Wan kownoe di abi goedoe nanga koni
Joe e denki taki goedoe ben sa meki joe kolokoe? Efoe wan sma ben gi joe boen foeroe moni, joe no ben sa breiti dan? Seiker joe ben o breiti. Joe ben sa prakseri kande fa joe ben sa kan gebroiki en.
WI MOESOE erken taki, foeroe sani de di joe kan bai foe meki a libi moro makriki èn moro switi. Moni kan de toe leki „wan sani di e kibri sma” teige problema di den no ben froewakti, soleki siki noso a abi di den no abi wroko. — Preikiman 7:12.
Ma san moni abi foe doe nanga kolokoe? Joe e denki, soleki fa foeroe sma e denki, taki goedoe e meki sma kolokoe? A kan moeilek foe feni den piki na tapoe den aksi disi bika joe man taki makriki omeni moni wan sma abi, noso teri omeni moni a abi, ala di dati no de so nanga kolokoe. Joe no man poti kolokoe na tapoe wan wegi èn wegi en.
Èn a sori toe taki son goedoe sma de kolokoe, ala di trawan de na ini toemoesi sari situwâsi. A srefi sani de troe foe sma di pôti. Tokoe, moro foeroe sma — srefi den wan di goedoe kaba — e bribi taki moro moni sa tjari moro kolokoe kon gi den.
Wan sma di ben skrifi foe den sortoe afersi disi ben de Kownoe Salomo foe owroeten Israèl. A ben de wan foe den moro goedoe sma di oiti ben libi. Joe kan leisi foe a kefalek bigi goedoe foe en na ini a di foe 10 kapitel foe a bijbelboekoe Wán Kownoe. Loekoe foe eksempre, taki vers 14 e taki: „A hebi foe a gowtoe dati di ben kon na Salomo na ini wán jari ben doro siksihondro nanga siksitenti na siksi gowtoe talenti.” A nomroe dati de a srefi leki 25.000 kilo gowtoe. Na ini a ten disi, so foeroe gowtoe ben sa warti moro leki 200.000.000 Amerkan dala!
Tokoe Salomo no ben goedoe wawan; Gado ben blesi en nanga koni. Bijbel e froeteri: „Kownoe Salomo ben abi moro goedoe nanga moro koni moro leki ala den tra kownoe foe grontapoe. Èn ala den sma foe grontapoe ben soekoe Salomo foe jere a koni di Gado ben poti na ini en ati” (1 Kownoe 10:23, 24). Wi toe kan abi wini foe a koni foe Salomo, foe di den sani di a skrifi de wan pisi foe bijbel. Meki wi si san a ben abi foe taki foe san goedoe abi foe doe nanga kolokoe.
[Prenki na tapoe bladzijde 3]
A meki baka foe Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart