A gi di wan sma e gi ensrefi abra na Gado èn a fri di a abi foe bosroiti foe ensrefi
„Gi so wan fri, Krestes ben fri wi”. — GALASIASMA 5:1.
1. Gi san den Hebrew nanga Griki wortoe di vertaal nanga „a gi di wan sma e gi ensrefi abra”, noso „a bigin di wan sani e bigin wroko” gebroiki moro foeroe?
BIJBEL skrifiman ben gebroiki difrenti Hebrew nanga Griki wortoe foe taki foe a de di wan sma de aparti, noso poti aparti, foe dini wan santa marki. Na ini Ingrisitongo bijbel den wortoe disi vertaal nanga wortoe soleki „a gi di wan sma e gi ensrefi abra”, „a bigin di wan sani e bigin wroko”. Son tron den e gebroiki den wortoe disi gi oso — moro foeroe gi a tempel foe Gado na ini na owroeten Jerusalem èn gi na anbegi di ben doe drape. Wanwan leisi nomo den gebroiki den wortoe disi gi afersi di no abi foe doe nanga relisi.
A gi di den gi densrefi abra na „a Gado foe Israèl”
2. Foe san ede den ben kan kari Jehovah nanga reti „a Gado foe Israèl”?
2 Na ini 1513 b.G.T., Gado ben fri den Israèlsma komoto na katibo na ini Egipti. Sjatoe baka dati, a ben poti den aparti leki en spesroetoe pipel, èn ben poti den na ini wan froebontoe foe matifasi nanga ensrefi. A ben taigi den: „Efoe oenoe sa gi jesi soifri na mi sten èn troetroe sa hori mi froebontoe, dan seiker oenoe sa tron mi spesroetoe goedoe na mindri foe ala tra pipel, bika heri grontapoe na foe mi” (Exodus 19:5; Psalm 135:4). Foe di a ben meki den Israèlsma en spesroetoe goedoe, meki nanga reti den ben kan kari Jehovah „a Gado foe Israèl”. — Josua 24:23.
3. Foe san ede Jehovah no ben teki partèi di a ben froekisi Israèl foe de en pipel?
3 Di Jehovah ben meki den Israèlsma tron en pipel di gi densrefi abra na en, dan a no ben de so dati a ben teki partèi, bika na wan lobi-ati fasi a ben prakseri toe foe den sma di no ben de Israèlsma. A ben gi en pipel a rai: „Te wan dorosei-sma e tan nanga oenoe leki dorosei-sma na ini oen kondre, dan oenoe no moesoe handri na wan takroe fasi nanga en. A dorosei-sma di e libi na oen mindri moesoe tron gi oenoe leki wan sma di gebore na ini joe kondre; èn joe moesoe lobi en leki joesrefi, bika oenoe ben tron dorosei-sma di ben libi na a kondre Egipti. Mi na Jehovah, oen Gado” (Lefitikus 19:33, 34). Foeroe jarihondro na baka, na wan krakti fasi Petrus ben kon froestan a fasi fa Gado e denki, èn a ben erken: „Now mi sabi seiker taki Gado no e teki sma partèi, ma na ini ibri nâsi a sma di e frede en èn di e wroko regtfardikifasi, de boen na en.” — Tori foe den Apostel 10:34, 35.
4. San ben de den markitiki gi a matifasi na mindri Gado nanga Israèl, èn a ben de so taki den Israèlsma ben libi akroederi den markitiki dati?
4 Loekoe toe, taki a de di den ben de a pipel foe Gado di ben gi densrefi abra na en, ben anga foe wan toe sani. Soso te den ben gi jesi soifri na a sten foe Gado èn ben hori en komando, dan den ben sa de en „spesroetoe goedoe”. A de wan sari sani taki den Israèlsma no ben handri akroederi den markitiki disi. Na baka di den ben weigri foe erken a Mesias di Gado ben seni kon na ini a fosi jarihondro G.T., dan den ben lasi a posisi foe den di ben de wan spesroetoe grani. Jehovah no ben de „a Gado foe Israèl” moro. Èn den sma di gebore leki Israèlsma no ben de Gado pipel moro di ben gi densrefi abra na en. — Teki gersi Mateus 23:23.
