Tan waka a pasi foe Jehovah
„Howpoe tapoe Jehovah èn hori a pasi foe en, èn en sa hei joe so taki joe kan kisi grontapoe.” — PSALM 37:34.
1, 2. San a ben wani taki gi Kownoe David foe waka a pasi foe Jehovah, èn san dati e aksi foe wi na ini a ten disi?
„MEKI mi kon sabi a pasi di mi moesoe waka, bika na joe mi opo mi sili” (Psalm 143:8). Nanga den heri ati den Kresten na ini a ten disi e taki den wortoe dati foe Kownoe David baka. Na wan opregti fasi den wani plisi Jehovah èn den wani waka en pasi. San disi wani taki? Gi David a ben wani taki dati a ben moesoe hori a wet foe Gado. A ben wani taki dati a ben moesoe froetrow tapoe Jehovah na presi foe froetrow tapoe den froebontoe nanga den nâsi ija, èn a ben wani taki foe dini Jehovah na wan loyaal fasi na presi foe dini den gado foe den sma foe den birtikondre. Moro de fanowdoe gi Kresten di wani waka a pasi foe Jehovah.
2 Na a fosi presi, foe waka a pasi foe Jehovah na ini a ten disi wani taki foe abi bribi na ini Jesus Krestes en froeloesoe-ofrandi, èn foe erken en leki „a pasi nanga a waarheid nanga a libi” (Johanes 3:16; 14:6; Hebrewsma 5:9). A wani taki toe foe libi akroederi „a wet foe Krestes”, di wani taki dati wi moesoe sori lobi gi makandra, spesroetoe gi den salfoe brada foe Jesus (Galasiasma 6:2; Mateus 25:34-40). Den sma di e waka a pasi foe Jehovah, lobi den gronprakseri nanga den komando foe en (Psalm 119:97; Odo 4:5, 6). Den e warderi a bigi grani di den abi foe doe a Kresten diniwroko (Kolosesma 4:17; 2 Timoteus 4:5). Begi na wan sani di den e doe doronomo na ini den libi (Romesma 12:12). Èn den ’e loekoe boen fa den e waka, no leki sma di no koni, ma leki koni sma’ (Efeisesma 5:15). Den no e òfer goedoe na jeje fasi foe kisi materia goedoe di de gi wan sjatoe ten nomo noso gi takroe lostoe foe a skin (Mateus 6:19, 20; 1 Johanes 2:15-17). Boiti dati, a de prenspari foe de loyaal na Jehovah èn foe froetrow na en tapoe (2 Korentesma 1:9; 10:5; Efeisesma 4:24). Foe san ede? Bika a situwâsi foe wi de pikinmoro a srefi leki di foe na owroeten Israèl.
A de di a de fanowdoe foe abi froetrow èn foe de loyaal
3. Foe san ede loyaalfasi, bribi, nanga froetrow sa jepi wi foe tan waka a pasi foe Jehovah?
3 Israèl ben de wan pikin nâsi di ben de na mindri takroe birtikondre di ben doe seremonia di abi foe doe nanga seks hoeroedoe na ini na anbegi foe kroektoe gado (1 Kroniki 16:26). Israèl wawan ben dini a wán troe Gado di sma no man si, Jehovah, èn A ben aksi foe den taki den moesoe hori densrefi na hei moreel markitiki (Deuteronomium 6:4). A de a srefi na ini a ten disi, bika soso wan toe miljoen sma e anbegi Jehovah, èn den e libi na ini wan grontapoe di abi pikinmoro siksi miljard sma di abi markitiki nanga relisi denki di e difrenti srefisrefi foe di foe den. Efoe wi de na ini a groepoe disi foe wan toe miljoen sma, dan wi moesoe loekoe boen taki sani no abi wan takroe krakti na wi tapoe. Fa? Loyaalfasi gi Jehovah Gado, bribi na ini en, èn wan tranga froetrow taki a sa doe den sani di a pramisi, sa jepi wi (Hebrewsma 11:6). Disi sa tapoe wi foe no froetrow na tapoe den sani di grontapoe e froetrow na tapoe. — Odo 20:22; 1 Timoteus 6:17.
