Mi de nanga tangi gi wan langa libi na ini a diniwroko foe Jehovah
SOLEKI FA OTTILIE MYDLAND BEN FROETERI
Na a kaba foe a di foe tinaneigi jarihondro, seiriboto ben tanapoe sei na sei na a ankrapresi foe Kopervik na a westsei foe Noorwegen. Na ini den dei dati, mansma nanga asi ben hari asiwagi na den strati. Sma ben gebroiki karsinoli lampoe foe abi faja, èn den ben waran den oedoe-oso, di moro foeroe ben ferfi weti, nanga oedoe èn nanga sani di tan abra foe ston-krofaja. Mi ben gebore drape na ini juni 1898, a di foe toe foe feifi pikin.
NA INI 1905, papa no ben abi wroko, dati meki a ben go na Amerkankondre. Dri jari na baka, a ben kon baka nanga wan kofroe di ben foeroe nanga presenti gi den pikin di ben meki den breiti, nanga zijde krosi nanga tra sani gi mama. Ma den moro warti sani di a ben abi na en ben de boekoe foe Charles Taze Russell di nen Studies in the Scriptures.
Papa ben bigin froeteri den mati nanga famiriman foe den sani di a ben leri na ini den boekoe disi. A ben gebroiki bijbel na den konmakandra na a kapèl foe a kerki drape, foe sori taki wan faja hèl no de (Preikiman 9:5, 10). Na ini 1909, a jari baka di papa kon baka foe Amerkankondre, brada Russell ben fisiti Noorwegen èn ben hori lezing na Bergen nanga Kristiania, di de Oslo now. Papa ben go na Bergen foe arki en.
Moro foeroe foe den sma ben kragi papa taki a e horibaka gi falsi leri. Mi ben firi sari gi en èn ben jepi en foe tjari bijbel traktaat go na den birtisma. Na ini 1912 mi ben tjari wan traktaat di e taki foe hèl, go na a oemapikin foe wan kerki tiriman. A ben skempi mi nanga papa. Mi ben skreki srefisrefi taki na oemapikin foe wan kerki tiriman ben kan gebroiki a dotitaki dati!
Wanwan leisi tra Bijbel Ondrosoekoeman, soleki fa sma ben kari Jehovah Kotoigi na a ten dati, ben fisiti wi na Kopervik, so srefi Theodor Simonsen, wan bekwaam takiman. Mi ben sa gi sma wan kari foe kon na den lezing di a ben hori na ini wi oso. A ben prei a citer èn ben singi bifo a lezing foe en, èn baka a lezing foe en a ben singi wan lasti singi. Wi ben abi dipi lespeki gi en.
Wan tra fisitiman na wi oso ben de Anna Andersen, wan colporteur, noso foeroeten bedinari. A ben rèis go foto foe foto na heri Noorwegen, moro foeroe nanga baisigri, èn ben prati bijbel lektuur na sma. Wan ten a ben de wan ofsiri ini a Leger des Heils èn a ben sabi wan toe ofsiri foe a Leger des Heils na Kopervik. Den ben gi en primisi foe hori wan bijbel lezing na ini na oso foe den pe den e hori konmakandra, èn mi ben gi sma wan kari foe kon èn arki en.
Wan tra colporteur di ben fisiti wi na Kopervik ben de Karl Gunberg. Ten na ten, a man disi di ben bescheiden, rustig, ma di ben meki sma lafoe, ben dini so srefi leki wan vertaler na a bijkantoro na Oslo. Foeroe jari na baka, wi ben wroko makandra drape.
Den fasi fa sma si sani na relisi sei ben abi krakti na mi tapoe
Na a ten dati, moro foeroe foe den sma no wawan ben abi wan tranga bribi na ini Gado èn na ini bijbel, ma den ben abi so srefi wan tranga bribi na ini relisi leri, soleki hèlfaja èn a Dri-wánfasi. Foe dati ede, a ben meki foeroe seki-seki kon di den Bijbel Ondrosoekoeman ben leri taki den leri disi no ben kroederi nanga bijbel. Den tranga kragi foe den birtisma foe wi taki papa ben de wan ketter, ben abi krakti na mi tapoe. Wan leisi mi ben taigi en srefi: „San joe e leri no troe. Dati na ketterij!”
„Kon dja, Ottilie”, na so a ben gi mi deki-ati, „èn loekoe san bijbel e taki.” Dan a ben leisi foe den Boekoe foe bijbel gi mi. A bakapisi ben de, taki a froetrow di mi ben abi na ini en èn na ini den sani di a ben leri, ben gro. A ben gi mi deki-ati foe leisi den Studies in the Scriptures, dati meki na ini a zomer foe 1914, foeroetron mi ben sidon e leisi na tapoe wan pikin bergi pe mi ben kan si a foto.