A gi di „na Israèl foe Gado” gi densrefi abra na Gado
5, 6. (a) San Jesus ben wani taki nanga den profeiti wortoe foe en di skrifi na ini Mateus 21:42, 43? (b) O ten èn fa „na Israèl foe Gado” ben kon bèsta?
5 Disi ben wani taki dati Jehovah no ben abi wan pipel moro di gi densrefi abra na en? Nôno. Jesus ben taki na fesi di a ben taki baka san a psalm singiman ben taki: „Noiti oenoe no ben leisi na ini den Boekoe foe bijbel: ’A ston di den bowman ben trowe, na a wan di kon tron a prenspari oekoeston. Foe Jehovah ede disi pasa, èn a de wan toemoesi moi sani na ini wi ai’? Dati meki mi e taigi oenoe: Den sa teki a kownoekondre foe Gado poeroe foe oenoe èn gi en na wan nâsi di e meki den froktoe foe en.” — Mateus 21:42, 43.
6 A „nâsi di e meki den froktoe foe en” ben sori foe de a kresten gemeente. Di a ben tan gi wan pisi ten na grontapoe, Jesus ben teki den fosiwan di ben o de den memre foe a gemeente. Ma tapoe a dei foe a Pinksterfesa 33 G.T., dan a ben de Jehovah Gado srefi di ben seti a kresten gemeente di a ben kanti santa jeje na tapoe den fosi memre foe en, di ben de pikinmoro 120 (Tori foe den Apostel 1:15; 2:1-4). Soleki fa na apostel Petrus ben skrifi baka ten, a gemeente disi di djonsro ben seti, ben tron dan „wan geslakti di den froekisi, wan kownoe priesterwroko, wan santa nâsi, wan pipel di de wan spesroetoe goedoe”. Foe sortoe sani ede Gado froekisi den? So taki den ben moesoe ’meki den moi sani bekènti na ala sei foe a sma di ben kari den poeroe foe doengroe kon na ini en toemoesi moi leti’ (1 Petrus 2:9). Now den bakaman foe Krestes, di salfoe nanga a jeje foe Gado, ben de wan nâsi di gi densrefi abra na en, „na Israèl foe Gado”. — Galasiasma 6:16.
7. San den memre foe na Israèl foe Gado ben sa abi, èn san den ben taigi den foe dati ede taki den no moesoe doe?
7 Ala di den memre foe a santa nâsi ben de „wan pipel di de wan spesroetoe goedoe”, tokoe den no ben moesoe de leki srafoe. Kontrari foe dati, den ben moesoe abi fri moro leki a fri di a natuurlijk nâsi Israèl di gi densrefi abra na Gado ben abi. Jesus ben pramisi den sma di ben o tron memre foe a njoen nâsi disi: „Oenoe sa sabi waarheid, èn waarheid sa meki oenoe kon fri” (Johanes 8:32). Na apostel Paulus ben sori taki kresten ben kon fri foe den sani di a Wet froebontoe ben aksi foe den. Ini a tori disi a ben froemane den kompe bribiman na ini Galasia: „Gi so wan fri, Krestes ben fri. Foe dati ede, tanapoe kánkan, èn no meki den poti wan tjatjari foe katibo baka na oenoe tapoe.” — Galasiasma 5:1.
8. Na sortoe fasi a seti foe den kresten e gi sma moro fri moro leki a fri di ben de na ondro a Wet froebontoe?
8 Tra fasi leki a natuurlijk Israèl foe fositen, te leki now na Israèl foe Gado gi jesi soifri na den markitiki foe a gi di a gi ensrefi abra na En. Disi no moesoe froewondroe wi bika foe densrefi den memre foe en ben bosroiti foe densrefi foe gi jesi. Ala di den memre foe a natuurlijk Israèl ben tron sma di gi densrefi abra akroederi a geborte foe den, den memre foe na Israèl foe Gado ben kon tron dati foe di densrefi ben bosroiti dati. So boen, a seti foe den kresten ben de kontrari foe a Wet froebontoe foe den djoe, di ben meki ibri sma gi densrefi abra sondro foe gi en a fri foe bosroiti dati foe ensrefi.
