Tan waka nanga Gado
„Tan waka nanga jeje èn oenoe no sa doe no wan lostoe foe a skin srefisrefi.” — GALASIASMA 5:16.
1. (a) Na mindri sortoe situwâsi èn foe o langa Heinok ben waka nanga Gado? (b) O langa Noa ben waka nanga Gado, èn sortoe hebi frantiwortoe a ben abi?
BIJBEL e froeteri wi taki Heinok „ben tan waka nanga a troe Gado”. Awansi den sma lontoe en ben taki kefalek takroe sani èn ben tjari densrefi na wan godelowsoe fasi, tokoe a ben tan waka nanga Gado te leki a dede na a libimarki foe 365 jari (Genesis 5:23, 24; Judas 14, 15). Noa „ben waka nanga a troe Gado” toe. A ben doe dati ala di a ben e kweki en osofamiri èn ala di a ben e kakafoetoe gi wan libimakandra di oproeroe engel nanga den ogri-ati bakapikin foe den ben abi krakti na tapoe, èn ala di a ben e sorgoe gi ala den finifini tori di abi foe doe nanga a bow foe wan bigi ark di ben de bigi moro leki iniwan sipi foe owroeten di ben e waka na tapoe se. A ben tan waka nanga Gado baka a Froedoe, srefi di oproeroe di sma meki teige Jehovah ben bigin baka na Babel. Ija, Noa ben tan waka nanga Gado te leki a dede na a libimarki foe 950 jari. — Genesis 6:9; 9:29.
2. San „waka nanga Gado” wani taki?
2 Te bijbel e taki dati den man disi di ben abi bribi „ben waka” nanga Gado, dan bijbel e gebroiki den wortoe disi na wan agersi fasi. A wani taki dati Heinok nanga Noa ben tjari densrefi na wan fasi di ben sori taki den ben abi wan tranga bribi na ini Gado. Den ben doe san Jehovah ben komanderi den èn ben tjari a libi foe den akroederi den sani di den ben sabi foe en foe a fasi fa a ben handri nanga libisma. (Teki gersi 2 Kroniki 7:17.) Den no ben sori soso na froestan sei nomo taki den ben agri nanga san Gado ben taki èn ben doe, ma den ben doe ala sani san A ben aksi — no soso wan toe foe den sani, ma ala sani so fara leki den ben man leki onvolmaakti sma. Dati meki Noa foe eksempre, ben doe soifri san Gado ben komanderi en (Genesis 6:22). Noa no ben e doe sani di a no ben kisi foe doe, èn a no ben e tan draidrai na wan mi-no-ke fasi. Leki wan sma di ben abi wan krosibei matifasi nanga Jehovah, a ben firi fri foe begi Gado èn ben warderi a tiri foe Gado, a ben e waka nanga Gado. Joe e doe dati?
Wan fasi foe libi di moesoe tan doronomo
3. San de toemoesi prenspari gi ala sma di de foetoeboi foe Gado di gi densrefi abra èn di dopoe?
3 A de wan prisiri sani foe si taki sma e bigin waka nanga Gado. Te den e teki positief stap akroederi a wani foe Jehovah, dan den e sori taki den abi bribi, di sondro a bribi dati no wan sma kan plisi Gado (Hebrewsma 11:6). Fa wi e prisiri taki ala jari, nanga wan gemiddelde foe den feifi jari di pasa, moro leki 320.000 sma gi densrefi abra na Jehovah èn pristeri densrefi gi a dopoe na ini watra! Ma a de so srefi prenspari gi den èn gi wi alamala foe tan waka nanga Gado. — Mateus 24:13; Openbaring 2:10.
4. Foe san ede moro foeroe foe den Israèlsma di ben gowe libi Egipti, no ben go na ini a Pramisi Kondre, ala di den ben sori pikinso bribi?