Na ini augustus 1914, sma ben kon ipi-ipi dorosei foe a gebow pe den ben tjari a koranti kon na doro foe a foto, foe leisi foe a broko di a Fosi Grontapoefeti broko. Papa ben kon èn ben si san ben e pasa. „Tangi foe Gado!”, a ben bari taki. A ben si taki a broko di feti ben broko, ben de a kontroe foe bijbel profeititori foe san a ben e preiki (Mateus 24:7). Na a ten dati, foeroe Bijbel Ondrosoekoeman ben bribi taki heri esi den ben sa teki go na hemel. Di a sani dati no ben pasa, dan son wan ben lasi-ati.
Mi teki a sei foe bijbel waarheid
Na ini 1915, di mi ben abi 17 jari, mi ben kaba a middelbaar skoro èn ben bigin doe grontapoe wroko na wan kantoro. Na a ten dati mi ben bigin leisi The Watch Tower doronomo. Ma a no ben de te leki 1918 taki konmakandra ben hori na Kopervik doronomo. Fosi, feifi foe wi ben kon. Wi ben leisi poeblikâsi foe a Waktitoren Genootschap, soleki Studies in the Scriptures, èn ben taki foe a materiaal nanga jepi foe aksi nanga piki. Ala di mama ben taki boen foe den Bijbel Ondrosoekoeman nanga trawan, tokoe noiti a ben tron wan foe wi.
Na ini a bigin foe 1918, na a kantoro pe mi ben wroko, mi ben kon sabi Anton Saltnes, di mi ben man jepi foe tron wan Bijbel Ondrosoekoeman. Na a ten disi mi ben tron wan preikiman di e preiki ibri moen èn ben teki dopoe na wan bigi konmakandra na Bergen na ini 1921.
Na ini mei 1925 wan bigi konmakandra ben de gi heri Skandinafia na Orebro, Sweden. Moro leki 500 sma ben kon, so srefi Joseph F. Rutherford, a presidenti foe a Waktitoren Genootschap. So wan 30 foe wi ben rèis foe Oslo go nanga loko ini wan wagi foe a loko di ben hori spesroetoe gi wi.
Na a bigi konmakandra disi den ben meki bekènti taki wan bijkantoro foe Noord-Europa ben sa opo na Kopenhagen, Deinsikondre, foe sorgoe gi a preikiwroko na heri Skandinafia nanga den Baltis kondre. William Dey foe Scotland ben kisi a wroko foe tiri a preikiwroko. Sma ben lobi en, èn heri esi sma ben kon sabi en leki a Bigi Skotman. Na ini a bigin brada Dey no ben sabi no wan Skandinafia tongo, dati meki na den konmakandra nanga bigi konmakandra a ben sa sidon te na bakasei èn ben loekoe den pikin-nengre, so taki den papa nanga mama foe den ben kan poti prakseri na tapoe den sani di den ben taki foe a podium.
The Watch Tower foe 1 maart 1925 ben taki foe Openbaring kapitel 12, èn ben tjari kon na krin taki a kapitel disi abi foe doe nanga a geborte foe Gado en Kownoekondre èn taki a geborte disi ben feni presi na hemel na ini 1914. The Watch Tower ben tjari kon na krin taki dati ben feni presi na ini 1914. Mi ben feni en wan moeilek sani foe froestan, dati meki mi ben leisi na artikel ibri tron baka. Di te foe kaba mi ben froestan en, mi ben breiti srefisrefi.
Di kenki tjari kon ini a fasi fa wi ben froestan bijbel tori, dan son wan naki foetoe èn hari densrefi poeroe foe a pipel foe Gado. Ma te so wan kenki ben de wan moeilek sani foe froestan, dan ala ten mi ben leisi a materiaal ibri tron baka foe proeberi foe froestan a prakseri foe en. Efoe tokoe mi no froestan a njoen froeklari ete di tjari kon na krin, dan mi e wakti te den meki en kon na krin. Ala leisi baka mi kisi wini foe di mi abi a pasensi dati.
Diniwroko na Bethel
Wan toe jari mi ben wroko leki wan boekhouder, sekretarsi, èn wan distrikt boekhouder. Na ini 1928, a sma di ben loekoe den moni afersi foe a Genootschap ben kon siki èn ben moesoe gowe libi Bethel. Foe di mi ben abi ondrofeni ini a wroko dati, meki den ben aksi mi foe doe a wroko. Mi ben bigin nanga a Bethelwroko na ini juni 1928. Wanwan leisi, brada Dey ben kon fisiti wi èn ben loekoe den moni afersi foe a Genootschap di mi ben doe, efoe den boen. A Bethelfamiri foe wi ben teki fesi toe ini a poebliki preikiwroko na Oslo, pe wi ben abi soso wán gemeente na a ten dati.
Wan toe foe wi ben jepi a dinari foe Bethel di e seni lektuur gowe, brada Sakshammer, foe paki The Golden Age (now Ontwaakt!) èn foe seni den gowe. Brada Simonsen nanga Gunberg ben de na mindri den wan di ben jepi wi. Wi ben abi wan prisiri ten, èn foeroetron wi ben e singi ala di wi ben e wroko.
Froetrow na ini a Kownoekondre howpoe
Na ini 1935 wi ben kon froestan taki a „bigi ipi” no ben de wan di foe toe groepoe di e go na hemel. Wi ben leri taki na presi foe dati, den e prenki wan groepoe di e pasa a bigi banawtoe libilibi èn di abi na okasi foe libi foe têgo na ini wan Paradijs na grontapoe (Openbaring 7:9-14). Nanga a njoen fasi disi foe froestan a tori, son wan di ben teki prati na den simbôl foe a Memrefesa, ben kon froestan taki a howpoe foe den ben de wan foe libi na grontapoe, èn den no ben teki prati moro na den simbôl.
Ala di noiti mi ben tweifri na a howpoe di mi abi foe go na hemel, tokoe foeroetron mi ben prakseri: ’Foe san ede Gado wani mi?’ Mi no ben feni misrefi warti foe kisi so wan bigi grani. Leki wan sjatoe èn froeleigi oemasma, mi ben feni en wan freimde sani foe prakseri foe misrefi leki wan kownoe di e tiri makandra nanga Krestes na hemel (2 Timoteus 2:11, 12; Openbaring 5:10). Ma mi ben prakseri foe den wortoe foe na apostel Paulus taki „no foeroe maktiwan” ben kisi a kari, ma „Gado ben teki den swaki sani foe grontapoe, foe meki den tranga sani kisi sjen”. — 1 Korentesma 1:26, 27.
Aktiviteit na ini a ten foe a di foe Toe Grontapoefeti
Tapoe 9 april 1940, a Doisri legre ben kon na ini Noorwegen, èn heri esi den ben teki a kondre abra. Foeroe sma ben bigin arki a Kownoekondre boskopoe leki wan bakapisi foe a feti. Foe oktober 1940 te go miti juni 1941, wi ben prati moro leki 272.000 boekoe nanga brochure. Dati wani taki dati ibriwan foe den moro leki 470 Kotoigi di ben de na ini Noorwegen na a ten dati, ben prati gemiddeld moro leki 570 boekoe nanga brochure na ini den neigi moen dati!
Tapoe 8 juli 1941, a Gestapo ben go na ala den fesiman opziener èn ben taigi den taki efoe a preikiwroko no ben tapoe, dan den ben sa seni den go na strafoeman kampoe. Feifi Doisri skowtoe ben kon na Bethel èn ben teki foeroe foe den goedoe foe a Waktitoren Genootschap. Den ben tjari a Bethelfamiri gowe èn ben poti aksi gi den foe kon sabi sani, ma no wan foe wi ben poti na ini strafoe-oso. Te foe kaba, tapoe 21 juli 1941, den ben teki a gebow foe a Genootschap, na Inkognitogaten 28 B, èn den ben tapoe a preikiwroko foe wi. Mi ben froisi go na Kopervik baka èn ben feni grontapoe wroko foe sorgoe gi misrefi.
Na a ten dati, papa ben e dini leki wan pionier. Wan dei den Nazi ben kon èn ben ondrosoekoe na oso foe papa. Den ben teki ala lektuur di a ben abi, so srefi den bijbel nanga den bijbelconcordantie foe en. Wi ben kisi soso pikinso njanjan na jejefasi na ini a pisi ten disi. Foe tan tranga na jejefasi, dan wi ben studeri owroe boekoe ibri tron baka, soleki a boekoe Government (Tirimakti), èn wi ben go doro foe preiki.
A de wan sari sani taki na foeroe presi den brada ben prati. Son wan ben abi a denki taki wi moesoe preiki na poebliki èn go oso foe oso, ala di trawan ben feni taki wi moesoe wroko na wan moro kibri fasi èn miti sma na tra fasi. Dati meki prenspari brada, di fosi ben wroko boen makandra nanga wi èn di wi ben lobi so foeroe, no ben taki nanga makandra moro. A prati di ben de na mindri den ben hati mi moro leki iniwan tra situwâsi na ini mi libi leki wan Kotoigi.
Aktiviteit ben bigin baka, baka a feti
Na ini a zomer foe 1945 baka a feti, brada Dey ben fisiti Noorwegen èn ben hori konmakandra na Oslo, Skien, nanga Bergen. A ben aksi den brada foe seti a kesekese èn ben aksi ala sma di ben wani doe dati foe opo tanapoe. Ala sma ben opo tanapoe! A kesekese ben loesoe foe ala ten na ini december 1945, baka di Nathan H. Knorr, di ben de presidenti foe a Waktitoren Genootschap na a ten dati, fisiti wi.
