Kownoekondre preikiman e froeteri
Lowe go na Jehovah en theokrasia organisâsi
LANGA ten pasa kaba, a profeiti Jesaja ben firi foe froeklari: ’Den moesoe gi Jehovah glori na tapoe den èilanti foe a se’ (Jesaja 24:15). Jehovah Kotoigi e si den èilanti foe a se leki pisi foe a „grontapoe pe sma e libi” di Jesus ben taki dati „a boen njoensoe moesoe preiki” drape. — Mateus 24:14; Markus 13:10.
Den Markis Èilanti e didon pikinmoro 1400 kilometer na a noord-owstoesei foe Tahiti. Den de wan pisi foe wan groepoe èilanti di de fara na ini a Grote Oceaan, di nen Fransi Polinesia. Nanga wan fatoe vulkaan gron èn wan waran èn foktoe weer, prani e gro heri boen na tapoe den èilanti disi. Ma den Markis e gi so srefi tra sortoe froktoe. Loekoe a kefal foe wan osofamiri di ben doe wan sani na tapoe a Kownoekondre boskopoe, na tapoe na èilanti Hiva Oa.
Jean nanga en wefi, Nadine, no ben de kolokoe nanga a so-kari hei libimakandra foe West-Europa pe den ben libi. So boen, den ben bosroiti foe gowe libi a fasi fa sma e libi, neleki den no abi ten srefisrefi, èn froisi gowe nanga a pikin foe den go na den Markis Èilanti. A njoen oso foe den, di ben bow nanga bamboe, ben didon na ini wan fara lagi presi. Foe man doro den moro krosibei birtisma foe den, den ben moesoe waka na tapoe wan takroe bergipasi gi toe joeroe langa. A moro krosibei dorpoe di ben abi wan datra, skoro, nanga wan bigi wenkri, ben de dri joeroe moro fara te joe ben go nanga wan jeep.
Jean nanga Nadine no ben abi belangstelling gi relisi. Ma den ben abi takimakandra di abi foe doe nanga a bigin foe libi. Nofotron, den ben e prakseri finifini foe den moeilek leri foe na evolutie. Ma no wan foe den leri disi ben satisferi den.
Baka di den ben libi so fara foe tra sma siksi jari langa, den ben froewondroe foe kisi fisiti foe toe Kotoigi foe Jehovah. Foe den dorpoesma na ini a birti, den Kotoigi ben kon jere pe Jean nanga Nadine ben libi. A no de foe taki, dati a takimakandra ben tron wan takimakandra foe na evolutie leri. Foe a prisiri foe a trowpaar, den Kotoigi ben tjari wan eksemplaar foe a boekoe Leven — Hoe is het ontstaan? Door evolutie of door schepping? (Libi — Fa a doe kon? Nanga jepi foe evolutie noso foe di Gado meki sani?), di den Jehovah Kotoigi ben tjari kon na doro. Jean nanga Nadine ben breiti foe abi wan boekoe di ben gi wan finifini ondrosoekoe foe a fasi fa libi doe kon djaso.
Wan sjatoe pisi ten na baka, wan bijbelstudie ben bigin. Na ini wan pisi ten foe pikinmoro dri jari, Jean nanga Nadine ben go na fesi doronomo. Den ben kisi na overtoigi taki heri-esi a heri grontapoe ben sa kon tron wan paradijs. Baka di na osofamiri foe den ben gro kon abi dri pikin, a ben tron wan troetroe tjalensi foe rèis fo joeroe langa foe fisiti den kresten konmakandra na a Kownoekondre zaal. Ma dati no ben tapoe den foe kon na den konmakandra. Te foe kaba, Jean nanga Nadine ben teki dopoe na ini watra leki wan simbôl foe a gi di den gi densrefi abra na Jehovah. Disi den ben doe na tapoe wan kongres di ben hori na a moro prenspari dorpoe, pe a heimarki foe fisitiman ben de 38 sma!
Foe man jepi a pikin groepoe foe Kownoekondre preikiman, na osofamiri ben bosroiti foe gowe libi na oso foe den di ben de so fara. Den ben froisi go na wan dorpoe di abi pikinmoro wán doesoen sma di e libi drape, pe Jean e dini now leki wan dinari ini a diniwroko na ini a gemeente drape foe Jehovah Kotoigi. Na osofamiri disi, di ben lowe fosi go na den èilanti foe gowe foe a hei libimakandra, e si en leki wan grani taki den feni a wan-enkri troe kibripresi, Jehovah en theokrasia organisâsi.