A bribi foe kresten sa kisi tesi
„A no ala sma abi bribi.” — 2 TESALONIKASMA 3:2.
1. Fa historia sori taki a no ala sma abi troetroe bribi?
NA INI a heri historia, mansma, oemasma, nanga pikin-nengre de di abi troetroe bribi. A wortoe „troetroe”, di e taki wan sani foe bribi, e fiti bika miljoenmiljoen tra sma sori wan sortoe bribi di de leki a bribi di sma e bribi sani toemoesi esi, gaw foe bribi sondro foe abi wan joisti fondamenti noso reide. Den sortoe bribi disi abi nofotron foe doe nanga falsi gado noso anbegi di no de akroederi na Almaktiwan, Jehovah, nanga en Wortoe di a ben tjari kon na doro. Foe dati ede na apostel Paulus ben skrifi: „A no ala sma abi bribi.” — 2 Tesalonikasma 3:2.
2. Foe san ede a de toemoesi prenspari foe ondrosoekoe wi eigi bribi?
2 Ma den wortoe foe Paulus e sori taki na a ten dati son sma ben abi troetroe bribi, èn so a de toe nanga son sma na ini a ten disi. Moro foeroe leisiman foe a tijdschrift disi abi na angri foe abi so wan troetroe bribi èn foe meki a bribi gro — bribi di de akroederi a soifri sabi foe a waarheid foe Gado (Johanes 18:37; Hebrewsma 11:6). Dati de so nanga joe? Dan a de tranga fanowdoe taki joe e froestan èn de srekasreka gi a troetori taki a bribi foe joe sa kisi tesi. Foe san ede wi kan taki dati?
3, 4. Foe san ede wi moesoe loekoe na Jesus te a abi foe doe nanga tesi di bribi e kisi?
3 Wi moesoe erken taki Jesus Krestes de toemoesi prenspari gi a bribi foe wi. Ija, bijbel e kari en a Sma di e meki a bribi foe wi kon boen dorodoro. Dati na bika san Jesus ben taki èn ben doe, èn spesroetoe a fasi fa a ben meki profeititori kon troe. A ben tranga a fondamenti na tapoe san libisma e poti troetroe bribi (Hebrewsma 12:2; Openbaring 1:1, 2). Tokoe wi e leisi taki Jesus ben „[kisi] tesi neleki wi na ini ala fasi, ma sondro sondoe” (Hebrewsma 4:15). Ija, a bribi foe Jesus ben kisi tesi. Dati no moesoe meki wi lasi-ati noso frede, ma dati moesoe trowstoe wi.
4 Di Jesus ben kisi bigi tesi èn srefi te na dede na a oedoe, a „ben leri foe gi jesi” (Hebrewsma 5:8). A ben boeweisi taki libisma kan libi akroederi troetroe bribi awansi sortoe tesi ben sa kan kon na den tapoe. Disi wani taki wan spesroetoe sani te wi e prakseri san Jesus ben taigi den bakaman foe en: „Hori a wortoe na prakseri di mi ben taigi oenoe: Wan srafoe no bigi moro en masra” (Johanes 15:20). Foe taki en leti, foe den bakaman foe en na ini a ten foe wi, Jesus ben taki na fesi: „Oenoe sa de sma di no wan nâsi no sa wani si na ai foe mi nen ede.” — Mateus 24:9.
5. Fa den Boekoe foe bijbel e sori taki wi sa kisi tesi?
5 Biginbigin na ini a jarihondro disi, kroetoe ben bigin na a oso foe Gado. Den Boekoe foe bijbel ben taki na fesi: „A de a fasti ten foe a kroetoe taki a bigin na a oso foe Gado. Now efoe a e bigin na wi fosi, dan san sa de a kaba foe den wan di no e gi jesi na a boen njoensoe foe Gado? ’Èn efoe a regtfardiki sma e kisi froeloesoe nanga moeiti, dan pe a godelowsoe sma nanga a sondari sa tanapoe?’ — 1 Petrus 4:17, 18.
