„Jehovah no sa drai en baka gi en pipel”
„Den rampoe foe a regtfardikiwan foeroe, ma Jehovah e froeloesoe en foe den alamala.” — PSALM 34:19.
1, 2. (a) Fa Jehovah e blesi en pipel na ini a ten disi? (b) Nanga san foeroe kresten e kisi foe doe, èn sortoe aksi e opo kon?
DEN anbegiman foe Jehovah e libi na ini wan paradijs na jejefasi leki wan kontroe foe bijbel profeititori (2 Korentesma 12:1-4). Jehovah Kotoigi abi wan internationaal bradafasi di abi lobi nanga wánfasi leki eigifasi (Johanes 13:35). Den abi wan dipi èn finifini sabi foe bijbel waarheid (Jesaja 54:13). Fa den de Jehovah tangi taki a e gi den a grani foe de fisitiman na ini en tenti na jejefasi! — Psalm 15:1.
2 Ala di ala sma na ini na organisâsi foe Jehovah abi en boen na jejefasi, tokoe a gersi taki wan toe sma e libi na ini vrede èn sondro broko-ede te joe e teki den gersi trawan, ala di trawan e ondrofeni a wán noso tra sortoe nowtoe. Foeroe kresten de na ini wan sari situwâsi foe langa pisi ten èn sondro taki den abi iniwan howpoe foe kisi froelekti na ini a krosibei tamara. A de wan gewoon sani foe lasi-ati na ondro den sortoe situwâsi dati (Odo 13:12). Rampoe na wan boeweisi taki Gado no e feni sma boen? Jehovah e gi spesroetoe kibri gi son kresten ala di a e drai en baka gi trawan?
3. (a) Jehovah de frantiwortoe gi den problema di en pipel e ondrofeni? (b) Foe san ede srefi getrow anbegiman foe Jehovah e ondrofeni a pina di libisma e pina?
3 Bijbel e piki: „No meki no wan sma, te tesi miti en, taki: ’Na Gado e tesi mi.’ Bika sma no kan tesi Gado nanga ogri sani, èn ensrefi no e tesi no wan sma toe” (Jakobus 1:13). Jehovah na a Sma di e gi en pipel kibri èn a Sma di e sorgoe gi en pipel (Psalm 91:2-6). „Jehovah no sa drai en baka gi en pipel” (Psalm 94:14). Disi no wani taki dati getrow anbegiman no sa ondrofeni pina. Sma di kisi onvolmaakti fasi e tiri a seti foe sani foe a disiten grontapoe. Foeroe sma kroeka, èn wan toe foe den ogri dorodoro. No wan foe den e loekoe go na Jehovah foe kisi koni. Disi abi leki bakapisi taki libisma e pina foeroe. Bijbel e taki krin, taki a no ala ten a pipel foe Jehovah kan wai pasi gi den sari bakapisi foe libisma onvolmaaktifasi nanga ogridoe. — Tori foe den Apostel 14:22.
Loyaal kresten e froewakti taki den sa pina
4. San ala kresten kan froewakti so langa den e libi na ini a godelowsoe seti foe sani disi, èn foe san ede?
4 Ala di den bakaman foe Jesus no de wan pisi foe grontapoe, tokoe den e libi na mindri foe a seti foe sani disi (Johanes 17:15, 16). Bijbel e poeroe Satan kon na doro leki a krakti di e basi a grontapoe disi (1 Johanes 5:19). Foe dati ede, ala kresten kan froewakti taki wan leisi den sa kisi foe doe nanga serjoesoe problema. Nanga dati na prakseri na apostel Petrus e taki: „Hori oensrefi, de na ai. Oen gensman, Didibri, e waka lontoe leki wan krasi lew, di e soekoe foe njan wan sma. Ma kakafoetoe gi en, hori fasti na a bribi, foe di oenoe sabi taki den srefi sani disi, e miti a heri libimakandra foe oen brada na grontapoe, leki wan fasi foe kisi pina” (1 Petrus 5:8, 9). Ija, a heri kresten libimakandra kan froewakti taki den sa pina.
