Papa nanga owroeman — Den e teki ala toe ròl na den tapoe
„Foe di, efoe wan man no sabi fa foe tiri en eigi osofamiri, dan fa a sa sorgoe gi a gemeente foe Gado?” — 1 TIMOTEUS 3:5.
1, 2. (a) Fa opziener di no ben trow èn opziener di ben trow èn di no ben abi pikin, ben man dini den brada foe den na ini a fosi jarihondro? (b) Fa Akwila nanga Priskila na wan eksempre gi foeroe trowpaar na ini a ten disi?
OPZIENER na ini a fosi kresten gemeente ben kan de man di no ben trow noso trowman sondro pikin noso man di trow èn di ben abi wan osofamiri nanga pikin. Sondro tweifri, son wan foe den kresten dati ben man waka baka a rai di na apostel Paulus ben gi na ini en fosi brifi gi den Korentesma, kapitel 7, èn den no ben trow. Jesus ben taki: „Joe abi eunuch di meki densrefi kon tron eunuch foe a boen foe a kownoekondre foe hemel” (Mateus 19:12). Den sortoe man di no ben trow, leki Paulus èn kande wan toe foe den kompe di ben rèis makandra nanga en, ben o fri foe teki waka foe go jepi den brada foe den.
2 Bijbel no e taki efoe Barnabas, Markus, Silas, Lukas, Timoteus, nanga Titus ben de man di no ben trow. Efoe den ben trow, dan a de krin taki den ben fri nofo foe den osofamiri frantiwortoe foe den foe man teki foeroe waka foe go na den difrenti toewijzing (Tori foe den Apostel 13:2; 15:39-41; 2 Korentesma 8:16, 17; 2 Timoteus 4:9-11; Titus 1:5). Kande den wefi foe den ben go makandra nanga den, neleki Petrus nanga „den tra apostel”, di soleki fa a sori, ben teki den wefi nanga den te den ben go na difrenti presi (1 Korentesma 9:5). Akwila nanga Priskila na wan eksempre foe wan trowpaar di ben de klariklari foe froisi go na tra presi, foe di den ben go nanga Paulus foe Korente na Efeise, èn baka dati na Rome, èn ben kon baka na Efeise. Bijbel no e taki efoe den ben abi pikin. A gi di den ben gi densrefi na a diniwroko di den ben doe gi den brada foe den, ben meki taki „ala den gemeente foe den nâsi” ben de nanga tangi (Romesma 16:3-5; Tori foe den Apostel 18:2, 18; 2 Timoteus 4:19). Na ini a ten disi, sondro tweifri joe abi foeroe trowpaar di, leki Akwila nanga Priskila ben kan dini tra gemeente, kande foe di den ben froisi go na presi pe a nowtoe de moro bigi.
Papa nanga owroeman
3. San e sori taki foeroe owroeman foe a fosi jarihondro ben de trowman di ben abi osofamiri?
3 A ben sa gersi so taki na ini a fosi jarihondro G.T., a moro bigi pisi foe den kresten owroeman ben de trowman ben abi pikin. Di Paulus ben taki foe den markitiki di de fanowdoe gi wan man di „e soekoe foe kisi wan wroko leki opziener”, dan a ben taki dati so wan kresten moesoe de „wan man di e tiri en eigi osofamiri na wan toemoesi boen fasi, di abi pikin di saka densrefi na en ondro nanga ala serjoesoe fasi”. — 1 Timoteus 3:1, 4.
4. San den ben aksi foe owroeman di ben trow èn di ben abi pikin?
4 Soleki fa wi si, dan wan opziener no ben de froeplekti foe abi pikin, noso foe trow srefi. Ma te wan kresten ben trow, èn efoe a ben wani kon bekwaam foe de wan owroeman noso wan dinari ini a diniwroko, dan a ben moesoe man doe en wroko leki edeman foe en wefi na wan joisti fasi èn nanga lobi-ati èn sori taki a ben man hori den pikin foe en na en ondro na wan joisti fasi (1 Korentesma 11:3; 1 Timoteus 3:12, 13). Efoe wan serjoesoe swakifasi ben de ini a tiri di wan brada ben e tiri en osofamiri, dan dati ben o meki taki a no ben sa de bekwaam foe kisi spesroetoe grani ini a gemeente. Foe san ede? Paulus e tjari kon na krin: „Efoe wan man no sabi fa foe tiri en eigi osofamiri, dan fa a sa sorgoe gi a gemeente foe Gado?” (1 Timoteus 3:5) Efoe en eigi osofamiri no ben wani saka densrefi na ondro a tiri foe en, dan san trawan ben o doe?
