„Joe ati de opregti nanga mi?”
„Kon nanga mi èn kon loekoe fa mi no e froedrage no wan strei teige Jehovah.” — 2 KOWNOE 10:16.
1, 2. (a) Fa a situwâsi foe Israèl na relisi sei ben kon takroe moro nanga moro? (b) Sortoe bigi kenki ben de foe pasa na Israèl na ini 905 b.G.T.?
A JARI 905 b.G.T. ben de wan ten foe bigi kenki na Israèl. Pikinmoro 100 jari moro na fesi, Jehovah ben meki a kownoekondre Israèl di ben de ini wánfasi, kon prati foe di Salomo ben fadon komoto na bribi (1 Kownoe 11:9-13). Baka dati Rehabeam, a manpikin foe Salomo, ben tiri a zuidsei kownoekondre, Juda, ala di a noordsei kownoekondre Israèl, ben kon na ondro Jerobeam, wan Efra-imsma. A de wan sari sani taki a noordsei kownoekondre ben abi wan takroe bigin. Jerobeam no ben wani taki den borgoe foe en ben go na a zuidsei kownoekondre foe go anbegi na ini a tempel, foe di a ben frede taki den ben o kisi a prakseri foe drai go baka na a oso foe David. Dati meki a ben seti na anbegi foe wan pikin kaw na Israèl èn na so wan fasi a ben seti wan eksempre foe anbegi kroektoe gado di ben tan te wan seiker marki na ini a heri historia foe a noordsei kownoekondre. — 1 Kownoe 12:26-33.
2 A situwâsi ben kon moro takroe di Akab, a manpikin foe Omri, ben tron kownoe. En wefi Iseibèl, di ben de foe dorosei kondre, ben horibaka gi na anbegi foe Bâ-al èn ben kiri den profeiti foe Jehovah. Ala di a profeiti Elia ben gi warskow sondro foe kibri wan sani, tokoe Akab no ben doe noti foe tapoe Iseibèl. Ma na ini 905 b.G.T., Akab ben dede, èn Joram, en manpikin, ben tiri. A ten foe krin a kondre ben doro now. Elisa, a sma di ben teki a presi foe Elia, ben taigi a sroedati komandanti, Jehu, taki Jehovah ben e salfoe en foe de a njoen kownoe foe Israèl. San ben de a wroko foe en? Foe pori a sondoe oso foe Akab èn foe teki refensi gi a broedoe foe den profeiti di Iseibèl ben trowe! — 2 Kownoe 9:1-10.
3, 4. Fa Jonadab ben sori taki en ati ben de ’opregti nanga na ati foe Jehu’?
3 Foe di Jehu ben gi jesi na a komando foe Gado, meki a ben meki den kiri a takroe Iseibèl, èn baka dati a ben bigin krin Israèl foe di a ben pori na oso foe Akab (2 Kownoe 9:15–10:14, 17). Dan a ben miti wan sma di ben horibaka gi en. „A ben miti Jonadab, a manpikin foe Rehab, di ben kon miti en. Di a ben blesi en, dan a ben taigi en: ’Joe ati de opregti nanga mi, neleki fa mi eigi ati de nanga joe ati?’ Ne Jonadab ben taki: ’Ija.’ ’Efoe dati de so, dan gi mi joe anoe.’ Dati meki Jonadab ben gi en en anoe. Ne a ben meki en kon na tapoe a wagi nanga en. Dan a ben taki: ’Kon nanga mi èn kon loekoe fa mi no e froedrage no wan strei teige Jehovah.’ Èn den ben meki en rèi nanga en na ini a fetiwagi foe en.” — 2 Kownoe 10:15, 16.
4 Jehonadab (noso, Jonadab) no ben de wan Israèlsma. Ma tokoe akroederi a nen foe en (di wani taki „Jehovah wani”, „Jehovah boen”, noso „Jehovah lobi foe gi sani”), a ben de wan anbegiman foe Jehovah (Jeremia 35:6). A de seiker taki a ben abi belangstelling na wan aparti fasi foe si fa Jehu „no e froedrage no wan strei teige Jehovah”. Fa wi doe sabi dati? We, a miti di a ben miti a salfoe kownoe foe Israèl no ben de wan onfroewakti sani. Jonadab ben „kon miti en”, èn dati ben de na wan ten di Jehu ben kiri Iseibèl nanga trawan na ini na oso foe Akab kaba. Jonadab ben sabi san ben e pasa di a ben teki a kari foe Jehu foe kon na tapoe en wagi. A ben de krin taki a ben de na a sei foe Jehu — nanga Jehovah — na ini a strei disi na mindri a falsi nanga troe anbegi.