5. Fa Jesus ben sori krin taki getrow kresten sa ondrofeni sari sani na ini a libi?
5 Srefi efoe wi abi dipi lobi gi Jehovah èn de loyaal na den gronprakseri foe en, tokoe wi sa ondrofeni sari sani na ini a libi. Jesus ben sori disi krin na ini en agersitori di skrifi na ini Mateus 7:24-27, pe a ben poti wan difrenti na mindri den wan di e gi jesi na den wortoe foe en nanga den wan di no e gi jesi. A ben teki den disipel di e gi jesi gersi wan koni man, di e bow wan oso na tapoe wan tranga klipston. A ben agersi den wan di no e gi jesi na den wortoe foe en nanga wan don man, di e bow en oso na tapoe a santi. Baka wan tranga bigi winti, soso na oso di ben bow na tapoe a klipston, e tan boen. Loekoe taki na ini a kefal foe na oso foe a koni man, „alen ben fadon kon, èn den froedoe ben kon, èn den winti ben wai èn ben naki teige na oso dati, ma a no ben fadon”. Jesus no ben pramisi taki ala ten a koni man ben sa abi vrede èn de sondro broko-ede. Na presi foe dati, a koni foe a man dati ben sa sreka en foe pasa a bigi winti. Na agersitori foe a saiman e sori wan srefi sortoe prakseri. Ini na agersitori Jesus e tjari kon na krin, taki srefi anbegiman di e gi jesi „nanga wan opregti èn boen ati” ben sa „meki froktoe foe di den e horidoro”. — Lukas 8:4-15.
6. Soema e kisi a faja tesi na ini na agersitori foe Paulus foe den materiaal di no kan bron?
6 Di na apostel Paulus ben skrifi den Korentesma, a ben gebroiki wortoe na wan agersi fasi foe sori a fanowdoe di de foe abi tranga eigifasi di kan jepi wi foe kakafoetoe gi tesi. Den sortoe materiaal dati di no kan bron, soleki gowtoe, solfroe, nanga diri ston, de a srefi leki eigifasi di de foe Gado. (Teki gersi Odo 3:13-15; 1 Petrus 1:6, 7.) Na a tra sei, den e agersi eigifasi na skinfasi nanga materiaal di kan bron. Dan Paulus e taki: „A wroko foe ibriwan sma sa kon de foe si, bika a dei sa meki a kon na krin, bika a sa tjari kon na krin nanga jepi foe faja; èn a faja srefi sa sori fa a wroko foe ibriwan sma de. Efoe a wroko foe iniwan sma di a bow na en tapoe, e tan, dan a sa kisi pai” (1 Korentesma 3:10-14). Djaso agen, bijbel e tjari kon na krin taki wi alamala seiker sa kisi foe doe nanga wán noso tra fasi foe faja tesi.
7. Fa den Boekoe foe bijbel kan jepi wi foe horidoro na ondro tesi, soleki fa Romesma 15:4 e taki?
7 Foeroe tori de na ini bijbel foe loyaal foetoeboi foe Gado di ben moesoe horidoro na ondro rampoe, sontron foe langa pisi ten. Ma Jehovah no ben drai en baka gi den. Kande na apostel Paulus ben abi den sortoe eksempre dati na prakseri di a ben taki: „Ala sani di ben skrifi fositen ben skrifi foe gi wi leri, taki nanga a hori di wi e horidoro èn nanga a trowstoe foe den Boekoe foe bijbel, wi ben sa kan abi howpoe” (Romesma 15:4). Loekoe den eksempre foe dri man di, ala di den ben abi wan krosibei matifasi nanga Gado, ben kisi foeroe rampoe.
