San e pasa nanga jongoe sma?

A BOEN njoensoe noso a takroe njoensoe — sortoewan joe wani jere fosi? Te den e poti na aksi disi, dan foeroe sma e froekisi foe jere a takroe njoensoe fosi nanga a howpoe taki a boen njoensoe sa tan na ini a prakseri.

Te wi e ondrosoekoe san e pasa nanga jongoe sma, dan loekoe fosi a situwâsi foe disiten. Foeroetron owroe sma e taki dati jongoe sma na ini a ten disi no de leki jongoewan foe a ten di pasa. Na a tra sei, jongoe sma e mândi nanga a prakseri taki den no doro den markitiki foe fositen. Ma tokoe, sma di e ondrosoekoe a libisma famiri fajafaja, e agri taki jongoewan na ini a ten disi de tra fasi.

Fa den de tra fasi?

Ala di foeroe sma e bribi taki jongoe sma moesoe abi boen maniri, wan firi taki den abi frantiwortoe nanga lespeki gi trawan, tokoe foeroetron a fasi fa sani de troetroe no man doro den marki dati. Soleki fa wan ondrosoekoe e sori, di tjari kon na doro na ini The Independent koranti foe Londen, dan jongoe sma e „kweki wan ’njoen fasi foe opo densrefi’ teige wan grontapoe di den e si leki wan grontapoe di no e meki a froewakti foe den kon troe srefisrefi”. A ’njoen fasi [disi] foe opo densrefi’ de foe si ini den sani di wan ondrosoekoe feni, taki moro mendri jongoewan foe disiten wani si densrefi leki sma di „abi krin froestan èn sabi taki den abi frantiwortoe”. Na presi foe dati, den wani sma si den leki sma di „no man dwengi densrefi èn di sma no man bereken san den o doe”.

Na ini Ingrisikondre foe eksempre, ogridoe di sma e kragi foe den na skowtoe — di moro foeroe foe den jongoe sma ben doe — ben kon tintron moro foeroe na mindri 1950 nanga 1993. A fowtoe gebroiki foe drug nanga sopi di e kon moro foeroe, e go skinskin nanga a fasi fa ogridoe e kon moro foeroe. Na a srefi ten, na so The Times foe Londen e taki, pikinmoro ala goedoe kondre si „bigi gro foe siki di e kon foe a sociaal situwâsi ede na mindri jongoewan sensi a di foe Toe Grontapoefeti”. Soleki fa David J. Smith, profesor di e ondrosoekoe tori di abi foe doe nanga ogridoe, e taki, dan den siki disi „no abi foe doe nanga sani di sma no abi na materia sei noso nanga na abi di sma abi foeroe goedoe, wan sani di no makriki foe froestan”. Ondrosoekoe e sori taki wan moro bigi difrenti de foe si now na mindri jongoe sma nanga moro owroe sma.

Na ini a ten disi, moro nanga moro pikin-nengre nanga jongoe tini e kisi foe doe nanga stress. Kefal pe sma e kiri densrefi, foe di den ben proeberi noso doe dati troetroe, kon tron wan aladei sani. A proeberi di pikin di no abi 12 jari ete e proeberi foe kiri densrefi na ini Scotland, kon de toetron moro foeroe ini moro mendri leki tin jari, na so Herald foe Glasgow na ini Scotland e froeteri. Den moro owroe pikin e gi pasi meki a lasi di den lasi howpoe, tjari den foe go doe a srefi sani. „A proeberi di den e proeberi foe kiri densrefi, na den moro takroe bakapisi foe den senwe problema di e kon moro nanga moro na tapoe den jongoewan di, soleki fa a sori, e moro a jepi di den e kisi”, na so a koranti e taki.

Soema abi a fowtoe?

Bigisma e feni en wan makriki sani foe gi jongoe sma a fowtoe taki jongoewan abi „tra fasi” foe si sani. Ma troetroe, a no de so taki den bigisma moro foeroe de frantiwortoe foe san e pasa now na mindri jongoe sma? Speri di handri den na wan ogri fasi, a sorgoe di papa nanga mama no e sorgoe boen gi den pikin foe den, a de di sma no de di e gi eksempre di jongoewan kan waka na baka èn kan froetrow na tapoe, na sani di sma e kari foeroetron leki reide foe san ede jongoewan e tjari densrefi tra fasi. „Depressie di moro foeroe sma abi, de a srefi leki fa a ben de 30 jari pasa kaba”, na so Profesor Sir Maikel Rutter, edeman foe a Medical Research Council Child Psychiatry Unit (na organisâsi di e ondrosoekoe sani tapoe a kontren foe datratori foe pikin di abi stress) foe Ingrisikondre e taki. „Ma”, na so a e taki moro fara, „a kisi di tini nanga jongoe bigisma e kisi depressie, kon moro foeroe srefisrefi. . . . Tweifri no de taki a broko di osofamiri e broko e prei wan ròl; no soso brokotrow, ma na algemeen fasi foe broeja nanga strei na mindri bigisma.”

Wan oema di e ondrosoekoe sani e taki dati jongoe sma e „weigri foe teki den gwenti foe fositen”. Foe san ede? „Bika den gwenti no e wroko moro na den.” Teki leki wan eksempre a tra fasi fa den e si a ròl di mansma nanga oemasma abi. Foeroe jongoe oemasma e teki den eigifasi foe lobi foe feti èn foe doe ogri nanga tranga di moro foeroe na eigifasi foe mansma, ala di jongoe man-nengre e teki den eigifasi foe oemasma. Fa dati de tra fasi foe den gwenti foe fositen!

Ma foe san ede wi e si so wan bigi kenki now? Èn sortoe boen njoensoe de ini a tori foe jongoe sma na ini a ten disi? Fa den kan abi wan seiker tamara? A tra artikel foe wi e poti prakseri na tapoe den piki tapoe den aksi disi.