4. Foe san ede den nâsi de „na doengroe na froestan sei?”
4 Na apostel Paulus ben sori o difrenti Kresten moesoe de foe grontapoe, di a ben skrifi: „Disi mi e taki foe dati ede èn mi e kotoigi ini Masra, taki oenoe no waka moro neleki fa den nâsi e waka toe ini a sosofasi foe a denki foe den, ala di den de na doengroe na froestan sei èn den drifi komoto foe a libi di de foe Gado, foe di den no abi sabi na ini den, foe di na ati foe den no abi firi” (Efeisesma 4:17, 18). Jesus na „a troe leti” (Johanes 1:9). Iniwan sma di no e erken en noso di e froeklari taki a e bribi na ini en, ma no e gi jesi na „a wet foe Krestes” de na ini „doengroe na froestan sei”. Den no e waka a pasi foe Jehovah srefisrefi, ma den „drifi komoto foe a libi di de foe Gado”. Awansi o koni den prakseri taki den de akroederi grontapoe, tokoe den „no abi sabi” foe a wan-enkri koni di e gi libi, a sabi foe Jehovah Gado nanga foe Jesus Krestes. — Johanes 17:3; 1 Korentesma 3:19.
5. Foe san ede foeroe ati no e doe wan sani na tapoe a waarheid, ala di a leti foe waarheid e skèin na grontapoe?
5 Tokoe a leti foe waarheid e skèin na grontapoe troetroe! (Psalm 43:3; Filipisma 2:15) „A troe koni srefi e tan bari tranga na tapoe strati srefi” (Odo 1:20). A jari di pasa, den Kotoigi foe Jehovah gebroiki moro leki wán miljard joeroe foe froeteri tra sma foe Jehovah Gado èn foe Jesus Krestes. Hondro doesoendoesoen sma ben handri na tapoe dati. Ma a moesoe froewondroe wi taki foeroe tra sma no e handri na tapoe? Nôno. Paulus ben taki dati „na ati foe den no abi firi”. Son wan foe den abi ati di no e jere, bika foe a prakseri di den e prakseri densrefi nomo, noso foe di den lobi moni. Falsi relisi noso a grontapoe fasi foe si sani èn di de na ala presi tide, ben abi krakti na tapoe tra sma. Moeilek situwâsi di foeroe sma ondrofeni na ini a libi, meki den drai den baka gi Gado. Trawan e weigri foe libi akroederi den hei moreel markitiki foe Jehovah (Johanes 3:20). A kan taki na ati foe wan sma di e waka a pasi foe Jehovah, kan tron wan ati di no abi firi na den fasi disi?
6, 7. Na sortoe okasi den Israèlsma ben fadon gowe ala di den ben de anbegiman foe Jehovah Gado, èn foe san ede?
6 Disi ben pasa nanga na owroeten Israèl, soleki fa Paulus ben sori. A ben skrifi: „Den sani disi now, ben tron eksempre gi wi, foe wi no de sma di o angri foe doe ogri sani, soleki fa den ben angri foe dati. No tron sma toe di e anbegi kroektoe gado, soleki fa sonwan foe den ben doe, neleki fa a skrifi: ’A pipel ben sidon njan èn dringi, èn den ben opo meki prisiri.’ No meki wi doe hoeroedoe toe, soleki fa sonwan foe den ben doe hoeroedoe, nanga a wan-enkri bakapisi taki den ben fadon, toetenti na dri doesoen foe den tapoe wán dei.” — 1 Korentesma 10:6-8.
7 Paulus e taki fosi foe na okasi di Israèl ben anbegi wan gowtoe pikin kaw na a foetoe foe a Sinai bergi (Exodus 32:5, 6). Disi ben de wan langalanga trangajesi teige wan komando foe Gado di den ben agri foe gi jesi na dati wan toe wiki nomo na fesi (Exodus 20:4-6; 24:3). Dan Paulus e taki foe a ten di Israèl makandra nanga den oemapikin foe Moab ben boigi gi Bâ-al (Numeri 25:1-9). Na anbegi di sma ben e anbegi pikin kaw ben abi foe doe so srefi nanga a satisferi di sma ben satisferi den lostoe foe den na wan takroe fasi, ’èn ben abi wan boen ten’.a Na anbegi foe Bâ-al ben abi foe doe nanga fajafaja seks hoeroedoe (Openbaring 2:14). Foe san ede den Israèlsma ben doe den sondoe disi? Bika den ben meki den ati kon „angri foe doe ogri sani” — awansi a ben de na anbegi foe kroektoe gado, noso den seks hoeroedoe di ben doe nanga dati.
