Libi na wan fri fasi akroederi a gi di kresten gi densrefi abra na Gado
„Pe a jeje foe Jehovah de, na drape fri de.” — 2 KORENTESMA 3:17.
1. Na soema den Kotoigi foe Jehovah gi densrefi abra, èn foe san ede den e gebroiki organisâsi di de akroederi wet?
JEHOVAH KOTOIGI e bribi taki a relisi foe den sa tan foe têgo. Foe dati ede den e froewakti foe dini Gado „nanga jeje èn nanga waarheid” foe têgo (Johanes 4:23, 24). Leki fri sma, den kresten disi gi densrefi abra na Jehovah Gado krinkrin èn den abi a fasti bosroiti foe libi akroederi dati. Foe man doe dati, den e froetrow na tapoe a Wortoe foe Gado èn na tapoe en santa jeje. Ala di nanga den heri ati den e libi akroederi a gi di den gi densrefi abra leki kresten na ini a fri di den kisi foe Gado, den Kotoigi e sori joisti lespeki gi a ròl foe den „hei tirimakti” foe lanti èn den e meki boen gebroiki foe den jepisani èn den seti di de akroederi wet (Romesma 13:1; Jakobus 1:25). Foe eksempre, den Kotoigi e gebroiki a Waktitoren Genootschap leki wan wrokosani di de akroederi wet — wán foe den foeroe wrokosani di den abi na ini difrenti kondre — so taki den man doe a wroko foe den foe jepi kompe libisma, spesroetoe na jejefasi. Ma den Kotoigi gi densrefi abra na Gado, no na wan organisâsi di de akroederi wet, èn a gi di den gi densrefi abra na Jehovah sa tan foe têgo.
2. Foe san ede den Kotoigi foe Jehovah e warderi a Waktitoren Genootschap èn den srefi sortoe organisâsi di de akroederi wet?
2 Leki foetoeboi di gi densrefi abra na Gado, den Kotoigi foe Jehovah abi a plekti foe waka na baka den komando foe Jesus foe „meki disipel foe sma foe ala nâsi, èn dopoe den na ini a nen foe a Tata èn foe a Manpikin èn foe a santa jeje, èn leri den” (Mateus 28:19, 20). A wroko disi sa tan go doro te na a kaba foe a seti foe sani disi, bika Jesus ben taki toe: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon” (Mateus 24:3, 14). Ibri jari den drukkerij foe a Waktitoren Genootschap èn den srefi sortoe organisâsi di de akroederi a wet e gi den Kotoigi foe Jehovah foeroe miljoen bijbel, boekoe, brochure, nanga tijdschrift, foe gebroiki den na ini a preikiwroko foe den na heri grontapoe. Foe dati ede den wrokosani disi di de akroederi wet, na warti sani foe jepi den foetoeboi foe Gado di gi densrefi abra na en foe libi akroederi a gi di den gi densrefi abra na Gado.
3. Na sortoe fasi den Kotoigi foe Jehovah ben gebroiki a wortoe „a Genootschap” fositen?
3 Wan sma kan taki dati a fasi fa den Kotoigi e taki foe a Waktitoren Genootschap — noso moro foeroe soso „a Genootschap” — e sori taki den e si en moro leki wan wrokosani nomo di de akroederi wet. Den no e si en leki a moro bigi makti di e teki bosroiti na ini relisi afersi? A boekoe Jehovah’s Getuigen — Verkondigers van Gods koninkrijk (Jehovah Kotoigi — Preikiman foe Gado Kownoekondre) e tjari a penti disi kon na krin te a e taki: „Di The Watchtower [foe 1 juni 1938] ben taki foe ’A Genootschap’, dan disi no ben wani taki soso foe wan wrokosani di de akroederi wet, ma a skin foe salfoe kresten di ben seti a wrokosani dati di de akroederi wet èn di den ben gebroiki.”a Foe dati ede, den wortoe ben wani taki „a getrow èn koni srafoe” (Mateus 24:45). Na a fasi disi den Kotoigi moro foeroe ben gebroiki den wortoe „a Genootschap”. A no de foe taki dati a korporâsi di de akroederi wet èn „a getrow èn koni srafoe” a no wortoe di wi kan gebroiki a srefi fasi. Den memre foe a bestuur foe a Waktitoren Genootschap e teki nanga stem, ala di den Kotoigi di de a ’getrow srafoe’ salfoe nanga jepi foe Jehovah en santa jeje.
4. (a) Fa foeroe Kotoigi e taki, so taki sma no e froestan den na wan fowtoe fasi? (b) Foe san ede wi moesoe abi balansi na a fasi fa wi e gebroiki wortoe?