Wan disiten Jehu nanga wan disiten Jonadab
5. (a) Sortoe kenki sa feni presi heri esi gi a heri libisma famiri? (b) Soema na a Moro Bigi Jehu, èn soema e teki presi gi en na grontapoe?
5 Na ini a ten disi, no langa moro, dan sani o kenki na wan toemoesi aparti fasi gi ala libisma, neleki fa a ben de gi Israèl na ini 905 b.G.T. A ten de krosibei now pe Jehovah sa krin grontapoe foe ala den takroe bakapisi foe a krakti di Satan abi na tapoe grontapoe, so srefi falsi relisi. Soema na a disiten Jehu? No wan tra sma leki Jesus Krestes, di den ben taigi den profeiti wortoe: „Tai joe feti-owroe na joe bowtoe, o maktiwan, nanga joe lespekifasi èn nanga joe a moi di joe moi. Èn go na ini a moi di joe moi foe abi boen bakapisi; rèi gi na afersi foe waarheid èn foe sakafasi èn foe regtfardikifasi” (Psalm 45:3, 4). „Na Israèl foe Gado”, salfoe kresten „di e hori den komando foe Gado èn abi a wroko foe gi kotoigi foe Jesus”, e teki presi gi Jesus na grontapoe (Galasiasma 6:16; Openbaring 12:17). Sensi 1922 den salfoe brada foe Jesus disi warskow sondro frede gi den sani di Jehovah o doe foe kroetoe sma. — Jesaja 61:1, 2; Openbaring 8:7–9:21; 16:2-21.
6. Soema ben komoto na den nâsi foe horibaka gi den salfoe kresten, èn fa den ben go na tapoe a wagi, foe taki en na wan agersi fasi, foe a Moro Bigi Jehu?
6 Salfoe kresten no de den wawan. Foeroe sma foe den nâsi kon foe horibaka gi Jesus, a Moro Bigi Jehu, èn gi den sma di e teki presi gi en na grontapoe, ini a teki di den e teki sei gi a troe anbegi, neleki fa Jonadab ben kon foe miti Jehu (Sakaria 8:23). Jesus ben kari den, den „tra skapoe” foe en èn na ini 1932 den ben kon sabi den leki wan disiten prenki foe Jonadab foe owroeten èn den ben kisi a kari foe ’go na tapoe a wagi’ foe a disiten Jehu (Johanes 10:16). Fa? Foe di den ’e hori den komando foe Gado’ èn e teki prati nanga den salfoewan na ini „a wroko foe gi Kotoigi foe Jesus”. Na ini a ten disi, disi wani taki toe foe preiki a boen njoensoe foe Gado en Kownoekondre di seti, na ondro Jesus leki Kownoe (Markus 13:10). Na ini 1935, den ben kon sabi den „Jonadab” disi leki a „bigi ipi” foe Openbaring 7:9-17.
7. Fa kresten na ini a ten disi sori taki den ’ati de opregti ete’ nanga na ati foe Jesus?
7 Sensi den jari sjatoe baka 1930, a bigi ipi nanga den salfoe brada foe den sori sondro foe frede taki den e horibaka gi a troe anbegi. Na ini son kondre na Owstoe-Europa nanga West-Europa, a Fara Owstoesei, nanga Afrika, foeroe foe den dede foe a bribi foe den ede (Lukas 9:23, 24). Na ini tra kondre, sma poti den na ini strafoe-oso, groepoe sma kon na den tapoe foe doe den ogri, noso sma froefolgoe den (2 Timoteus 3:12). Fa den meki wan nen leki sma di abi bribi! Èn a bericht foe a dienstjari 1997 e sori taki den abi a fasti bosroiti ete foe dini Gado, awansi san a bakapisi o de. Den ’ati de opregti ete’ nanga na ati foe Jesus. Den ben sori dati na ini 1997, di 5.599.931 Kownoekondre preikiman, pikinmoro alamala foe den na „Jonadab”, ben gebroiki ala nanga ala 1.179.735.841 joeroe na ini a wroko foe gi kotoigi foe Jesus.