Den sani di wi e leri foe bijbel tori
8. San Jehovah ben meki pasa na ini a kefal foe Josef, èn gi o langa?
8 Josef, a manpikin foe Jakob, ben feni a boen foe Jehovah foe sensi di a ben jongoe. Tokoe, sondro taki en ben abi fowtoe, a ben kisi wan lo rampoe. Den eigi brada foe en ben tjari en gowe nanga tranga èn ben handri nanga en na wan ogri-ati fasi. Den ben seri en leki wan srafoe gi wan tra kondre pe den ben kragi en nanga wan lei èn ben poti en na ini wan „strafoe-oso olo” (Genesis 40:15). Drape, ’den ben kwinsi den foetoe foe en nanga boei, en sili ben kon na isri ini’ (Psalm 105:17, 18). A pisi ten di Josef ben de na ini katibo èn na ini strafoe-oso, dan sondro tweifri ibritron baka a ben begi Jehovah foe kon fri. Ma, ala di Jehovah ben gi en tranga na difrenti fasi, tokoe so wan 13 jari, a ben wiki ibri mamanten leki wan srafoe noso wan strafoeman ete. — Genesis 37:2; 41:46.
9. San David ben moesoe froedrage foeroe jari langa?
9 Wan srefi sortoe kefal na di foe David. Di Jehovah ben soekoe wan bekwaam man foe tiri Israèl, a ben taki: „Mi feni David, a manpikin foe Isa-i, wan man di mi ati feni boen” (Tori foe den Apostel 13:22). Awansi David ben abi wan boen posisi na ini Jehovah ai, tokoe a ben pina foeroe. Ini kefar foe dede, a ben kibri foeroe jari na ini a sabana, na ini ston-olo, na ini bergi-olo, èn na tapoe freimde gron. Foe di den ben onti tapoe en leki wan werdri meti, meki a ben kisi lasi-ati èn ben frede. Tokoe a ben horidoro nanga a krakti foe Jehovah. Nanga reti David ben kan taki foe den sani di a ben ondrofeni: „Den rampoe foe a regtfardikiwan foeroe, ma Jehovah e froeloesoe en foe den alamala.” — Psalm 34:19.
10. Sortoe kefalek bigi rampoe ben miti Nabot nanga en osofamiri?
10 Na ini den dei foe a profeiti Elia, soso 7000 sma ben de na Israèl di no ben boigi kindi gi a falsi gado Ba-al (1 Kownoe 19:18; Romesma 11:4). Den ben handri nanga Nabot, di kande ben de wán foe den sma disi, na wan kefalek onregtfardiki fasi. Den ben lagi en foe di den ben kragi en foe blasfemia ede. Di den ben kroetoe en taki a ben fowtoe, dan wan komando foe kownoe ben gi taki den ben moesoe ston en te a dede, èn dagoe ben leki en broedoe. Den ben kiri srefi den manpikin foe en! Ma, den no ben feni fowtoe na en foe den sani di den ben kragi en. Den sma di ben kotoigi teige en ben de leiman. A heri tori ben de wan ogri-ati plan di na oemakownoe Iseibèl ben meki, so taki a kownoe ben kan kisi a droifidjari foe Nabot. — 1 Kownoe 21:1-19; 2 Kownoe 9:26.
11. San na apostel Paulus e froeteri wi foe getrow man nanga oema na ini a bijbel historia?
11 Josef, David, nanga Nabot na soso dri foe den foeroe getrow man nanga oema di bijbel e taki foe den èn di ben kisi rampoe. Na apostel Paulus ben skrifi wan sjatoe tori foe a historia foe den foetoeboi foe Jehovah na ini den jarihondro di pasa. Na ini a sjatoe tori a ben taki foe den wan di „ben kisi tesi foe di sma ben spotoe den èn ben krawasi den, ija, moro leki dati, foe di den ben poti den na boei èn na ini strafoe-oso. Sma ben ston den, sma ben tesi den, sma ben sá den na pisi, den ben dede foe di sma ben kiri den nanga a feti-owroe, den ben waka na ini skapoeskin, na ini krabitaskin, ala di den ben de na nowtoe èn den ben de na ini banawtoe èn sma ben libi takroe nanga den; èn grontapoe no ben warti den. Den ben wakawaka na ini woestijngron èn na tapoe bergi èn na ini ston-olo èn na ini olo na ondrogron” (Hebrewsma 11:36-38). Ma Jehovah no ben drai en baka gi den.
