Pristeri a boen njoensoe — Gi jongoe sma
1 Joe de srekasreka foe pristeri a boen njoensoe gi jongoe sma na ini joe gebied? Noso joe e sjensjen èn kande joe abi na firi foe sjatoe na takmakandra efoe wan jongoewan e opo na doro? A boen njoensoe de gi ala sma, efi na jongoewan efi owroewan.
WAN POSITIEVE INSTELLING
2 No prakseri taki foe di na sma di joe e miti foe di a jongoe ini jari a no e bisi nanga kerki afersi noso taki a no abi jesi gi na grontapoe situwasi. A moro betre foe joe gebroiki na okasi boen èn taki fajafaja foe den wondroe pramisi foe Jehovah. Loekoe na sma leki wan toekomstige discipel. A de troe taki foeroe jongoesma den ede foeroe nanga na leri foe evolutie èn kande sonwan de di abi wéniki respeki gi morele gronprakseri. Ma tokoe wan ondrosoekoe a mindri studenti ben sori taki foeroe jongoesma „e bribi na ini Gado ofoe na ini wan universele geest”, soleki fa na ondrosoekoe ben kari en.
3 Foeroe jongoesma e broko den ede nanga a ten di de na den fesi èn san dati sa tjari gi den. Nofotron jongoesma wani foe arki troetroe èn moro fara den wani foe gi den égi fasi foe prakseri foe a tori disi. Efoe wan jongoewan kon na a doro soboen, no draidrai foe bigin wan takmakandra foe na bijbel. De positief èn meki moeiti foe doro en ati.
4 Na Tori foe takmakandra di wi e gebroiki now, „A grontapoe sa pori na ini wan nucleaire oorlog?”, e gi wi wan moi okasi foe kisi na prakseri foe jongoe bigisma. Foeroe jongoe sma e ferstan heri boen san kan psa efoe sowan feti sa loesoe kon. Wi kan kon sabi den fasi foe prakseri foe na tori disi èn bigin wan takmakandra? Foeroe foe den sa skreki foe si taki na bijbel e gi wan trowstoe piki na tapoe na aksi disi di e gi djomp’ati.
DE SREKASREKA
5 Sorgoe taki joe de srekasreka te joe e miti jongoesma èn sorgoe taki joe abi bodoi na joe di e hari den prakseri. Ini ibri uitgave foe Na Wachttoren nanga Ontwaakt! joe e feni wan noso moro artikel di de foe na spesroetoe belang foe jongoe sma. Ini a moen oktober wi kan leki wan eksempre bigin taki nanga jongoe sma nanga den artikel soleki „Investeer ini wan séker toekomst”, „Joe moro bigi féjanti — Soema na en?”, „Gado ben bepaal joe lot?”, èn „Howpoe gi den sma di den abi ogri-ati gi den.” Sorgoe taki joe sabi den artikel disi boen; dati sa jepi joe foe de srekasreka foe pristeri a boen njoensoe gi joengoe sma di joe e miti.
6 Efoe na tjans de taki ini na gebied joe e miti studenti, joe ben sa kan abi na joe na Kolokoe-boekoe noso Na bijbel de troetroe na Wortoe foe Gado? Ofoe san joe e prakseri foe na Osofamiri-boekoe gi sma di trow paspas? Moro foeroe tron a no sa de hebi foe abi den pikin boekoe disi na wi makandra nanga den boekoe di wi moesoe pristeri ini a spesroetoe moen dati.
7 Wi sa de srekasreka boen na fesi efoe wi abi wan positieve instelling, e teki sani foe spesroetoe artikel di skrifi spesroetoe gi jongoewan èn wi e abi moro boekoe na wi di de gi den spesroetoe fanowdoe foe den. Miljoenmiljoen jongoewan e soekoe wan loesoe gi den problema nanga san den abi foe doe. Foeroe e arki boen na a boen njoensoe foe a kownoekondre. Wi e broko wi ede nanga na tanboen foe ala sma awansi sortoe jari den abi. Meki wi opregti broko-ede troesoe wi foe de srekasreka heri boen èn foe pristeri a boen njoensoe na wan heri switifasi gi jongoe sma di wi e miti na ini na gebied. Kande wi kan jepi wan jongoewan foe ’feti foe kisi regtvaardikifasi’ nanga tégo libi na en fesi. — 2 Tim. 2:22.