Kownoekondre preikiman e froeteri
„Joe pipel sa de klariklari foe gi densrefi”
A MAKTI legre edeman foe Siria, Na-aman, abi gwasi siki. Efoe a no doe noti nanga a takroe siki disi, dan a kan abi leki bakapisi taki a siki disi kan pori en skin èn kiri en te foe kaba. San Na-aman moesoe doe? Wan jongoe oemapikin, di den ben „tjari . . . gowe foe a kondre Israèl na ini katibo”, de na mindri den sma di de foe na osofamiri foe Na-aman. A e taki sondro frede èn a e sori Na-aman taki a profeiti Elisa na a sma di kan meki en kon betre. — 2 Kownoe 5:1-3.
Foe di a ben taki nanga deki-ati, meki Na-aman e soekoe Elisa èn e kon betre. Boiti dati, Na-aman e tron wan anbegiman foe Jehovah! Na ondrofenitori disi, di skrifi na ini bijbel, ben feni presi na ini a di foe tin jarihondro b.G.T. (2 Kownoe 5:4-15). Na ini a ten disi, foeroe jongoe sma e sori a srefi deki-ati te den e taki foe Kownoekondre afersi. Na ondrofenitori foe Mosambik di e kon now e sori a sani dati.
Nuno, di abi siksi jari, na wan preikiman foe a boen njoensoe di no dopoe ete. Srefi bifo a ben tron wan preikiman di no dopoe ete, a ben e tjari den pikin-nengre foe en birti kon na makandra, ben e begi èn ben e leri den bijbel foe di a ben e gebroiki a poeblikasi Mi boekoe nanga bijbel tori.
Foeroetron Nuno e wiki froekoe satra mamanten èn e memre en osofamiri: „Tide wi e go na ini a velddienst.” A e sori a faja di a abi gi a diniwroko na tra fasi. Te a e go makandra nanga en papa nanga mama foe doe stratiwroko na Maputo, dan foeroetron Nuno e waka miti sma ensrefi. Na wan foe den okasi disi, wan bisnisman ben waka kon na en èn ben aksi: „Foe san ede joe e seri den tijdschrift disi?” Nuno ben taki: „Mi no e seri den tijdschrift, ma mi e teki den bijdrage foe jepi pai den kostoe foe a preikiwroko.” A bisnisman ben piki: „Ala di mi no abi belangstelling, tokoe a fasi fa joe de nanga joe koni e naki mi ati. Mi ben sa wani gi wan bijdrage gi a wroko disi.”
Na wan tra okasi, Nuno ben waka miti wan man na strati èn a ben pristeri en a boekoe Ware vrede en zekerheid — Hoe kunt u die vinden? A man ben aksi: „A no joe e go na a skoro dati?” „Ija,” Nuno ben piki, „mi e go na a skoro dati, ma tide mi e pristeri wan prenspari boskopoe di komoto foe a boekoe disi. A e sori joe taki joe kan libi na ini a njoen grontapoe di Gado sa tjari kon, soleki fa a de foe si na ini a prenki na ini a boekoe disi.” Nuno no ben sabi taki a man nanga soema a ben taki, ben de wan leriman na en skoro. A leriman no ben teki a boekoe wawan, ma nownow a e kisi den Waktitoren nanga Ontwaakt! tijdschrift dorodoro foe Nuno toe.
Te wan sma e aksi Nuno foe san ede a lobi foe teki prati na ini a preikiwroko, dan a e taki: „Mi wani taki nanga sma èn leri den foe Jehovah nanga en Manpikin, Jesus Krestes.” A e taki moro fara: „Èn efoe den sma no wani arki, dan reide no de foe mândi.”
Na heri grontapoe, doesoendoesoen jongoewan leki Nuno „de klariklari foe gi densrefi” foe leri sma èn foe preiki foe a Kownoekondre foe Gado (Psalm 110:3). Ma a sani dati no e kon foe ensrefi. Papa nanga mama di e leri den pikin foe den foe Jehovah foe sensi pikin-nengreten, e poti wan boen eksempre ini a diniwroko èn e feti fajafaja baka Kownoekondre afersi, sa kisi foeroe pai.