Meki muiti fu du moro na ini wi diniwroko
1 Na apostel Paulus ben gi Kresten a rai fu waka na tapu a pasi fu Gado èn fu „tan waka nanga moro faya” (1 Tes. 4:1). San disi wani taki gi wi? A wani taki dati wi musu tan suku fasi fu meki muiti fu du moro na ini a diniwroko. Iya, wi musu meki muiti fu ’du a diniwroko fu wi dorodoro.’—2 Tim. 4:5.
2 Fu san ede wi musu du moro: Wi sa meki muiti fu du moro na ini wi diniwroko, fu di wi e angri fu dini wi Mekiman dorodoro. Wi wani kisi wan moro bun matifasi nanga Gado, èn wi e suku fasi fu du wi diniwroko moro bun. Te wi abi a gwenti fu du wi diniwroko na wan bun fasi, èn te wi sabi fu san ede wi e du dati, dan dati sa yepi wi fu doro marki na ini a diniwroko fu Gado.—Ps. 1:1, 2; Fil. 4:6; Hebr. 10:24, 25.
3 Te wi e meki muiti fu du moro na ini wi diniwroko, dan wi musu kon kisi a gwenti fu gi wisrefi. Wi kan kisi a gwenti disi, te wi aksi Yehovah na ini begi fu yepi wi frustan a moi eksempre fu Yesus (Mat. 20:28). Yesus kisi furu prisiri fu di a dini trawan di a ben du en diniwroko (Tori. 20:35). Wi kan teki na eksempre fu Yesus fu di wi e sori taki wi e broko wi ede nanga trawan, èn fu di wi e du moro na ini a diniwroko te wi kisi na okasi fu du dati.—Yes. 6:8.
4 San papa nanga mama kan du: Te pikin yongu ete, papa nanga mama kan leri den fu kisi na angri fu yepi trawan èn fu du moro na ini a diniwroko. Yonguwan sa si fa den memre fu na osofamiri de fayafaya èn fa den meki tranga muiti fu du moro na ini a diniwroko fu den. Wan brada ben kisi deki-ati fu du moro na ini a diniwroko di a ben yongu ete, fu di a ben wroko makandra nanga en granpapa na ini a diniwroko. Fu di a ben si fa en granpapa ben de fayafaya èn fa dati ben gi en prisiri, meki a ben suku okasi fu dini den brada nanga sisa. Now a de wan dinari ini a diniwroko.
5 Moro brada de fanowdu: ’Efu wan sma e suku fu du moro na ini a diniwroko, dan a e suku fu du wan tumusi bun wroko’ (1 Tim. 3:1). Den wortu disi e gi brada deki-ati fu doro den marki fu tyari moro frantwortu na ini Yehovah en organisâsi. A no de fanowdu fu abi spesrutu koni fu man du dati. Wan brada di wani tyari moro frantwortu musu tan suku a Kownukondre fosi, èn a musu de fayafaya na ini a diniwroko (Mat. 6:33; 2 Tim. 4:5). A sa meki muiti fu de wan bun eksempre gi trawan.
6 Na heri grontapu: Yehovah e tyari sma kon na ini en organisâsi èn a e meki a sani dati pasa moro gaw na ini a ten disi (Yes. 60:22). A de tumusi prenspari taki ala sma di e teki na eksempre fu Yesus, e du a diniwroko fu den moro bun. A raportu fu a dienstyari 2006 e sori taki 248.327 sma na heri grontapu ben teki dopu. Disi na sowan 680 nyunwan di teki dopu ibri dei! Meki wi alamala suku fasi fu du wi diniwroko dorodoro.