Meki a goedoe foe a Kownoekondre diniwroko foe joe kon moro foeroe
1 Jesus ben agersi a Kownoekondre howpoe nanga wan goedoe di joe no man pai (Mat. 13:44-46). Wi de neleki den man ini den agersitori foe Jesus, di ben seri ala den sani di den ben abi foe bai wan sani foe moro bigi waarde? Efoe dati de so, dan wi sa poti afersi foe Gado Kownoekondre na a fosi presi, ala di a kan abi na ini toe, taki sani no sa waka fa wi wani èn taki wi sa moesoe drai baka gi wisrefi. — Mat. 6:19-22.
2 Foe di wi Kownoekondre diniwroko na wan goedoe, dan wi moesoe angri foe meki a kon moro foeroe. San den sani di wi e doe ini wi persoonlijk libi e sori? Wi e meki den Kownoekondre aktiviteit foe wi kon moro foeroe? Wi kan doe disi, foe di wi abi wan prati na ini den difrenti fasi foe a diniwroko, san abi na ini toe na oso-foe-oso wroko, a tjari di wi e tjari gobaka, a hori di wi e hori bijbelstudie, nanga a gi di wi e gi okasi kotoigi.
3 ’Fa mi kan meki a prati di mi abi, kon moro foeroe?’: Nanga a bigin foe wan njoen diniwroko jari, a de wan boen sani gi ibriwan foe loekoe baka na den persoonlijk aktiviteit foe en, foe si san a ben kan doe foe gi moro ten ini a velddienst èn aksi ensrefi: ’Mi kan seti den afersi foe mi, so taki mi kan gi mi nen foe doe jepi-pionierwroko gi wan pisi ten noso foe doe dati doronomo? Efoe mi seti wan toe sani tra fasi, dan mi ben kan bigin nanga a gewoon pionierwroko?’ Den njoen pionier di gi den nen foe bigin 1 september, abi na okasi foe go na a pionier skoro di sa hori tra jari.
4 Son preikiman poti wan marki gi densrefi foe doe moro okasi kotoigi. Foeroetron na aktiviteit disi e gi kefarlek boen froktoe. Trawan kan firi taki den moesoe kon moro boen ini a tjari di den e tjari gobaka nanga boen bakapisi, noso foe bigin wan njoen bijbelstudie.
5 Efoe wi e kon na a bosroiti taki wi skotoe ini wi diniwroko na a wán noso tra fasi, dan san wi kan doe foe meki a kon moro foeroe? Den wan di ben doro moro hei marki nanga boen bakapisi, e gi a rai foe teki a fasti bosroiti foe poti Kownoekondre afersi na a fosi presi, a no abi trobi omeni a o kostoe den (Mat. 6:33). Bribi nanga a froetrow di joe e froetrow dorodoro na tapoe Jehovah, de fanowdoe (2 Kor. 4:7). Soekoe a jepi foe Jehovah nanga jepi foe opregti begi èn nanga a hori di joe e hori doro na ini begi (Luk. 11:8, 9). Wi kan de seiker taki Jehovah sa blesi den opregti moeiti di wi e doe foe meki a prati di wi abi ini a diniwroko foe en kon moro foeroe. — 1 Joh. 5:14.
6 Joe moesoe taki nanga tra brada nanga sisa di meki a diniwroko foe den kon moro foeroe nanga boen bakapisi. Aksi den fa den ben man kakafoetoe gi problema sondro foe den lasi ati. Den ondrofenitori foe den, kan de joisti a sani di joe abi fanowdoe foe gi joe na overtoigi, taki a meki di joe e meki joe diniwroko kon moro foeroe, a no wan sani di joe no kan doro.
7 Te joe e leisi den artikel ini A Waktitoren noso Wi Kownoekondre Dienst, di e taki foe a velddienst, go prakseri ondro begi fa joe kan fiti den rai di gi, na ini joe diniwroko. Doe a srefi sani, te joe e fisiti den konmakandra noso den kongres. Den rai di gi na ini na artikel disi abi den gron na tapoe wan takimakandra di ben de wan pisi foe a kringkonmakandra-programa foe a jari di pasa. A de a fosi wan foe wan groepoe artikel di ben meki foe jepi wi foe waka baka a deki-ati di a programa disi ben gi èn foe fiti den deki-ati disi di gi, na ini wi aladei libi.
8 Jesus ben si a diniwroko foe en leki wan serjoesoe afersi, foe di a ben meki en a fosi sani nanga san a ben broko en ede. A ben froeklari: „Mi njanjan de foe mi doe a wani foe a wan di ben seni mi kon” (Joh. 4:34). Wi e firi a srefi fasi toe? Efoe dati de so, dan a no abi misi taki wi sa feni fasi foe meki den aktiviteit foe wi kon moro foeroe èn prati „den boen sani” foe den goedoe foe wi, nanga trawan. — Mat. 12:35; Luk. 6:45.