„Abi pikin di de na bribi”
5, 6. (a) Foe sortoe markitiki ini a tori foe pikin, Paulus ben taki nanga Titus? (b) San den e froewakti foe owroeman di abi pikin?
5 Di Paulus ben leri Titus foe poti opziener na wroko na den gemeente foe Kreta, dan a ben taki: „Efoe wan sma no abi wan kragi teige en, wan masra foe wán wefi, a abi pikin di de na bribi èn di sma no ben man kragi foe wan jajolibi ede noso di no ben trangajesi. Bika opziener leki a sma di e teki presi gi Gado no moesoe abi wan kragi teige en.” Ma san a markitiki „abi pikin di de na bribi”, wani taki? — Titus 1:6, 7.
6 Den wortoe „pikin di de na bribi” e sori go na jongoe sma di gi den libi abra na Jehovah kaba èn di teki dopoe, noso na jongoe pikin di e go na fesi foe kan gi densrefi abra èn teki dopoe. Den memre foe wan gemeente e froewakti taki den pikin foe owroeman moro foeroe moesoe abi boen maniri èn e gi jesi. A moesoe de krin foe si taki wan owroeman e doe ala san a man foe bow a bribi foe den pikin foe en. Kownoe Salomo ben skrifi: „Leri wan boi akroederi a pasi foe en; srefi te a kon owroe, a no sa drai baka foe en” (Odo 22:6). Ma san efoe wan jongoewan di kisi so wan leri e weigri foe dini Jehovah noso e doe wan takroe sondoe srefi?
7. (a) Foe san ede a de krin taki Odo 22:6 no e taki foe wan reglementi di no man kenki? (b) Foe san ede wan owroeman no sa lasi den grani foe en so, efoe a pikin foe en no e bosroiti foe dini Jehovah?
7 A de krin, taki na odo di kari dja na tapoesei no e taki foe wan strak reglementi. A no e skoifi a gronprakseri foe a friwani na wan sei (Deuteronomium 30:15, 16, 19). Te wan manpikin noso wan oemapikin e doro a jari taki a man teki frantiwortoe, dan ensrefi moesoe teki wan bosroiti di abi foe doe nanga a gi di wan sma e gi ensrefi abra èn nanga a teki foe dopoe. Efoe a de krin taki wan owroeman gi a jepi na jejefasi, a tiri, nanga a tranga leri di de fanowdoe, èn tokoe a jongoewan no e bosroiti foe dini Jehovah, dan dati foe ensrefi no wani taki dati a papa no de bekwaam foe dini leki opziener. Na a tra sei, efoe wan owroeman abi wan toe jongoe pikin di e libi na oso èn di, a wan baka a trawan, e kon siki na jejefasi èn e kon ini problema, dan den no moesoe si na owroeman moro leki „wan man di e tiri en eigi osofamiri na wan toemoesi boen fasi” (1 Timoteus 3:4). A prenspari sani de, taki sma moesoe man si taki wan opziener e doe ala san a man foe abi ’pikin di de na bribi èn di sma no ben man kragi foe wan jajolibi ede noso di no ben trangajesi’.a
Te wan man trow nanga wan „wefi di no de na bribi”
8. Fa wan owroeman moesoe handri nanga en wefi di no de na bribi?
8 Paulus ben skrifi foe kresten man di ben trow nanga wefi di no de na bribi: „Efoe wan brada abi wan wefi di no de na bribi, èn tokoe a [wefi] e agri foe libi nanga en, dan a [brada] no moesoe gowe libi en . . . Bika . . . a wefi di no de na bribi kon santa foe a brada ede; noso, den pikin foe oenoe no ben o krin, ma now den de santa. Bika, . . . masra, fa joe sabi efoe joe sa froeloesoe joe wefi?” (1 Korentesma 7:12-14, 16) Djaso den wortoe „no de na bribi” no e sori go na wan wefi di no abi wan bribi, ma na wan oema di no gi ensrefi abra na Jehovah. A ben kan de wan djoe, noso wan sma di ben bribi na ini heiden gado. Na ini a ten disi, a ben sa kan taki wan owroeman trow nanga wan oema di abi wan tra relisi, di de wan agnostis-sma, noso di de wan atheistsma srefi. Efoe a wefi wani tan nanga en, dan a brada no moesoe gowe libi en soso foe di a e bribi tra sani. A moesoe ’tan libi nanga en akroederi sabi, e gi en grani leki na wan moro swaki prapi, na oemasma fasi’, èn e libi nanga a howpoe foe man froeloesoe en. — 1 Petrus 3:7; Kolosesma 3:19.
