Yu abi na koni fu dini?

„Taki wi abi nofo koni e kon fu Gado.” — 2 KORENTE SMA 3:5a.

1. Sortu sma a kresten gemeente no kan kobroiki?

YEHOVAH GADO nanga Yeises Krestes na wrokoman. Yeises ben taki fu disi: „Mi Tata tan wroko te now ete, èn mi e tan wroko” (Yohanes 5:17). Gado no e feni sma bun di e weigri fu wroko; so srefi a no e feni den sma bun di e suku frantiwortu fu kisi makti tapu trawan. A kresten gemeente no abi presi gi lesiman ofu sma di e suku wan wroko pe den e prakseri den srefi nomo.—Mateyus 20:25-27; 2 Tesalonika sma 3:10.

2. Fu san-ede now so wan bigi fanowdu de fu mansma fu tyari frantiwortu na ini a kresten gemeente?

² Yehovah Kotoigi abi ’furu fu du ini a wroko fu Masra’, spesrutu now di someni sma e lon go na „a bergi” fu na tru anbegi (1 Korente sma 15:58; Yesaya 2:2-4). Wan bigi fanowdu de fu mansma di abi koni na yeye fasi fu tyari frantiwortu na ini a gemeente. Fu di a no ambisi, pe yu e prakseri srefi nomo, e pusu den, meki den sortu man disi e hei Yehovah, no den srefi (Odo 8:13). Den sabi taki na Gado e yepi den fu kon koni gi gemeente wroko, neleki fa a meki den dinari fu a nyun frubontu kon abi nofo koni.’ — 2 Korente sma 3:4-6.

3. Te yu luku en na bigi, dan san na den frantiwortu fu owruman nanga dinari na ini a diniwroko?

³ Neleki na mindri den fositen kresten, na so ini a ten disi den e poti sma fu dini leki owruman nanga dinari na ini a diniwroko nanga yepi fu a santa yeye èn den seti fu Yehovah organisâsi (Tori fu den Apostru 20:28; Filipi sma 1:1; Titus 1:5). Owruman e wei na ipi fu Gado na yeye fasi, èn e hori ai a tapu sani fu kibri wi. Den dinari na ini a diniwroko, di a wroko fu den no abi fu du langalanga nanga a hori fu ai a tapu sani na yeye fasi, e asisteri den (1 Petrus 5:2; Teki gersi Tori fu den Apostru 6:1-6). Neleki a Manpikin fu Gado, di ben kon fu dini sma, na so den man disi di den poti fu du wroko wani fu dini konpe bribiman (Markus 10:45). Efu yu na wan kresten man, yu abi dan a yeye dati?

Markitiki gi ala tu grupu

4. Pe wi e feni spesrutu den markitiki gi den wan di kisi gemeente frantiwortu fu du?

⁴ Spesrutu na ini 1 Timoteyus 3:1-10, 12, 13 nanga Titus 1:5-9 na apostru Paulus ben taki finifini fu den markitiki gi den wan di kisi gemeente frantiwortu. Te wi e go luku den markitiki disi, di sonwan fu den de, èn gi owruman èn gi dinari ini a diniwroko, dan wi no musu luku den akruderi den markitiki fu grontapu. Na presi fu dati, wi musu si den leki fa sani ben de ini a fosi yarihondro èn leki markitiki di a pipri fu Yehovah kan kobroiki. Fu doro den markitiki disi no e aksi volmaaktifasi, noso den no ben sa feni nowan sma bun gi a wroko fu opziener ofu dinari ini a diniwroko (1 Yohanes 1:8). Ma efu yu na wan kresten man, awasi yu abi now gemeente wroko fu du ofu no, fu san-ede yu no e ondrosuku yu srefi fu si efu yu kan doro den markitiki?