8. San wi kan leri foe den sani di Israèl ben ondrofeni?
8 Paulus ben sori taki wi moesoe leri wan sani foe den sani disi di ben e pasa. San wi moesoe leri foe disi? Wi no man prakseri taki wan Kresten ben o boigi gi wan gowtoe pikin kaw noso gi wan owroeten gado foe den Moabietsma. Ma fa a de nanga hoeroedoe noso a satisferi di wan sma e satisferi en eigi lostoe pasa marki? Den sani disi na aladei sani na ini a ten disi, èn efoe wi e gi na okasi foe meki wan lostoe gi den sani disi gro na ini wi ati, dan den sa meki wi drifi komoto na Jehovah. A bakapisi sa de a srefi leki te wi ben anbegi kroektoe gado — taki wi drifi komoto na Gado. (Teki gersi Kolosesma 3:5; Filipisma 3:19.) Ija, Paulus e tapoe en takimakandra foe den sani dati di ben pasa, nanga a froemane di a e gi en kompe bribiman: „lowe gi na anbegi foe kroektoe gado.” — 1 Korentesma 10:14.
Jepi de foe waka a pasi foe Gado
9. (a) Sortoe jepi wi kisi foe tan waka a pasi foe Jehovah? (b) San na wán fasi fa wi e jere a ’wortoe na wi baka’?
9 Efoe wi abi a fasti bosroiti foe waka a pasi foe Jehovah, dan wi no de sondro jepi. Jesaja ben taki na fesi: „Oen eigi jesi sa jere wan wortoe na oen baka di e taki: ’Disi na a pasi. Waka na tapoe, oen pipel’, efoe oenoe moesoe go na oen reti-anoesei noso efoe oenoe moesoe go na oen kroektoe-anoesei” (Jesaja 30:21). Fa den ’eigi jesi foe wi’ e jere a ’wortoe dati na wi baka’? We, no wan sma na ini a ten disi e jere wan troetroe sten, noso e kisi wan persoonlijk boskopoe foe Gado. A „wortoe” di sma e jere e kon na wi alamala na a srefi fasi. Na a fosi presi èn moro prenspari, a e kon foe den Boekoe foe Bijbel di skrifi nanga jepi foe Gado santa jeje, èn di abi den prakseri foe Gado na ini èn wan verslag foe a fasi fa a ben handri nanga libisma. Foe di ibridei wi e jere propaganda foe sma di „drifi komoto na a libi di de foe Gado”, meki wi moesoe leisi Bijbel èn prakseri dipi foe en doronomo so taki wi kan abi wan boen gosontoe na jeje fasi. Disi sa jepi wi foe no doe „soso sani” èn foe de „srekasreka dorodoro gi ibri boen wroko” (Tori foe den Apostel 14:14, 15; 2 Timoteus 3:16, 17). A sa tranga wi, a sa gi wi krakti, èn a sa jepi wi ’foe meki wi pasi waka boen’ (Josua 1:7, 8). Foe dati ede Jehovah Wortoe e gi wi a deki-ati: „Now, o oen manpikin, arki na mi; ija, kolokoe den sma de di e hori mi pasi. Gi jesi na trangaleri èn kon koni, èn no sori taki joe no e poti nofo prakseri na tapoe sani.” — Odo 8:32, 33.
10. San na a di foe toe fasi fa wi e jere a ’wortoe na wi baka’?
10 A ’wortoe di de na wi baka’ e kon toe nanga jepi foe „a getrow èn koni srafoe” di e gi „njanjan na a reti ten” (Mateus 24:45-47). Wan fasi fa a njanjan disi e gi, de nanga jepi foe Bijbel poeblikâsi di druk, èn na ini den jari di pasa no so langa ete, a njanjan disi ben de bogobogo. Foe eksempre, nanga jepi foe a Waktitoren tijdschrift, wi kon froestan den profeititori moro boen. Na ini a tijdschrift disi wi kisi a deki-ati foe horidoro na ini a preikiwroko èn a wroko foe meki disipel ala di moro foeroe sma abi wan mi-no-ke fasi, èn wi kisi jepi foe no fadon na ini trapoe, èn wi kisi a deki-ati foe kweki boen Kresten eigifasi. Wi e warderi den njanjan dati srefisrefi di wi e kisi na a joisti ten!