9. San wan owroeman moesoe doe na kondre pe a wet e gi a masra so srefi a wefi a reti foe meki den pikin foe den kon sabi den relisi bribi foe ala toe sma, èn fa disi sa abi krakti na tapoe den grani foe en?
9 Efoe wan opziener abi pikin, dan na wan joisti fasi a sa doe en wroko leki edeman di de masra nanga papa di e kweki den „ini a tranga leri èn serjoesoe froemane foe Jehovah” (Efeisesma 6:4). Na foeroe kondre, a wet e gi ala toe trowpatna a reti foe gi den pikin foe den leri na relisi sei. Te disi de so, dan a wefi kan aksi foe teki a reti di a abi foe meki den pikin kon sabi den relisi bribi nanga doe foe en, san kan wani taki toe dati a e teki den go na a kerki foe en.b A no de foe taki, dati den pikin moesoe waka baka a konsensi foe den di kisi tiri foe bijbel, te den no wani teki prati na gwenti foe falsi relisi. Leki osofamiri edeman, a papa sa teki a reti di ensrefi abi foe studeri nanga den pikin foe en èn teki den go na den konmakandra na a Kownoekondre zaal te dati kan. Te den doro a jari taki den kan teki den eigi bosroiti, dan den sa bosroiti foe densrefi, sortoe pasi den sa waka (Josua 24:15). Efoe den kompe owroeman foe en nanga den memre foe a gemeente kan si taki a e doe ala san a wet e gi en pasi foe doe foe gi den pikin foe en leri na wan joisti fasi ini a pasi foe waarheid, dan a sa de bekwaam leki wan opziener.
’Tiri en osofamiri na wan boen fasi’
10. San na en moro prenspari plekti efoe wan man di abi wan osofamiri de wan owroeman?
10 Srefi gi wan owroeman di de wan papa èn di en wefi na wan kompe kresten, a no de wan makriki wroko foe prati en ten nanga en prakseri na mindri en wefi, pikin, nanga gemeente frantiwortoe na wan joisti fasi. Den Boekoe foe bijbel e sori krin taki wan kresten papa abi wan froeplekti foe sorgoe gi en wefi nanga pikin. Paulus ben skrifi: „Ija, efoe wan sma no e sorgoe gi den sma foe en, èn spesroetoe gi den wan di de memre foe en osofamiri, dan a drai en baka gi a bribi èn a moro takroe leki wan sma sondro bribi” (1 Timoteus 5:8). Na ini a srefi brifi dati, Paulus ben taki dati soso trowman, di sori kaba taki den de boen masra nanga papa, den moesoe rikomanderi leki opziener. — 1 Timoteus 3:1-5.
11. (a) Na sortoe fasi wan owroeman moesoe „sorgoe gi den sma foe en”? (b) Na sortoe fasi disi kan jepi wan owroeman foe doe den gemeente frantiwortoe foe en?
11 Wan owroeman no moesoe „sorgoe” gi den sma foe en na materia sei nomo, ma na jejefasi èn na emotioneel sei toe. A koni kownoe Salomo ben skrifi: „Sreka joe wroko dorosei foe joe oso èn kaba en gi joesrefi tapoe a pranigron. Baka dati joe moesoe bow joe osofamiri toe” (Odo 24:27). So boen, ala di wan opziener e sorgoe gi den sani di en wefi nanga pikin abi fanowdoe na materia sei, na emotioneel sei èn tapoe a kontren foe ontspanning, a moesoe bow den toe na jejefasi. Disi e teki ten — ten di a no sa man gi na gemeente afersi. Ma a de ten di kan tjari foeroe wini kon ini a tori foe a kolokoe nanga a jejefasi foe na osofamiri. Te nanga langa, efoe en osofamiri tranga na jejefasi, dan kande na owroeman no abi foe gi so foeroe ten foe loesoe osofamiri problema. Disi sa gi en moro okasi foe sorgoe gi gemeente afersi. Na eksempre di a e gi leki wan boen masra èn wan boen papa sa tjari boen na jejefasi kon gi a gemeente. — 1 Petrus 5:1-3.