9, 10. (a) Fa Jeremia ben sori taki wan kenki ben sa de ini a tori foe a gi di wan sma e gi ensrefi abra na Gado? (b) Foe san ede joe ben sa kan taki dati a no ala kresten na ini a ten disi di gi densrefi abra na Gado, de memre foe na Israèl foe Gado?
9 A profeiti Jeremia ben taki na fesi taki wan kenki ben sa kon ini a tori foe a gi di sma ben sa gi densrefi abra na Gado, di a ben skrifi: „Loekoe! Dei e kon”, na so den wortoe foe Jehovah de, „èn foe troe mi sa sroto nanga na oso foe Israèl èn nanga na oso foe Juda wan njoen froebontoe; a no sa de wan leki a froebontoe di mi ben sroto nanga den fositen tata foe den tapoe a dei di mi ben teki den na anoe foe tjari den komoto foe a kondre Egipti,’ a froebontoe foe mi di densrefi ben broko, ala di misrefi ben abi den leki wan trowmasra èn leki goedoe’, na so den wortoe foe Jehovah de.” „Bika disi na a froebontoe di mi sa sroto nanga na oso foe Israèl baka den dei dati”, na so den wortoe foe Jehovah de. „Mi wani poti mi wet na den inisei, èn na ini den ati mi sa skrifi den. Èn mi wani tron a Gado foe den èn den sa tron mi pipel.” — Jeremia 31:31-33.
10 Foe di den abi a wet foe Gado skrifi „na den inisei”, foe taki en so, „na ini den ati”, meki den memre foe na Israèl foe Gado e kisi a firi foe libi akroederi a gi di den gi densrefi abra na en. A firi di den abi foe doe dati, de moro tranga leki di foe den natuurlijk Israèlsma di gi densrefi abra akroederi a geborte foe den, no foe di den ben bosroiti dati foe densrefi. Na ini a ten disi, a tranga firi foe doe a wani foe Gado, soleki fa na Israèl foe Gado e sori dati, de na ini den moro leki feifi miljoen kompe anbegiman na heri grontapoe. Den toe gi densrefi abra na Jehovah Gado foe doe a wani foe en. Ala di den sma disi no abi a howpoe foe libi na hemel soleki fa a de nanga den wan di de na ini na Israèl foe Gado, tokoe den e prisiri na ini a howpoe foe têgo libi na grontapoe na ondro a tiri foe a hemel Kownoekondre foe Gado. Den e sori warderi gi a jeje Israèl foe di fajafaja den e horibaka gi den weiniki memre foe en di tan abra ete, foe di den e doe a wroko foe den foe ’meki den moi sani bekènti na ala sei foe a sma di ben kari den poeroe foe doengroe kon na ini en toemoesi moi leti’.
Gebroiki a fri di Gado gi, na wan koni fasi
11. Sortoe makti Gado ben gi libisma di a ben kria den, èn fa den moesoe gebroiki en?
11 Gado ben kria libisma foe man warderi a fri di den abi. A ben gi den a makti foe wan fri wani. A fosi libisma trowpaar ben gebroiki a fri di den ben abi foe bosroiti foe densrefi. Ma, no na wan konifasi èn sondro lobi, den ben bosroiti wan sani di ben tjari rampoe kon na tapoe den èn so srefi na tapoe den bakapikin foe den. Tokoe, disi e sori krinkrin taki noiti Jehovah e dwengi den kriatoeroe foe en di abi froestan, foe teki wan pasi teige san densrefi e firi èn wani. Èn foe di „Gado lobi wan sma di e gi nanga prisiri”, meki a wan-enkri sortoe gi di wan sma gi ensrefi abra na en, di Gado feni boen, na a wan di abi en gron na tapoe lobi, a wan di a sma doe nanga en eigi wani èn nanga prisiri, di abi gron na tapoe a fri di a abi foe bosroiti foe ensrefi (2 Korentesma 9:7). Iniwan tra fasi leki dati Gado no feni boen.
