Leri brada fu teki frantwortu na den tapu
„Ibri sma di kisi trutru bun leri o de leki en leriman.”—LUK. 6:40.
1. Di Yesus ben e du en diniwroko na grontapu, fa a leri den disipel fu en fu du a preikiwroko?
NA A kaba fu a tori di na apostel Yohanes skrifi fu a libi fu Yesus, a taki: „Fu taki en leti, Yesus du furu sani tu. Ma efu sma ben o skrifi den finifini, mi denki taki presi no ben o de fu man hori ala den bukulolo disi” (Yoh. 21:25). Yesus ben du en diniwroko fayafaya na ini a syatu pisi ten di a ben de na grontapu. Na ini a pisi ten dati, a ben musu suku mansma di a ben musu leri fu du en wroko te a ben drai go na hemel baka. Na ini a yari 33 a leri wan pikin grupu fu du en wroko, ma esi-esi a grupu disi tron wan bigi gemeente di ben abi dusundusun preikiman.—Tori 2:41, 42; 4:4; 6:7.
2, 3. (a) Fu san ede moro brada de fanowdu fu teki fesi na ini na organisâsi? (b) San wi o luku na ini na artikel disi?
2 Na ini a ten disi yu abi moro leki seibi milyun Kownukondre preikiman na ini moro leki 100.000 gemeente na heri grontapu. Dati meki moro nanga moro mansma de fanowdu fu teki fesi na ini na organisâsi. Fu eksempre, Kresten owruman de fanowdu trutru. Wi e prèise den brada di e meki muiti fu kisi a grani disi, fu di den „e suku fu du wan tumusi bun wroko”.—1 Tim. 3:1.
3 Ma wan tu sani de di wan brada musu du fu man kisi frantwortu na ini a gemeente. A no soso te wan brada kisi skoroleri, te a abi ondrofeni, noso te a man du son spesrutu sani, dan a man kisi den frantwortu disi. Fu man kisi den frantwortu disi, a moro prenspari taki en libi e kruderi nanga san Bijbel e taki fu brada di e teki fesi na ini a gemeente. Fa brada kan kisi yepi fu teki frantwortu na den tapu? Yesus taki: „Ibri sma di kisi trutru bun leri o de leki en leriman” (Luk. 6:40). Na ini na artikel disi wi o luku wan tu fasi fa a Moro Bun Leriman Yesus Krestes yepi den disipel fu en fu teki moro frantwortu na den tapu. Wi o luku tu san wi kan leri fu dati.
„Mi kari unu mi mati”
4. Fa Yesus sori taki a ben de wan trutru mati fu den disipel fu en?
4 Yesus ben e si den disipel fu en leki en mati, a no ben denki taki den lagi moro en. A ben de furu nanga den, a ben e frutrow den, èn a ben taigi den ’ala den sani di a yere fu en Tata’. (Leisi Yohanes 15:15.) Yu kan frustan taki den ben breiti di Yesus gi den piki di den aksi en: „O ten den sani disi o pasa, san o de a marki taki yu kon èn taki a kaba fu a grontapu disi de krosibei?” (Mat. 24:3, 4) A ben fruteri den tu san a ben e denki èn fa a ben e firi. Fu eksempre, na a neti di den ben o tori Yesus, a meki Petrus, Yakobus, nanga Yohanes go nanga en na a dyari fu Getseimanei pe a ben e begi fayafaya fu di sani ben e moro en. A kan taki den dri disipel no yere san a taki na ini a begi, ma den ben frustan taki a ben hebi gi en trutru (Mark. 14:33-38). Prakseri tu fa den dri apostel disi ben musu fu firi di den si wan leisi taki Yesus „kenki kon de wan heri tra fasi” (Mark. 9:2-8; 2 Petr. 1:16-18). Fu di Yesus nanga den disipel fu en ben de bunbun mati, meki den ben abi a krakti fu go doro nanga a prenspari wroko di den ben musu du.
5. Fa owruman kan sori taki den wani yepi trawan?
5 Neleki Yesus, den Kresten owruman na ini a ten disi e tron mati fu trawan èn den e yepi den. Den e tron bunbun mati fu den tra brada nanga sisa èn den e teki ten fu leri sabi den moro bun. A tru taki son sani de di den owruman no kan fruteri trawan, ma disi no wani taki dati den no e taigi den noti. Den owruman e frutrow den brada nanga sisa fu den èn te den feni wan moi sani na ini Bijbel, den e fruteri trawan dati. Noiti den e si den dinari ini a diniwroko leki sma di lagi moro den, awinsi den dinari moro yongu. Na presi fu dati, den e frustan taki srefi den yongu dinari na mansma di go na fesi na ini a tru bribi èn di e tan meki muiti fu du moro. Den owruman sabi taki den yongu man disi lobi Yehovah èn taki den e wroko makandra nanga den fu sorgu gi a gemeente.