5. San a wani taki fu de fri fu fowtu?

⁵ A no abi fasi fu kisi piri-ai; a abi wan bun nen na sma na dorosei; a de fri fu kragi (1 Timoteyus 3:2, 7, 8, 10; Titus 1:6, 7). Te den poti dinari ini a diniwroko nanga owruman na wroko, aladi den e dini, dan den no musu abi fasi fu kisi piri-ai, dati wani taki, fri fu takru nen èn sondro fu den de fanowdu fu a kisi piri-ai fu wan kragi di de nanga reti fu wan fowtu waka nanga libi èn leri. Kragi di no de tru fu na sei fu „falsi brada” ofu trawan, no e meki wan sma musu kisi piri-ai. Wan kragi di e meki taki den no feni wan sma bun fu dini na ini a gemeente, no musu de wan lawlaw sani, èn sma musu buweisi en ini akruderi nanga beibri markitiki (2 Korente sma 11:26; 1 Timoteyus 5:19). Wan sma di den poti fu du wroko na ini a gemeente leki owruman „musu abi so srefi wan bun nen na sma na dorosei, so taki a no tron wan syen èn fadon na ini wan trapu fu Didibri.” Efu wan man ben du wan seryusu sondu na ini a ten di psa, dan den ben sa kan poti en fu du wroko leki owruman ofu dinari soso, efu nanga yepi fu en libifasi a puru fu sensi a ten dati a syen dati èn ben meki wan bun nen gi en srefi.

6. San a wani taki fu de „a man fu wán wefi”?

⁶ Wan man fu wán wefi (1 Timoteyus 3:2, 12; Titus 1:6). Disi no wani taki taki soso man di trow kan tron dinari na ini a diniwroko èn owruman. Ma efu a trow, dan wan man musu abi wán wefi nomo di de na libi èn a musu de kotrow na en (Hebrew sma 13:4). Tra fasi leki fa a ben de nanga furu man fu a fosi yarihondro di no ben de kresten, dan a no kan abi moro leki wan uma.a

7. (a) A de na yari na skin fasi di e meki wan man bun fu de wan owruman? (b) San a wani taki fu teki fesi na wan tumusi bun fasi na ini wan osofamiri?

⁷ Na wan tumusi moi fasi e teki fesi ini en eigi osofamiri, nanga pikin di e saka den srefi na en ondro (1 Timoteyus 3:4, 5, 12; Titus 1:6). Son sma e denki taki owruman musu de moro pikinso 30 yari, ma a beibri no e poti wan yari di de a moro pikinsowan. Toku a sma musu handri leki wan owru man na yeye fasi. Dinari na ini a diniwroko èn owruman musu owru nofo fu kan abi pikin. Efu wan man trow, dan den no e feni en bun gi a wroko fu opziener efu a e handri leki wan sma di e dini Gado na wan tra presi, ma e rigeri èn e dwengi trawan na oso. A ben musu wini respeki, fu di a teki fesi ini en osofamiri akruderi beibri gronprakseri, èn a sani di a poti na prakseri musu de fu sani waka bun na yeye fasi nanga ibri memre fu a osofamiri. Na algemeen lin de, taki wan owruman di de wan papa musu abi mendriyari pikin di abi maniri èn di ’e bribi’. Ófu den e go na fesi fu gi den srefi abra na Gado ófu den teki dopu kba leki wan Kotoigi fu Yehovah. Wan man di no man bow bribi na ini en pikin, seiker no sa man fu du dati tu na ini trawan.

8. San wan edeman fu wan osofamiri musu leri bifo a tron wan owruman?

⁸ Bifo en man di abi wan osofamiri kan tron wan owruman di kan hori-ai a tapu yeye sani na ini a gemeente, dan a musu leri fa fu tyari en eigi osofamiri. „Efu wan man no sabi fa fu teki fesi na ini en eigi osofamiri, fa a sa kan sorgu dan gi a gemeente fu Gado?” (1 Timoteyus 3:5). A de tru, taki wan uma di no de na bribi kan kakafutu gi en man (Mateyus 10:36; Lukas 12:52). Ofu wan fu den pikin fu en kan du wan seryusu sondu, ala di den trawan e du en heri bun na yeye fasi. Ma, efu a man ben du ala san den kan fruwakti fu en, èn spesrutu efu a abi bun bakapisi na yeye fasi nanga trawan na ini en osofamiri, dan a trowe di wan memre fu a osofamiri e trowe na tumusi bun tiri fu en, no abi fu meki taki a no bun fu de wan dinari na ini a diniwroko ofu wan owruman.