12, 13. Fa Timoteus de leki wan eksempre foe a kisi di pikin moesoe kisi joisti leri, èn san na eksempre foe en ben meki foeroe jongoe sma doe?
12 Foe di Jehovah Kotoigi e erken a markitiki disi dorodoro, meki den e gi sma deki-ati foe gi densrefi abra na Gado, ma noiti den e dwengi wan sma foe gi ensrefi abra na Gado, no srefi den eigi pikin foe den. Kontrari foe san foeroe kerki e doe, den Kotoigi no e dopoe den pikin foe den leki beibi, neleki taki den ben sa man dwengi den foe gi densrefi abra na Gado sondro taki den pikin srefi bosroiti dati foe densrefi. A bijbel eksempre di wi moesoe waka na baka, na a wan di a jongoe Timoteus ben waka na baka. Di a ben de wan bigisma, na apostel Paulus ben taigi en: „Tan na ini den sani di joe ben leri èn di den ben boeweigi joe foe bribi, foe di joe sabi foe soema joe ben leri den èn taki foe sensi pikin-nengreten joe sabi den santa boekoe, di kan meki joe kon koni foe kisi froeloesoe nanga jepi foe a bribi na ini Krestes Jesus.” — 2 Timoteus 3:14, 15.
13 A de wan moi sani foe si taki Timoteus ben sabi den santa boekoe bika a ben kisi a leri dati foe sensi pikin-nengreten. Den ben boeweigi en — den no ben dwengi en — foe bribi den kresten leri di en mama nanga en granmama ben gi en (2 Timoteus 1:5). Leki wan bakapisi foe dati, Timoteus ben si taki a de wan koni sani foe tron wan bakaman foe Krestes èn foe dati ede a ben bosroiti foe ensrefi foe gi ensrefi abra na Gado leki kresten. Na ini a ten disi, foeroe tindoesoen jonkoeman nanga jongoe oema di abi papa nanga mama di de Jehovah Kotoigi, ben waka na baka na eksempre disi (Psalm 110:3). Trawan no doe dati. A de wan sani di den e bosroiti foe densrefi.
Bosroiti foe de wan srafoe foe soema?
14. San Romesma 6:16 e taigi wi foe a doronomo fri?
14 No wan libisma fri dorodoro. Ibri sma skotoe na ini a fri foe en, bika foe den natoeroe wet soleki a wet foe a zwaartekracht, di wan sma no kan frigiti taki a de sondro foe kisi takroe bakapisi foe dati. So srefi na jejefasi, no wan sma fri dorodoro. Paulus ben taki: „Oenoe no sabi taki te oenoe e tan pristeri oensrefi leki srafoe na wan sma foe gi jesi na en, oenoe na srafoe foe en bika oenoe e gi en jesi, leki srafoe foe sondoe nanga dede leki marki, noso foe di oenoe e gi jesi, nanga regtfardikifasi leki marki?” — Romesma 6:16.
15. (a) Fa sma e denki foe a de di den de srafoe, ma san tokoe foeroe foe den e doe te foe kaba? (b) Sortoe joisti aksi wi ben sa kan poti gi wisrefi?
