Onesiforus — Wan deki-ati trowstoeman
„HORI den wan na prakseri di de na ini strafoe-oso boei neleki joe tai nanga den toe, èn den wan di trawan e handri takroe nanga den” (Hebrewsma 13:3). Di na apostel Paulus ben skrifi den wortoe disi na wan sani foe 61 G.T., dan ensrefi ben go na strafoe-oso moro leki wán leisi kaba èn a ben o go baka bifo a ben o dede wan ogri dede (Tori foe den Apostel 16:23, 24; 22:24; 23:35; 24:27; 2 Korentesma 6:5; 2 Timoteus 2:9; Fileimon 1). Na ini a ten dati a ben de toemoesi prenspari, neleki fa dati de now, taki den gemeente ben sorgoe foe kompe bribiman di ben kisi tesi foe a bribi foe den ede.
Wan fosi jarihondro disipel di ben teki spesroetoe notisi foe a sani dati di ben fanowdoe ben de Onesiforus. A ben go loekoe Paulus, di Paulus ben sidon na strafoe-oso wan di foe toe leisi. Na apostel ben skrifi foe en: „Meki Masra abi sari-ati nanga na osofamiri foe Onesiforus, foe di nofotron a ben kon gi mi kowroe-ati, èn a no ben sjen foe den keti foe mi. Kontrari foe dati, te a ben de na Rome, dan a ben soekoe mi fajafaja èn ben feni mi” (2 Timoteus 1:16, 17). Oiti joe teki a ten foe prakseri boen san den toe wortoe dati wani taki troetroe? Te joe e doe disi, dan kande joe sa kisi moro warderi gi Onesiforus. Joe sa si taki a ben de wan deki-ati trowstoeman.
Paulus de na ini strafoe-oso wan di foe toe leisi
Baka di Paulus ben kon fri a fosi leisi di a ben sidon na strafoe-oso, a ben go ete wan leisi na ini wan strafoe-oso foe den Romesma, ma a ben de na ini wan heri tra situwâsi. A fosi leisi, mati ben kan kon na en na ini na oso di ensrefi ben joeroe, èn a ben gersi leki a ben abi a froetrow taki a ben o kon fri djonsro. Now moro foeroe foe den sma ben gowe libi en, èn wan ogri dede ben e wakti en. — Tori foe den Apostel 28:30; 2 Timoteus 4:6-8, 16; Fileimon 22.
A leisi disi, Paulus ben de na ini strafoe-oso na wan sani foe 65 G.T. Pikinmoro wán jari na fesi dati — na ini juli 64 G.T. — wan faja ben bron na ini heri Rome, èn foeroe sani ben lasi gowe na ini 10 foe den 14 kontren foe a foto. Soleki fa Tacitus, a historia skrifiman foe Rome e taki, dan kèiser Nero no ben man „poeroe a takroe prakseri di sma ben abi taki a bigi faja ben seti foe wan komando ede di a ben gi. Dati meki, foe poeroe a blaka na tapoe en nen, Nero ben meki den kresten tjari a nen èn a ben meki a moro ogri sortoe pina kon na tapoe wan groepoe di sma no ben wani si na ai foe den tegoe sani ede di den ben doe, èn di a pipel ben kari kresten. . . . Den ben kiri den na a moro lagi fasi. Dagoe ben priti den [kresten] na pisipisi, ala di den ben tapoe den nanga a boeba foe meti, èn den ben dede, noso den ben spikri den na kroisi, noso den ben kiri den, foe di den meki faja bron den, so taki den ben kan de leki faja na neti, te a krin foe a dei ben gowe kaba”.
A ben de na ini so wan situwâsi èn nanga a srefi froewakti, taki Paulus ben de na ini strafoe-oso baka. A no de foe froewondroe taki a ben prisiri te en mati Onesiforus ben kon loekoe en! Ma kon meki wi loekoe a srefi situwâsi foe a sei foe Onesiforus.