Jehovah e broko en ede nanga den wan di e pina
12. San na wan toe foe den nowtoe di Jehovah Kotoigi e ondrofeni na ini a ten disi?
12 Fa a de nanga a pipel foe Jehovah na ini a ten disi? Leki wan organisâsi, wi kan de seiker taki Gado e kibri wi èn taki wi sa pasa den lasti dei nanga a bigi banawtoe (Jesaja 54:17; Openbaring 7:9-17). Ma, leki aparti sma wi e erken taki „ten nanga sani di e pasa èn di sma no sabi na fesi” e miti ala libisma (Preikiman 9:11). Na ini a ten disi, foeroe getrow kresten de di e pina foe rampoe ede. Sonwan pôti kefalek. Bijbel e taki foe kresten „pikin di no abi papa nanga mama èn den weduwe” di de na ini banawtoe (Jakobus 1:27). Trawan e pina leki wan bakapisi foe natoeroe rampoe, feti, ogridoe, a fowtoe gebroiki foe makti, siki, nanga dede.
13. Foe sortoe moeilek sani di sma ben ondrofeni, den froeteri no sa langa pasa?
13 Foe eksempre, den Watch Tower bijkantoro ben froeteri na ini den verslag foe den foe 1996, di den ben seni gi a Tiri Skin foe Jehovah Kotoigi, taki sonwan foe den brada nanga sisa foe wi de na ini strafoe-oso na ondro toemoesi takroe situwâsi foe di den e hori densrefi na bijbel gronprakseri. Dri gemeente na wan Zuidamerkan kondre ben broko, di guerrilla groepoe ben dwengi hondrohondro Kotoigi foe gowe foe a kontren. Na wan Westafrikan kondre, den ben kiri wan toe Kotoigi di ben kon de wantronso leti mindri a soetoe di sma ben soetoe makandra ini wan borgoe-feti. Na wan Centraalamerkan kondre, a moeilek situwâsi foe son brada na moni sei di de kaba, ben kon moro takroe nanga na ogri di wan orkan ben tjari kon. Na tra presi pe kande pôtifasi nanga a mankeri foe njanjan no de serjoesoe problema, takroe krakti kan meki taki sonwan e lasi a prisiri foe den. A druk foe a libi na ini a ten disi e meki foeroe sma lasi-ati. Foe a mi-no-ke fasi ede, meki trawan so srefi kan firi lasi-ati te den e preiki a boen njoensoe foe a Kownoekondre.
14. (a) San wi e leri foe na eksempre foe Job? (b) San wi moesoe doe te wi e kisi foe doe nanga banawtoe, na presi foe denki na wan fowtoe fasi?
14 Wi no moesoe si den situwâsi disi leki boeweisi taki Gado no e feni wi boen. Memre a kefal foe Job nanga den foeroe problema di a ben kisi. A ben de „wan man sondro fowtoe èn opregti” (Job 1:8). Fa Job ben moesoe lasi-ati di Elifas ben kragi en taki a doe ogri! (Job, kapitel 4, 5, 22) Wi no wani de esi foe kon na a bosroiti taki wi e ondrofeni rampoe foe di wi e meki Jehovah sari na wan fasi noso foe di Jehovah poeroe en blesi. Fowtoe fasi foe denki te wi e kisi foe doe nanga banawtoe, kan meki a bribi foe wi kon swaki (1 Tesalonikasma 3:1-3, 5). Te wi e firi brokosaka, dan a moro boen foe prakseri dipi foe a troetori taki Jehovah nanga Jesus de krosibei foe den regtfardikiwan awansi san e pasa.