15 Na idea taki den na srafoe foe wan sma na wan sani di no switi gi foeroe sma. Tokoe, na ini a grontapoe foe a ten disi, a de troetroe so taki nofotron sma e meki trawan e basi den èn abi krakti na den tapoe na so foeroe triki fasi, taki te foe kaba sondro taki densrefi wani den e doe san tra sma wani den foe doe. Foe eksempre, a bisnis di abi a wroko foe meki reklame èn den sma di e meki prisiriten e doe moeiti foe meki ala sma denki èn handri na a srefi fasi, e seti markitiki gi den di den moesoe waka na baka. Politik nanga relisi organisâsi e meki sma e horibaka gi den idea nanga den marki foe den, no foe di ala ten den e gebroiki tranga boeweisi foe overtoigi sma, ma moro foeroe foe di den e wroko na tapoe a firi di den sma abi foe de na ini wánfasi noso loyaal. Foe di Paulus ben taki dati ’wi na srafoe foe den sma di wi e gi jesi na den’, meki ibriwan foe wi sa doe boen foe aksi wisrefi: ’Foe soema mi de wan srafoe? Soema abi a moro bigi krakti na tapoe den bosroiti foe mi èn a fasi fa mi e libi? Den kerki tiriman, politik fesiman, den bigi goedoeman, noso prenspari sma na ini a show bisnis? Na soema mi e gi jesi — Gado noso libisma?’
16. Na sortoe fasi kresten de srafoe foe Gado, èn san na a joisti fasi fa wi moesoe si a de di wi de srafoe?
16 Kresten no e si a gi di den moesoe gi jesi na Gado leki wan sani di na wan onreidelek fasi e pasa a persoonlijk fri foe den. Foe densrefi den e gebroiki a fri foe den na a srefi fasi leki na Eksempre foe den, Jesus Krestes, ala di den e meki den persoonlijk firi foe den èn den sani di de na tapoe a fosi presi gi den, kon akroederi a wani foe Gado (Johanes 5:30; 6:38). Den e kweki „a denki foe Krestes”, èn den e saka densrefi na ondro en leki na Edeman foe a gemeente (1 Korentesma 2:14-16; Kolosesma 1:15-18). Disi de leki wan oema di trow èn di foe ensrefi e wroko makandra nanga a man di a lobi. Foe taki en leti, den e taki foe a heri skin foe salfoe kresten leki wan krin njoenwenke di pramisi foe trow nanga Krestes. — 2 Korentesma 11:2; Efeisesma 5:23, 24; Openbaring 19:7, 8.
17. San ala Kotoigi foe Jehovah ben bosroiti foe tron?
17 Ibriwan foe den Kotoigi foe Jehovah, awansi a abi wan howpoe foe libi na ini hemel noso na grontapoe, ben gi en libi persoonlijk abra na Gado foe doe en wani èn foe gi jesi na en leki Tiriman. Gi ibri Kotoigi, a gi di a gi ensrefi abra na Gado, ben de wan persoonlijk bosroiti foe tron wan srafoe foe Gado na presi foe tan wan srafoe foe libisma. Disi de akroederi a rai di na apostel Paulus ben gi: „A ben bai oenoe nanga wan prijs; no de srafoe foe libisma moro.” — 1 Korentesma 7:23.
Leri foe gi wisrefi wini
18. O ten wan sma di kon tron wan Kotoigi doro den markitiki foe teki dopoe?
18 Bifo wan sma kan doro den markitiki foe tron wan foe den Kotoigi foe Jehovah, dan a moesoe doro den markitiki foe den Boekoe foe bijbel. Den owroeman e loekoe heri boen foe sabi efoe wan sma di kan tron wan Kotoigi e froestan troetroe san a wani taki foe gi ensrefi abra na Gado leki wan kresten. A wani de troetroe wan foe den Kotoigi foe Jehovah? A wani libi akroederi san disi wani taki? Efoe a no de so, dan a no doro den markitiki foe teki dopoe.