9. Sortu forsektiki fasi wan owruman ofu dinari na ini a diniwroko musu sori na ini a tori fu sopi?

⁹ No wan drungu trobiman ofu e gi en srefi abra na furu win (1 Timoteyus 3:3, 8; Titus 1:7). Wan dinari na ini a diniwroko ofu wan owruman no mag dringi sopi psa marki. Te sma kon de wan srafu fu sopi dan dati kan meki taki den no man dwengi den prakseri nanga firi moro, san e meki drungu trobiman ofu feti kon. A no musu ’gi en srefi abra na furu win’ ofu abi a nen taki a de wan sma di gwenti dringi ofu de wan hebi dringiman (Odo 23:20, 21; 29-35). Fa a de wan sari sani efu wan herder fisiti ben sa lasi en moifasi fu di sopi dringi tumusi furu! Efu wan brada e dringi pikinso ete, dan a no musu du dati te a abi wan prati na den konmakandra, na a diniwroko ofu tra fasi fu santa dienst. — Leviticus 10:8-11; Eseikièl 44:21.

10. Fu san-ede den wan di lobi moni èn den wan di gridi fu kisi oneerlijk wini, no bun fu de wan owruman ofu dinari na ini a diniwroko?

¹⁰ A no musu de wan sma di lobi moni ofu gridi fu kisi oneerlijk wini (1 Timoteyus 3:3, 8; Titus 1:7). Sma di lobi moni de ini kofar na yeye fasi, èn „gridi sma” no sa kisi Gado Kownukondre. Fu dati-ede meki den sortu man dati no bun nofo fu de wan owruman ofu dinari na ini a diniwroko. (1 Korente sma 6:9, 10; 1 Timoteyus 6:9, 10). A rutu fu a wortu na ini grikitongo di poti abra nanga „oneerlijk”, wani taki trutru „syen” èn a wortu di poti abra nanga „wini” e sori go tapu ibri sortu fu wini ofu winimarki (Filipi sma 1:21; 3:4-8). A no de fu taki, taki wan man di en fasi fu denki èn firi e sori taki a ben sa handri den „skapu” fu Gado na wan oneerlijk fasi, no bun fu kisi gemeente frantiwortu (Eseikièl 34:7-10; Tori fu den Apostru 20:33-35; Yudas 16). A fanowdu fu de forsektiki fu rikomanderi wan sma e kon moro a fesi te wi e frustan taki wan man, di den poti kba leki owruman ofu dinari, kan kisi moni fu luku èn dan ben sa kan kon na ini a tesi fu fufuru pikinso fu a moni. — Yohanes 12:4-6.

11. Fu san-ede den no musu rikomanderi „wan sma di kon nyun ini bribi” fu kisi gemeente frantiwortu?

¹¹ No wan sma di kon nyun na bribi; di den tesi fu si efu a bun gi a wroko (1 Timoteyus 3:6, 10). Wan sma di no dopu langa ete no kisi a ten fu sori taki a o sorgu na wan kotrow fasi gi den wroko di a o kisi fu du. Kande a no e firi nanga den wan di abi en muilek ofu mankeri a koni di de fanowdu fu yepi konpe bribiman èn kande e si srefi trawan moro lagi. Fu dati-ede bifo den rikomanderi wan man leki wan dinari na ini a diniwroko èn spesrutu leki wan owruman, dan den musu „tesi fu si efu a bun gi a wroko” èn a musu gi buweisi taki a e krutu sani bun èn taki yu kan bow na en tapu. Wan fasti ten no e gi fu a tesi disi di den musu tesi en, èn sma de difrenti ini na esi di den e gro na yeye fasi. Ma owruman no musu rikomanderi wan nyun sma esi „so taki en ede no kon bigi fu heimemre èn a fadon go na ini a strafu di leisi gi Didibri.” Meki a man sori fosi a sakafasi leki fa Krestes ben sori.—Filipi sma 2:5-8.

Markitiki gi dinari na ini a diniwroko

12. A de so taki soso den dinari na ini a diniwroko musu doro den markitiki di poti gi den?

¹² Son markitiki poti gi dinari na ini a diniwroko. Ma efu owruman no sa doro den markitiki disi tu, dan den no ben sa bun fu dini leki owruman. Leki wan kresten man, yu abi den eigifasi disi?

