Fasi fu Du Moro na ini Yu Diniwroko
1 Moro leki 40 yari pasa, wan artikel nanga a nen: „¿Yu E Du Ala San Yu Man?” ben kon na ini The Watchtower fu 15 yanuari 1955. Na artikel ben sori na wan lobi-ati fasi fa iniwan sma fu a pipel fu Yehovah kan meki a prati di a abi na a diniwroko kon moro bun, so taki a kan meki a Kownukondre wroko fu en kon moro furu. Wi kan fiti a bun rai dati na ini a ten disi tu, ala di wi e go doro fu meki sani kon moro bun srefi.
2 A moro bigi komando di de, musu buweigi wi fu du ala wi diniwroko: „Yu musu lobi Yehovah, yu Gado, nanga yu heri ati èn nanga yu heri sili èn nanga yu heri frustan èn nanga ala yu krakti” (Mark. 12:30). Wi e sori taki wi lobi Yehovah dorodoro fu di wi e gebroiki ala den okasi di wi abi fu meki a Kownukondre wroko fu en go na fesi. Luku den sani di e kon now èn di yu kan gebroiki fu du moro na ini yu diniwroko.
3 Tyari Yu Frantiwortu: Brada di gi densrefi abra na Yehovah kan du muiti fu doro den markitiki fu kon tron wan dinari ini a diniwroko èn go na fesi dan fu dini leki owruman. Den artikel: „¿Yu e suku fu kisi a wroko fu wan opziener?” nanga „¿Yu abi na koni fu dini?” na ini A Waktitoren fu 1 september 1990, buweigi furu brada fu gi densrefi na gemeente frantiwortu. Aksi den owruman na ini yu gemeente spesrutu rai fa yu kan du moro èn fa yu kan doro den markitiki.
4 Owruman nanga dinari ini a diniwroko di no trow e kisi wan kari fu denki seryusu fu gi den nen gi a Bedinari Skoro. Yu kan kon sabi moro fu a skoro disi fu di yu e leisi den sani di e sori go na a „Bedinari Skoro” na ini den Index van Wachttoren-publikaties 1986-1995 nanga 1996. ¿Yu e si a „bigi doro [dati] di e tyari go na aktiviteit” e opo gi yu? (1 Kor. 16:9a) Furu brada di ben meki bun gebroiki fu a doro disi di e tyari go na aktiviteit, noiti ben denki fu ala den grani fu diniwroko di den ben sa kan kisi baka di den ben klari a skoro. Now den e prisiri fu dini na Bethel noso na ini a veld leki spesrutu pionier, zendeling noso kringopziener.
5 Du Muiti fu Du a Furuten Diniwroko: Yonguwan di e kisi den diploma fu heiskoro, oso-wefi, èn iniwan sma di de nanga pensyun kaba, musu denki seryusu fu a pionierwroko. Luku na inlegvel fu Wi Kownukondre Dienst fu yuli 1998, èn taki baka dati nanga pionier di ben abi den srefi situwâsi leki den wan di yu abi na ini yu eigi libi. Kande a sa buweigi yu fu du moro na ini yu diniwroko fu di yu e du a pionierwroko, leki fa den e du dati (1 Kor. 11:1). Yu ben sa man meki yu aktiviteit kon moro furu fu di yu e wroko 70 yuru wan mun èn na so fasi e dini leki wan gewoon pionier?
6 Moro leki 17.000 brada nanga sisa e dini now na ini Bijkantoro nanga Betheloso na heri grontapu. Wi Kownukondre Dienst fu maart 1995 e taki san de fanowdu fu kan gi yu nen gi so wan diniwroko. Fu san ede yu no e leisi na inlegvel dati èn luku efu yu na wan sma di abi a bekwaamfasi fu na aparti grani fu Bethel diniwroko?
7 Dini Pe Moro Yepi De Fanowdu: ¿Yu e libi na wan presi pe den e wroko a gebied furutron, noso pe furu brada de fu du a wroko? ¿Yu denki fu meki yu diniwroko kon moro furu fu di yu e froisi go na wan presi pe den abi moro yepi fanowdu? Kande yu kan froisi go na wan krosibei boitipresi pe den abi moro wrokoman fanowdu (Mat. 9:37, 38). Yu no musu du disi sondro fu denki fu en na fesi. Yu musu denki fu en na ondro begi (Luk. 14:28-30). Taki fu a situwâsi fu yu nanga den owruman èn nanga a kringopziener. Den sa taki-go-taki-kon nanga yu fu si efu a de wan koni sani fu froisi now, noso fu sreka sani fu du dati na wan tra ten ini a tamara. Efu yu wani skrifi go na a Genootschap fu den gi yu rai pe yu ben sa kan froisi go, dan wan brifi di a Dienst Komte fu yu gemeente poti den nen na ondro musu seni go makandra nanga a brifi fu yu.
8 Meki a Kwaliteit fu Yu Diniwroko Kon Moro Bun: Soleki fa a sori, wi alamala kan du moro na ini a diniwroko fu di wi e meki a kwaliteit fu wi velddienst kon moro bun. ¿Yu abi wan prati na ala den fasi fu a wroko, di abi na ini na oso fu oso preikiwroko nanga a gi fu okasi kotoigi, èn so srefi a go di yu e go baka na sma èn a bijbelstudie wroko? Efu yu e hori wan studie, dan yu kan meki a koni di yu abi fu gi leri kon moro bun? A ben sa bun efu yu ben sa luku Wi Kownukondre Dienst fu yuni 1996 fu kisi rai di yu kan gebroiki fu buweigi den studenti fu yu fu den gi densrefi abra na Gado èn teki dopu.
9 Na ini kapitel 9 fu Georganiseerd om onze bediening te volbrengen den e taki moro fara fa wi kan du moro na ini wi diniwroko èn fa wi kan meki en kon moro bun. A no de fu taki, dati wi alamala musu wani du someni leki wi kan na ini a diniwroko fu Gado. Fu san ede yu no e go denki seryusu fu den sani di yu seti leki marki na yeye fasi? Du soleki 1 Timoteus 4:15 e rikomanderi: „Denki dipi fu den san disi, teki den krinkrin na ini yu, so taki ala [sma] kan si taki yu e go na fesi.”