4 Na ini den dei foe Moses, wan osofamiri foe Israèl ben moesoe abi bribi foe hori a Paska na Egipti èn foe spats a broedoe na tapoe den doropostoe èn na a tapoesei pisi foe a doro foe na oso foe den (Exodus 12:1-28). Ma a bribi foe foeroe foe den ben degedege, di den ben si taki a legre foe Farao ben de krosibei na den baka na a Redi Se (Exodus 14:9-12). Psalm 106:12 e sori taki, di den ben hari pasa abra a drei gron foe a se sondro foe wan sani ben pasa nanga den èn den ben si fa a watra di ben lon ben kiri na Egipti legre, dan den „ben abi bribi na ini [a] wortoe [foe Jehovah]” baka. Ma baka wan sjatoe pisi ten na ini a gran sabana, den Israèlsma ben bigin kragi foe watra, njanjan nanga a fesimanwroko. A takroe njoensoe foe 10 foe den 12 spion di ben drai kon baka foe a Pramisi Kondre, ben meki den kon frede. Na ondro den sortoe situwâsi dati, „den no ben abi bribi na ini [a] wortoe [foe Gado]”, soleki fa Psalm 106:24 e taki. Den ben wani go baka na Egipti (Numeri 14:1-4). Awansi sortoe bribi den ben abi, den ben sori a bribi dati soso te den ben si son froewondroe fasi fa Gado ben sori en krakti. Den no ben tan waka nanga Gado. A bakapisi ben de taki den Israèlsma dati no ben go na ini a Pramisi Kondre. — Psalm 95:10, 11.
5. Fa 2 Korentesma 13:5 nanga Odo 3:5, 6 abi foe doe nanga a waka di wi e waka nanga Gado?
5 Bijbel e froemane wi: „Tan tesi efoe oenoe de na ini bribi, tan boeweisi san oensrefi de” (2 Korentesma 13:5). Foe de „na ini bribi” wani taki, foe hori wisrefi na a seti foe kresten bribi. Disi de prenspari efoe wi wani abi boen bakapisi ini a waka di wi e waka nanga Gado wi heri libi langa. Foe man waka nanga Gado, dan wi moesoe oefen a kwaliteit foe a bribi foe wi èn wi moesoe froetrow dorodoro tapoe Jehovah (Odo 3:5, 6). Foeroe trapoe de di kan kisi den wan di no e doe dati. San na wan toe foe den trapoe disi?
Tan fara foe a trapoe foe froetrow tapoe joesrefi
6. San ala kresten sabi foe hoeroedoe nanga soetadoe, èn fa den e denki foe den sondoe disi?
6 Ala sma di studeri bijbel, di ben gi en libi abra na Jehovah èn di ben teki dopoe, sabi taki a Wortoe foe Gado e kroetoe hoeroedoe nanga soetadoe (1 Tesalonikasma 4:1-3; Hebrewsma 13:4). Den sma dati e agri taki a sani disi joisti. Den abi na prakseri foe libi akroederi a sani dati. Tokoe hoeroedoe e tan de wan foe den moro boen trapoe di Satan e gebroiki. Foe san ede?
7. Fa na a Sabana foe Moab, den man foe Israèl ben kisi foe doe nanga fasi foe tjari densrefi di den ben sabi taki ben fowtoe?
7 Na ini a bigin, den wan di kon abi foe doe nanga so wan hoeroedoe fasi foe tjari densrefi, kande no ben abi na prakseri foe doe dati. Kande a sani dati ben de so nanga den Israèlsma na a Sabana foe Moab. Gi den man foe Israèl di ben weri foe libi na ini a gran sabana, na ini a bigin a kan gersi taki den oema foe Moab nanga Midian, di ben kori den, ben abi switifasi èn ben lobi foe teki sma na oso. Ma san ben pasa di den Israèlsma ben teki a kari foe abi demakandra nanga sma di ben dini Bâ-al èn no Jehovah, sma di ben gi pasi meki den jongoe oemapikin foe den (srefi foe prenspari osofamiri) abi seks nanga den man di no ben trow nanga den? Di den man foe a kampoe foe Israèl ben bigin si den sortoe demakandra dati leki sani di den wani srefisrefi, dan den ben kori den foe doe sani di den ben sabi taki a ben fowtoe, èn a sani dati ben meki taki den ben lasi den libi. — Numeri 22:1; 25:1-15; 31:16; Openbaring 2:14.
8. San kan meki wan kresten doe seks hoeroedoe na ini a ten foe wi?
8 San ben sa kan meki wan sma fadon na ini wan srefi sortoe trapoe na ini a ten foe wi? Ala di a sabi kande o serjoesoe seks hoeroedoe de, tokoe efoe a no e si a kefar toe foe froetrow tapoe ensrefi, dan a kan gi enrefi pasi foe go na ini wan situwâsi pe a firi foe doe na ogri kan teki en froestan. — Odo 7:6-9, 21, 22; 14:16.