13. San a wani taki fu de seryusu?

¹³ Seryusu (1 Timoteyus 3:8). Wan man di bun fu dini leki dinari na ini a diniwroko, no mag teki frantiwrotu lekti. A musu tyari en srefi na wán wartifasi di e wini respeki. Aladi a fiti fu meki spotu wanwan leisi, toku den no ben sa feni en bun efu doronomo a e meki grap.

14. (a) San a wani taki fu no de wan dobru tongo sma? (b) San de fanowdu fu abi wan krin konsensi?

¹⁴ A no musu de wan dobru tongo sma; e abi wan krin konsensi (1 Timoteyus 3:8, 9). Dinari na ini a diniwroko (nanga owruman) musu taki waarheid, den no musu de sma di e gongosa ofu di no de opregti ini san den e taki. Fu di den no de wan dobru tongo sma, meki den no musu abi hoigrifasi, e taigi a wan sma disi èn a tra sma a kontrari fu en (Odo 3:32; Yakobus 3:17). Den man disi musu de so srefi man di e horibaka loyaal gi a waarheid di tyari kon a krin, sma di e „kibri a santa kibritori fu a bribi nanga wan krin konsensi.” A konsensi fu so wan man musu gi kotoigi na fesi Gado taki a de opregti èn no e du wan sani bakabaka ofu no e du sani di no krin (Rome sma 9:1; 2 Korente sma 1:12; 4:2; 7:1). Nowan sma bun fu den poti en fu dini na ipi fu Gado efu a no e hori na a waarheid èn den markitiki fu Gado.

Wi o luku den markitiki fu owruman

15. Sortu markitiki wi e ondrosuku now, èn nanga san den abi spesrutu fu du?

¹⁵ Bepaalde markitiki abi fu du spesrutu nanga owruman, èn abi moro furu fu du nanga a wroko fu den leki herder nanga leriman. Yu doro den markitiki disi leki wan kresten man?

16. (a) San de fanowdu fu no du sani psa marki ini a tori fu gwenti? (b) Fa wan owruman kan hori a dwengi di a musu dwengi en srefi?

¹⁶ No musu du sani psa marki ini a tori fu gwenti; e dwengi en srefi (1 Timoteyus 3:2; Titus 1:8). Wan owruman no musu du sani psa marki, a no de wan srafu fu takru gwenti. Te tesi e miti en, dan Gado sa yepi en fu hori en balansi efu a e begi leki fa a psalmsingiman ben begi: „Den nowtu fu mi ati kon moro furu; ow puru mi fu den banawtu di de na mi tapu” (Psalm 25:17). Wan opziener musu begi so srefi fu kisi Gado yeye èn sori a froktu fu a yeye, pe yu abi na ini a dwengi di a musu dwengi en srefi (Lukas 11:13; Galasia sma 5:22, 23). Efu wan owruman e dwengi en fasi fu denki, fu taki nanga fu du sani dan dati e meki a kibri en srefi gi sani di de psa marki te a e tiri na gemeente na yeye fasi.

17. San de na ini a tori fu de gosontu na frustan?

¹⁷ Gosontu na frustan (1 Timoteyus 3:2). Wan owruman musu de frustandiki èn koni èn forsektiki. Den sani di a e taki èn du musu abi wan marki, èn nanga en frustan a musu tiri den. En sakafasi nanga balansifasi fu denki musu gron a tapu a koni fu Gado èn a tapu a gosontu leri fu a Wortu fu Yehovah, di a musu de wan fayafaya stukaman fu en. — Rome sma 12:3; Titus 2:1.

18. San a e aksi fu wan owruman fu de nanga orde fasi?

¹⁸ De nanga orde fasi (1 Timoteyus 3:2). A griki wortu di kobroiki dyaso na ini 1 Timoteyus 2:9 poti abra nanga „sani di seti bun”. Fu dati-ede wan owruman musu abi wan fasi fu libi di netjes èn pe sani orga bun. Fu eksenpre, a musu hori en srefi soifri na ten. Leki fa a sori, dan den fosi yarihondro kresten no ben poti furu krakti a tapu a meki fu rapport, èn wan opziener na ini a ten disi no abi fu de wan spesrutu sabiman fu boekhouden (skrifi moni afersi ini buku) ofu wan skrifiman. Dinari na ini a diniwroko ben sa kan sorgu gi den fanowdu sani ini a tori disi. Ma a griki wortu fu „de nanga orde” kan sori tapu wan bun fasi fu tyari yu srefi, èn seiker den no sa feni wan man bun fu de wan owruman efu a ben sa de trangayesi ofu sani fu en ben sa bruya. — 1 Tesalonika sma 5:14; 2 Tesalonika sma 3:6-12; Titus 1:10.

