Kownoekondre preikiman e froeteri

Kon fri foe a makti foe ogri jeje

LANGATEN kaba, afkodrei abi krakti na tapoe a libi foe miljoenmiljoen sma. Ma sma kan kon fri! Dati na san pasa nanga foeroe sma na ini na owroeten foto Efeise. Soleki fa bijbel e froeteri, dan „boen foeroe foe den sma di ben doe obiawroko, ben tjari den boekoe foe den kon makandra èn ben bron den . . . So boen, na wan krakti fasi, a wortoe foe Jehovah ben tan gro èn ben panja go na alasei. — Tori foe den Apostel 19:19, 20.

A kresten gemeente na ini a ten disi e ondrofeni so wan gro toe. Neleki fa a ben de na Efeise, na so a de taki na mindri den sma di ben tron bribisma, joe abi sma di fosi ben anbegi ogri jeje. Na ondrofenitori foe Zimbabwe di e kon now, e sori disi.

Ala sma ben sabi Gogo (granmama) Mthupha foe a krakti di a ben abi foe doe afkodreiwroko. Te na Zambia, Botswana, nanga Zuid-Afrika, sma ben komopo foe a meki den kon betre nanga a boesidresi foe en. Gogo Mthupha ben leri trawan toe fa foe de wan n’anga, noso obiaman. Èn son leisi a ben wisi sma!

Wan sonde mamanten, Jehovah Kotoigi di den ben doe na oso-foe-oso diniwroko ben go na Gogo Mthupha. A ben lobi en troetroe foe taki nanga den foe a pramisi di bijbel e pramisi wan njoen regtfardiki grontapoe, wan grontapoe di fri foe ala ogri makti. A ben teki a boekoe Joe kan libi foe têgo na ini wan paradijs na grontapoea èn a ben agri foe teki wan oso-bijbelstudie. Baka soso dri studie, a ben bigin go na den konmakandra.

Di Gogo Mthupha ben studeri bijbel, a ben kon sabi taki den spesroetoe krakti foe en ben kon foe den ogri jeje kriatoeroe di ben meki oproeroe teige a soevereiniteit foe Jehovah (2 Petrus 2:4; Judas 6). A ben kon sabi toe, taki den ogri jeje disi abi a fasti bosroiti foe opo ala sma teige Jehovah èn teige a soifri anbegi. Foe di a libi foe en ben anga foe a kari di a ben kari den ogri jeje kriatoeroe disi, dan san a ben o doe?

Gogo Mthupha ben taki dati a ben wani trowe ala den tapoe nanga obia wrokosani foe en. Disi ben wani taki so srefi a spesroetoe ati foe en nanga den „kawtoetoe di ben kan taki,” di a ben gebroiki te a ben meki sma kon betre nanga jepi foe en n’anga. Gogo Mthupha ben wani trowe ala den sani dati, so taki a ben kan dini a wan-enkri troe èn libi Gado, Jehovah.

Ma wan toe foe den famiriman foe en no ben agri, foe di a ben jepi den na moni sei. Den ben begi en foe gi den den wrokosani disi, makandra nanga den dangra krakti foe en, so taki den ben kan tan abi winimarki. Gogo Mthupha no ben wani.

Nanga a jepi foe a gemeente foe Jehovah Kotoigi drape, a ben tjari dri bigi saka nanga afkodrei wrokosani kon makandra èn ben bron den alamala. Di den flam ben teki den wrokosani foe en abra, di a ben gebroiki gi na anbegi foe ogri jeje, dan Gogo Mthupha ben bari: „Loekoe! A toetoe dati, a no kan jepi ensrefi.”

Baka wan pisi ten, Gogo Mthupha ben sori taki nanga prisiri a ben gi ensrefi abra na Jehovah, foe di a ben teki dopoe na ini watra. Fa a e wroko moni now? Foe di a e seri groentoe. Ija, nanga a krakti foe Gado Wortoe, wan sma kan kon fri foe na anbegi foe ogri jeje. Gogo Mthupha e taki: „Noiti mi no firi so fri.”

[Foetoewortoe]