„Mi gi unu na eksempre”
6, 7. Fruteri fa Yesus ben de wan eksempre gi den disipel fu en. Fa dati yepi den bakaten?
6 Den disipel fu Yesus ben lobi Gado Wortu, ma son leisi a fasi fa den kweki èn a presi pe den gro kon bigi ben meki taki den ben abi tra denki (Mat. 19:9, 10; Luk. 9:46-48; Yoh. 4:27). Ma toku Yesus no krutu nanga den èn en ati no ben e bron nanga den. A no ben dwengi den tu fu du sani di den no ben o man du èn a no ben e taigi den fu du sani di ensrefi no ben e du. Na presi fu dati, Yesus ben sori den fa fu du sani.—Leisi Yohanes 13:15.
7 Sortu eksempre Yesus gi den disipel fu en? (1 Petr. 2:21) A ben sorgu taki a ben abi soso den sani di de fanowdu trutru na ini a libi, so taki a ben man gebroiki moro furu fu en ten fu preiki gi trawan (Luk. 9:58). Yesus ben e leri sma san a leri fu Yehovah èn a no ben e leri den san ensrefi ben e denki (Yoh. 5:19; 17:14, 17). A ben abi switifasi èn sma no ben e frede fu taki nanga en. Ala san a du ben de fu di a abi lobi (Mat. 19:13-15; Yoh. 15:12). Na eksempre fu Yesus yepi den apostel furu bakaten. Fu eksempre, a yepi Yakobus fu abi deki-ati èn fu dini Gado teleki den kiri en (Tori 12:1, 2). Na eksempre fu Yesus yepi Yohanes tu fu tan dini Gado moro leki 60 yari.—Openb. 1:1, 2, 9.
8. Sortu eksempre den owruman de gi den yongu brada nanga trawan?
8 Owruman kan de bun eksempre gi yongu brada tu te den e sori sakafasi nanga lobi èn te den e gebroiki den ten nanga krakti fu yepi trawan (1 Petr. 5:2, 3). Boiti dati, den owruman di abi wan tranga bribi, di e gi bun leri, di e libi leki trutru Kresten, èn di de fayafaya preikiman breiti te den e si fa den tra brada e teki na eksempre fu den.—Hebr. 13:7.
Yesus taigi den disipel san fu du, dan a seni den go preiki
9. Fa wi du sabi taki Yesus leri den disipel fu en fu du a preikiwroko?
9 Baka di Yesus preiki fayafaya sowan tu yari langa, a seni den 12 apostel fu en fu go preiki tu. Ma fosi a seni den, a taigi den san den ben musu du (Mat. 10:5-14). Di a ben o du wan wondru fu gi dusundusun sma nyanyan, a fruteri den fa den ben musu seti den sma na ini grupu so taki den ben kan nyan (Luk. 9:12-17). A no de fu taki dati di Yesus ben e gi den disipel leri, a ben e taigi den krin san den ben musu du èn fa den ben musu du dati. Fu di Yesus ben gi den apostel bun leri èn fu di den ben kisi yepi fu a santa yeye, meki den ben man seti sani fu du a bigi preikiwroko di den du na ini a yari 33 èn baka dati.
10, 11. Fa owruman kan leri tra brada fu yepi na ini a gemeente?
10 Na ini a ten disi a wroko fu gi wan mansma leri, e bigin te a bigin studeri Bijbel. Kande wi musu yepi en fu leisi bun. Wi e yepi en go doro te wi tan studeri nanga en. Te a e bigin go na den Kresten konmakandra, a o go na fesi so taki a kan go na a Theokrasia Diniwroko Skoro, a kan tron wan preikiman di no dopu ete èn a kan du tra sani tu. Baka te a dopu, a leriwroko e go doro. Fu eksempre, kande den brada o leri en fu du wroko fu sorgu a Kownukondre zaal. Baka wan pisi ten den brada kan yepi en fu si san a musu du fu tron wan dinari ini a diniwroko.
11 Te den owruman gi wan brada a frantwortu fu du wan sani na ini a gemeente, dan den wani yepi en fu du a sani dati bun. Fu dati ede den e fruteri en fa tra brada gwenti du a sani disi na ini den gemeente èn den e sori en krin san a musu du. A brada di e teki leri musu frustan san den owruman e fruwakti fu en. Efu a sani muilek gi en fu du, dan den owruman no musu prakseri wantewante taki a no man du san den aksi en. Na presi fu dati den e fruteri en ete wan leisi na wan switi fasi san a musu du èn fa a musu du dati. Te den owruman e si fa den tra brada e du muiti fu du san den taki èn te den e si fa den brada e prisiri fu di den e yepi trawan, dan den srefi e breiti tu.—Tori 20:35.