12. Na ini sortoe osofamiri afersi, papa di de owroeman, moesoe gi wan boen eksempre?
12 Te wan sma wani tiri wan osofamiri na wan boen fasi, dan dati wani taki toe dati a moesoe poti ten na wan sei foe tiri wan osofamiri studie. A de spesroetoe prenspari taki owroeman e gi wan boen eksempre dja, foe di boen osofamiri abi boen gemeente leki bakapisi. Wan opziener no moesoe gebroiki so foeroe ten doronomo gi tra grani ini a diniwroko, taki a no abi ten foe studeri nanga en wefi nanga den pikin. Efoe disi de so, dan a moesoe loekoe en schema baka. Kande a moesoe meki wan tra schema baka noso poeroe pikinso foe a ten di a e gi na tra afersi, èn son tron a no moesoe teki son grani srefi.
Tiri na wan balansi fasi
13, 14. Sortoe rai „a getrow èn koni srafoe” gi owroeman di abi wan osofamiri?
13 A no now taki rai e gi foe meki frantiwortoe foe na osofamiri nanga a gemeente de ini balansi. Foeroe jari langa „a getrow èn koni srafoe” gi owroeman rai tapoe a kontren foe na afersi disi (Mateus 24:45). Moro leki 37 jari pasa kaba, The Watchtower foe 15 september 1959, bladzijde 553 nanga 554, ben gi leki rai: „Troetroe, a no de so taki wi moesoe hori ala den sani disi di e aksi ten foe wi, na ini balansi? Na ini a balansi disi, joe moesoe poti a joisti prakseri na tapoe den afersi foe joe eigi osofamiri. Seiker Jehovah Gado no ben sa froewakti foe wan man taki a e gebroiki ala en ten gi wroko ini a gemeente, èn taki a e jepi en brada nanga den sma na en sei foe kisi froeloesoe, èn tokoe a no e sorgoe gi a froeloesoe foe en eigi osofamiri. A wefi nanga den pikin foe wan man na wan prenspari frantiwortoe.”
14 A Waktitoren foe 1 november 1986, bladzijde 7 ben gi leki rai: „Te osofamiri e teki prati na a velddienst, dan joe sa kon moro krosibé na makandra, ma tokoe den aparti fanowdoe foe pikin e aksi wan investering foe joe privé ten èn emotionele energie. Èn foe dat’ede meki balansifasi de fanowdoe foe bepaal omeni ten joe kan gebroiki gi wroko ini a gemeente sondro foe misi ini den jeje, emotioneel nanga skin sorgoe foe ’den wan di de foe joe’. Wan kresten moe ’leri fosi foe sori ini [en] égi osofamiri a gi di joe e gi joesrefi ini a dini foe Gado’ (1 Timóteus 5:4, 8)”.
15. Foe san ede wan owroeman di abi wan wefi nanga pikin, abi koni nanga a koni foe man si sani krin fanowdoe?
15 Wan odo foe bijbel e taki: „Koni sa bow wan osofamiri, èn nanga a koni foe man si sani krin a sa sori taki a tanapoe steifi” (Odo 24:3). Ija, te wan opziener wani doe en theokrasia plekti èn na a srefi joeroe wani bow en osofamiri, dan seiker a abi koni nanga a koni foe man si sani krin, fanowdoe. Soleki fa bijbel e taki en, dan a abi moro leki wan kontren foe hori ai tapoe sani. Den frantiwortoe na ini en osofamiri èn na ini a gemeente de ini a tori. A abi a koni foe man si sani krin fanowdoe foe kan hori wan balansi na mindri den frantiwortoe disi (Filipisma 1:9, 10). A abi koni fanowdoe foe bosroiti sortoe sani a moesoe poti na a fosi presi (Odo 2:10, 11). Ma omeni toe a e firi ensrefi frantiwortoe foe sorgoe gi den grani di a abi na ini a gemeente, tokoe a moesoe froestan taki a moro prenspari frantiwortoe di a kisi foe Gado leki wan masra nanga papa na a sorgoe nanga a froeloesoe foe en osofamiri.