15. Fa wi sabi taki Jehovah e broko en ede srefisrefi nanga den rampoe di en pipel e miti?
15 Na apostel Paulus e gi wi a djaranti te a e taki: „Soema sa prati wi foe a lobi foe Krestes? Pina noso banawtoe noso froefolgoe noso angri noso soso skin noso kefar noso feti-owroe? . . . mi abi na overtoigi taki no wan dede noso libi, no wan engel noso tiri, no wan sani di de now noso wan sani di moesoe kon ete, no wan makti, no wan hei noso dipi, no wan tra mekisani sa man prati wi foe a lobi foe Gado, di de na ini Krestes Jesus, wi Masra” (Romesma 8:35, 38, 39). Jehovah e broko en ede srefisrefi nanga wi èn a sabi taki wi e pina. Di David ben de wan loweman ete, a ben skrifi: „Den ai foe Jehovah de na tapoe den regtfardiki sma, èn den jesi foe en de na a babari foe den foe kisi jepi. Jehovah de krosibei foe den wan di broko na ati” (Psalm 34:15, 18; Mateus 18:6, 14). Wi hemel Tata e broko en ede nanga wi èn e firi sari gi den wan di e pina (1 Petrus 5:6, 7). A e gi wi den sani di wi abi fanowdoe foe horidoro, awansi sortoe pina wi e ondrofeni kande.
Den presenti foe Jehovah e horibaka gi wi
16. Sortoe sani di Jehovah gi e jepi wi foe horidoro, èn fa?
16 Ala di wi no kan froewakti foe abi wan libi sondro problema na ini na owroe seti foe sani disi, tokoe „Gado no libi wi na baka sondro jepi” (2 Korentesma 4:8, 9). Jesus ben pramisi foe gi den bakaman foe en wan jepiman. A ben taki: „Mi sa aksi a Tata èn a sa gi oenoe wan tra jepiman di sa de nanga oenoe foe têgo, a jeje foe waarheid” (Johanes 14:16, 17). Na a Pinksterfesa foe 33 G.T., na apostel Petrus ben taigi den sma di ben arki en, taki den ben kan kisi „a fri presenti foe a santa jeje” (Tori foe den Apostel 2:38). Na ini a ten disi a santa jeje e jepi wi? Ija! A wroko krakti foe Jehovah e gi wi moi froktoe: „Lobi, prisiri, vrede, langa pasensi, switifasi, boen-ati, bribi, safri-atifasi, a dwengi di wan sma e dwengi ensrefi” (Galasiasma 5:22, 23). Ala den sani disi na warti eigifasi di e jepi wi foe horidoro.
17. San na wan toe bijbel waarheid di e tranga a bribi nanga a fasti bosroiti foe wi foe wakti nanga pasensi tapoe Jehovah?
17 A santa jeje e jepi wi toe foe froestan taki den disiten banawtoe na „gi wan sjatoe pisi ten nomo èn lekti” te joe e teki en gersi a paiman foe têgo libi (2 Korentesma 4:16-18). Wi abi na overtoigi taki Gado no sa frigiti den wroko foe wi èn a lobi di wi e sori gi en (Hebrewsma 6:9-12). Te wi e leisi den wortoe foe bijbel di skrifi nanga santa jeje, dan wi e kisi trowstoe foe den eksempre foe getrow foetoeboi foe owroeten, di ben horidoro na ondro foeroe rampoe, ma di den ben froeklari kolokoe. Jakobus e skrifi: „Brada, teki leki wan model foe a pina di sma e pina foe ogri ede èn a sori foe pasensi, den profeiti, di ben taki na ini a nen foe Jehovah. Loekoe! Wi e froeklari den wan kolokoe di horidoro” (Jakobus 5:10, 11). Bijbel e pramisi „krakti di e pasa san de normaal” foe jepi wi foe horidoro na ondro tesi. Jehovah e blesi wi toe nanga a howpoe foe na opobaka (2 Korentesma 1:8-10; 4: 7). Te wi e leisi bijbel ala dei èn e prakseri dipi foe den pramisi disi, dan wi sa tranga a bribi foe wi nanga a fasti bosroiti foe wi foe wakti nanga pasensi tapoe Gado. — Psalm 42:5.