4 Den Kotoigi foe Jehovah e proeberi foe loekoe boen te den e taki so taki sma no froestan den na wan fowtoe fasi. Na presi foe taki, „a Genootschap e leri”, foeroe Kotoigi e froekisi foe gebroiki wortoe soleki, „a bijbel e taki” noso „mi e froestan taki bijbel e leri”. Na a fasi disi den e poti krakti na tapoe a persoonlijk bosroiti di ibri Kotoigi teki foe teki den leri foe bijbel èn na so fasi den no e meki sma abi a fowtoe denki taki na wan noso tra fasi den Kotoigi tai na den sani di wan relisi sekte e taigi den foe den. A no de foe taki, noiti den rai di wi e kisi fa wi moesoe gebroiki wortoe moesoe tron streipenti. Boiti dati, wortoe de prenspari soso te a e jepi foe meki sma no froestan sani na wan fowtoe fasi. A de fanowdoe foe abi balansi leki kresten. Bijbel e froemane wi foe „no feti abra wortoe” (2 Timoteus 2:14, 15). Den Boekoe foe bijbel e kari a gronprakseri disi toe: „Efoe nanga a tongo oenoe no e taki wortoe di makriki foe froestan, dan fa sma sa sabi san oenoe e taki?” — 1 Korentesma 14:9.
A jeje foe Gado e meki moro mendri reglementi de fanowdoe
5. Fa wi moesoe froestan 1 Korentesma 10:23?
5 „Ala sani de akroederi wet; ma a no ala sani boen”, na apostel Paulus ben taki. A ben taki moro fara: „Sma mag doe ala sani; ma a no ala sani e bow sma” (1 Korentesma 10:23). A de krin taki Paulus no ben wani taki dati wi mag doe sani di a Wortoe foe Gado e kroetoe krinkrin. Te wi teki den gersi den pikinmoro 600 wet di ben gi na Israèl foe owroeten, dan pikinso spesroetoe komando nomo de di e tiri a kresten libi. So boen, foeroe afersi libi gi a konsensi foe ibriwan sma persoonlijk. Wan sma di gi ensrefi abra na Jehovah abi a fri di a kisi nanga jepi foe a tiri di a jeje foe Gado e gi. Te wan kresten ben meki a waarheid tron wan pisi foe en, meki a e waka na baka a konsensi foe en di oefen nanga jepi foe bijbel èn a e froetrow na tapoe a tiri foe Gado nanga jepi foe a santa jeje. Disi e jepi a kresten di gi ensrefi abra na Gado, foe kon sabi san sa „bow” en èn san sa „boen” gi ensrefi èn gi tra sma. A e froestan taki den bosroiti di a e teki sa abi krakti na tapoe a persoonlijk matifasi di a abi nanga Gado, na soema a gi ensrefi abra.
6. Fa wi kan sori na tapoe den kresten konmakandra taki wi meki a waarheid tron wan pisi foe wi?
6 Wan Kotoigi e sori taki a meki a waarheid tron wan pisi foe en, te a e gi komentaar na tapoe den kresten konmakandra. Na ini a bigin kande a ben taki baka san skrifi na ini a poeblikâsi di a ben e studeri. Ma baka ten, a sa go na fesi te a man taki nanga en eigi wortoe foe den leri foe bijbel. Na so fasi a e boeweisi taki a e gebroiki a krakti di a abi foe man denki, no soso foe taki baka nomo san tra sma ben taki. Te a e sreka den sani di a abi na prakseri, e poti den na ini en eigi wortoe èn e gebroiki joisti wortoe foe waarheid di komoto na en ati, dan dati sa gi en prisiri èn sa sori taki a abi na overtoigi na ini en eigi froestan. — Preikiman 12:10; teki gersi Romesma 14:5b.
7. Sortoe bosroiti den foetoeboi foe Jehovah ben teki na wan fri fasi?
7 Lobi gi Gado èn gi den kompe libisma e boeweigi den Kotoigi foe Jehovah (Mateus 22:36-40). A troe, a kresten lobi tai den krosibei na makandra leki wan brada libimakandra na heri grontapoe (Kolosesma 3:14; 1 Petrus 5:9). Ma leki fri sma, ibriwan foe den persoonlijk teki a bosroiti foe meki a boen njoensoe foe Gado Kownoekondre bekènti, foe no teki sei na ini politik afersi, foe tan farawe foe broedoe, foe wai pasi gi son fasi foe abi prisiri, èn foe libi akroederi den bijbel markitiki. Disi a no bosroiti di sma ben dwengi den foe teki. Den na bosroiti di de wan pisi foe a libi di den bosroiti gi densrefi, sma di kan kon tron Kotoigi, bifo den ben teki a bosroiti srefi foe gi densrefi abra na Gado leki kresten.
