Yu Wani Du Moro?
1 Yesus ben agersi a Kownukondre nanga tumusi warti gudu (Mat. 13:44-46). A wroko di wi abi fu prati a Kownukondre nyunsu na wan warti gudu tu. A diniwroko disi musu kisi a fosi presi na ini wi libi. Dati musu de so, srefi te a de fanowdu fu tapu wisrefi pikinso fu du san wi ben sa wani, soso fu kan abi wan prati dorodoro na dati (Mat. 6: 19-21). Yu wani du moro na ini a Kownukondre diniwroko?
2 Prakseri den Prenspari Sani Disi: Difrenti sani de fanowdu so taki wisrefi kan du moro furu na ini a diniwroko: (1) wi musu abi wan fasti bosroiti fu poti Kownukondre afersi na a fosi presi na ini wi libi (Mat. 6:33); (2) wi musu sori bribi èn musu frutrow na tapu Yehovah (2 Kor. 4:1, 7); (3) wi musu suku a yepi fu Gado fu di wi e begi opregti èn doronomo (Luk. 11:8-10); (4) wi musu du san wi ben pramisi èn wi musu handri akruderi den begi fu wi.—Yak. 2:14, 17.
3 Fasi fa Wi Kan Du Moro na ini Wi Diniwroko: Wi alamala kan poti a prenspari marki na wi fesi fu abi wan prati doronomo na a diniwroko ibri mun. Ma yu prakseri tu fa yu kan gebroiki ibri momenti fu du okasi preiki? Noso fa yu kan meki muiti fu meki a pristeri fu yu abi moro krakti tapu sma? Yu e meki muiti fu abi moro bun bakapisi na den gobaka fu yu, èn yu e pruberi fu hori oso-bijbelstudie di e go na fesi? Yu ben sa man dini kande leki wan yepi-pionier noso gewoon pionier noso na wan kontren pe moro yepi de fanowdu? Kande yu na wan dopu brada. Yu ben sa kan meki a muiti fu doro den markitiki di poti fu de wan dinari ini a diniwroko noso wan owruman? (1 Tim. 3:1, 10) Yu ben sa man du moro na ini yu diniwroko fu di yu e aksi fu du Bethel wroko, fu go na a Dinari Skoro noso fu kisi leri na a Gileadskoro fu tron wan zendeling?—Luk. 10:2.
4 Wan brada di ben abi wan furuten wroko èn di ben e gi furu ten na sport, ben kisi a deki-ati fu tron wan gewoon pionier. A ben bigin nanga a yepi-pionierwroko èn baka dati a seti sani na so wan fasi taki a ben man fu go na ini a furuten diniwroko. Baka ten a go na a Dinari Skoro èn dati ben yepi en fu teki sreka gi a wroko di a kisi now fu dini leki wan kringopziener. A breiti srefisrefi taki a ben du moro fu di a ben kisi a deki-ati fu du dati. A abi na overtoigi taki a abi moro prisiri fu di a ben teki a bosroiti fu du moro na ini a Kownukondre diniwroko.
5 Yehovah e blesi den wan di e pristeri densrefi fu du moro (Yes. 6:8). No meki noti tapu yu fu du moro na ini yu diniwroko èn fu kisi moro bigi prisiri nanga kowru-ati srefi.