11. Kari a di foe dri fasi fa wi kan jere a ’wortoe na wi baka’.
11 A getrow èn koni srafoe e gi njanjan toe nanga jepi foe den doronomo konmakandra foe wi. Disi na den gemeente konmakandra, den kringkonmakandra di wi abi toe leisi na ini wan jari, èn den moro bigi alajari Kongres. Sortoe getrow Kresten no e warderi den konmakandra disi? Den de wan prenspari jepi foe horibaka gi wi te wi e waka a pasi foe Jehovah. Foe di moro foeroe foe wi moesoe gebroiki foeroe ten na wroko noso na skoro, makandra nanga den wan di no abi a srefi bribi leki wi, meki doronomo Kresten demakandra de wan sani di e kibri wi libi troetroe. Den konmakandra e gi wi wan boen okasi „foe gi makandra deki-ati foe sori lobi èn doe boen wroko” (Hebrewsma 10:24). Wi lobi wi brada, èn wi lobi foe abi demakandra nanga den. — Psalm 133:1.
12. Sortoe fasti bosroiti den Kotoigi foe Jehovah abi, èn fa den ben sori en no so langa pasa?
12 Foe di den njanjan disi na jeje fasi e tranga den, meki pikinmoro siksi miljoen sma na ini a ten disi e waka a pasi foe Jehovah, èn foeroe miljoenmiljoen tra sma e studeri Bijbel foe leri fa foe waka a pasi foe Jehovah. Den e lasi-ati noso e kon swaki foe di den de weiniki nomo te joe teki den gersi den miljardmiljard sma di e libi na heri grontapoe? Kwetikweti! Den abi a fasti bosroiti foe tan arki a ’wortoe na den baka’, èn na wan loyaal fasi den e doe a wani foe Jehovah. Foe sori na poebliki taki den abi a fasti bosroiti disi, meki na tapoe den „Gado pasi foe libi” Distrikt Kongres nanga Internationaal Kongres foe a jari 1998/1999, den sma di ben de drape ben teki wan resolutie di e sori a bosroiti di den teki nanga den ati. Now wi sa gi oenoe den wortoe foe a resolutie dati.
Resolutie
13, 14. Sortoe krin denki Kotoigi foe Jehovah abi foe a situwâsi na ini grontapoe?
13 „Wi, leki Kotoigi foe Jehovah di kon makandra na a „Gado pasi foe libi”-Kongres, e agri nanga wi heri ati taki a pasi foe Gado na a moro boen fasi foe libi. Ma wi e erken taki a moro bigi pisi foe a libisma famiri na ini a ten disi e denki tra fasi. A libisma libimakandra proeberi kaba nanga jepi foe foeroe idea, filosofia nanga relisi idea foe seti a moro boen fasi foe libi. Te wi e loekoe a libisma historia nanga a situwâsi na grontapoe na wan eerlijk fasi, dan dati e sori taki den sani di Gado taki èn di skrifi na ini Jeremia 10:23 troe: „A no de na wan man di e waka, srefi foe bepaal pe foe poti en foetoe na pasi.”
14 Ibri dei wi e si moro boeweisi di e sori taki den wortoe dati troe. A moro bigi pisi foe a libisma libimakandra no e poti prakseri na Gado pasi foe libi. Sma e feti na baka sani di gersi leki den reti na ini den eigi ai. Den bakapisi de wan sari sani — a broko di osofamiri libi e broko, pe sma e gowe libi pikin sondro taki den pikin abi tiri; a feti di sma e feti nomo na baka materia goedoe, di abi leki bakapisi taki sma no de kolokoe èn e kon broeja; a takroedoe nanga ogri di e doe nanga tranga èn di de wan soso sani èn di e kiri someni sma; den etnisch strei nanga feti pe kefalek foeroe sma e lasi den libi; foe di hoeroedoe e kon moro nanga moro, meki siki di e kon foe seks e panja na ala sei. Disi na soso wan toe foe den kefalek foeroe dangra problema di de na sma pasi ini a soekoe di den e soekoe kolokoe, vrede nanga seikerfasi.