Na a srefi ten, tapoe 17 juli 1945, mi ben kisi wan telegram foe a bijkantoro dinari, brada Enok Oman, di ben taki: ’O ten joe kan kon baka na Bethel?’ Son wan ben taki dati mi moesoe tan na oso èn sorgoe gi mi papa, di ben abi moro leki 70 jari na a ten dati. Ma papa ben gi mi a deki-ati foe teki a Bethelwroko na mi tapoe baka, èn mi ben doe dati. Na ini 1946, Marvin F. Anderson, wan brada foe Amerkankondre, ben tron a bijkantoro opziener foe wi, èn a preikiwroko ben orga baka.
Na ini den zomer fakansi mi ben sa go baka na Kopervik foe go loekoe mi famiri. Den toe brada nanga toe sisa foe mi no ben tron Kotoigi, ma ala ten den ben sori switifasi gi papa èn gi mi. Wan foe den brada foe mi ben tron havenmeester nanga loods, èn a trawan ben de wan skoromeester. Ala di mi ben abi pikinso nomo na materia sei, tokoe papa ben sa taigi den: „Ottilie goedoe moro leki joe.” Èn a ben troe! Joe no ben kan teki den sani di den ben kisi gersi den goedoe na jejefasi di mi ben abi! Papa dede na a libimarki foe 78 jari na ini 1951. Mama dede na ini 1928.
Wan heimarki na ini mi libi ben de foe go na a internationaal kongres foe a pipel foe Jehovah na a foto New York na ini 1953. Na a jari dati, a grontapoe veld ben pasa a marki foe 500.000 preikiman, èn moro leki 165.000 sma ben kon na a kongres! Bifo a kongres na ini 1953, mi ben wroko wan wiki na a Bethel na Brooklyn, den edekantoro foe Jehovah en organisâsi na grontapoe.
Doe san mi kan
Na ini den jari di pasa no so langa ete, den ai foe mi go na baka foe cataract ede. Mi kan leisi bigi letter pikinso ete nanga deki bril èn nanga wan grasi di e meki sani sori bigi. Èn kresten sisa e kon loekoe mi èn e leisi gi mi toe leisi na ini wan wiki, foe san mi de nanga tangi srefisrefi.
Mi no man doe foeroe preikiwroko toe. Na ini a zomer, son tron den kresten sisa tjari mi go nanga mi rolstoeroe na wan presi pe mi kan preiki pikinso. Mi e post tijdschrift nanga brochure doronomo toe go na den skoro na ini Kopervik, soleki a lagi skoro pe mi ben de wan studenti pikinmoro 100 jari pasa kaba. Mi breiti taki mi kan de wan preikiman ete di e preiki ibri moen.
Kolokoe taki a presi pe wi e njan nanga a Kownoekondre zaal de na a srefi sodro leki mi kamra na Bethel, di sensi 1983 de na Ytre Enebakk dorosei foe Oslo. So boen, mi man go na a mamanten anbegi, go njan, èn go na den konmakandra foe wi, foe di mi gebroiki wan sortoe krokoe di e jepi mi foe waka. En mi breiti taki mi kan go na kongres nanga bigi konmakandra ete. Mi e prisiri foe miti den mati di mi sabi foeroe jari langa kaba, so srefi njoen brada nanga sisa èn foeroe switi pikin foe Kotoigi.
Tan hori a bribi te na a kaba
A de wan blesi foe abi fajafaja sma di e gi trawan prisiri èn di abi jejefasi lontoe mi djaso na Bethel. Di mi ben bigin nanga mi Bethelwroko, a heri famiri ben de sma di ben abi a howpoe foe go na hemel (Filipisma 3:14). Now ala sma na Bethel, boiti mi, abi a howpoe foe libi foe têgo na grontapoe.
A troe taki wi ben froewakti dati Jehovah ben sa opo doe wan sani moro na fesi. Ma mi breiti te mi e si fa a bigi ipi e kon bigi moro nanga moro. Mi si foeroe gro troetroe! Di mi ben teki prati na ini a diniwroko a fosi leisi, so wan 5000 preikiman ben de na heri grontapoe. Nownow moro leki 5.400.000 de! Ija, mi si „a pikinwan . . . tron wan doesoen, èn a pikinwan . . . tron wan makti nâsi” (Jesaja 60:22). Wi moesoe tan froewakti Jehovah, soleki fa a profeiti Habakuk ben skrifi: „Awansi a ben sa meki oenoe wakti srefi na en tapoe, tan froewakti en; bika a sa kon troe sondro foe misi.” — Habakuk 2:3.