18. (a) San 2 Korentesma 1:3, 4 e gi wi deki-ati foe doe? (b) Fa kresten opziener kan sori taki den de fonten foe trowstoe nanga kowroe-ati?
18 Boiti dati, Jehovah gi wi a paradijs na jejefasi pe wi kan njan boen foe na opregti lobi foe wi kresten brada nanga sisa. Wi alamala abi wan prati foe trowstoe makandra (2 Korentesma 1:3, 4). Kresten opziener spesroetoe kan de wan moro bigi fonten foe trowstoe nanga kowroe-ati (Jesaja 32:2). Leki „presenti na ini man”, den kisi a komando foe bow den wan di e pina, foe „gi trowstoe na den sili di broko-saka”, èn foe „jepi den swakiwan” (Efeisesma 4:8, 11, 12; 1 Tesalonikasma 5:14). Owroeman e kisi a deki-ati foe meki boen gebroiki foe den Waktitoren nanga Ontwaakt! tijdschrift, èn so srefi tra poeblikâsi di „a getrow èn koni srafoe” e gi (Mateus 24:45-47). Den sani disi abi kefalek foeroe rai na ini di abi en gron tapoe bijbel, di kan jepi wi foe loesoe wan toe foe den problema di e gi wi broko-ede — èn srefi foe no meki den problema kon. Meki a de so, taki wi e waka baka Jehovah foe di wi e gi makandra trowstoe nanga deki-ati na ini moeilek ten!
19. (a) San e jepi wi foe wai pasi gi wan toe problema? (b) Te foe kaba, na tapoe soema wi moesoe froetrow, èn san sa meki taki wi man kakafoetoe gi tesi?
19 Ala di wi e go moro fara na ini den lasti dei èn a situwâsi na ini a disiten seti foe sani e kon moro takroe, kresten e doe san den man foe wai pasi gi rampoe (Odo 22:3). Joisti fasi foe kroetoe sani, gosontoe froestan, nanga sabi foe bijbel gronprakseri kan jepi wi foe teki koni bosroiti (Odo 3:21, 22). Wi e arki a Wortoe foe Jehovah èn e gi jesi na dati foe no meki fowtoe di no de fanowdoe (Psalm 38:4). Tokoe wi sabi taki, awansi omeni moeiti wi e doe foe wi sei, wi no kan poeroe pina krinkrin na ini wi libi. Na ini a seti foe sani disi, foeroe regtfardiki sma e ondrofeni hebi problema. Ma wi kan kakafoetoe gi den tesi di wi kisi èn e froetrow dorodoro taki „Jehovah no sa drai en baka gi en pipel” (Psalm 94:14). Èn wi sabi taki heri esi a seti foe sani disi nanga den nowtoe foe en no sa de moro. Foe dati ede, meki a de so, taki wi e teki a fasti bosroiti foe no „tapoe foe doe san boen, bika na a reti ten wi sa koti efoe wi no e kon weri”. — Galasiasma 6:9.
San wi ben leri?
◻ Sortoe tesi a heri libimakandra foe kresten e ondrofeni?
◻ Sortoe bijbel eksempre e jepi wi foe froestan taki rampoe no e boeweisi taki Jehovah no e feni wi boen?
◻ Fa Jehovah e denki foe den problema di en pipel e kisi?
◻ San na wan toe foe den presenti foe Jehovah di e jepi wi foe horidoro na ondro tesi?
[Prenki na tapoe bladzijde 10]
David, Nabot, nanga Josef na dri sma di ben kisi rampoe