Den moesoe gi frantiwortoe na a Tiri Skin?
8. Sortoe aksi moesoe tjari kon na krin?
8 Bijbel e sori krinkrin taki troe kresten no e dini Gado foe di sma dwengi den. A e taki: „Jehovah na a Jeje; èn pe a jeje foe Jehovah de, na drape fri de” (2 Korentesma 3:17). Ma fa a troetori disi e kroederi nanga na idea foe wan „getrow èn koni srafoe” nanga a Tiri Skin foe en? — Mateus 24:45-47.
9, 10. (a) Fa a gronprakseri foe na edeman-wroko e fiti na ini a kresten gemeente? (b) San a gronprakseri foe na edeman-wroko ben meki de fanowdoe na ini a fosi-jarihondro kresten gemeente?
9 Foe gi piki na tapoe na aksi disi, wi moesoe hori a gronprakseri foe bijbel ini a tori foe na edeman-wroko na prakseri (1 Korentesma 11:3). Na Efeisesma 5:21-24 den e kari Krestes na „edeman foe a gemeente”, a sma na soema a gemeente moesoe „saka ensrefi na ondro”. Jehovah Kotoigi e froestan taki a getrow èn koni srafoe meki foe den jeje brada foe Jesus (Hebrewsma 2:10-13). A getrow srafoe groepoe disi poti na wroko foe gi a pipel foe Gado jeje „njanjan na a reti ten”. Na ini a ten disi foe a kaba, Krestes poti a srafoe disi na wroko foe loekoe „ala den goedoe foe en”. Foe dati ede, foe en posisi ede, a e froedini lespeki foe iniwan sma di e kari ensrefi wan kresten.
10 A marki foe na edeman-wroko na foe hori a wánfasi èn foe sorgoe taki „ala sani feni presi na wan fasi di fiti èn leki fa sani seti” (1 Korentesma 14:40). Foe man doro disi na ini a fosi jarihondro, den ben froekisi wan toe salfoe kresten foe a getrow èn koni srafoe foe teki presi gi a heri groepoe. Soleki fa a wan baka a tra kefal e sori, dan a tiri di a tiri skin foe a fosi jarihondro ben gi, ben abi a boen-ati foe Jehovah èn a blesi foe en. Nanga prisiri den fosi jarihondro kresten ben erken a seti disi. Ija, den ben lobi en èn ben breiti troetroe nanga den moi bakapisi di a ben tjari kon. — Tori foe den Apostel 15:1-32.
11. Fa wi moesoe si a disiten Tiri Skin?
11 A waarde foe so wan seti de te now ete. Nownow, a Tiri Skin foe Jehovah Kotoigi abi tin salfoe kresten na ini, èn den alamala abi someni tenti jari foe ondrofeni leki kresten. Den e gi jeje tiri na den Jehovah Kotoigi, soleki fa a ben de nanga a tiri skin foe a fosi jarihondro (Tori foe den Apostel 16:4). Leki den fositen kresten, nanga prisiri den Kotoigi e soekoe jepi na den lepi brada foe a Tiri Skin, foe kan kisi tiri di abi en gron tapoe bijbel nanga na tapoe tiri na ini afersi foe na anbegi. Ala di den memre foe a Tiri Skin na srafoe foe Jehovah nanga Krestes, soleki fa a de nanga den kompe kresten foe den, tokoe bijbel e leri wi: „Gi jesi na den wan di e teki fesi na oen mindri èn saka oensrefi na den ondro, foe di den e loekoe den sili foe oenoe leki sma di sa gi frantiwortoe, so taki den kan doe disi nanga prisiri èn no nanga soktoe, bika disi ben sa doe oenoe ogri.” — Hebrewsma 13:17.
12. Na soema ibri kresten moesoe gi frantiwortoe?
12 A posisi di den Boekoe foe bijbel e gi a Tiri Skin foe tiri, wani taki dati ibri Kotoigi foe Jehovah moesoe gi a Tiri Skin frantiwortoe foe a wroko di a e doe? No akroederi den wortoe foe Paulus gi den kresten na ini Rome: „Foe san ede oenoe e kroetoe a brada foe oenoe? Noso foe san ede oenoe e wisiwasi so srefi a brada foe oenoe? Bika wi alamala sa tanapoe na fesi a kroetoestoeroe foe Gado . . . Ibriwan foe wi sa gi Gado frantiwortoe foe ensrefi.” — Romesma 14:10-12.