Den e preiki nanga faja ete
8. Fa den Jehovah Kotoigi e sori a faja di den abi gi a troe anbegi?
8 Jehu ben abi a nen taki a de wan sma di ben e rèi en wagi tranga — wan boeweisi taki a ben abi faja foe doe en wroko (2 Kownoe 9:20). Den taki foe Jesus, a Moro Bigi Jehu, dati faja ’njan en’ (Psalm 69:9). Dati meki a no de foe froewondroe, taki sma sabi den troe kresten na ini a ten disi na a faja di den abi. Den e „preiki a wortoe . . . leki wan sani di de toemoesi prenspari na ini boen ten, na ini moeilek ten”, na ini a gemeente èn na poebliki (2 Timoteus 4:2). A faja foe den ben de spesroetoe foe si na ini a bigin pisi foe 1997, baka di wan artikel na ini Wi Kownoekondre Dienst gi a deki-ati foe teki prati na ini a jepi-pionierwroko so foeroe leki wi man. Na ala kondre den ben poti wan nomroe foe jepi-pionier leki marki. San ben de a bakapisi? A ben de toemoesi aparti! Foeroe bijkantoro ben pasa a marki di den ben poti. Ekwador ben poti wan marki foe 4000 jepi-pionier, ma ben gi raport foe 6936 jepi-pionier na ini maart. Japan ben gi raport foe ala nanga ala, 104.215 jepi-pionier na ini den dri moen dati. Na Zambia, pe den ben abi 6000 sma leki marki, 6414 jepi-pionier ben gi raport na ini maart; 6532 na ini april; èn 7695 na ini mei. Na heri grontapoe, a heimarki foe jepi-pionier nanga gewoon pionier makandra ben de 1.110.251, wan gro foe 34,2 procent te joe teki en gersi 1996!
9. Na sortoe tra fasi Jehovah Kotoigi e feni sma foe froeteri den a boen njoensoe, boiti ini na oso-foe-oso wroko?
9 Na apostel Paulus ben taigi owroeman foe Efeise: „Mi no ben draidrai foe froeteri oenoe ala san ben boen èn foe leri oenoe na poebliki èn oso foe oso toe” (Tori foe den Apostel 20:20). Jehovah Kotoigi na ini a ten disi e waka baka na eksempre foe Paulus èn e preiki fajafaja a boen njoensoe oso foe oso. Ma kande a no makriki foe feni sma na den oso foe den. Dati meki „a getrow èn koni srafoe” e gi Kownoekondre preikiman a deki-ati foe taki nanga sma na den bisnis presi foe den, na den strati, na den sekanti, na den poebliki presi pe sma e koiri — awansi pe sma de foe feni (Mateus 24:45-47). Den bakapisi de kefalek boen.
10, 11. Fa preikiman na ini toe kondre teki fesi na wan moi fasi foe soekoe den sma di abi belangstelling, di soleki fa den gwenti, den no man miti na den oso?
10 Na Kopenhagen, Deinsikondre, wan pikin groepoe foe preikiman doe stratiwroko dorosei foe den loko station. Foe januari te go miti juni, den ben prati 4733 tijdschrift, ben abi toemoesi boen takimakandra nanga sma èn ben meki foeroe gobaka. Difrenti preikiman na ini a kondre dati opo tijdschrift route na den wenkri. Wán foto abi wan bigi wowojo ala freida, pe doesoendoesoen sma e go. Dati meki a gemeente seti sani foe gi kotoigi na a wowojo doronomo. Na ini wán kontren, den kotoigi ben go na den skoro nanga wan paki nanga bodoi di abi poeblikâsi na ini di fiti spesroetoe gi den skoromeester nanga jufrow.
11 So srefi na Hawai den meki moeiti foe miti den sma di den no kan feni na oso. Spesroetoe gebied abi poebliki kontren na ini toe (strati, presi pe sma e koiri, parkeer presi, nanga bushalte), presi na ini foto, presi pe wenkri lai, nanga opolanigron, gi kotoigi nanga jepi foe telefon, na ini bus, èn na den skoro djari. A gemeente sa sorgoe taki a joisti nomroe foe Kotoigi e kisi a toewijzing gi ibri gebied èn taki den wan di e kisi a toewijzing e kisi boen leri. Foeroe kondre e gi verslag foe den srefi sortoe moeiti di meki èn di orga na wan boen fasi. A bakapisi de, taki den e miti sma di abi belangstelling, di den no ben sa feni noiti na ini na oso-foe-oso wroko kande.
