Wan libi di noiti no hati mi
SOLEKI FA PAUL OBRIST BEN FROETERI
Na ini 1912, di mi ben abi siksi jari, mama dede di a ben e meki en di foe feifi pikin. So wan toe jari baka dati, wan jongoe bediende Berta Weibel, ben bigin e sorgoe gi wi osofamiri. Di papa ben trow nanga en a jari na baka, dan wi leki pikin ben breiti foe abi wan mama baka.
WI BEN libi na ini Brugg, wan pikin foto na ini a pisi foe Switserland pe den e taki Doisritongo. Berta ben de wan kresten sma troetroe, èn mi ben lobi en srefisrefi. A ben bigin studeri den poeblikâsi foe den Bijbel Ondrosoekoeman (Jehovah Kotoigi) na ini 1908, èn san a ben leri, a ben prati nanga trawan.
Na ini 1915, sjatoe baka di Berta nanga papa ben trow, mi ben go nanga en di den ben sori a „Photo-Drama der Schepping”. Na atosigi nanga felem pristeri disi foe na Internationaal Vereniging foe Serjoesoe Bijbel Ondrosoekoeman ben abi foeroe krakti na tapoe mi prakseri nanga mi ati. A ben abi krakti toe na tapoe trawan. A zaal na ini Brugg ben foeroe someni, taki skowtoe ben tapoe den doro èn ben seni tra sma gowe di ben e kon ete. Foeroe sma ben proeberi dan foe kon na inisei na wan fensre di ben opo, foe di den ben gebroiki wan trapoe, èn wan toe sma ben man doe dati.
A moi eksempre foe mama
Na a ten dati, a Fosi Grontapoefeti ben de fajafaja na ini Europa, èn sma ben frede gi a tamara. So boen, a wroko foe fisiti sma oso foe oso nanga a boskopoe foe Gado Kownoekondre di e gi trowstoe, soleki fa mama ben doe, ben de wan heri boen wroko. Son leisi a ben meki mi kon nanga en, èn mi ben prisiri foe disi troetroe. Na ini 1918, mama ben man sori te foe kaba, taki a ben gi ensrefi abra na Jehovah Gado, foe di a ben teki dopoe na ini watra.
Papa no ben boemoei ensrefi nanga na anbegi foe mama te leki mama ben teki dopoe, ma baka dati papa ben bigin gens en. Wán dei a ben graboe den bijbel poeblikâsi foe en èn ben trowe den go na ini na onfoe. Mama ben man poeroe soso a bijbel foe en na ini a faja. Ma san a ben doe baka dati, ben de wan froewondroe sani. A ben go na papa èn ben gi en wan brasa. A no ben hori papa na ati kwetikweti.
Papa no ben froewakti disi srefisrefi, èn en ati ben kon kowroe. Ma wanwan leisi, a ben gens mama baka, èn wi ben abi foe froedrage den atibron foe en.
Wroko èn a go di mi ben go na fesi na jejefasi
Na ini 1924, baka di mi ben kaba nanga den dri jari di mi ben leri a wroko foe wan barbir, mi ben gowe libi oso èn ben feni wroko na ini a pisi foe Switserland pe den e taki Fransitongo. Disi ben gi mi na okasi foe meki a sabi di mi ben abi foe a Fransitongo gro. Ala di a froisi di mi ben froisi, ben meki a go di mi ben moesoe go na fesi na jejefasi kon swaki pikinso, tokoe noiti mi no ben lasi mi lobi gi bijbel waarheid. So boen, di mi ben drai go baka na oso siksi jari baka dati, dan mi ben bigin go na den konmakandra foe a kresten gemeente na ini Brugg.
Sjatoe baka dati mi ben froisi go na Rheinfelden, wan pikin foto so wan 40 kilometer moro fara. Drape mi ben wroko na ini a kapsalon foe mi sisa èn mi ben tan go na fesi na jejefasi, foe di mi ben kon makandra nanga wan pikin groepoe Bijbel Ondrosoekoeman. Wan dei, di wi ben kaba nanga a bijbelstudie foe wi di wi abi mindriwiki, dan brada Soder, na owroeman di ben teki fesi, ben aksi: „Soema abi na prakseri foe teki prati na a velddienst sonde?” Mi ben go nanga mi friwani, foe di mi ben prakseri taki mi ben o go makandra nanga wan sma di ben o sori mi fa foe doe a wroko.