19. San wan owruman e du fu di a lobi fu teki sma na oso?

¹⁹ Lobi fu teki sma na oso (1 Timoteyus 3:2; Titus 1:8). Wan owruman „e waka na pasi fu lobi fu teki sma na oso” (Rome sma 12:13; Hebrew sma 13:2). A griki wortu gi „lobi fu teki sma na oso” wani taki trutru „lobi freimde sma srefisrefi.” Sobun, a owruman di lobi teki sma na oso e gi nyunwan wan switikon na den krestenkonmakandra, aladi a e sori a srefi belangstelling gi den pôtiwan neleki fa a e du dati gi den wan di abi en bun na skin fasi. A e sori a lobi fu teki sma na oso gi den wan di e waka lontu luku gemeente fu meki den belang fu a krestendom go na fesi èn e seni den go na pasi „na wan fasi di warti gi Gado” (3 Yohanes 5-8). Iya, wan owruman e sori a lobi fu teki sma na oso spesrutu gi konpe bribiman akruderi den fanowdu fu den èn leki fa den omstandigheid fu en e gi pasi fu dati. — Yakobus 2:14-17.

20. Na sortu fasi wan owruman musu man fu gi leri?

²⁰ Koni fu leri sma (1 Timoteyus 3:2). A man di wan owruman man fu gi leri na yeye fasi, no de a bakapisi fu a bun frustan di a abi ofu fu grontapu koni (1 Korente sma 2:1-5, 13). A e kon fu di a ’e hori steifi na a kotrow wortu di abi fu du nanga en koni [ofu: fasi] fu gi leri, so taki a kan frumane nanga yepi fu a gosontu leri èn kan gi den gensman so srefi piri-ai’ (Titus 1:9; Teki gersi Tori fu den Apostru 20:18-21, 26, 27). A musu man ’leri nanga safri-atifasi den wan di no abi wan bun yeyefasi’ (2 Timoteyus 2:23-26). Srefi efu wan owruman no de a moro bun publiki takiman na ini a gemeente, toku a musu de so wan bun stukaman fu a Wortu fu Gado, taki a de koni nofo fu gi leri èn rai na bribiman, di e studeri a beibri tu (2 Korente sma 11:6). A musu abi a koni fu gi „gosontu leri” di e yepi osofamiri nanga aparti sma fu du muiti fu libi wan libi fu gi den srefi ini a dini fu Gado. —  Titus 2:1-10.

21. (a) Fu san-ede wi kan taki taki wan owruman ’no e naki’? (b) San a wani taki fu de redelijk? (c) San a wani taki „no lobi feti”?

²¹ No de wan sma di e naki, ma de redelijk, no lobi feti (1 Timoteyus 3:3; Titus 1:7). Leki wan sma di lobi vrede, dan wan owruman no e naki sma na skin fasi, noso e frede den nanga skenpi wortu ofu wortu di e ati yu firi (Teki gersi 2 Korente sma 11:20). (Den sani di ben taki a fesi taki a „no de wan drungu trobiman” e sori taki a e kibri en srefi gi a kobroiki fu sopi psa marki di furutron e tyari feti kon.) Fu di a de redelijk” (ofu „e gi sma leti; e fiti en srefi”), èn no e prei basi ofu de muilek fu trawan plisi en, meki a no e meki problema fu pikin sani (1 Korente sma 9:12; Filipi sma 4:5; 1 Petrus 2:18). Fu di wan owruman no lobi feti, ofu meki trobi, meki a e kibri en srefi gi trobi èn a „no e firi fu kisi atibron.” — Titus 3:2; Yakobus 1:19, 20.