Bribi e kisi tesi — Foe san ede?
6. Foe san ede bribi di kisi tesi abi foeroe waarde?
6 Na wan sortoe fasi, a bribi di no kisi tesi no sori o warti a de, èn wi no e sabi a kwaliteit foe en. Joe ben sa kan gersi en nanga wan tjèk di joe no teki a moni foe en ete. Joe kisi wan tjèk kande gi wan wroko di joe ben doe, gi sani di joe ben gi, noso srefi leki wan presenti. A tjèk kan loekoe boen, ma a boen? A warti troetroe a moni di skrifi na tapoe? Na a srefi fasi, a bribi foe wi moesoe de moro leki nomo a fasi fa wi gersi na dorosei noso soso a froeklari di wi e froeklari dati na poebliki. A moesoe kisi tesi efoe wi wani boeweisi taki a wani taki wan sani troetroe èn taki a abi troetroe waarde. Te a bribi foe wi kisi tesi, dan wi kan si taki a tranga èn abi waarde. Wan tesi kan sori toe efoe kontren de pe wi moesoe meki wi bribi moro boen noso moro tranga.
7, 8. Foe pe den tesi na tapoe wi bribi e kon?
7 Gado e gi pasi meki froefolgoe nanga tra tesi e kon na wi bribi tapoe. Wi e leisi: „No meki no wan sma, te tesi miti en, taki: „Na Gado e tesi mi.” Bika sma no kan tesi Gado nanga ogri sani, èn ensrefi no e tesi no wan sma toe” (Jakobus 1:13). Soema, noso san de frantiwortoe gi den sortoe tesi disi? Na Satan, grontapoe nanga wi eigi onvolmaakti skin.
8 Wi kan erken taki Satan abi bigi krakti tapoe grontapoe, a fasi fa grontapoe e denki èn e doe sani (1 Johanes 5:19). Èn wi sabi seiker taki a e wiki froefolgoe teige kresten (Openbaring 12:17). Ma wi e bribi toe taki Satan e proeberi foe kori wi foe di a e wroko na tapoe na onvolmaakti skin foe wi, taki a e proeberi foe tesi wi nanga grontapoe ontspanning, èn e howpoe taki wi sa broko kindi, tranga jesi Gado, èn taki te foe kaba Jehovah no sa feni wi boen? A no de foe taki, dati den taktik foe Satan no moesoe froewondroe wi, bika a ben gebroiki den srefi taktik di a ben proeberi foe tesi Jesus. — Mateus 4:1-11.
9. Fa wi kan abi wini foe den eksempre foe bribi?
9 Nanga jepi foe en Wortoe nanga a kresten gemeente, Jehovah e gi wi positief eksempre foe bribi di wi kan waka na baka. Paulus ben froemane: „Tron sma di e waka leki wán man na baka na eksempre foe mi, brada, èn hori den wan na ai di e waka na wan fasi di e kroederi nanga na eksempre di oenoe abi na ini wi” (Filipisma 3:17). Leki wan foe den salfoe foetoeboi foe Gado na ini a fosi jarihondro, Paulus ben teki fesi foe doe wroko foe bribi, ala di a ben ondrofeni bigi tesi. Te na a kaba foe a di foe 20 jarihondro, wi no e mankeri no wan srefi sortoe eksempre foe bribi. Den wortoe foe Hebrewsma 13:7 e fiti now nanga moro krakti leki di Paulus ben skrifi den: „Memre den wan di e teki fesi na oen mindri, di taki a wortoe foe Gado gi oenoe, èn waka baka a bribi foe den, ala di oenoe e loekoe fa a waka nanga libi foe den e go.”