15, 16. Sortoe fasti bosroiti ben teki na ini a resolutie, di abi foe doe nanga Gado pasi foe libi?
15 Nanga a sari situwâsi foe a libisma famiri na prakseri, nanga na „orlokoe foe a bigi dei foe Gado na Almaktiwan”, di Bijbel e kari Armagedon èn di de krosibei (Openbaring 16:14, 16), meki wi leki Kotoigi foe Jehovah e teki a bosroiti taki:
16 Na a fosi presi: Wi e si wisrefi leki sma di de foe Jehovah Gado, di ibriwan foe wi gi wisrefi abra na en sondro foe poti kondisi, èn wi sa tan abi bribi di no e seki ini a loesoe-paiman di Jehovah seti nanga jepi foe en Manpikin, Jesus Krestes. Wi abi a fasti bosroiti foe waka na tapoe Gado pasi foe libi èn dini en leki Kotoigi foe en èn saka wisrefi na ondro en soevereiniteit di a sori nanga jepi foe a tirimakti foe Jesus Krestes.
17, 18. Sortoe posisi den Kotoigi foe Jehovah sa tan abi, di abi foe doe nanga moreel markitiki èn nanga a Kresten bradafasi?
17 A di foe toe: Wi sa tan hori na den hei moreel markitiki nanga den jeje markitiki foe Bijbel. Wi abi a fasti bosroiti foe no waka leki fa den nâsi e waka ini a sosofasi foe a denki foe den (Efeisesma 4:17-19). A de a bosroiti foe wi foe tan krin na fesi Jehovah èn no meki grontapoe flaka wi. — Jakobus 1:27.
18 A di foe dri: Wi sa hori steifi na a posisi di wi abi èn di gron na tapoe Bijbel leki wan Kresten bradafasi di de na heri grontapoe. Wi sa tan neutraal leki Kresten na mindri den nâsi èn no gi wisrefi pasi taki wi e fadon na ini a trapoe foe bita-ati noso pratifasi ini a tori foe ras, kondre noso etnisch groepoe.
19, 20. (a) San Kresten papa nanga mama sa doe? (b) Fa ala troe Kresten sa tan sori taki den na disipel foe Krestes?
19 A di foe fo: Wi, di de papa nanga mama, sa poti a pasi foe Gado go dipi na ini den pikin foe wi. Wi sa poti wan eksempre ini a Kresten fasi foe libi, di wani taki toe foe leisi Bijbel doronomo, studeri nanga na osofamiri, èn abi wan prati nanga wi heri ati na ini a Kresten gemeente èn na ini a preikiwroko.
20 A di foe feifi: Wi alamala sa meki moeiti foe kweki den eigifasi di wi Kriaman e sori, èn wi sa meki moeiti foe waka na baka a fasi fa a de èn den pasi foe en, soleki fa Jesus ben doe dati (Efeisesma 5:1). Wi teki a bosroiti foe meki ala den afersi foe wi feni presi na wan lobi-ati fasi, èn na a fasi dati wi e meki sma kon sabi wi leki disipel foe Krestes. — Johanes 13:35.
21-23. San den Kotoigi foe Jehovah sa tan doe, èn sortoe tranga overtoigi den abi?
21 A di foe siki: Sondro foe tapoe, wi sa go doro foe preiki a boen njoensoe foe Gado Kownoekondre èn meki disipel, èn wi sa leri den, Gado pasi foe libi èn gi den deki-ati foe kisi moro leri na den gemeente konmakandra. — Mateus 24:14; 28:19, 20; Hebrewsma 10:24, 25.
