Loekoe boen nanga spotoeman!

Na ini a ten disi, sma taki foeroe fa sani sa de na fesi, èn a bisnis di e ondrosoekoe fa sani sa waka na ini a ten di e kon, e gro srefisrefi. „Ala di a jari 2000 e kon moro krosibei”, na so The Daily Telegraph foe Londen e taki, „wan freimde sani, ma tokoe wan sani di wi ben froewakti pikinso, e pasa. Doesoendoesoen sma na heri grontapoe e ondrofeni kefalek freimde èn nofotron frede fisjoen foe a ten di e kon”. Gi foeroe sma di e ondrosoekoe sani, a serjoesoe belangstelling di sma abi gi a ten di e kon, na wan herhaling foe a howpoe di sma e howpoe nomo tapoe kenki na ini a ten di pasa èn di no ben feni presi.

DI MORO nanga moro sma ben e rèi nanga asi na ini a di foe 19 jarihondro, dan wan man ben taki na fesi taki te foe kaba den foto na ini Europa ben sa foeroe nanga a kaka foe asi. A no de foe taki, dati a sani di a ben taki na fesi no ben troe. Dati meki, foe poti krakti na tapoe a fasi fa den sani di sma e taki na fesi e misi foeroetron, The Times foe Londen ben taki: „A ten di e kon sa lai nomo nanga asi kaka.”

Tra sma e spotoe den sma di e si taki kefar de na ini a ten di e kon. Foe eksempre, wan profesor foe bisnis afersi, na wan universiteit na ini Amerkankondre, ben tjalensi den sma di e warskow taki a milieu e go na baka, foe bèt efoe dati ben sa kon moro takroe. Soleki fa a skrifi na ini a New Scientist tijdschrift, a profesor e froeklari taki „a kwaliteit foe wi libi e kon moro boen èn sa tan kon moro boen gi ala ten”.

Ala di sma e froeklari sani kontrari makandra, tokoe foeroe sma e bribi taki, te joe e loekoe en moro fini, tokoe sani no sa kenki. Foe di den e spotoe nanga ibri idea taki Gado sa kon na ini den afersi foe libisma, den e sori taki den abi wan denki leki di foe den spotoeman na ini a fosi jarihondro G.T.

Ala sani de a srefi ete?

A di foe toe brifi di na kresten apostel Petrus ben skrifi nanga Gado en santa jeje, pikinmoro na ini a jari 64 G.T, ben warskow: „Na ini den lasti dei spotoeman sa kon nanga den spotoe foe den, di sa doe sani akroederi den eigi lostoe.” — 2 Petrus 3:3.

Spotoeman e proeberi foe meki a sani di den e spotoe sori foe de wan lafoe sani. A sma di e spotoe kan fadon na ini a trapoe foe doe sani nanga en wawan na prakseri, bika nofotron a spotoeman wani meki den sma di e arki en e teki a srefi prakseri foe en. Kande wan toe foe den spotoeman di Petrus ben warskow ben de leki den sma disi, „di sa doe sani akroederi den eigi lostoe”. Foe meki den leisiman de na ai, meki na apostel ben gebroiki wan fasi foe taki so taki a kan poti krakti na tapoe a sani. A ben warskow taki „spotoeman nanga a spotoe foe den” ben sa kon.

Den spotoeman dati foe a fosi jarihondro ben tweifri efoe a ’denoja foe en [Krestes] di den ben pramisi’ ben de troetroe foe di den ben e taki: „Pe a denoja disi foe en de di den ben pramisi? Bika sensi den dei di den afo foe wi fadon na sribi ini dede, ala den sani ben tan soifri leki fa a ben de sensi di Gado bigin kria sani” (2 Petrus 3:4). Na so a ben gersi gi den. Tokoe, moro na fesi na ini a jari 33 G.T., Jesus ben taki na fesi taki rampoe ben sa kon gi a foto Jerusalem. „Den dei sa kon na joe tapoe”, a ben froeklari, „te den feanti foe joe sa bow wan skotoe foe postoe nanga srapoe ede na joe lontoe èn den sa lontoe joe èn sa banawtoe joe na ala sei, èn den sa masi joe nanga joe pikin na ini joe na gron, èn na ini joe den no sa libi no wan ston na tapoe wan trawan.” Den sma di ben spotoe a warskow dati ben meki wan kefalek bigi misteik! Na ini 70 G.T. den legre foe Rome ben lontoe Jerusalem èn ben pori a foto, èn foeroe sma di ben libi na ini èn ben lasi den libi. Foe san ede a moro bigi pisi foe den sma di ben e libi na ini a foto no ben sreka gi a rampoe disi? Bika den no ben si krin taki Gado ben kroetoe den nanga jepi foe en Manpikin, Jesus. — Lukas 19:43, 44.

Na apostel Petrus e taki dati na ini a ten di e kon, Gado na Almaktiwan ben sa kon moksi ensrefi na ini a tori. „A dei foe Jehovah sa kon leki wan foefoeroeman”, Petrus e warskow (2 Petrus 3:10). Na a ten dati Gado sa poeroe den godelowsoe sma foe a heri grontapoe èn a sa kibri den wan di a kroetoe taki den de regtfardiki. Soleki fa ben tjari kon na krin foeroetron kaba na ini a tijdschrift disi, a „denoja” foe Krestes Jesus ben bigin na ini 1914. Ma a doe di a moesoe doe sani ete leki a Sma di Gado sa Tjari Strafoe kon foe poeroe godelowsoefasi, de na ini a ten di e kon ete. Foe dati ede, a warskow foe na apostel foe loekoe boen nanga den spotoeman, abi wan moro serjoesoe kontroe na ini a ten disi.

Kande joe wakti wan langa ten kaba tapoe a kon di Gado sa kon na ini den afersi foe libisma. San sa jepi joe foe tan wakti nanga pasensi sondro foe meki den spotoeman kisi joe? Grantangi, leisi go moro fara.

[Prenspari pisi na tapoe bladzijde 4]

„Den dei sa kon na joe tapoe te den feanti foe joe sa . . . lontoe joe èn sa banawtoe joe na ala sei, . . . èn na ini joe den no sa libi no wan ston na tapoe wan trawan.” Dati no ben de wan warskow foe spotoe nanga en. Den legre foe Rome ben pori Jerusalem, èn foeroe sma ben lasi den libi.