A doe di sma e doe sani kibrikibri na ini a nen foe Masra
NA INI maart 1995, den ben trowe wan gas di ben abi vergif na ini, go na ini den ondrogron loko station foe Tokio, Japan, èn dati ben kiri 12 sma, a ben siki doesoendoesoen sma moro, èn ben jepi foe tjari wan sikrit kon na krin. Wan relisi sekte di sma sabi leki Aum Shinrikyo (A Moro Hei Waarheid) ben meki wan maksin nanga sarin gas na kibrifasi foe gebroiki disi foe doro marki di ben froewondroe sma.
Wan moen baka dati, wan bom di ben soetoe ben meki taki wan gebow foe lanti ini Oklahoma City, Amerkankondre, ben pori krinkrin èn 167 sma dede. Boeweisi ben gersi foe sori taki na ogri disi di ben doe, ben abi wan sani foe doe nanga a fasi di a takimakandra foe lanti nanga a Branch Davidian relisi sekte na Waco, Texas, ben fasi, soifri toe jari bifo dati. Na a ten dati, so wan 80 memre foe a sekte dede. A bom di ben soetoe, ben tjari wan sani kon na krin toe di foeroe sma no ben sabi: Foeroe groepoe now di de afoe-sroedati-afoe-borgoe, e doe den sani foe den na Amerkankondre èn sma e prakseri taki son wan foe den e meki plan na kibrifasi foe doe sani teige lanti.
Baka ten, di 1995 ben doro wan kaba, den ben feni den bron dedeskin foe 16 sma na ini wan boesiboesi krosibei foe Grenoble, Fransikondre. Den ben de memre foe na Orde foe a Son Tempel, wan pikin relisi sekte di ben kon na ini njoensoe na ini oktober 1994 na Switserland nanga Kanada, di 53 memre ben kiri densrefi noso trawan ben kiri den. Ma srefi baka a sari tori disi, a sekte ben tan de. Te na a dei foe tide a tan wan kibritori sortoe reide nanga marki a sekte abi.
Den kefar foe a doe di relisi e doe sani na sikritfasi
Foe di den sani disi pasa, a de foe froewondroe dan taki foeroe sma no e froetrow relisi groepoe? Seiker no wan sma ben sa wani foe horibaka gi wan sikrit organisâsi — efoe a de wan relisi groepoe efoe no — èn di e gebroiki a froetrow foe wan sma, na wan fowtoe fasi èn e meki a sma feti na baka marki di a no e agri nanga den. Ma san sma kan doe foe no kon na ini a trapoe foe go na ini sikrit organisâsi di no e sori soifri?
Soleki fa a sori, dan a ben sa de wan koni sani gi iniwan sma di e prakseri foe tron wan memre foe wan sikrit organisâsi, foe overtoigi ensrefi san na den troetroe marki foe na organisâsi. A moesoe loekoe boen nanga druk di mati noso kompe e poti na en tapoe, èn bosroiti di a e teki no moesoe gron tapoe a firi, ma tapoe troetori. Hori na prakseri taki, soleki fa a e sori dan a sa de a sma srefi — no tra sma — di sa ondrofeni iniwan bakapisi di ben sa kan kon foe dati.
Te wan sma e doe sani akroederi bijbel gronprakseri, dan dati na a moro boen fasi foe wai pasi gi kefalek groepoe di no abi boen reide foe doe sani (Jesaja 30:21). Disi wani taki dati wi moesoe tan neutraal na politiek sei, sori lobi gi trawan, srefi na feanti, wai pasi gi „den wroko foe a skin”, èn kweki den froktoe foe Gado jeje. A moro prenspari sani de, taki troe kresten no moesoe de wan pisi foe grontapoe, neleki fa Jesus no ben de wan pisi foe en, èn a fasi disi wani taki so srefi foe no teki prati na ini grontapoe sikrit organisâsi. — Galasiasma 5:19-23; Johanes 17:14, 16; 18:36; Romesma 12:17-21; Jakobus 4:4.
Jehovah Kotoigi na opregti bijbel studenti, di e teki a bribi foe den serjoesoe èn den e proeberi foe libi akroederi dati, sondro foe kibri wan sani. Na heri grontapoe, sma sabi den boen leki wan relisi groepoe di e ’soekoe vrede èn e doe moeiti foe kisi en’ (1 Petrus 3:11). A boekoe foe den, Jehovah’s Getuigen — Verkondigers van Gods Koninkrijk (Jehovah Kotoigi — Preikiman foe Gado Kownoekondre), e taki soifri: „Jehovah Kotoigi kwetikweti no de wan sikrit organisâsi. Den sani di den e bribi abi den fondamenti tapoe bijbel, èn den e froeklari disi krinkrin na ini poeblikâsi di ala sma kan kisi. Boiti dati, den e doe spesroetoe moeiti foe kari a poebliki kon na den konmakandra, so taki densrefi kan si èn jere san e pasa drape.”
A troe relisi no e doe sani na sikritfasi kwetikweti. Anbegiman foe a troe Gado e kisi leri foe no kibri gi sma soema na den, noso foe no kibri en gi sma san na a marki foe den leki Jehovah Kotoigi. Den fositen disipel foe Jesus ben foeroe Jerusalem nanga a leri foe den. Ala sma ben kan si san den ben e bribi èn san den ben e doe. Na so a de toe nanga Jehovah Kotoigi na ini a ten disi. Wi kan froestan taki, te ogri-ati tiri na wan onregtfardiki fasi e skotoe kresten foe abi a fri foe anbegi, dan kresten moesoe de na ai èn abi deki-ati te den e doe a wroko foe den, ala di den e gi jesi na „Gado leki tiriman moro leki na libisma”, wan situwâsi di sma poti na den tapoe nanga dwengi, foe di den abi a deki-ati foe gi kotoigi na poebliki. — Tori foe den Apostel 5:27-29; 8:1; 12:1-14; Mateus 10:16, 26, 27.
Efoe oiti joe ben prakseri taki Jehovah Kotoigi ben sa kan de wan sikrit sekte, dan dati ben de kande foe di joe no ben sabi foeroe foe den. Dati ben moesoe de so nanga foeroe sma na ini a fosi jarihondro.
Tori foe den Apostel kapitel 28 e froeteri wi foe wan konmakandra di na apostel Paulus ben abi na Rome nanga „den moro prenspari man foe den djoe”. Den ben taigi en: „Wi denki taki a de wan joisti sani foe jere foe joe san joe e prakseri, bika foe troe, foe a sekte disi wi kon sabi taki na ala presi sma e taki sani teigi den” (Tori foe den Apostel 28:16-22). Leki wan piki, Paulus „ben tjari a tori kon na krin gi den, foe di a ben gi kotoigi finifini foe a kownoekondre foe Gado” èn „son sma ben bigin bribi” (Tori foe den Apostel 28:23, 24). Foe troe a ben tjari têgo wini kon gi den di den ben kon sabi den troetori foe a troe krestendom.
Foe di Jehovah Kotoigi de fajafaja gi a diniwroko foe Gado di den e doe sondro foe kibri wan sani èn di e doe na poebliki, meki den sa prisiri foe tjari den soifri troetori foe a wroko foe den nanga den sani di den bribi, kon na krin gi iniwan sma di wani sabi den troetori. Foe san ede joe no e ondrosoekoe disi gi joesrefi, èn na so fasi kon sabi den joisti sani di abi foe doe nanga a bribi foe den?
[Prenki na tapoe bladzijde 6]
Jehovah Kotoigi e prisiri foe tjari kon na krin soema na den èn san den e doe