Go loekoe Paulus na ini strafoe-oso
A sori leki, Onesiforus famiri ben libi na Efeise (2 Timoteus 1:18; 4:19). Den no e taki efoe Onesiforus ben kon na a mamafoto foe a tirimakti foe doe en eigi tori, noso efoe a ben kon loekoe Paulus spesroetoe. Awansi fa a no fa, na apostel ben taki: ’Te Onesiforus ben de na Rome, dan nofotron a ben kon gi mi kowroe-ati’ (2 Timoteus 1:16, 17). Sortoe kowroe-ati? Ala di a kan taki a jepi di Onesiforus ben gi, ben de jepi na materia sei, tokoe a sori leki foe di ensrefi ben de drape, meki a ben de wan sani toe di ben tranga Paulus èn ben gi en deki-ati. Te joe loekoe en boen, dan joe kan leisi na ini son vertaling: „Nofotron a prisiri mi jeje”, noso „nofotron a trowstoe mi.”
Na a ten dati, te wan sma ben wani go loekoe wan kresten strafoeman na Rome, dan dati ben tjari wan lo problema kon. Tra fasi leki fa a ben de na ini den dei di Paulus ben sidon na strafoe-oso a fosi leisi, a sori leki den kresten foe Rome no ben man kon sabi pe a ben de. Na ini wan bigi foto leki Rome, a no ben de wan makriki wroko foe feni wan strafoeman di no wan sma no ben sabi èn di ben de na mindri wan heri ipi strafoeman di moesoe ben de na ini strafoe-oso foe difrenti ogri di den ben doe. Foe dati ede, a ben de fanowdoe foe soekoe heri boen. A sabiman Giovanni Rostagno e taki foe den afersi na a fasi disi: „Den problema ben kan difrenti foeroe. A moro prenspari sani na taki, te wan sma ben soekoe, dan a ben moesoe loekoe boen troetroe foe di kefar ben de. Efoe wan sma ben aksi bodoi na difrenti presi èn a ben sori taki troetroe a ben wani feni a strafoe-oso pe wan owroe strafoeman di ben de fanatiek, ben e sidon èn di sma ben taki foe en dati a ben doe wan lo ogri, dan dati ben kan meki troetroe taki sma no ben o froetrow a tori.”
Na wan krin fasi, a skrifiman P. N. Harrison e skrifi foe a srefi situwâsi dati, èn a e taki: „A gersi leki wi e si wan sma di abi wan fasti bosroiti, na mindri wan ipi sma di e waka nanga foetoe, èn nanga foeroe belangstelling wi e waka na baka a freimdesma disi di komoto na den farawe sjoro foe na Ege-is Se, ala di a e waka na ini den foeroefoeroe strati di a no sabi, e naki na tapoe foeroe doro, e ondrosoekoe ibri sani di sma taigi en èn di kan de wan jepi, ala di sma e warskow en gi den tjans di a e teki, ma a no abi na prakseri kwetikweti foe tapoe nanga a soekoe di a e soekoe; te leki wan bekènti sten na ini wan strafoe-oso di sma no ben sabi so boen e bari en wan odi, èn a e feni Paulus di fasi nanga keti na wan sroedati foe Rome.” Efoe a presi dati ben gersi den tra strafoe-oso foe den Romesma, dan kande a ben de wan kowroe, doengroe, èn doti presi, pe keti nanga ala sortoe pina ben de bogobogo.
A ben de wan kefalek sani te sma ben kon sabi joe leki wan mati foe wan strafoeman leki Paulus. A ben de wan moro bigi kefar ete foe tan go loekoe en. Efoe wan sma ben taki krin taki a ben de wan kresten, dan dati ben kan abi leki bakapisi taki den ben teki en go sroto èn ben kiri en nanga jepi foe hebi skin-ati. Ma Onesiforus no ben de tevrede taki a ben go loekoe Paulus soso wán noso toe leisi. Èn a no ben sjen noso frede toe foe doe dati „nofotron”. Onesiforus troetroe ben doe akroederi san en nen ben wani taki, „A sma di e tjari wini kon”, foe di a ben gi jepi na wan deki-ati fasi èn na wan lobi-ati fasi, ala di kefar ben de.