9. Sortoe warskow di komoto na bijbel kan kibri wi gi hoeroedoe?
9 Foe taki en krin, a Wortoe foe Gado e warskow wi foe no meki sani kori wi foe go denki taki wi de so tranga taki takroe kompe no sa pori wi. Dati wani taki toe foe loekoe telefisi programa di e sori a libi foe sma di no e libi akroederi boen gwenti nanga wet, èn foe loekoe tijdschrift di e wiki takroe lostoe (1 Korentesma 10:11, 12; 15:33). Srefi te wan sma abi demakandra nanga kompe bribiman na ondro situwâsi di no fiti, dan dati kan tjari en go na serjoesoe problema. A krakti di e hari wan mansma nanga wan oemasma kon na makandra tranga. Foe di na organisâsi foe Jehovah e broko en ede na wan lobi-ati fasi, meki den e warskow wi foe no de wi wawan èn sondro tra sma, te wi de nanga wan mansma noso oemasma di wi no trow nanga en noso di no de wan memre foe na osofamiri. Foe kan tan waka nanga Gado, dan wi moesoe tan fara foe a trapoe foe froetrow tapoe wisrefi èn gi jesi na a rai di a e gi wi leki wan warskow. — Psalm 85:8.
No meki frede gi libisma abi krakti na joe tapoe
10. Fa „a frede gi libisma” e poti wan trapoe?
10 Wan tra kefar de foe feni na ini Odo 29:25, di e taki: „A frede gi libisma, na dati e seti wan trapoe.” Foeroetron a trapoe foe wan ontiman abi wan stropoe di e hari strak lontoe a neki noso tetei di e kisi a foetoe foe wan meti (Job 18:8-11). Na a srefi fasi a frede gi libisma kan tapoe a man di wan sma man taki na wan fri fasi èn foe tjari ensrefi na wan fasi di e plisi Gado. Na angri foe plisi trawan na wan normaal sani, èn a no de wan kresten fasi foe no abi lespeki èn foe no broko-ede srefisrefi nanga san tra sma e denki. Ma wi moesoe de ini balansi. Te wan sma e doe san Gado no wani noso no e doe san a Wortoe foe Gado e komanderi, foe di a e broko en ede nanga a fasi fa tra sma kan denki foe en, dan a sma dati fadon na ini wan trapoe.
11. (a) San na a kibri di wan sma e kisi foe no meki a frede gi libisma abi krakti na en tapoe? (b) Fa Jehovah jepi den foetoeboi foe en di ben feti nanga a frede gi libisma?
11 A kibri di wan sma kan kibri ensrefi gi so wan trapoe no e anga foe a fasi di a sma abi èn di a gebore nanga dati, ma a e anga foe a froetrow di a e „froetrow tapoe Jehovah” (Odo 29:25b). Srefi wan sma di e sjensjen kan sori foe de nanga deki-ati èn kan de kánkan foe di a e froetrow tapoe Gado. So langa den banawtoe foe a seti foe sani disi foe Satan e lontoe wi, wi sa moesoe de na ai gi a frede gi libisma di e kisi wi leki wan trapoe. Ala di a profeiti Elia ben abi wan boen nen leki wan sma di ben doe en diniwroko nanga deki-ati, tokoe di Iseibèl ben tapoe skreki gi en foe kiri en, a ben lowe foe di a ben kon frede (1 Kownoe 19:2-18). Di na apostel Petrus ben kon na ondro druk foe sma, a ben kon frede èn ben taki dati a no ben sabi Jesus Krestes, èn foeroe jari baka dati, a ben gi pasi meki frede meki a tjari ensrefi na wan fasi di de kontrari a bribi (Markus 14:66-71; Galasiasma 2:11, 12). Ma ala toe, Elia nanga Petrus, ben teki a jepi di den ben kisi na jejefasi èn, nanga froetrow tapoe Jehovah, den ben tan dini Gado na a fasi di a feni boen.