„A sma di e arki rai na wan koni sma”
12. Fu san ede a rai di Yesus gi den disipel fu en ben de bun rai?
12 Di Yesus ben e gi den disipel fu en leri, a gi den rai tu na a yoisti ten. Fu eksempre, a piri-ai gi Yakobus nanga Yohanes di den ben wani taki faya komoto fu hemel fu bron son Samariasma di no ben wani Yesus drape (Luk. 9:52-55). Di a mama fu Yakobus nanga Yohanes go na Yesus fu aksi en efu a ben kan gi den manpikin fu en wan hei posisi na ini en Kownukondre, Yesus taigi den tu brada langalanga: „A no mi musu taki suma kan go sidon na mi reti-anusei èn suma kan go sidon na mi kruktu-anusei. Na mi Tata sreka a presi dati gi suma a wani” (Mat. 20:20-23). Ala ten Yesus ben gi den krin rai di ben kan yepi den fu sabi san fu du na ini difrenti situwâsi èn ala ten den rai fu en ben komoto fu Gado Wortu. A leri den disipel fu en fu denki na so wan fasi taki den ben o du sani di e kruderi nanga Gado Wortu (Mat. 17:24-27). Yesus ben hori na prakseri tu taki den bakaman fu en no ben man du ala sani èn a no ben fruwakti taki den no ben o meki fowtu. A ben gi den rai fu di a ben lobi den.—Yoh. 13:1.
13, 14. (a) Suma abi rai fanowdu? (b) Gi eksempre fu rai di wan owruman kan gi wan brada so taki a kan go na fesi.
13 Ibri mansma di e du muiti fu kisi frantwortu na ini a Kresten gemeente musu kisi Bijbel rai ten na ten. Odo 12:15 e taki: „A sma di e arki rai na wan koni sma.” Wan yongu brada taki: „A moro muilek sani gi mi ben de taki mi ben e firi leki mi no bun nofo fu teki frantwortu na mi tapu. Ma wan owruman yepi mi fu si sani na a yoisti fasi.”
14 Efu den owruman si taki wan brada e du wan sani di e tapu en fu go na fesi, den musu go na en wantewante èn den musu gi en rai na wan safri-ati fasi (Gal. 6:1). Son tron wan brada musu kisi rai fu di a abi wan denki noso fasi di no bun. Fu eksempre, efu a gersi leki wan brada e kibri skin, dan fu yepi en wan owruman kan sori en taki Yesus ben de wan fayafaya Kownukondre preikiman di taigi den bakaman fu en taki den musu meki sma tron disipel (Mat. 28:19, 20; Luk. 8:1). Efu a gersi leki wan brada wani de moro prenspari leki trawan, wan owruman kan sori en fa Yesus yepi den disipel fu en fu frustan omeni problema kan kon te wan sma e suku fu de moro prenspari leki trawan (Luk. 22:24-27). Fa a de te wan brada no wani gi trawan pardon? A kan de wan bigi yepi gi en te den owruman taki nanga en fu na agersitori fu a srafu di no ben wani gi wan trawan pardon, aladi den ben gi en pardon (Mat. 18:21-35). Te wan sma musu kisi rai, a moro bun te den owruman no e draidrai fu du dati.—Leisi Odo 27:9.
„Oefen yusrefi”
15. Fa wan brada en osofamiri kan horibaka gi en so taki a kan yepi trawan?
15 Den owruman e teki fesi fu yepi den brada fu go na fesi, ma tra sma kan horibaka gi den tu. Fu eksempre, wan brada en wefi nanga den pikin fu en kan yepi en fu go na fesi èn den musu du dati tu. Efu a brada de wan owruman kaba, den kan horibaka gi en aladi a e wroko tranga na ini a gemeente. Den e frustan taki a musu gi pikinso fu en ten nanga krakti fu yepi trawan. A e gi en prisiri te a e si taki en osofamiri e frustan taki a no man de nanga den ala ten efu a wani du en wroko bun na ini a gemeente. Wi e warderi en trutru taki den osofamiri fu owruman de klariklari fu du disi.—Odo 15:20; 31:10, 23.
16. (a) Na suma a didon efu wan brada wani abi frantwortu na ini a gemeente? (b) Fa wan man kan du muiti fu kisi frantwortu na ini a gemeente?