13. Foe san ede den Kotoigi foe Jehovah e froeteri san den doe na ini a preikiwroko?
13 Ma a no troe taki den e froewakti taki ibri Kotoigi moesoe froeteri san a doe na ini a preikiwroko? Ija, ma a marki foe a sani disi froeklari krinkrin na ini wan boekoe foe den Kotoigi, di e taki: „Den fositen bakaman foe Jesus Krestes ben abi belangstelling gi raport di e sori a gro na ini a preikiwroko (Markus 6:30). Ala di a wroko ben go na fesi, raport foe den nomroe ben poti na makandra èn so srefi verslag foe toemoesi aparti ondrofenitori foe den wan di ben abi wan prati na a preiki di den ben preiki a boen njoensoe. . . . (Tori foe den Apostel 2:5-11, 41, 47; 6:7; 1:15; 4:4) . . . Den getrow kresten wrokoman dati ben kisi deki-ati srefisrefi di den jere raport foe san ben e doe! . . . Na a srefi fasi, a disiten organisâsi foe Jehovah e doe moeiti foe abi wan soifri raport foe a wroko di e doe leki wan kontroe foe Mateus 24:14.”
14, 15. (a) Fa 2 Korentesma 1:24 e fiti a Tiri Skin? (b) Na tapoe gron foe sortoe sani wan kresten moesoe teki persoonlijk bosroiti, èn san den moesoe erken?
14 A Tiri Skin na wan lobi-ati seti èn wan eksempre foe bribi di warti foe waka na baka (Filipisma 3:17; Hebrewsma 13:7). Foe di den e tan hori na eksempre foe Krestes èn e waka na en baka, meki den kan taki leki fa Paulus ben taki: „No taki wi na basi foe oen bribi, ma wi na kompe wrokoman foe oen prisiri ede, bika na foe oen bribi ede meki oenoe e tanapoe” (2 Korentesma 1:24). Te a Tiri Skin e loekoe a fasi fa sani e go, dan a e poti prakseri na tapoe den winimarki di de te wi e gi jesi na den bijbel rai, a e gi rai foe gebroiki den bijbel wet nanga gronprakseri, a e warskow gi kefar di kibri, èn a e gi „kompe wrokoman” a deki-ati di den abi fanowdoe. Na so fasi a e doe en kresten wroko foe tiri, foe di a e jepi den foe tan hori den prisiri, a e meki den tranga na ini bribi so taki den kan tanapoe kánkan. — 1 Korentesma 4:1, 2; Titus 1:7-9.
15 Efoe wan Kotoigi e teki bosroiti na tapoe gron foe bijbel rai di a Tiri Skin ben gi, dan a e doe dati foe di ensrefi wani, bika a studeri di ensrefi ben studeri bijbel meki a kisi na overtoigi taki disi na a joisti pasi. A Wortoe foe Gado abi krakti na tapoe ibri Kotoigi foe gebroiki a gosontoe bijbel rai di a Tiri Skin e gi, ala di a e froestan krinkrin taki den bosroiti di a e teki sa abi krakti na tapoe a persoonlijk matifasi di a abi nanga Gado, na soema a gi ensrefi abra. — 1 Tesalonikasma 2:13.
Studenti nanga sroedati
16. Foe san ede son sma e sluit uit ala di a fasi fa sma e tjari densrefi de wan persoonlijk bosroiti?
16 Ma efoe den bosroiti di abi foe doe nanga a fasi fa wan sma e tjari ensrefi, de wan persoonlijk afersi, dan foe san ede wan toe Kotoigi foe Jehovah e sluit uit? No wan sma e bepaal foe ensrefi taki a doe di wan sma doe wan sondoe, e meki a de fanowdoe taki a sma moesoe sluit uit. Na presi foe dati, a sluit di den sa sluit wan sma uit, de wan sani di de fanowdoe akroederi den Boekoe foe bijbel, soso te wan memre foe a gemeente doe serjoesoe sondoe sondro foe abi berow, soleki den wan di kari na ini a di foe feifi kapitel foe Wán Korentesma. So boen, ala di wan kresten kan sluit uit foe di a doe hoeroedoe, tokoe disi e feni presi soso te a sma e weigri foe teki a jepi na jejefasi foe den lobi-ati herder. A no Jehovah Kotoigi wawan di abi a kresten gwenti disi. The Encyclopedia of Religion e taki: „Ibri libimakandra e teki a reti di a abi foe kibri ensrefi teige memre di no wani kenki èn di kan de wan kefar gi a boen foe a libimakandra. Na ini relisi afersi den e poti moro krakti na tapoe a reti disi, foe di den e bribi taki a strafoe [a sluit di den e sluit sma uit] abi krakti na tapoe a posisi di wan sma abi na fesi Gado.”