Tanapoe kánkan
12, 13. (a) Sortoe taktik Satan ben gebroiki teige Jehovah Kotoigi na ini 1997? (b) Na sortoe fasi falsi propaganda ben wroko heri tra fasi na ini wan kondre?
12 Na ini wan lo kondre na ini 1997, Jehovah Kotoigi ben kisi foe doe nanga ogri, falsi propaganda, di, soleki fa a sori, ben abi leki marki foe tjari den go na kroetoe. Ma den Kotoigi ben tanapoe kánkan! (Psalm 112:7, 8) Den ben prakseri a begi foe a psalm singiman: „Den bigimemre sma taki lei foe pori mi nen. Foe mi sei, nanga mi heri ati mi sa hori den komando foe joe” (Psalm 119:69). So wan fasi foe taki lei foe hari a prakseri foe a poebliki, na wan boeweisi nomo taki sma no wani si troe kresten na ai soleki fa Jesus ben taki na fesi (Mateus 24:9). Èn son tron a abi wan heri tra bakapisi. Wan man na Belgia ben leisi wan artikel di e taki foe Jehovah Kotoigi èn di e broko den saka, na ini wan aladei koranti di foeroe sma sabi. Foe di a man ben skreki srefisrefi foe den ogri-ati lei di den ben taki foe den Kotoigi, meki a ben go na wan konmakandra na wan Kownoekondre zaal a sonde baka dati. A ben seti sani foe studeri bijbel nanga den Kotoigi èn ben bigin go na fesi esi-esi. A man disi ben de wan memre foe wan groepoe fosi. En bijbelstudie ben jepi en foe meki en fasi foe libi kroederi nanga bijbel, èn dati ben de wan sani di sma lontoe en ben si. A de seiker taki a skrifiman foe na artikel di e taki ogri-ati lei, no ben abi so wan bakapisi na prakseri!
13 Son opregti sma na Belgia taki fa den e denki foe a bedrigi propaganda. Na mindri den joe ben abi wan man di fosi ben de wan fosi minister, di ben erken taki a ben abi foeroe warderi gi san Jehovah Kotoigi doe. Èn wan memre foe parlement ben skrifi: „Tra fasi leki den lagi froeklari di sma panja na son okasi, gi mi, a no gersi taki den [Jehovah Kotoigi] tjari iniwan kefar kon gi lanti. Den na borgoe di lobi vrede, de opregti èn abi lespeki gi tirimakti.” Den wortoe foe na apostel Petrus koni troetroe: „Tan tjari oensrefi na wan boen fasi na mindri den nâsi, so taki ini den sani di den e taki foe oenoe leki oenoe na ogri sma, leki wan bakapisi foe den boen wroko foe oenoe, di den ben si nanga den eigi ai, den kan gi glori na Gado na a dei te a sa ondrosoekoe sani.” — 1 Petrus 2:12.
Wan toemoesi aparti Memrefesa
14. San na wan toe span verslag foe sma di ben de na a Memrefesa na ini 1997?
14 A fiti taki den wan di e gi kotoigi foe Jesus moesoe si a Memrefesa foe a dede foe en leki wan heimarki na ini a libiten foe den. Na ini 1997, 14.322.226 sma ben de tapoe 23 maart foe hori a sani di ben pasa. Dati ben de pasa 1.400.000 moro leki na ini 1996 (Lukas 22:14-20). Na foeroe kondre, a nomroe foe sma di ben de na a Memrefesa ben pasa a nomroe foe Kownoekondre preikiman srefisrefi, èn dati e sori den moi froewakti foe gro na ini a ten di e kon. Foe eksempre, na Haiti wan heimarki foe 10.621 preikiman ben de na ini 1997, ala di 67.259 sma ben de na a Memrefesa. Joe kan loekoe na alajari bericht na tapoe bladzijde 18 te go miti 21 èn si fa foeroe tra kondre ben abi a srefi hei nomroe foe sma di ben de na a Memrefesa te joe e teki en gersi a nomroe foe preikiman.
15. Fa na ini son kondre den brada foe wi ben wini serjoesoe problema, so taki den ben man hori a Memrefesa?
15 Gi son sma a no ben de makriki foe de na a Memrefesa. Na Albania wan avondklok ben de foe 7.00 joeroe na neti foe oproeroe ede na mindri den borgoe. Na 115 pikin groepoe na a heri kondre, a Memrefesa ben bigin 5.45 joeroe bakadina. A son ben dongo 6.08 joeroe bakadina, èn ben marki a bigin foe 14 Nisan. Den ben meki den simbôl pasa wan sani foe 6.15 joeroe bakadina. Na ini moro foeroe kefal a lasti begi ben taki wan sani foe 6.30 joeroe bakadina, èn den wan di ben de drape ben hasti densrefi foe go na oso bifo na avondklok. Tokoe a nomroe foe sma di ben de na a Memrefesa ben de 3154, te joe teki en gersi wan heimarki foe preikiman foe 1090. Na wan Afrikan kondre, oproeroe na mindri borgoe ben meki taki a Kownoekondre zaal no ben kan gebroiki, dati meki toe owroeman ben bosroiti foe miti na ini wan oso foe wan di foe dri owroeman, foe seti sani foe hori a Memrefesa na ini moro pikin groepoe. Foe man doro na a oso, dan den toe owroeman ben moesoe abra wan gotro. Ma sma ben e feti na ini a kontren, èn sma di ben e loeroe foe soetoe trawan kiri, ben soetoe tapoe iniwan sma di ben e proeberi foe abra a gotro. Wán owroeman ben lon abra a gotro sondro foe wan sani pasa. A di foe toe owroeman ben e abra di a ben jere wan soetoe. A ben trowe ensrefi na gron èn ben kroipi go na wan presi pe a ben de veilig, ala di den koegroe ben frei pasa abra en ede. A konmakandra foe den owroeman ben hori nanga boen bakapisi, èn den ben man sorgoe gi den sani di a gemeente ben abi fanowdoe.
„Komoto na ala nâsi nanga lo . . . nanga tongo”
16. Fa a getrow èn koni srafoe groepoe seti sani, so taki a boen njoensoe kan prati na mindri pikin groepoe di e taki wan tra tongo?
16 Na apostel Johanes ben taki dati a bigi ipi ben sa „komoto na ala nâsi nanga lo nanga pipel nanga tongo” (Openbaring 7:9). Foe dati ede a Tiri Skin e seti sani so taki lektuur de foe kisi na ini moro nanga moro tongo — so srefi tongo di den lo di e libi farawe nanga pikin groepoe foe sma e taki. Na Mosambik, foe eksempre, a traktaat Libi na ini wan njoen grontapoe pe vrede de ben tjari kon na doro na ini feifi tra tongo. Na Nikaragwa, a brochure Njan Boen Foe Tégo Foe A Libi Na Grontapoe! ben de foe kisi na ini a Miskito tongo — a fosi poeblikâsi foe a Waktitoren Genootschap di de foe kisi na ini a tongo dati. Foeroe Miskito Ingi ben teki a brochure nanga prisiri di den ben si wan sani na ini den eigi tongo. Na ini 1997, a Genootschap ben tjari lektuur kon na doro na ini 25 tra tongo èn ben druk moro leki wan miljard tijdschrift.
17. Sortoe tongo di wan groepoe sma e taki ben kisi jepi na Korea, èn fa den video banti ben de wan bigi jepi gi den sma disi na ini a kondre?
17 Na Korea den ben jepi wan groepoe di e taki wan tra tongo. A fosi kongres na ini gebarentaal na Korea ben hori na ini a jari 1997. Joe abi 15 gemeente na ini gebarentaal na Korea nanga 543 preikiman, ma 1174 sma ben de na a kongres, èn 21 ben teki dopoe. Foe man jepi den dofoewan di no man froestan makriki den wortoe di sma taki noso skrifi, meki den e meki poeblikâsi na tapoe video banti na ini 13 difrenti gebarentaal. Na so fasi den dofoewan e kisi jepi foe „leisi” èn srefi foe studeri a boen njoensoe, èn a abi boen bakapisi. Na Amerkankondre, a ben kan teki feifi jari fosi wan dofoeman e doro so fara taki a e teki dopoe. Now di wan nomroe foe video de foe kisi na ini Amerkan gebarentaal, dan gi son dofoeman, a ten kon moro sjatoe te go miti wan sani foe wán jari.