10. Sortoe spesroetoe eksempre foe bribi wi abi na ini a ten no so langa pasa?
10 A froemane dati abi krakti spesroetoe te wi e loekoe fa a salfoe fikapisi tjari ensrefi te foe kaba. Wi kan prakseri foe na eksempre foe den èn waka baka a bribi foe den. A bribi foe den na wan troetroe bribi di kisi tesi èn di kon moro boen foe dati ede. A pikin groepoe di ben bigin na ini den jari baka 1870, ben gro kon tron wan kresten bradafasi di de na heri grontapoe. Leki bakapisi foe a bribi èn a horidoro foe den salfoewan na a ten dati, moro leki feifi nanga afoe miljoen Kotoigi foe Jehovah e preiki èn e leri sma now foe a Kownoekondre foe Gado. A gemeente na heri grontapoe di de now, foe fajafaja troe anbegiman, de wan troetroe boeweisi foe a bribi foe den di kisi tesi. — Titus 2:14.
Bribi di kisi tesi èn di abi foe doe nanga 1914
11. O prenspari 1914 ben de gi C. T. Russell nanga den kompe foe en?
11 Foeroe jari bifo a fosi grontapoefeti ben bigin, a salfoe fikapisi ben meki bekènti taki 1914 ben sa de wan prenspari datum na ini den bijbel profeititori. Ma son wan foe den froewakti ben de toemoesi froekoe, èn a fasi fa den ben prakseri foe sani di ben o pasa, no ben soifri krinkrin. Foe eksempre, C. T. Russell, a fosi presidenti foe a Waktitoren Genootschap, nanga den kompe foe en ben kan si taki wan kefalek bigi preikiwroko ben de fanowdoe. Den ben leisi: „Na evangelie foe a kownoekondre sa preiki na heri grontapoe leki wan kotoigi gi ala nâsi; èn dan a kaba sa kon” (Mateus 24:14, King James Version). Ma fa a groepoe dati di ben pikin te joe ben teki dati gersi nanga trawan, ben kan doe dati?
12. Fa wán foe den kompe foe Russell ben handri na tapoe a waarheid foe bijbel?
12 Loekoe fa disi ben abi krakti tapoe A. H. Macmillan, wan kompe foe Russell. A ben gebore na ini Kanada, èn Macmillan no ben abi 20 jari ete di a ben kisi a boekoe foe Russell The Plan of the Ages (1886). (A boekoe disi, di nen so srefi The Divine Plan of the Ages, ben tron Pisi 1 foe den Studies in the Scriptures di ben prati na ala sei. Pisi 2, The Time Is at Hand [1889], ben sori go na 1914 leki a kaba foe „den ten foe den heiden” [Lukas 21:24, KJ]). A srefi neti di Macmillan ben bigin leisi, a ben prakseri: „We, dati gersi a waarheid!” Na ini a zomer foe 1900, a ben miti Russell na wan kongres foe den Bijbel Studenti, soleki fa den ben e kari den Kotoigi foe Jehovah na a ten dati. Heri esi Macmillan ben dopoe èn ben bigin wroko nanga Brada Russell na den edekantoro foe a Genootschap na ini New York.
13. Sortoe problema di abi foe doe nanga a kontroe foe Mateus 24:14 Macmillan nanga tra sma ben si?
13 Na tapoe gron foe a leisi di den ben leisi bijbel, den salfoe kresten disi ben taki dati 1914 ben sa de wan ten pe bigi kenki ben sa feni presi na ini den sani di Gado ben abi na prakseri foe doe. Ma Macmillan nanga wan toe tra sma ben aksi densrefi fa a preikiwroko gi den nâsi di ben taki na fesi na Mateus 24:14 ben kan doe na ini so wan sjatoe ten di ben libi ete. Baka ten a ben taki: „Mi kan memre taki wi ben e taki foe a tori disi nanga Brada Russell foeroetron, èn dan Brada Russell ben sa taki: ’We Brada, djaso na ini New York, wi abi moro Djoe leki na ini Jerusalem. Wi abi moro Iersma djaso leki na ini Dublin. Èn wi abi moro Italiasma djaso leki na ini Rome. Now, efoe wi e preiki gi den djaso, dan dati wani taki dati wi miti a libisma famiri nanga a boskopoe.’ Ma wi no ben de tevrede nanga dati. Foe dati ede wi ben abi na idea foe meki a ’Photo-Drama’.”
