Aksi foe leisiman
Wi ben kan taki dati a moro njoen fasi fa wi kon froestan a wortoe „geslakti” na ini Mateus 24:34 no so langa pasa ete, e gi a prakseri taki a kaba foe a seti foe sani ben kan skoifi go na wan ten di de fara na ini a tamara?
Dati no de so kwetikweti. Kontrari foe dati, a froestan di wi kon froestan a tori disi moro betre paspas, moesoe jepi wi foe tan froewakti a kaba doronomo. Fa so?
We, soleki fa A Waktitoren foe 1 november 1995 ben tjari kon na krin, dan Jesus ben gebroiki den wortoe „a geslakti disi” gi godelowsoe sma di e libi na ini a srefi ten (Mateus 11:7, 16-19; 12:39, 45; 17:14-17; Tori foe den Apostel 2:5, 6, 14, 40). A no ben taki foe wan fasti pisi ten di ben o bigin nanga wan spesroetoe datum.
Foe taki en leti, „Aksi foe leisiman” na ini a srefi uitgave dati foe A Waktitoren ben poti prakseri na tapoe toe prenspari sani: „Wi no kan si wan geslakti foe sma leki wan pisi ten di abi wan fasti nomroe foe jari” èn „Den sma foe wan geslakti e libi wan sjatoe pisi ten te joe teki disi gersi tra ten.”
Nofotron wi e gebroiki „geslakti” na a fasi disi. Foe eksempre, wi ben sa kan taki: ’Den sroedati foe a geslakti foe Napoleon no ben sabi noti foe opolani nanga atoombom.’ Wi ben sa taki nomo foe den sroedati di ben gebore na ini a srefi jari leki Napoleon? Wi ben sa taki foe den Fransi sroedati nomo di dede fosi Napoleon dede? Kwetikweti; na so wi no ben sa gebroiki „geslakti” toe foe proeberi poti wan fasti nomroe foe jari. Ma wi ben sa taki foe wan sjatoe pisi ten, te joe teki disi gersi tra ten, èn wi no ben sa taki foe hondrohondro jari di e bigin nanga a ten foe Napoleon te go miti a tamara.
Na so a de toe nanga a fasi fa wi e froestan san Jesus ben taki na ini a profeititori di a ben gi na tapoe na Olijfbergi. A kontroe foe den difrenti sani foe a profeititori dati e sori taki a kaba foe a seti foe sani disi de krosibei (Mateus 24:32, 33). Memre taki soleki fa Openbaring 12:9, 10 e sori, di a hemel Kownoekondre foe Gado ben opo na ini 1914, den ben fringi Satan kon na ini a birti foe grontapoe. Openbaring e taki moro fara taki Satan ati e bron srefisrefi now. Foe san ede? Foe di a sabi taki „a abi wan sjatoe pisi ten”. — Openbaring 12:12.
Foe dati ede a ben de wan joisti sani taki A Waktitoren foe 1 november ben abi na ondro-edeprakseri „Tan na ai!” A ben fiti taki a paragraaf di ben kon na baka, ben taki: „Wi no abi foe sabi den joisti ten foe den sani di e pasa. Na presi foe dati, wi moesoe poti wi prakseri na tapoe taki wi e tan na ai, e kweki wan tranga bribi, èn e tan doe foeroe na ini a diniwroko foe Jehovah — èn no tapoe a teri foe datum.” Dan a ben gebroiki den wortoe di Jesus ben taki: „Tan loekoe, tan na ai, bikasi joe no sabi o ten a fasti ten de. Ma san mi e taigi oenoe, mi e taigi ala sma: Tan na ai.” — Markus 13:33, 37.