’Tan na tapoe a wagi’
18. San Jehu ben bigin doe, baka di a miti Jonadab?
18 Na ini 905 b.G.T., baka di Jonadab kon na en, Jehu bigin foe pori falsi anbegi. A ben gi ala den anbegiman foe Bâ-al a kari: „Meki wan serjoesoe konmakandra kon santa gi Bâ-al.” Dan a ben seni a kari go na a heri kondre foe de seiker taki den no misi no wan anbegiman foe Bâ-al. Ala di den ipi-ipi sma ben go na ini a bigi tempel foe a falsi gado, Jehu ben sorgoe taki no wan anbegiman foe Jehovah ben de drape. Te foe kaba, Jehu nanga en legre ben koti den Bâ-al anbegiman poeroe. „Na so Jehu ben wai Bâ-al poeroe foe Israèl.” — 2 Kownoe 10:20-28.
19. Sortoe jejefasi wi moesoe sori, nanga den sani na prakseri di de krosibei gi a libisma famiri, èn nanga sortoe wroko wi moesoe abi foe doe fajafaja?
19 Na ini a ten disi, a lasti kroetoe tapoe ala falsi relisi de heri krosibei. Kresten e meki boen njoensoe bekènti na a heri libisma famiri na ondro a tiri foe engel, èn e gi den deki-ati foe frede Gado èn foe poti densrefi aparti foe falsi relisi (Openbaring 14:6-8; 18:2, 4). Safri-atiwan e kisi a deki-ati foe saka densrefi na ondro Gado en Kownoekondre ondro Jesus Krestes, a Kownoe foe Jehovah di poti na tapoe a kownoestoeroe (Openbaring 12:10). Na ini a span ten disi, wi no moesoe meki a faja foe wi kon swaki ala di wi e tanapoe kánkan gi troe anbegi.
20. Sortoe fasti bosroiti joe o teki na ini a dienstjari 1998?
20 Wan leisi, di kownoe David ben de ondro hebi kwinsi, a ben begi: „Mi ati de kánkan, o Gado, mi ati de kánkan. Mi wani singi èn prei pokoe. Mi sa prèise joe na mindri den pipel, o Jehovah” (Psalm 57:7, 9). Meki a de so, taki wi toe de kánkan. Na ini a dienstjari 1997, sma ben opo wan tranga babari foe prèise gi a glori foe Jehovah Gado, awansi den ben kisi foe doe nanga foeroe problema. Meki a de so, taki wan srefi sortoe, ija, wan moro bigi babari de foe jere na ini a njoen dienstjari. Èn meki a de so, taki wi e tan prèise Jehovah, awansi san Satan e proeberi foe doe kande foe meki wi lasi-ati noso foe gens wi. Na so fasi wi sa sori taki wi ati e tan de opregti nanga na ati foe a Moro Bigi Jehu, Jesus Krestes, èn wi sa doe wan sani nanga wi heri sili na tapoe a froemane di gi na ondro a krakti foe a santa jeje: „Abi prisiri na ini Jehovah èn de nanga prisiri, oenoe regtfardikiwan; èn bari wan prisiri babari, oen alamala di abi opregti ati.” — Psalm 32:11.
Joe kan tjari disi kon na krin?
◻ Sortoe kenki ben feni presi na Israèl na ini 905 b.G.T.?
◻ Soema na a disiten Jehu, èn fa a „bigi ipi” sori taki den ’ati de opregti’ nanga en ati?
◻ Sortoe nomroe foe na alajari bericht e sori a faja di Jehovah Kotoigi ben sori na ini a dienstjari 1997?
◻ Sortoe jejefasi wi sa sori na ini a dienstjari 1998, awansi san Satan sa doe nanga wi?
[Raportoe na tapoe bladzijde 18-21]
1997 DINIWROKO RAPORTOE FOE JEHOVAH KOTOIGI NA HERI GRONTAPOE
(Loekoe a tijdschrift)
[Prenki na tapoe bladzijde 15]
A toemoesi aparti nomroe foe sma di ben de na a Memrefesa e sori den moi froewakti gi gro na ini a ten di e kon
[Prenki na tapoe bladzijde 16]
Neleki fa Jonadab ben horibaka gi Jehu, na so a „bigi ipi” na ini a ten disi e horibaka gi a Moro Bigi Jehu, Jesus Krestes, èn gi den salfoe brada foe en