14. Sortoe aparti wroko ben doe bifo 1914?
14 A ben de wan kefalek aparti sani foe meki a „Photo-Drama der Schepping”! A ben moksi film nanga grasi atosigi di ben kloroe nanga anoe, kon na wán nanga bijbel lezing èn pokoe na tapoe platenspeler. Na ini 1913, The Watch Tower ben taki foe wan kongres na ini Arkansas, Amerkankondre: „Leki wán man wi ben bosroiti taki a ten ben doro foe gebroiki film foe leri sma den bijbel waarheid. . . . [Russell] ben froeklari taki a ben wroko dri jari kaba na tapoe a plan disi èn now a ben abi pikinmoro foeroe hondro moi fowtoe, di seiker sa hari foeroe sma èn sa meki na Evangelie bekènti, èn a sa jepi a poebliki foe abi bribi baka na ini Gado.”
15. Sortoe bakapisi a „Photo-Drama” ben abi?
15 A „Photo-Drama” ben doe dati troetroe na baka a fosi leisi di a ben sori na ini januari 1914. Disi na verslag komoto foe The Watch Tower foe 1914:
Foe 1 april: „Wan bedinari ben taki baka di a ben si toe pisi: ’Mi si soso afoe foe a PHOTO-DRAMA DER SCHEPPING, ma mi leri moro foe bijbel kaba leki mi ben leri na ini den dri skoro jari na ini wan theologis seminari.’ Baka di wan djoe ben si en, a ben taki: ’Mi e gowe leki wan moro boen djoe leki di mi ben kon na inisei.’ Difrenti Katolik priester nanga non fisiti a DRAMA èn ben taki dati den ben abi foeroe warderi. . . . Soso twarfoe pisi foe a DRAMA ben klari kaba . . . Tokoe wi doro èn sori en na 31 foto kaba . . . Moro leki dritenti na feifi doesoen sma e si en, e jere en, e froewondroe, e prakseri èn e kisi blesi ibri dei.”
Foe 15 juni: „Den fowtow gi mi moro faja foe prati a Waarheid, èn tranga a lobi foe mi gi mi Hemel Tata èn wi lobi Owroe Brada Jesus. Ibri dei mi e begi Gado foe en bigi blesi na tapoe a PHOTO-DRAMA DER SCHEPPING èn na tapoe ala sma di abi foe doe nanga a pristeri foe en . . . Mi na joe foetoeboi gi En, F. W. KNOCHE. — Iowa.”
Foe 15 juli: „Wi breiti foe si fa den fowtow ben abi wan boen krakti tapoe den sma na ini a foto disi, èn wi de seiker taki a kotoigi disi gi grontapoe e gebroiki so srefi foe tjari foeroe sma kon na inisei di e boeweisi taki den na diriston di Masra srefi froekisi. Wi sabi wan bigi nomroe opregti bijbelstudenti di abi demakandra now nanga a Klas leki wan bakapisi foe a wroko foe a Photo-Drama. . . . Joe sisa na ini Masra, EMMA L. BRICKER.”
Foe 15 november: „Wi de seiker taki oenoe sa breiti foe jere foe a kefalek moi kotoigi di e gi nanga jepi foe a PHOTO-DRAMA DER SCHEPPING na a London Opera House, na Kingsway. A tiri di Masra e gi ben de so moi foe si na ini ibri pisi foe a pristeri disi taki den brada e prisiri srefisrefi . . . Sma foe ala sortoe posisi èn ala sortoe sma ben de na ini a poebliki foe wi; wi si taki foeroe kerki tiriman ben de drape toe. Wán kerki tiriman . . . ben aksi karta so taki en nanga en wefi ben kan kon foe si en ete wan tron. Wan kerki tiriman foe a Kerki foe Ingrisikondre fisiti a DRAMA difrenti leisi, èn . . . a tjari foeroe foe den mati foe en foe si a DRAMA. Toe beskopoe ben de drape toe, èn difrenti heihei sma.”