22 A di foe seibi: Leki aparti sma èn leki wan relisi organisâsi, wi sa tan poti a wani foe Gado na a fosi presi na ini wi libi. Foe di wi e gebroiki en Wortoe, Bijbel, leki wi tjariman, meki wi no sa go na reti-anoesei noso na kroektoe-anoesei, èn na so fasi wi e sori taki a pasi foe Gado hei krinkrin moro leki den pasi foe grontapoe. Wi abi a fasti bosroiti foe tan waka Gado pasi foe libi — na wan serjoesoe fasi èn na wan loyaal fasi, nownow èn foe têgo!
23 Wi e teki a bosroiti disi foe di wi e froetrow dorodoro tapoe a pramisi di Jehovah gi na wan lobi-ati fasi taki a sma di e doe a wani foe Gado, e tan foe têgo. Wi e teki a bosroiti disi foe di wi abi na overtoigi taki, te wi e libi akroederi den gronprakseri, den rai nanga den froemane foe Bijbel, taki dati na a moro boen fasi foe libi na ini a ten disi èn a e poti wan boen fondamenti gi a tamara, so taki wi kan hori a troetroe libi steifi (1 Timoteus 6:19; 2 Timoteus 4:7b, 8). Ma a moro prenspari sani foe san ede wi e teki a bosroiti disi, na foe di wi lobi Jehovah Gado nanga wi heri ati, sili, froestan nanga krakti!
24, 25. San ben de a piki na tapoe a resolutie di ben gi, èn san na a fasti bosroiti foe den wan di e waka a pasi foe Jehovah?
24 Ala sma di de djaso na a Distrikt Kongres disi di e horibaka gi a bosroiti disi, grantangi taki IJA!
25 Den hondrohondro arena nanga stadium na heri grontapoe ben seki di ala sma di ben de drape ben e piki nanga wan tranga sten „IJA!” Den Kotoigi foe Jehovah de seiker taki den sa tan waka a pasi foe Jehovah. Den e froetrow dorodoro tapoe Jehovah èn e bribi taki a sa meki den pramisi foe en kon troe. Den e tan loyaal na en, awansi san e pasa. Èn den abi a fasti bosroiti foe doe a wani foe en.
„Gado de nanga wi”
26. Na ini sortoe moi situwâsi den wan de di e waka a pasi foe Jehovah?
26 Den Kotoigi foe Jehovah e memre a froemane foe a psalm singiman: „Howpoe tapoe Jehovah èn hori a pasi foe en, èn en sa hei joe so taki joe kan kisi grontapoe” (Psalm 37:34). Den no e frigiti den wortoe foe Paulus di e gi deki-ati: „Efoe Gado de nanga wi, dan soema sa de teige wi? En di no ben kibri en eigi Manpikin srefi, ma di ben gi en abra gi wi alamala, èn foe san ede makandra nanga en a no ben sa gi wi ala tra sani na wan switi fasi?” (Romesma 8:31, 32) Ija, efoe wi e tan waka a pasi foe Jehovah, dan a sa gi wi „ala sani bogobogo foe prisiri foe den” (1 Timoteus 6:17). Wan moro boen presi leki pe wi de, no de — ala di wi e waka a pasi foe Jehovah, na sei den lobi brada nanga sisa foe wi. Nanga Jehovah na wi sei, meki wi abi a fasti bosroiti foe tan drape èn horidoro te na a kaba, nanga a tranga froetrow taki na a reti ten foe en, wi sa si te A e meki ibriwan foe den pramisi foe en kon troe. — Titus 1:2.
[Foetoewortoe]
a Wan man di e gi froeklari e taki foe a Griki wortoe di vertaal nanga „abi wan boen ten”, taki a e taki foe den dansi di sma ben dansi na den heiden fesa èn a e taki toe: „Soleki fa wi sabi, foeroe foe den dansi disi ben doe foe wiki den moro takroe seks lostoe.”
Joe e memre disi ete?
◻ San wan Kresten moesoe doe foe waka a pasi foe Jehovah?
◻ Foe san ede wi moesoe kweki froetrow tapoe Jehovah èn de loyaal na en?
◻ Sortoe jepi wi abi foe waka a pasi foe Jehovah?
◻ Gi wan toe heimarki foe a resolutie di ben teki na den „Gado pasi foe libi”-Kongres.
[Prenki na tapoe bladzijde 18]
Den ben teki wan prenspari resolutie na den „Gado pasi foe libi” Distrikt nanga Internationaal Kongres