Di sonde ben doro èn wi ben kon na ini a gebied foe wi, dan brada Soder ben taki: „Masra Obrist o wroko drape.” Ala di noiti ete mi ati ben naki so esi, tokoe mi ben bigin fisiti sma na den oso foe den èn ben taki nanga den foe a Kownoekondre foe Gado (Tori foe den Apostel 20:20). Sensi a ten dati, mi no ben tweifri noiti foe doe a preikiwroko di Jesus ben taki dati a ben moesoe doe bifo a kaba foe a seti foe sani disi ben o kon (Mateus 24:14). Na tapoe 4 maart 1934, di mi ben abi 28 jari, dan mi ben sori taki mi ben gi misrefi abra na Jehovah Gado, foe di mi ben teki dopoe na ini watra.
Toe jari baka dati, mi ben feni wroko leki wan barbir na Lugano, wan foto na ini a pisi foe Switserland pe den e taki Italiatongo. Wantewante mi ben bigin preiki a boen njoensoe drape, ala di mi ben sabi pikinso Italiatongo nomo. Ma tokoe, a fosi sonde di mi ben de na ini a velddienst mi ben prati den 20 pikin boekoe di mi ben teki nanga mi. Baka wan pisi ten, mi ben man tjari wan toe sma di ben abi belangstelling kon na wán, foe opo wan groepoe foe studeri A Waktitoren. Te foe kaba, wan toe foe den ben teki dopoe, èn na ini februari 1937 wi ben opo wan gemeente foe Jehovah Kotoigi na Lugano.
Toe moen baka dati, na ini april 1937, mi ben kisi wan brifi di ben kenki a libi foe mi krinkrin. A ben de wan kari di mi ben kisi foe go dini na Bethel, soleki fa den e kari den gebow foe den bijkantoro foe Jehovah Kotoigi na ini wan kondre. Wantewante mi ben teki a kari — wan bosroiti di noiti no hati mi. So boen, mi ben bigin nanga wan sani di tron wan libiwroko foe 60 jari na ini a foeroeten diniwroko.
Bethel diniwroko na ini moeilek ten
Na a ten dati, a Bethel-oso foe Switserland ben de na ini a foto Bern, a mamafoto foe Switserland. Drape wi ben druk boekoe, pikin boekoe, nanga tijdschrift na ini 14 tongo, èn den ben tjari den go na heri Europa. Wanwan leisi, mi ben tjari den poeblikâsi di ben druk, go na a loko station nanga wan kroiwagi, foe di a no ben de ala ten so na ini a ten dati taki wi ben kan gebroiki wan oto. A fosi toewijzing foe mi na Bethel ben de na tapoe a Compositie Afdeling pe wi ben poti den loto letter kon na wán èn nanga dati den ben doe a druk wroko. No langa baka dati, mi ben bigin wroko na a tonbangi pe den e ontfanga fisitiman èn e teki telefon, èn, a no de foe taki, dati mi ben de a barbir foe a Bethelfamiri toe.
Na ini september 1939, a di foe Toe Grontapoefeti ben bigin, èn a feti di den Nazi ben go feti nanga trawan ben tjari bigi frede kon na ini heri Europa. Switserland ben de wan neutraal kondre na mindri foe den kondre di ben e feti. Ini a bigin, wi ben tan doe wi krestenwroko sondro taki wan sani ben kon na mindri. Baka dati, na tapoe 5 juli 1940, toe joeroe bakadina, di mi ben de na mi tonbangi na a presi pe den e ontfanga fisitiman, wan sma di ben weri leki wan borgoe ben kon nanga wan sroedati di ben abi wan gon na en nanga wan nefi na tapoe.