Foe 1 december: „Mi nanga mi wefi e taigi wi Hemel Tata tangi troetroe gi a bigi èn warti blesi di kon na wi nanga jepi foe a wrokosani foe joe. A ben de a kefalek moi PHOTO-DRAMA foe joe di ben meki wi si èn teki a Waarheid . . . Wi abi den siksi pisi foe STUDIES IN THE SCRIPTURES. Den na wan bigi jepi.”
A fasi fa sma ben handri na tapoe den tesi na a ten dati
16. Foe san ede 1914 ben tjari wan tesi kon na tapoe bribi?
16 Ma fa a ben de te den sortoe opregti èn loyaal kresten disi ben si taki a froewakti di den ben abi foe go na Masra na ini 1914 no ben kon troe? Den salfoewan disi ben ondrofeni wan aparti pisi ten foe tesi? The Watch Tower foe 1 november 1914, ben froeklari: „Meki wi hori na prakseri taki wi de na ini wan pisi ten foe tesi.” Foe a tori disi, Jehovah’s Getuigen — Verkondigers van Gods Koninkrijk (1993) e taki: „Foe troe, den jari foe 1914 te go miti 1918 ben de ’wan pisi ten foe tesi’ gi den Bijbel Studenti.” Den ben sa gi pasi meki a bribi foe den kon moro soifri èn meki a denki foe den kenki so taki den ben kan bigin nanga a bigi wroko di ben de na den fesi?
17. Fa den getrow salfoewan ben handri di den ben tan na grontapoe na baka 1914?
17 The Watch Tower foe 1 september 1916 ben taki: „Wi ben prakseri taki a Kotiwroko foe tjari a Kerki [den salfoewan] kon makandra ben sa kaba bifo a kaba foe den Ten foe den Heiden; ma noti na ini bijbel ben taki dati. . . . Wi e sari taki a Kotiwroko e go doro? Lobi brada, a denki di wi moesoe abi now, na taki wi moesoe abi foeroe tangi gi Gado, moro warderi gi a moi Waarheid di A gi wi leki grani foe si èn di sma e kon sabi wi nanga dati, èn meki a faja foe wi kon moro bigi foe jepi tjari a Waarheid dati foe meki tra sma sabi en.” A bribi foe den ben kisi tesi, ma tokoe den ben kakafoetoe gi a tesi dati èn nanga boen bakapisi. Ma wi leki kresten moesoe froestan taki den tesi na tapoe a bribi kan foeroe èn kan difrenti.
18, 19. Sortoe tra tesi foe bribi ben de gi a pipel foe Gado sjatoe baka di Brada Russell ben dede?
18 Foe eksempre, wan tra sortoe tesi ben kon na tapoe a fikapisi sjatoe baka di Brada Charles T. Russell ben dede. Dati ben de wan tesi na tapoe a loyaalfasi èn a bribi foe den. Soema ben de ’a getrow srafoe’ na ini Mateus 24:45? Son sma ben denki taki a ben de Brada Russell srefi, èn den ben weigri foe wroko makandra nanga den njoen sani di ben seti na ini na organisâsi. Efoe en ben de a srafoe, dan san den brada ben moesoe doe now di a dede? Den ben moesoe waka na baka wan njoen sma di kisi a wroko, noso a ben de ten now foe froestan taki Jehovah no ben gebroiki wán sma nomo, ma wan heri groepoe kresten leki wan wrokosani, noso srafoe groepoe?
19 Ete wan tesi ben kon na tapoe den troe kresten na ini 1918, di grontapoe tirimakti di den kerki tiriman foe krestenhèit ben gi deki-ati, ben wroko makandra foe doe ’ogri akroederi wet’ teige na organisâsi foe Jehovah (Psalm 94:20, KJ). Kefalek foeroe froefolgoe ben bigin teige den Bijbel Studenti na ini Noord-Amerika nanga Europa. A gens di den kerki tiriman ben soetoe faja gi, ben doro wan heimarki na tapoe 7 mei 1918, di komando ben gi akroederi a wet na ini Amerikankondre foe hori J. F. Rutherford nanga difrenti foe den krosibei kompe foe en, èn so srefi A. H. Macmillan. Den ben kroetoe den na wan falsi fasi taki den e gens a tirimakti, èn den tirimakti no ben arki den froeklari foe den taki den no ben doe fowtoe sani.