12. Sortoe disiten eksempre e sori fa sma kisi jepi foe no meki taki frede meki den no plisi Gado?
12 Foeroe foe den foetoeboi foe Jehovah na ini a ten foe wi kon sabi toe fa foe wini a frede di e kisi sma leki wan trapoe. Wan tini Kotoigi na Gajana ben erken: „A feti di mi moesoe feti foe kakafoetoe gi a druk foe speri, tranga na skoro.” Ma a ben taki toe: „Disi de so toe nanga a bribi di mi abi na ini Jehovah.” Di en skoromeester ben spotoe en na fesi a heri klas foe en bribi ede, dan a ben begi Jehovah safri. Baka ten, di en wawan ben de nanga a skoromeester, a ben gi en kotoigi nanga takt. Di wan jonkoeman di ben e leri den markitiki foe Jehovah, ben go fisiti a foto pe a ben gro na Benin, a ben teki a bosroiti foe poeroe wan kroektoe gado di en papa ben meki gi en. A jonkoeman ben sabi taki a popki no ben abi libi na ini, èn a no ben frede gi a popki, ma a ben sabi toe taki den sma foe a dorpoe ben o atibron èn ben sa kan soekoe foe kiri en. A ben begi Jehovah, èn dan na neti ten a ben teki a kroektoe gado tjari go na boesi èn ben libi en drape. (Teki gersi Kroetoebakra 6:27-31.) Di wan oemasma na a Dominikan Republiek ben bigin dini Jehovah, dan en masra ben taigi en taki a kan froekisi na mindri en nanga Jehovah. A man ben tapoe skreki gi en nanga brokotrow. Frede ben sa meki taki a poti en bribi na wan sei? A ben piki: „Efoe mi no ben de getrow na ini a trowlibi, dan mi ben sa sjen, ma mi no e sjen foe dini Jehovah Gado!” A ben tan waka nanga Gado, èn baka ten, en masra ben doe a wani foe Jehovah makandra nanga en. Te wi e froetrow dorodoro tapoe wi hemel Tata, dan wi toe kan tan fara foe meki a frede gi libisma meki wi no doe den sani di wi sabi taki a sa plisi Jehovah.
No si rai leki wan sani di no de so prenspari
13. Gi sortoe trapoe 1 Timoteus 6:9 e warskow wi?
13 Ala di son trapoe di ontiman e gebroiki meki foe kisi iniwan meti di e kon pasa wan seiker presi, tokoe tra trapoe e hari meti nanga jepi foe wan beti di e hari en na wan bedrigi fasi. Gi foeroe sma, goedoe de leki a sani dati (Mateus 13:22). Na ini 1 Timoteus 6:8, 9, bijbel e gi wi a deki-ati foe de tevrede nanga njanjan, krosi nanga wan presi foe tan. Dan bijbel e warskow: „Den sma di abi a fasti bosroiti foe kon goedoe, e kon ini wan tesi èn wan trapoe èn foeroe don èn takroe lostoe, di e meki sma fadon go na ini pori.”
14. (a) San ben sa kan meki taki wan sma no e gi jesi na a rai foe de tevrede nanga njanjan, krosi nanga wan presi foe tan? (b) Fa wan fowtoe fasi foe taki san na goedoe e meki wan sma si a warskow di skrifi na ini 1 Timoteus 6:9 leki wan sani di no de so prenspari? (c) Na sortoe fasi „a lostoe foe den ai” ben sa kan meki son sma breni gi a trapoe di e wakti den?
14 Ala di bijbel e gi a warskow disi, tokoe foeroe sma e fadon na ini a trapoe, bika den no e gebroiki a rai gi densrefi. Foe san ede? A ben sa kan taki heimemre e poesoe den foe tan hori na wan fasi foe libi di e aksi moro leki den „njanjan, krosi nanga wan presi foe tan” di bijbel e gi wi tranga foe de tevrede nanga den? Den e si a warskow di bijbel gi leki wan sani di no de so prenspari kande, foe di den e taki dati goedoe na sani san kefalek goedoe sma abi? Bijbel e poti gewoon a fasti bosroiti di sma teki foe kon goedoe na a tra sei foe a de di wi moesoe de tevrede nanga njanjan, krosi nanga wan presi foe tan. (Teki gersi Hebrewsma 13:5.) A de so, taki „a lostoe foe den ai” — a lostoe foe abi den sani di den e si, srefi te a wani taki foe gi den jeje afersi abra di a moesoe feti na baka — e meki taki den e poesoe den afersi foe troe anbegi na a di foe toe presi? (1 Johanes 2:15-17; Hagai 1:2-8) O moro kolokoe den wan de di troetroe e gi jesi na a bijbel rai èn e waka nanga Gado, foe di den e meki a diniwroko foe Jehovah de a moro prenspari sani na ini a libi foe den!
Kakafoetoe nanga boen bakapisi gi den broko-ede foe a libi
15. Sortoe situwâsi, soleki fa wi kan froestan, e gi foeroe sma foe a pipel foe Jehovah broko-ede, èn gi sortoe trapoe wi moesoe de na ai te wi de na ondro so wan druk?
15 A broko di sma e broko den ede srefisrefi foe kisi den sani di den abi fanowdoe na ini a libi, e pasa moro foeroe leki a bosroiti di sma e teki foe kon goedoe. Foeroe foetoeboi foe Jehovah e libi nanga soso pikinso goedoe. Den e wroko tranga foeroe joeroe langa, so taki den kan abi srefi den krosi di de fanowdoe, wan presi gi na osofamiri foe den foe sribi na neti, èn awansi fa a no fa, pikinso njanjan foe a dei. Trawan e feti nanga problema foe siki noso owroedei ede foe densrefi noso foe memre foe na osofamiri. O makriki a ben sa de foe meki den sortoe situwâsi dati poeroe jeje afersi na ini a libi foe den! — Mateus 13:22.