Foe san ede Onesiforus ben doe ala den sani disi? Brian Rapske ben taki: „Strafoe-oso no wawan ben de wan presi pe sma ben pina na skin sei, ma a ben de wan presi toe pe foeroe broko-ede ben de foe a hebi druk di strafoe-oso ben tjari kon gi strafoeman. Na ini so wan situwâsi, a ben kan gi a strafoeman foeroe deki-ati na emotioneel sei te jepiman ben de drape densrefi èn ben taki wortoe di e gi a sma deki-ati.” A sori leki Onesiforus ben froestan dati èn na wan deki-ati fasi a ben horibaka gi en leki wan troetroe mati. Fa Paulus ben moesoe warderi a jepi dati!
San ben pasa nanga Onesiforus?
Na ini en di foe toe brifi gi Timoteus, Paulus ben seni odi gi na osofamiri foe Onesiforus èn a ben taki foe en: „Meki a de so, taki Masra meki a kisi sari-ati foe Jehovah na a dei dati” (2 Timoteus 1:18; 4:19). Foeroe sma e prakseri taki den wortoe „na a dei dati” e taki foe a kroetoedei foe Gado èn dati meki den e kon na a bosroiti taki Onesiforus ben dede. Efoe dati ben de so, dan kande „Onesiforus ben go na den kefalek strafoe-oso toemoesi foeroe leisi èn den ben kisi en, èn a ben pai gi dati nanga en libi”, na so P. N. Harrison denki. Ma a kan de nomo, taki Onesiforus no ben de na oso na a ten dati, noso kande taki Paulus ben seni odi gi en nanga en heri osofamiri.
Son sma denki taki den wortoe disi: „Meki a de so, taki Masra meki a kisi sari-ati foe Jehovah na a dei dati”, wani taki wan spesroetoe sani. Den denki taki den wortoe disi e gi sma a reti foe taki begi gi dede sili di e libi èn kande e pina na ini wán noso tra jeje kondre. Ma a prakseri dati no e kroederi nanga a leri foe bijbel taki dedesma no sabi notinoti (Preikiman 9:5, 10). Èn srefi efoe Onesiforus ben dede, dan Paulus ben winsi nomo taki en mati ben o kisi a sari-ati foe Gado. „Wi abi a reti foe winsi a sani dati gi ala sma”, R. F. Horton e taki. „Ma foe begi gi dedesma, èn foe hori Mis gi den, na wan sani di kwetikweti no ben o kon ini a prakseri [foe na apostel].”
Meki wi de loyaal trowstoeman
Efoe Onesiforus troetroe ben lasi en libi di a ben jepi Paulus efoe no, a de seiker taki a ben tjari en libi kon ini kefar di a ben soekoe na apostel èn ben go loekoe en na ini strafoe-oso. Èn tweifri no kan de, taki Paulus ben warderi a jepi nanga a deki-ati di Onesiforus ben gi en, èn di a ben abi so tranga fanowdoe.
Te kompe kresten e ondrofeni tesi, froefolgoe, noso te den e sidon na strafoe-oso, dan wi kan kisi na okasi foe trowstoe den èn gi den deki-ati. Foe dati ede, meki wi begi gi a boen foe den èn na wan lobi-ati fasi doe ala san wi kan doe foe jepi den (Johanes 13:35; 1 Tesalonikasma 5:25). Meki wi de deki-ati trowstoeman, neleki Onesiforus.
[Prenki na tapoe bladzijde 31]
Na wan deki-ati fasi, Onesiforus ben trowstoe na apostel Paulus, di ben de na strafoe-oso