Boen papa èn boen owroeman toe
16. Sortoe wini wan owroeman abi te a de wan papa toe?
16 Wan owroeman di abi pikin nanga boen maniri kan de wan troetroe wini. Efoe a leri foe sorgoe boen gi en osofamiri, dan a man jepi tra osofamiri na ini a gemeente. A e froestan den problema foe den moro boen èn a kan gi rai di e sori en eigi ondrofeni. Kolokoe taki doesoendoesoen owroeman na heri grontapoe e doe en heri boen leki masra, papa, nanga opziener.
17. (a) San wan man di de owroeman nanga papa no moesoe frigiti noiti? (b) Fa tra memre foe a gemeente moesoe sori taki den abi troetroe firi gi trawan?
17 Efoe wan man di abi wan osofamiri wani de wan owroeman, dan a moesoe de wan lepi kresten di, ala di a e sorgoe gi en wefi nanga pikin, kan orga en afersi so taki a man gi ten na trawan na ini a gemeente èn teki notisi foe den. Noiti a moesoe frigiti taki en herder wroko e bigin na oso. Te memre foe a gemeente sabi, taki owroeman di abi wan wefi nanga pikin abi a frantiwortoe foe na osofamiri foe den, so srefi den plekti ini a gemeente toe, dan den sa proeberi foe no teki toemoesi foeroe foe den ten. Foe eksempre, wan owroeman di abi pikin di moesoe go na skoro a tra mamanten, no kan tan langa ala ten baka konmakandra di e hori te neti. Tra memre foe a gemeente moesoe froestan disi èn moesoe sori taki den abi troetroe firi gi trawan. — Filipisma 4:5.
Wi moesoe lobi den owroeman foe wi
18, 19. (a) San wi ben man froestan di wi loekoe 1 Korentesma kapitel 7? (b) Fa wi moesoe si den sortoe kresten man dati?
18 Foe di wi loekoe kapitel 7 foe a fosi brifi di Paulus ben seni go na den Korentesma, meki wi ben man si taki foeroe mansma di no trow de di, bika den e waka baka a rai foe Paulus, e gebroiki a fri foe den foe dini Kownoekondre afersi. Joe abi doesoendoesoen brada toe di trow èn di no abi pikin di, ala di den e teki notisi foe a wefi foe den, wan sani di a abi reti na tapoe; den e dini leki toemoesi boen opziener na ini distrikt, kring, gemeente, nanga bijkantoro foe a Waktitoren Genootschap, èn den wefi foe den e horibaka gi den na wan fasi di de foe prèise. Te foe kaba, na ini den pikinmoro 80.000 gemeente foe Jehovah en pipel, joe abi foeroe papa di no e sorgoe na wan lobi-ati fasi gi den wefi nanga pikin nomo, ma di e teki ten toe foe dini den brada foe den leki lobi-ati herder. — Tori foe den Apostel 20:28.
19 Na apostel Paulus ben skrifi: „Meki den owroeman di e tiri na wan boen fasi, de warti foe kisi dobroe grani, spesroetoe den wan di e wroko tranga foe taki èn foe gi leri” (1 Timoteus 5:17). Ija, owroeman di e tiri na wan boen fasi na ini den oso èn na ini a gemeente, warti foe kisi a lobi nanga a lespeki foe wi. Foe troe wi moesoe „tan lobi den sortoe man dati”. — Filipisma 2:29.
[Foetoewortoe]
a Loekoe De Wachttoren foe 15 januari 1979, bladzijde 30, 31.
b Loekoe The Watchtower foe 1 december 1960, bladzijde 735-736.
Foe loekoe sani sjatoe baka
◻ Fa wi sabi taki foeroe owroeman na ini a fosi jarihondro G.T. ben abi wan osofamiri?
◻ San den e aksi foe owroeman di trow èn di abi pikin, èn foe san ede?
◻ San a wani taki foe abi „pikin di de na bribi”, ma san efoe wan pikin foe wan owroeman no e bosroiti foe dini Jehovah?
◻ Tapoe sortoe kontren wan owroeman moesoe „sorgoe gi den sma foe en”?
[Prenki na tapoe bladzijde 30]
Boen osofamiri abi boen gemeente leki bakapisi