„Pe Zürcher de?” a sma di weri leki wan borgoe ben bari. Na a ten dati, Franz Zürcher ben de bijkantoro opziener foe wi preikiwroko na ini Switserland.
„Soema mi kan taki?”, mi ben aksi. Wantewante den ben graboe mi hori èn ben srepi mi go na tapoe a trapoe, ala di den ben komanderi mi taki mi ben moesoe tjari den go na a kantoro foe Zürcher.
A heri Bethelfamiri — wi ben de nanga 40 sma na a ten dati — ben kisi a komando foe kon na makandra na ini na eetzaal. Den ben poti fo masjin gon na dorosei foe a gebow foe frede iniwan sma di ben sa proeberi foe lowe. Na inisei, so wan 50 sroedati ben bigin soekoe sani na ini a gebow. Tra fasi leki san den ben froewakti, den no ben feni boeweisi taki Jehovah Kotoigi ben de sma di ben e gi trawan deki-ati foe kakafoetoe gi sroedatiwroko. Ma tokoe den ben teki wan bigi ipi boekoe èn ben tjari den gowe na ini feifi legre wagi.
Di wi ben weigri foe meki lanti loekoe san ben moesoe poti noso poeroe na ini A Waktitoren, dan a poeblikâsi disi no ben mag kon na doro moro na ini Switserland. Disi ben wani taki dati someni sma no ben de fanowdoe moro gi a wroko na Bethel, èn den moro jongoe memre foe a famiri ben kisi deki-ati foe gowe èn tron pionier, soleki fa den ben e kari Jehovah Kotoigi di e teki prati na a foeroeten preikiwroko.
Doe a pionierwroko na ini a ten foe orlokoe
Na ini juli 1940, mi ben drai go baka na a kontren foe Switserland pe den e taki Italiatongo, krosibei foe Lugano pe mi ben libi bifo mi ben go na Bethel. A tranga Katolik gebied disi, di na a ten dati ben de so srefi na ondro a tranga krakti foe a Fasisme, ben tron a pionier toewijzing foe mi.
Pikinmoro noiti no wan dei ben pasa sondro taki skowtoe ben stòp mi èn ben komanderi mi foe tapoe nanga mi preikiwroko. Wan dei di mi ben taki nanga wan oema na a portoe foe wan djari, wan man na ini borgoe krosi ben graboe mi hori foe bakasei, a ben tjari mi go na ini wan skowtoewagi, èn a ben rèi mi go na Lugano. Drape a ben gi mi abra na skowtoe. Di den ben aksi-aksi mi sani, mi ben froeklari taki Jehovah Gado ben gi wi a komando foe preiki.
„Djaso na grontapoe, wi na den sma di e gi komando”, na ofsiri ben piki na wan heimemre fasi. „Gado kan gi komando na hemel!”
Na a ten foe orlokoe, a ben de spesroetoe prenspari taki wi ben poti prakseri na tapoe a rai foe Jesus foe „koni leki sneki èn tokoe [foe de] sondro fowtoe leki doifi” (Mateus 10:16). So boen, mi ben kibri moro foeroe foe den boekoe foe mi na ini den inisei saka foe mi empi. Èn foe de seiker taki mi no ben o lasi no wan sani, dan mi ben weri broekoe nanga bigi peipi di ben doro te na mi kindi èn di ben tai strak na ondro mi kindi.
Baka ten, mi ben kisi a rai foe froisi go na a lagi presi foe Engadine, pe a joe-o-hari-joe-o-troesoe nanga skowtoe ben go doro. Disi na wan moi lagi presi na owstoesei foe den Alpen foe Switserland, di beri na ondro heri ipi snew na winterten, èn foe dati ede mi ben aksi den foe seni den ski foe mi kon di ben jepi mi foe go na ala presi na ini a gebied.
Waran handschoen de prenspari te joe e rèis nanga ski na ini wan kowroe winter. Foe di mi ben gebroiki den di foe mi doronomo, meki den ben kon doin heri esi. Fa mi ben breiti wan dei di mi ben kisi wan pakèt nanga post di mi no ben froewakti, pe wan deki bosroko di ben brei nanga anoe èn waran handschoen ben de na ini! Wan kresten sisa na ini na owroe gemeente foe mi na Bern ben meki den gi mi. Te now ete te mi e prakseri foe disi, dan mi ati e foeroe nanga tangi.