16. Fa Jehovah e jepi wi foe kakafoetoe gi den banawtoe foe a libi?
16 Na wan lobi-ati fasi Jehovah e taigi wi foe a froelekti di wi sa kisi na ondro a Kownoekondre foe a Mesias (Psalm 72:1-4, 16; Jesaja 25:7, 8). A e jepi wi toe foe kakafoetoe gi den banawtoe foe a libi now, foe di a e gi wi rai fa foe tan hori den moro prenspari sani foe wi na a joisti fasi (Mateus 4:4; 6:25-34). Jehovah e gi wi a djaranti nanga jepi foe den tori fa a ben jepi den foetoeboi foe en na ini a ten di pasa (Jeremia 37:21; Jakobus 5:11). A e meki wi kon tranga nanga a sabi taki, awansi sortoe problema e kon na wi tapoe, a lobi di a abi gi den loyaal foetoeboi foe en e tan doronomo (Romesma 8:35-39). Gi den wan di e poti a froetrow foe den tapoe Jehovah, a e froeklari: „Mi no sa gowe libi joe kwetikweti, èn noiti mi no sa drai mi baka gi joe.” — Hebrewsma 13:5.
17. Gi eksempre foe a fasi fa sma di abi bigi problema man tan waka nanga Gado.
17 Foe di a sabi disi e meki troe kresten kon tranga, meki den e tan waka nanga Gado, na presi foe drai go na den fasi foe grontapoe. Wan algemeen grontapoe filosofia na mindri den pôtiwan na foeroe kondre, na taki, te joe e teki moni noso goedoe foe wan sma di abi moro leki joe, so taki joe kan gi joe osofamiri njanjan, dan dati a no foefoeroe. Ma den wan di e waka nanga bribi e weigri foe teki a fasi dati foe si sani. Den e warderi a boen-ati foe Gado moro leki ala tra sani èn e loekoe go na en foe pai den foe na eerlijk fasi fa den e tjari densrefi (Odo 30:8, 9; 1 Korentesma 10:13; Hebrewsma 13:18). Wan weduwe na India ben ondrofeni taki a wani di a ben wani wroko, makandra nanga a koni foe man feni fasi foe handri nanga problema, ben jepi en foe kakafoetoe. Na presi foe de nanga atibron foe a situwâsi foe en, a ben sabi taki, efoe a e poti a Kownoekondre foe Gado nanga en regtfardikifasi na a fosi presi na ini en libi, dan Jehovah ben sa blesi den moeiti di a doe foe feni den sani di ensrefi nanga en manpikin abi fanowdoe (Mateus 6:33, 34). Foeroe doesoendoesoen sma na heri grontapoe e sori taki, awansi sortoe problema den e kisi kande, Jehovah na a kibripresi nanga fortresi foe den (Psalm 91:2). Dati de so nanga joe?
18. San na a sroto foe tan fara foe den trapoe foe a grontapoe foe Satan?
18 So langa wi e libi na ini a disiten seti foe sani, trapoe sa de di wi moesoe tan fara foe den (1 Johanes 5:19). Bijbel e meki wi kon sabi den trapoe disi èn e sori wi fa foe tan fara foe den. Den wan di troetroe lobi Jehovah èn abi wan gosontoe frede foe no plisi en, kan kakafoetoe gi den sortoe trapoe dati nanga boen bakapisi. Efoe den e „tan waka nanga jeje”, dan den no sa broko kindi gi den fasi foe grontapoe (Galasiasma 5:16-25). A bigi froewakti de gi ala den wan di troetroe e bow a libi foe den lontoe a matifasi di den abi nanga Jehovah, foe waka nanga Gado èn abi wan krosibei matifasi nanga en foe têgo. — Psalm 25:14.
San joe e piki?
◻ Fa a froetrow di wan sma e froetrow tapoe ensrefi kan de wan trapoe?
◻ San kan kibri wi foe no meki a frede gi libisma abi krakti tapoe wi?
◻ San ben sa kan meki taki wi no e gebroiki rai di abi foe doe nanga a kefar foe feti na baka goedoe?
◻ San kan jepi wi foe man tan fara foe no fadon na ini a trapoe foe den broko-ede foe a libi?
[Prenki na tapoe bladzijde 16, 17]
Foeroe sma e tan waka nanga Gado na ini den heri libi