22. Tapu san a e sori taki wan owruman no musu de nanga tranga-ede?

²² A no de nanga tranga-ede (Titus 1:7). Disi wani taki trutru „no e plisi en srefi” (Teki gersi 2 Petrus 2:10). Wan owruman no musu de so, taki a no e frudrage tra sma denki, ma a musu abi wan sakafasi luku a tapu den koni di a abi. A no musu denki taki a e du sani moro bun moro ala tra sma, ma nanga sakafasi a e teki prati nanga trawan ini frantiwortu èn e warderi furu raiman. — Numeri 11:26-29; Odo 11:14; Rome sma 12:3, 16.

23. (a) Fa yu ben sa fruteri san a wani taki fu de „wan sma di lobi bunfasi”? (b) San a wani taki fu de regtfardiki?

²³ Wan sma di lobi bunfasi; regtfardiki (Titus 1:8). Fu kan de wan owruman, wan man musu lobi bunfasi èn musu de regtfardiki. Wan sma di lobi bunfasi e lobi san bun na ini den ai fu Yehovah, a e du sani di e sori switifasi èn di e yepi sma, èn a e sori warderi gi a bunfasi fu trawan (Lukas 6:35; Teki gersi Tori fu den Apostru 9:36, 39; 1 Timoteyus 5:9, 10). Fu de regtfardiki wani taki fu fiti yu srefi na den weti nanga markitiki fu Gado. Wantu fu den de, taki so wan man no e teki sma partèi èn a e hori na prakseri san de regtfardiki, soifri nanga bun (Lukas 1:6; Filipi sma 4:8, 9; Yakobus 2:1-9). Fu di bun bunfasi e difrenti fu regtfardikifasi ini a fasi disi, taki a e go moro fara leki san retidu e aksi, meki wan sma di lobi bunfasi e du moro gi tra sma leki san den e aksi fu en. — Mateyus 20:4, 13-15; Rome sma 5:7.

24. San de fanowdu fu de loyaal?

²⁴ Loyaal (Titus 1:8). Wan man di den feni bun fu de wan owruman e gi en srefi na ini a dini fu Gado sondro fu kan broko dati èn a e hori tranga na a weti fu Gado, awasi fa sani e tesi en soifri retifasi. A e du san Yehovah e fruwakti fu en èn disi abi so srefi na ini en fu wroko leki wan kotrow Kownukondre preikiman. — Mateyus 24:14; Lukas 1:74, 75; Tori fu den Apostru 5:29; 1 Tesalonika sma 2:10.

Doro den markitiki

25. Fu taki en leti, suma musu doro den markitiki di wi taki di dyonsro fu den, èn fa den kan kisi den eigifasi disi?

²⁵ A moro bigi pisi fu den markitiki di wi taki di dyonsro fu den, abi fu du nanga sani di den e aksi fu ibri Kotoigi fu Yehovah, èn di ibriwan sma ben sa kan kweki nanga yepi fu a blesi fu Gado na tapu en studi, muiti, bun demakandra nanga begi. Aparti sma kan de moro tranga leki trawan na ini son eigifasi. Ma dinari na ini a diniwroko nanga owruman musu doro na wan redelijk fasi ala markitiki gi a spesrutu grani fu den.

26. Fu san-ede kresten man e poti den srefi klariklari fu kisi gemeente frantiwortu?

²⁶ Ala Kotoigi fu Yehovah musu abi na winsi fu du ala san den kan ini a wroko fu Gado. A yeye disi e pusu kresten man fu poti den srefi klariklari gi gemeente frantiwortu. Yu de wan man di gi yu srefi abra èn teki dopu? Efu dati de so, suku dan fu kisi a wroko fu wan opziener ofu dinari ini a diniwroko èn du ala muiti fu kisi na koni fu kan dini!

[Foetoewortoe]

San yu ben sa piki?

◻ Fu san-ede wan bigi fanowdu de fu man di dopu fu teki gemeente frantiwortu na den tapu?

◻ San na wantu markitiki di dinari na ini a diniwroko musu doro?

◻ San na wantu markitiki gi owruman?

◻ Fu san-ede wan owruman musu sabi fa fu teki fesi bun na ini en osofamiri?

◻ San e pusu kresten man fu poti den srefi klariklari fu kisi wroko na ini a gemeente?

[Prenki na tapoe bladzijde 16]

Owruman nanga dinari ini na diniwroko musu teki fesi na ini den osofamiri akruderi beibri gronprakseri