Tranga a bribi di wi abi na ini a Wortoe foe Gado
MORO sma leisi bijbel leki iniwan tra boekoe. Ma omeni sma sori bribi na ini a boskopoe foe bijbel? Bijbel srefi e tjari kon na krin taki „a no ala sma abi bribi” (2 Tesalonikasma 3:2). A de krin taki wi no gebore nanga bribi. Wi moesoe kweki en safrisafri. Srefi den wan di abi bribi kaba no moesoe si en leki wan gewoon sani. Bribi kan go na baka èn dede. Foe dati ede moeiti de fanowdoe foe tan „gosontoe ini bribi”. — Titus 2:2.
Dati meki nanga boen reide a Tiri Skin foe Jehovah Kotoigi ben teki a thema „Bribi na ini Gado Wortoe” gi den 1997/98 serie distriktkongres. Na so wan fasi miljoenmiljoen Kotoigi nanga tra sma kisi a grani foe kon makandra foe tranga a bribi di den abi na ini a Wortoe foe Gado.
Gado Wortoe na waarheid — A fondamenti foe wi bribi
Disi ben de a thema foe a fosi dei foe a kongres. A ben bigin nanga wortoe foe prèise ala sma di ben de drape. A de di sma ben de na a kongres ben sori taki den ben lespeki bijbel. Ma den ben poti aksi di e poti sma na prakseri di abi foe doe nanga a kwaliteit foe a bribi foe wi: ’Wi man horibaka gi den sani di wi e bribi, foe di wi e gebroiki Gado Wortoe leki tiri? Wi e sori warderi gi njanjan na jejefasi, foe di noiti wi e si bijbel, den gemeente konmakandra nanga den poeblikâsi di abi den gron tapoe bijbel, leki gewoon sani? Wi e gro ini lobi, soifri sabi nanga a koni foe man si sani krin?’ A takiman ben gi ala sma a deki-ati foe arki heri boen, èn ben taki dati „a ’Bribi na ini Gado Wortoe’-distriktkongres disi, sreka foe jepi wi foe ondrosoekoe wisrefi finifini èn foe ondrosoekoe o foeroe èn sortoe bribi wi leki aparti sma abi.”
A thema taki ben nen „Waka nanga bribi, no nanga a si foe sani” (2 Korentesma 5:7). „A bribi foe den wan di tron Kotoigi foe Jehovah, a no wan bribi di e bribi ala sani”, a takiman ben taki. Disi de troe srefisrefi! Opregti bribi no breni. A abi en gron tapoe troetroe sani. Hebrewsma 11:1 e taki: „Bribi na a seiker froewakti foe sani di wan sma e howpoe na tapoe, a krin boeweisi foe troe sani, ma di sma no e si.” A takiman ben taki: „Efoe troetroe wi e go waka nanga bribi, dan wi abi bribi fanowdoe di abi wan boen fondamenti.” Foe di wi e waka nanga bribi, èn no nanga a si foe sani, dan wi no abi finifini tori fanowdoe foe a fasi fa èn o ten Jehovah sa doe ala sani di abi foe doe nanga en prakseri. Den sani di wi sabi kaba foe en e gi wi ala froetrow na ini en krakti foe meki den sani di a ben pramisi kon troe na wan lobi-ati fasi èn na wan regtfardiki fasi.
A lezing „Kresten jongoewan — Wan prenspari pisi foe a gemeente” ben memre den jongoewan o warti den de gi Jehovah. Den ben kisi a deki-ati foe gro na jejefasi foe di den e feti na baka den marki soleki foe leisi a heri bijbel èn foe doro den markitiki foe gi densrefi abra na Gado èn teki dopoe. A teki di wan sma wani teki moro leri, na wan persoonlijk bosroiti di a sma srefi moesoe teki nanga en papa nanga mama, ma efoe den e teki a bosroiti foe doe dati, dan a marki moesoe de ala ten foe de srekasreka foe dini Gado moro boen. Grontapoe leri kan de gi wan boen marki te wi „kon sabi seiker san na den moro prenspari sani” di abi foe doe nanga wi bribi. — Filipisma 1:9, 10.