16 Aladi a de so taki tra sma kan yepi wan brada èn horibaka gi en, toku a didon na a brada srefi efu a wani tyari frantwortu na ini a gemeente. (Leisi Galasiasma 6:5.) A no de fu taki dati wan brada no abi fu de wan dinari ini a diniwroko noso wan owruman fu man yepi trawan èn fu de wan fayafaya preikiman. Ma efu a wani tron wan dinari noso wan owruman na ini a gemeente, dan a musu tyari ensrefi soleki fa Bijbel e taki dati wan owruman noso dinari musu tyari ensrefi (1 Tim. 3:1-13; Tit. 1:5-9; 1 Petr. 5:1-3). Sobun, efu wan brada wani tron wan dinari noso wan owruman, ma den owruman no meki en tron dati ete, dan a musu go luku efu wan sani de ete di a musu du fu go na fesi. San kan yepi en? A musu leisi èn studeri Bijbel doronomo, a musu denki dipi fu san a leri, a musu begi nanga en heri ati èn a musu de wan fayafaya preikiman. Te a e du disi, dan ensrefi e teki a rai di Paulus gi Timoteyus: „Oefen yusrefi fu dini Gado fayafaya.”—1 Tim. 4:7.
17, 18. San wan dopu brada kan du efu a e denki taki a no bun nofo fu teki frantwortu na en tapu, noso efu a no e firi fu du dati?
17 Ma fa a de dan te wan man no wani du muiti fu go na fesi fu di a e denki taki a no bun nofo fu tyari frantwortu? A ben o bun efu a hori na prakseri omeni Yehovah Gado nanga Yesus Krestes du gi wi. Iya, Yehovah „e tyari a lai fu wi ala dei” (Ps. 68:19). Sobun, wi hemel Tata kan yepi wan brada fu tyari frantwortu na ini a gemeente. A bun tu te wan brada di no de wan dinari noso wan owruman, e hori na prakseri taki furu lepi brada de fanowdu fu teki fesi na ini na organisâsi fu Gado. A bun tu te a e begi Yehovah fu gi en santa yeye di kan yepi en fu dwengi ensrefi èn fu no bruya. Te a e prakseri den sani disi, dan a no o denki moro taki a no bun nofo (Luk. 11:13; Gal. 5:22, 23). Wi kan de seiker taki Yehovah o blesi den brada di wani teki frantwortu na den tapu.
18 Kande wan dopu brada no e firi fu teki frantwortu na en tapu. San kan yepi en? Na apostel Paulus skrifi: „Na Gado e wroko na ini unu. Èn na En e gi unu a wani nanga a krakti fu du den sani san e gi En prisiri” (Fil. 2:13, Nyun Testamenti). Sobun, na Gado e meki taki wan sma wani go na fesi èn a yeye fu Yehovah kan gi en krakti fu teki frantwortu na en tapu (Fil. 4:13). Boiti dati, wan Kresten kan begi Gado fu yepi en fu du san bun.—Ps. 25:4, 5.
19. Bijbel e taki dati Yehovah o ’seni seibi skapuman, iya, a o seni aiti libisma di o tiri leki granman’. San disi wani taki?
19 Yehovah e blesi den owruman di e meki muiti fu leri trawan fu teki frantwortu na den tapu. A e blesi den wan tu di e teki a leri dati èn di e du muiti fu teki frantwortu na den tapu na ini a gemeente. Wi kan de seiker taki a pipel fu Gado o abi nofo brada fu teki fesi na ini den gemeente, bika Bijbel e taki dati Yehovah o ’seni seibi skapuman, iya, a o seni aiti libisma di o tiri leki granman’ (Mika 5:5). Na ini a ten disi furu brada di abi sakafasi èn di wani teki frantwortu na den tapu e kisi leri fu teki fesi na ini den gemeente. Disi e gi Yehovah grani èn wi e kisi furu blesi tu.
San yu ben sa piki?
• Fa Yesus yepi den disipel fu en fu teki moro frantwortu na den tapu?
• Fa owruman kan de neleki Yesus te den e yepi brada fu teki fesi na ini a gemeente?
• Fa wan brada en osofamiri kan yepi en fu teki frantwortu na en tapu?
• Sortu muiti wan brada srefi kan du efu a wani teki frantwortu na en tapu?
[Prenki na tapu bladzijde 31]
Sortu leri yu kan gi yu Bijbelstudie efu a wani go na fesi?
[Prenki na tapu bladzijde 32]
Fa brada kan sori taki den wani teki frantwortu na den tapu na ini den gemeente?