20, 21. Soleki fa Maleaki 3:1-3 ben taki na fesi, sortoe wroko ben doe na mindri den salfoewan?
20 Ala di den no ben froestan en so na a ten dati, tokoe wan soifriwroko ben e doe, soleki fa a skrifi na Maleaki 3:1-3: „Soema sa froedrage a dei te a o kon, èn soema sa man tan tanapoe te a sori ensrefi? Bika a [a boskopoeman foe a froebontoe] sa de leki a faja foe wan sma di e soifri sani èn leki a sopo foe den wasiman. Èn a moesoe sidon leki wan sma di e soifri èn e krin solfroe èn a moesoe krin den manpikin foe Leifi; èn a moesoe meki den kon soifri leki gowtoe èn leki solfroe, èn seiker den sa tron gi Jehovah sma di e pristeri wan presenti ofrandi ini regtfardikifasi.”
21 Ala di a Fosi Grontapoefeti ben kon moro krosibei, wan toe foe den Bijbel Studenti ben miti wan tra tesi na tapoe a bribi foe den — efoe den ben sa tan neutraal na ini den grontapoe sroedati afersi (Johanes 17:16; 18:36). Wan toe foe den no ben tan neutraal. So boen, na ini 1918, Jehovah ben seni „a boskopoeman foe a froebontoe”, Krestes Jesus, go na a seti foe En foe a jeje tempel, foe krin a pikin groepoe foe En anbegiman foe den grontapoe flaka. Den wan di ben wani troetroe foe sori a troetroe bribi foe den ben leri wan sani foe na ondrofeni èn ben go doro foe tan preiki fajafaja.
22. Sortoe sani di abi foe doe nanga tesi foe bribi wi moesoe ondrosoekoe ete?
22 Den sani di wi loekoe a no sani di boen nomo gi a historia di pasa kaba. A abi langalanga foe doe nanga a disiten jeje kondisi foe a gemeente foe Jehovah na heri grontapoe. Ma meki wi loekoe na ini na artikel di e kon now, wan toe foe den tesi foe bribi di Gado pipel na ini a ten disi ben miti èn meki wi si fa wi kan pasa den tesi disi nanga boen bakapisi.
Joe e memre disi ete?
◻ Foe san ede a pipel foe Jehovah moesoe froewakti taki a bribi foe den sa kisi tesi?
◻ Sortoe moeiti ben doe foe prati a boskopoe foe Gado bifo 1914?
◻ San ben de a „Photo-Drama”, èn sortoe bakapisi a ben abi?
◻ Fa sani di ben pasa na ini a pisiten foe 1914 te go miti 1918 ben de wan tesi gi den salfoewan?
[Prenki na tapoe bladzijde 12]
Na a kaba foe a di foe 19 jarihondro èn na a bigin foe a di foe 20 jarihondro, sma na ini foeroe kondre ben e studeri bijbel nanga jepi foe den pisi foe „Millennial Dawn”, di ben nen baka ten „Studies in the Scriptures”
[Prenki na tapoe bladzijde 13]
Wan brifi foe C. T. Russell nanga den biginwortoe na tapoe casette-lolo, pe a ben taki: „’A Photo-Drama der Schepping’ pristeri nanga jepi foe a IBSA — International Bible Students Association. A marki foe en na foe gi sma leri akroederi relisi nanga sabidensi, èn foe horibaka gi bijbel”
[Prenki na tapoe bladzijde 15]
Demetrius Papageorge ben e rèis e sori a „Photo-Drama der Schepping”. Baka dati, den ben poti en na strafoe bika a ben de neutraal leki kresten