Baka dati wan symposium foe dri lezing ben kon nanga a thema „Den markitiki foe soema joe e hori?” Bribi na ini Gado Wortoe e boeweigi wi foe hori wisrefi na den markitiki foe bijbel. Kresten e gi jesi na den wet nanga gronprakseri foe Jehovah. Foe eksempre, den Boekoe foe bijbel e froemane wi foe no gebroiki dotitaki nanga skempi taki (Efeisesma 4:31, 32). A takiman ben aksi: „Te wan sani e froeferi joe noso e tanteri joe, joe e bari èn kosi joe patna noso den pikin foe joe?” Nôno, a no de foe taki, dati no ben sa de wan kresten fasi foe doe sani. Gado abi markitiki toe di abi foe doe nanga a fasi fa wi e weri. Kresten moesoe weri „krin krosi, nanga bescheidenfasi” (1 Timoteus 2:9, 10). A wortoe „bescheidenfasi” e tjari a prakseri foe na abi di wan sma abi lespeki gi ensrefi, wan firi foe wartifasi, krin froestan, nanga bescheidenfasi. Lobi gi tra sma e boeweigi wi, èn bijbel gronprakseri nanga wan firi foe san fiti e tiri wi.
Den toe tra lezing ben poti prakseri tapoe Hebrewsma 3:7-15 nanga 4:1-16 vers foe vers. Den pisi disi foe bijbel e warskow wi gi a kefar taki „a bedrigi krakti foe sondoe . . . tranga na ati foe . . . foe [wi]” (Hebrewsma 3:13). Fa wi kan wini a feti di wi e feti nanga sondoe? Jehovah e jepi wi nanga jepi foe en Wortoe. Ija, „a wortoe foe Gado de libilibi èn a abi krakti èn . . . a man foe si krin san na ati e denki èn abi na prakseri”. — Hebrewsma 4:12.
A lasti lezing na a fosi dei foe a kongres ben de „Wan boekoe gi ala sma”. A lezing ben poti krakti tapoe a troefasi, a soifrifasi nanga a praktis waarde foe bijbel. Fa wi ben prisiri foe jere a takiman meki bekènti taki wan njoen brochure foe 32 bladzijde di nen Een boek voor alle mensen! (Wan boekoe gi ala sma!), tjari kon na doro. A njoen poeblikâsi disi ben sreka spesroetoe gi sma di, ala di den kisi leri, sabi pikinso foe bijbel. A lezing ben bosroiti nanga den wortoe: „Sma moesoe ondrosoekoe a Wortoe foe Gado gi densrefi. Wi abi a froetrow taki efoe den e meki wan ondrosoekoe densrefi, dan den sa kon sabi taki na aparti boekoe disi, bijbel, troetroe na wan boekoe gi ala sma!”
Waka baka a „Sma di e meki a bribi foe wi kon boen dorodoro”
A thema disi foe a di foe toe dei foe a kongres ben poti prakseri tapoe Jesus Krestes, a „Sma di e meki a bribi foe wi kon boen dorodoro”. Wi moesoe „waka soifri na ini en foetoestap” (Hebrewsma 12:2; 1 Petrus 2:21). Den e taigi foeroe sma na ini krestenhèit: ’Bribi na ini Masra Jesus, èn joe sa kisi froeloesoe!’ Ma dati na ala san bribi wani taki? Bijbel e froeklari taki „bribi sondro wroko, dede” (Jakobus 2:26). Foe dati ede, boiti taki wi e bribi na ini Jesus, wi moesoe doe den wroko di a ben doe, spesroetoe foe preiki a boen njoensoe foe Gado en Kownoekondre.
A mamanten programa ben poti prakseri tapoe na evangelie wroko. Wi moesoe de fajafaja foe meki a boen njoensoe foe froeloesoe bekènti neleki Paulus (Romesma 1:14-16). Jesus ben preiki gi sma na ala presi. Ala di na oso-foe-oso wroko di wi gwenti doe e tjari boen bakapisi kon, tokoe moro nanga moro sma no de na oso te wi e fisiti den (Tori foe den Apostel 20:20). Foeroe sma de na skoro, e wroko, e go bai sani na wenkri, noso e rèis. Foe dati ede wi moesoe preiki na poebliki presi toe èn awansi pe wi kan feni sma.
A lezing „Meki roetoe èn kon stanfaste na ini waarheid” ben memre wi foe a bigi nomroe foe njoen disipel di e teki dopoe — wan gemiddelde foe moro leki 1000 ala dei! A de prenspari taki den njoen sma disi meki boen roetoe èn kon stanfaste na ini bribi (Kolosesma 2:6, 7). A takiman ben tjari kon na krin taki den troetroe roetoe e soigi watra nanga njanjan, ala di den e sorgoe toe foe hori a prani steifi noso horibaka gi a prani. Na so a de toe, taki njoen disipel kan kon stanfaste na ini waarheid nanga jepi foe boen gwenti foe studeri èn nanga boen demakandra.
A rai disi ben fiti spesroetoe gi den sma di ben teki dopoe. Ija, na a di foe toe dei foe a kongres, bigi groepoe foe njoen disipel ben teki dopoe, foe di den e waka baka na eksempre foe Jesus. A lezing „Bribi na ini Gado Wortoe e meki wan sma e teki dopoe” ben memre den sma di ben teki dopoe taki a doekroen di den doekroen den go na ondro watra, na wan boen simbôl foe a dede di den dede ini a fasi fa den ben libi fosi ala di den ben prakseri densrefi nomo. Na opo di den opo baka komoto na ini a watra, wani taki a kon di den e kon na libi baka foe doe a wani foe Gado.
A lezing „Feti wan tranga feti gi a bribi” ben abi en gron tapoe a bijbelboekoe Judas. Wi ben kisi a deki-ati foe kibri a bribi foe wi foe di wi e kakafoetoe gi krakti di kan doe wi ogri, soleki hoeroedoe, a meki di sma e meki oproeroe, nanga a fadon di sma e fadon komoto na bribi. Baka dati, papa nanga mama — spesroetoe den papa — ben kisi spesroetoe prakseri na ini a lezing „Sorgoe gi joe osofamiri”. A sorgoe di wan sma e sorgoe gi den sani di na osofamiri abi fanowdoe na skin sei, na jeje sei èn na emotioneel sei, na wan plekti di komoto foe bijbel (1 Timoteus 5:8). A sani disi e aksi ten, komunikâsi nanga krosibei matifasi. Jehovah Gado e prisiri troetroe nanga ala a tranga wroko di kresten papa nanga mama e doe foe kweki den pikin foe den na ini waarheid.
A tra symposium, „Meki wi go na a oso foe Jehovah”, ben bow warderi gi kresten konmakandra. Den e gi wi kibri foe den broko-ede foe a grontapoe disi. Na den konmakandra wi abi na okasi foe gi makandra deki-ati, èn wi kan sori a lobi di wi abi gi den kompe bribiman foe wi (Hebrewsma 10:24, 25). Den konmakandra e jepi wi toe foe srapoe den bekwaamfasi foe wi leki leriman, èn den e meki wi froestan den sani di Gado abi na prakseri moro dipi (Odo 27:17). Meki a de so, taki noiti wi e hori wisrefi aparti foe a gemeente, èn meki wi prakseri den wortoe foe Jesus: „Pe toe noso dri sma e kon makandra na ini mi nen, na drape mi de na den mindri.” — Mateus 18:20.
A lasti lezing foe a dei ben de „Na kwaliteit foe joe bribi — A e kisi tesi now”. Bribi di no kisi tesi no abi boeweisi taki a warti, èn wi no sabi a kwaliteit foe en. A de leki wan sjèk di joe no kisi a moni foe en ete. A abi troetroe a waarde foe a moni di skrifi na tapoe? Na a srefi fasi a de so toe, taki a bribi foe wi moesoe kisi tesi foe sori taki a de wan sani èn taki a de foe boen kwaliteit (1 Petrus 1:6, 7). A takiman ben taki: „Son tron den kerki tiriman nanga sma di fadon komoto na bribi e kori den njoensoeman nanga den tirimakti toe, foe gi wi porinen, foe di den e taki foe a kresten bribi nanga a fasi foe libi foe wi na wan fasi di no troe. . . . Wi sa gi pasi meki den sma di Satan meki kon breni, tapoe skreki gi wi èn meki wi lasi-ati èn meki wi e firi sjen foe a boen njoensoe? Wi sa gi pasi meki leitori di sma e taki foe a waarheid abi krakti tapoe a go di wi e go doronomo na den konmakandra nanga a preikiwroko foe wi? Noso wi sa tanapoe kánkan èn abi deki-ati èn abi a fasti bosroiti moro leki oiti foe go doro foe meki a waarheid foe Jehovah nanga en Kownoekondre bekènti?”
Libi foe bribi ede
A thema foe a di foe dri dei foe a kongres ben abi en gron tapoe den wortoe foe Paulus: „A de krin taki nanga jepi foe a wet den no e froeklari no wan sma regtfardiki na Gado, bika ’a regtfardiki sma sa libi foe bribi ede’ ” (Galasiasma 3:11).A symposium, „Den profeitiwortoe foe Joèl gi a ten foe wi”, ben de wan foe den heimarki foe a mamanten. A boekoe Joèl e sori go na a ten foe wi nanga a firi taki a de toemoesi prenspari: „Ke foe a dei; bika a dei foe Jehovah de krosibei, èn leki na ogri pori di e kon foe na Almaktiwan, a sa kon!” (Joèl 1:15) Na a srefi fasi leki di foe den sprenka di sma no man stòp, salfoe kresten no meki noti tapoe a meki di den e meki a Kownoekondre bekènti na ini a ten disi foe a kaba.