Foeroe prisiri grani
Na ini 1943, a situwâsi na Switserland ben bigin kon stabiel, èn den ben kari mi foe kon dini baka na Bethel. Foe di son problema ben de na ini a Fransi gemeente na Lausanne, so wan 100 kilometer moro fara, meki mi ben kisi a toewijzing foe go fisiti a foto dati doronomo foe jepi den preikiman foe kisi wan joisti prakseri foe na organisâsi foe Gado.
Baka ten, mi ben dini wan pisi ten leki kring-opziener gi ala den Fransi gemeente na Switserland. A fosi pisi foe a wiki mi ben wroko na Bethel, ma ibri wiki mi ben gebroiki freida, satra, nanga sonde foe fisiti wan tra gemeente foe proeberi de wan jepi na jejefasi. Boiti dati, di den ben opo wan Fransi gemeente na Bern na ini 1960, dan mi ben tron a fesiman opziener na ini a gemeente dati. Mi ben doe a wroko disi te 1970, di Bethel ben froisi foe Bern go na ini a moi presi na ini a foto Thun pe a de now.
Mi ben breiti foe feni wan pikin groepoe Kotoigi na Thun di e taki Italiatongo, èn mi ben bigin wroko nanga den. Baka wan pisi ten wan gemeente ben opo, èn wan toe jari mi ben dini leki a fesiman opziener foe a gemeente te leki moro jongoe brada ben doro a markitiki foe teki a frantiwortoe dati na tapoe den skowroe.
San mi si leki wan spesroetoe prisiri grani ben de, taki mi ben go na den internationaal kongres foe a pipel foe Jehovah. Foe eksempre, na ini 1950 joe ben abi a „Gro foe a Theokrasia”-kongres na Yankee Stadium, New York, wan sani di warti foe sma memre dati. Di mi ben go na a edekantoro foe Jehovah Kotoigi na Brooklyn, New York, den dati ben abi wan krakti na mi tapoe di tan. Noiti mi no sa frigiti a lezing foe brada Milton G. Henschel toe, a jari baka dati na a „Krin anbegi”-kongres na Londen, Ingrisikondre, di ben poti prakseri na tapoe den wortoe foe Jesus: „Mi e taigi oenoe: Efoe den disi ben tan pî, dan den ston ben sa bari taki” (Lukas 19:40). Brada Henschel ben aksi: „Joe denki taki den ston sa moesoe bari en taki?” Te now ete mi kan jere na ini mi jesi a tranga babari foe „nôno!” di ben kon foe den tindoesoen tron tindoesoen sten.
Di mi ben go na Bethel baka na ini 1937, dan mi papa, di ben kon sabi taki wi ben kisi soso wan pikin toelage, ben broko en ede nanga dati èn ben aksi: „Boi, fa joe o libi te joe kon owroe?” Mi ben piki en nanga den wortoe di mi ben teki foe a psalm singiman David: „Mi no si no wan regtfardikisma libi en wawan krinkrin, èn noiti mi no si den pikin foe en e soekoe brede” (Psalm 37:25). Den wortoe disi seiker kon troe na ini mi kefal.
Mi breiti troetroe taki moro leki 80 jari pasa kaba, Berta Weibel ben trow nanga papa èn taki na eksempre nanga a tiri foe en ben jepi mi foe kon sabi Jehovah nanga den eigifasi foe en! Ala di tra memre foe na osofamiri ben spotoe en, tokoe a ben dini Jehovah getrow te na a ten di a dede na ini 1983. Noiti a ben sori taki a ben hati en taki a ben dini Jehovah, a Gado foe en; èn noiti a no hati mi toe taki mi ben tan mi wawan sondro foe trow èn taki nanga mi heri ati mi gi mi libi na ini a diniwroko foe Jehovah.
[Prenki na tapoe bladzijde 25]
Wroko na Bethel