19. Foe san ede no wan reide no de foe kroetoe wan sma di bosroiti foe tron wan foetoeboi di gi ensrefi abra na Gado?
19 Ma te wan sma doro ala den markitiki, dan foe san ede wi moesoe kroetoe en foe di foe ensrefi a ben teki a bosroiti foe meki Gado nanga En Wortoe di skrifi nanga jepi foe santa jeje, abi krakti na en tapoe? A de wan moro boen sani te wan sma e meki libisma abi krakti na en tapoe moro leki foe meki Gado abi krakti na en tapoe? Noso disi abi moro pikinso winimarki? Jehovah Kotoigi no e denki dati? Nanga den heri ati den e agri nanga den wortoe foe Gado di Jesaja ben skrifi: „Mi, Jehovah, na joe Gado, a Sma di e leri joe foe gi joesrefi wini, a Sma di e meki joe waka na tapoe a pasi di joe moesoe waka.” — Jesaja 48:17.
20. Na sortoe fasi sma kon fri nanga jepi foe a waarheid foe bijbel?
20 A waarheid foe bijbel e fri sma foe a bribi di den e bribi na ini falsi relisi leri, soleki a skin-ati di wan sma e kisi foe têgo na ini wan faja hèl (Preikiman 9:5, 10). Na presi foe dati, a e foeroe na ati foe den nanga tangi gi a troetroe howpoe gi den dedewan — na opobaka di kan feni presi na tapoe gron foe a loesoe-ofrandi foe Jesus Krestes (Mateus 20:28; Tori foe den Apostel 24:15; Romesma 6:23). A waarheid foe bijbel e fri sma foe a broeja di den e broeja te den e froetrow na tapoe den politik pramisi di doronomo no e kon troe. Na presi foe dati, a waarheid foe bijbel e meki na ati foe den abi bogobogo prisiri foe di den sabi taki a Kownoekondre foe Jehovah e tiri kaba na hemel èn taki heri esi a sa tiri na heri grontapoe. A waarheid foe bijbel e fri sma foe doe sani di, ala di den na sani di a skin lobi, no e gi Gado grani èn abi kefalek takroe bakapisi soleki a broko di matifasi e broko, siki, èn a dede di sma e dede toemoesi froekoe. Foe taki en sjatoe, foe de wan srafoe foe Gado e gi foeroe wini leki foe de wan srafoe foe libisma. Foe taki en leti, a gi di wan sma e gi ensrefi abra na Gado abi kefalek moro foeroe wini „na ini a pisi ten disi . . . èn na ini a seti foe sani di e kon, têgo libi”. — Markus 10:29, 30.
21. Fa Jehovah Kotoigi e si a gi di sma e gi densrefi abra na Gado, èn san den e winsi?
21 Jehovah Kotoigi na ini a ten disi no ben tron wan pisi foe wan nâsi di gi ensrefi abra na Gado akroederi en geborte, soleki fa a ben de nanga den Israèlsma foe owroeten. Den Kotoigi de wan pisi foe wan gemeente foe kresten di gi densrefi abra na Gado. Ibri Kotoigi di dopoe tron dati foe di ensrefi gebroiki a fri di a abi foe bosroiti foe gi ensrefi abra na Gado. Ija, gi Jehovah Kotoigi, a gi di wan sma e gi ensrefi abra na Gado abi wan waran èn krosibei matifasi nanga Gado leki bakapisi di abi leki marki taki foe ensrefi wan sma e dini en. Nanga den heri ati den wani foe tan hori a prisiri matifasi disi, foe di foe têgo den e hori fasti na a fri di Jesus Krestes ben fri den.
San joe ben sa piki?
◻ Foe san ede Gado no ben teki partèi di a ben froekisi Israèl foe tron en „spesroetoe goedoe”?
◻ Foe san ede joe ben sa taki dati a gi di kresten e gi densrefi abra na Gado no wani taki dati den lasi a fri foe den?
◻ San na den winimarki te wan sma e gi ensrefi abra na Jehovah Gado?
◻ Foe san ede a moro boen foe de wan foetoeboi foe Jehovah na presi foe de wan srafoe foe libisma?
[Prenki na tapoe bladzijde 15]
Na ini owroeten Israèl, a gi di wan sma gi ensrefi abra na Gado ben anga foe en geborte
[Prenki na tapoe bladzijde 16]
A gi di wan kresten e gi ensrefi abra na Gado, na wan sani di a bosroiti foe ensrefi