17, 18. Fa wi ben sa kan gersi a joistifasi foe a sluit di den e sluit wan sma uit?
17 Jehovah Kotoigi na studenti foe bijbel (Josua 1:8; Psalm 1:2; Tori foe den Apostel 17:11). A programa foe bijbel-leri di a Tiri Skin e gi, ben sa kan teki gersi nanga wan leriprograma foe skoro di wan skoro raad e gi. Ala di a no a raad srefi e meki den materiaal di e leri na skoro, tokoe a e seti a leriprograma, e taki na sortoe fasi leri moesoe gi, èn a e gi prenspari markitiki. Efoe na wan ogri fasi wan sma e weigri foe libi akroederi den markitiki foe a skoro, e meki problema gi kompe studenti, noso e gi a skoro takroe nen, dan den kan poeroe en foe a skoro. Den sma di abi a frantiwortoe na skoro abi a reti foe handri gi a boen foe ala den studenti leki wan groepoe.
18 Boiti taki Jehovah Kotoigi na studenti, den na sroedati foe Jesus Krestes, di kisi a komando foe „feti a toemoesi boen feti foe a bribi” (1 Timoteus 6:12; 2 Timoteus 2:3). Soleki fa wi kan froewakti, te wan sma e tjari ensrefi doronomo na wan fasi di no e fiti wan kresten sroedati, dan dati kan abi leki bakapisi taki Gado no sa feni en boen. Leki wan sma di kisi a fri foe bosroiti gi ensrefi, wan kresten sroedati kan teki bosroiti soleki fa en wani, ma a moesoe tjari den bakapisi foe a bosroiti foe en. Paulus ben taki: „No wan man di e dini leki wan sroedati e moksi ensrefi na ini den bisnis afersi foe a libi, so taki a ben sa kisi a boen-ati foe a sma di ben teki en leki wan sroedati. Boiti dati, wan sma, srefi te a e strei na ini wan prei, no e kisi a kownoe-ati efoe a no strei akroederi den reglementi” (2 Timoteus 2:4, 5). Lepi kresten, so srefi den wan di de foe a Tiri Skin, e tan krinkrin na ondro a tiri foe a Fesiman foe den, Jesus Krestes, foe di den e hori densrefi na „den reglementi” so taki den kan wini a prijs foe têgo libi. — Johanes 17:3; Openbaring 2:10.
19. Now di wi ondrosoekoe den troetori foe a gi di kresten e gi densrefi abra na Gado, dan foe san wi kan de seiker?
19 Den troetori no e sori krinkrin taki Jehovah Kotoigi na foetoeboi foe Gado, no srafoe foe libisma? Leki kresten di gi densrefi abra na Gado èn di abi a fri gi san Krestes ben fri den, den e meki a jeje foe Gado nanga en Wortoe e tiri a libi foe den, ala di na ini wánfasi den e dini makandra nanga den brada foe den na ini a gemeente foe Gado (Psalm 133:1). Den boeweisi foe disi moesoe poeroe so srefi ibri tweifri di abi foe doe nanga a fonten foe pe den e kisi a krakti foe den. Makandra nanga a psalm singiman den kan singi: „Jehovah na mi krakti nanga mi skilt. Tapoe en mi ati froetrow, èn mi kisi jepi, so taki mi ati e prisiri srefisrefi, èn nanga mi singi mi sa prèise en.” — Psalm 28:7.
[Foetoewortoe]
a Di a Watchtower Bible and Tract Society of New York, Inc., tjari kon na doro na ini 1993.
Fa joe ben sa piki?
◻ Fa a Waktitoren Genootschap èn den srefi sortoe organisâsi disi di de akroederi wet e jepi den Kotoigi foe Jehovah?
◻ Fa den kresten e kisi wini foe a ròl di a Tiri Skin foe Jehovah Kotoigi abi?
◻ Foe san ede a pipel foe Jehovah e froeteri san den doe na ini a preikiwroko?
◻ Na ondro sortoe situwâsi a de joisti foe sluit wan kresten di ben gi ensrefi abra na Gado, uit?
[Prenki na tapoe bladzijde 19]
A tiri skin foe a fosi jarihondro ben sorgoe taki wánfasi ben de na ini a tori foe bijbelleri
[Prenki na tapoe bladzijde 23]
Na heri grontapoe Jehovah Kotoigi abi a fri gi san Krestes ben fri den