Yongu brada, unu e suku fu kisi frantwortu na ini a gemeente?
1. O ten wan yongu brada musu bigin du san skrifi na ini 1 Timoteyus 3:1?
1 „Efu wan man e suku fu tron wan sma di e teki fesi na ini a gemeente, dan a e suku fu du wan tumusi bun wroko” (1 Tim. 3:1). Den wortu disi di skrifi nanga Gado santa yeye e gi brada deki-ati fu suku fu kisi frantwortu na ini a gemeente. Yu musu de wan bigisma fosi yu du dati? A moro bun te yu e bigin yonguyongu kaba fu suku frantwortu na ini a gemeente. Na a fasi disi yu kan kisi leri èn sori taki yu fiti fu tron wan dinari ini a diniwroko te yu kon moro owru (1 Tim. 3:10). Efu yu na wan yongu dopu brada, dan san yu kan du fu kisi frantwortu na ini a gemeente?
2. San yu kan du fu abi a lobi fu yepi trawan, èn fa yu kan sori dati?
2 Lobi fu gi yepi: Hori na prakseri taki yu e suku fu kisi wan frantwortu noso wan wroko na ini a gemeente, a no wan titel. Fu dati ede, leri fu lobi yepi yu brada nanga sisa. Wan fasi fa yu kan du disi na te yu e denki dipi fu a bun eksempre fu Yesus (Mat. 20:28; Yoh. 4:6, 7; 13:4, 5). Aksi Yehovah meki a yepi yu fu broko yu ede nanga tra sma (1 Kor. 10:24). Yu man yepi den owruwan noso den sikiwan na ini yu gemeente? Yu de klariklari fu yepi krin a dyari, den toilet noso den fensre fu a Kownukondre zaal, noso wan tra sani fu meki a zaal tan krin? Yu kan yepi fu hori wan lezing na a Theokrasia Diniwroko-skoro te wan sma no man hori en lezing? Yu o si taki efu yu e gi yusrefi fu yepi trawan, dan dati sa meki yu firi koloku.—Tori 20:35.
3. O prenspari a de fu de wan lepi Kresten, èn fa wi kan tron wan lepi Kresten?
3 Wan lepi Kresten: A de moro prenspari gi wan futuboi na ini a gemeente taki a de wan lepi Kresten, na presi taki a sabi fa fu du wan spesrutu wroko heri bun. Wan lepi brada e pruberi fu si sani soleki fa Yehovah nanga Yesus e si den (1 Kor. 2:15, 16). A e sori taki a abi ’den fasi fu a yeye’ (Gal. 5:22, 23). A de wan fayafaya preikiman di e poti Kownukondre afersi na a fosi presi na ini en libi (Mat. 6:33). Yu kan kisi den fasi di wan lepi Kresten musu abi, te yu abi a gwenti fu studeri. Disi wani taki dati yu musu leisi Bijbel ibri dei, leisi ibri Waktitoren nanga Ontwaakt!, sreka èn go na den gemeente konmakandra (Ps. 1:1, 2; Hebr. 10:24, 25). Di Paulus ben gi Timoteyus deki-ati fu gro tron wan lepi Kresten, dan Paulus ben skrifi: „Tan poti prakseri na . . . den sani di yu e leri sma” (1 Tim. 4:15, 16). Sobun, du tranga muiti fu sreka den lezing di yu abi na a Theokrasia Diniwroko-skoro. Sreka yusrefi gi a diniwroko, èn abi a gwenti fu preiki. Abi a marki fu du moro na ini a diniwroko, soleki pionierwroko, Betel wroko, noso fu go na a Bijbelskoro gi brada di no trow. Te yu de wan lepi Kresten, dan dati o yepi yu fu „wai pasi gi den lostu di yongu sma abi”.—2 Tim. 2:22.
4. Fu san ede a bun taki wan brada di e suku fu kisi frantwortu musu de fu frutrow èn fu san ede a musu du en wroko bun?
4 De fu frutrow èn du yu wroko bun: Den brada di ben abi a wroko fu prati nyanyan gi den pôti Kresten na ini a fosi yarihondro, ben de man „di abi wan bun nen” fu di den ben de fu frutrow èn den ben du den wroko bun. Dati meki den apostel no ben abi fu broko den ede efu den brada dati ben o du a wroko bun. Disi ben gi den apostel na okasi fu poti prakseri na tra prenspari sani (Tori 6:1-4). Fu dati ede, te yu kisi wan wroko fu du na ini a gemeente, dan yu musu du ala san yu man fu du a wroko bun. De neleki Noa di ben du ala sani di Yehovah ben taigi en fu bow na ark (Gen. 6:22). Yehovah lobi te wan sma e du en wroko bun èn disi e sori taki a sma na wan lepi Kresten.—1 Kor. 4:2; luku a faki di nen „Fu san ede a bun fu leri den brada”.
5. Fu san ede yongu brada musu suku fu kisi frantwortu na ini a gemeente?
5 Soleki fa Bijbel ben taki na fesi, dan Yehovah ben o meki moro nanga moro sma kon na ini na organisâsi fu en (Yes. 60:22). Ibri yari sowan 250.000 sma e teki dopu. Fu di so furu nyun sma e tron Kotoigi fu Yehovah, meki wi abi moro lepi brada fanowdu fu teki frantwortu na ini a gemeente. Nownow moro wroko de fu du gi Yehovah, moro leki iniwan ten na fesi (1 Kor. 15:58). Un yongu brada, unu e suku fu du moro na ini a gemeente? Efu yu e du dati, dan yu e suku fu du wan tumusi bun wroko!
[Prenspari pisi na tapu bladzijde 3]
Fu di so furu nyun sma e tron Kotoigi fu Yehovah, meki wi abi moro lepi brada fanowdu fu teki frantwortu na ini a gemeente
[Faki na tapu bladzijde 3]
Fu san ede a bun fu leri den brada
A bun te owruman e gi yongu brada wroko fu du èn te den e leri den fa fu du a wroko. Na a kaba fu wan konmakandra, wan kring-opziener ben e sidon nanga wan preikiman na fesi a podium fu gi en deki-ati. A si wan yongu boi e tanapu krosibei fu den èn a aksi a boi efu a ben e wakti fu taki nanga en. A yongu brada piki en taki a kisi a wroko fu krin a podium baka ibri konmakandra. En papa nanga mama ben sreka kaba fu gowe, ma a boi no ben wani gowe fosi a du a wroko fu en. A kring-opziener no ben si en leki wan problema fu skoifi gi a boi. A kring-opziener skrifi: „Den owruman fu a gemeente dati ben abi a gwenti fu gi yongu brada leri fu di den e gi den wroko fu du na ini a gemeente. Fu dati ede mi no ben e fruwondru te den ben wani poti wan yongu brada leki dinari ini a diniwroko te mi de na ini a gemeente.”