A boekoe Joèl e gi howpoe toe, taki: „Ibriwan sma di e kari a nen foe Jehovah, sa kisi kibri” (Joèl 2:32). Disi wani taki moro leki foe gebroiki a nen foe Jehovah nomo. A de fanowdoe foe abi opregti berow, èn disi wani taki toe foe drai wi baka gi ogridoe (Joèl 2:12, 13). Ten no de foe draidrai, bika heri esi Jehovah sa tjari kroetoe kon tapoe den nâsi, neleki fa a ben tjari kroetoe kon tapoe Moab, Amon, nanga a bergi kontren foe Se-ir na ini den dei foe kownoe Josafat foe Juda. — 2 Kroniki 20:1-30; Joèl 3:2, 12.
Ala sma ben kisi deki-ati nanga a lezing „Sori bribi foe di wi e tan wakti Jehovah”. Now fara na ini a ten foe a kaba, wi kan loekoe baka fa foeroe foe den pramisi foe Jehovah kon troe, èn wi abi troetroe belangstelling gi sani di o pasa ete. A pipel foe Jehovah moesoe tan abi pasensi, èn prakseri taki ala sani di Gado pramisi sa kon troe. — Titus 2:13; 2 Petrus 3:9, 10.
A mamanten programa ben tapoe nanga a drama „Hori joe ai soifri”. A sori di den sori na ini a drama a fasi fa sani de troetroe, ben gi wi deki-ati foe ondrosoekoe a fasi foe denki foe wi ini a tori foe a feti di wi e feti na baka materia sani. Awansi pe wi e libi, efoe wi wani taki a libi foe wi de sondro broko-ede, dan wi moesoe waka baka a rai foe Jesus foe hori wi ai soifri, èn poti wi prakseri krin tapoe a Kownoekondre foe Gado. — Mateus 6:22.
A poebliki taki ben abi a moi nen „Bribi èn a tamara foe joe”. A lezing ben gi boeweisi taki libisma fesiman no man loesoe den problema foe grontapoe (Jeremia 10:23). A historia foe libisma e drai kon ibritron baka — na wan moro bigi fasi èn a e tjari wan moro bigi pori kon. San Jehovah Kotoigi e denki foe a tamara? Wi e bribi taki a getrow libisma famiri abi wan kefalek boen tamara na ondro a Kownoekondre foe Gado (Mateus 5:5). Gado sa meki den pramisi foe en kon troe gi a boen foe ala sma di abi bribi na ini en Wortoe, di e gi a tranga: „Soekoe Jehovah oen pipel, ala di oenoe kan feni en. Kari en, ala di a sori taki a de krosibei.” — Jesaja 55:6.
Jesus ben poti wan prenspari aksi nanga a ten foe wi na prakseri. A ben aksi: „Te a Manpikin foe libisma e doro, a sa feni troetroe a bribi na grontapoe?” (Lukas 18:8) A lasti lezing ben loekoe a kongres programa sjatoe baka èn ben sori fa a programa ben gi krakti boeweisi taki bribi na ini a Wortoe foe Gado de, ala di wi e libi na ini wan grontapoe di no abi bribi èn di relisi no abi krakti na en tapoe.
Tokoe wi leki aparti sma kan aksi wisrefi: ’Mi de na mindri den wan di abi bribi di no e degedege na ini Gado èn na ini en Wortoe?’ A „Bribi na ini Gado Wortoe”-distriktkongres moesoe jepi wi foe piki ija tapoe na aksi dati. Èn fa wi de Jehovah tangi taki a meki a bribi di wi abi na ini en èn na ini en Wortoe, bijbel, di skrifi nanga jepi foe en santa jeje, kon tranga!
[Prenki na tapoe bladzijde 24]
Foeroe friwani wrokoman ben wroko nanga prisiri foe jepi seti sani gi den doesoendoesoen sma di ben kon na den kongres
[Prenki na tapoe bladzijde 25]
Na heri grontapoe den ben gebroiki bigi stadion leki a wan disi
[Prenki na tapoe bladzijde 25]
L. A. Swingle foe a Tiri Skin e tjari a njoen brochure kon na doro
[Prenki na tapoe bladzijde 26]
Foeroe sma ben teki dopoe leki wan simbôl foe a gi di den gi densrefi abra na Jehovah
[Prenki na tapoe bladzijde 27]
Sma di ben de na a kongres ben singi Kownoekondre singi nanga prisiri. Inzet: a drama „Hori joe ai soifri”