Wakti nanga pasensi

A SKAPOEMAN di ben bari foeroetron „Wolfoe!” te wolfoe no ben de, ben kon si taki a leisi di a ben bari baka foe kisi jepi, dan sma no ben arki en. Na so a de na ini a ten disi, taki foeroe sma no e poti prakseri na tapoe a dei foe Jehovah di de krosibei, bika den jere wan lo warskow di sori foe de falsi warskow. A moro bigi feanti foe Gado, Satan, a falsi „engel foe leti”, e teki wini foe a troetori taki so foeroe sma no sabi sortoe warskow de troetroe èn sortoe wan den moesoe arki. — 2 Korentesma 11:14.

A de di wan sma de tevrede nanga ensrefi ben sa kan de kefalek srefi gi den sma di dini Jehovah langa ten kaba. Foe san ede? Loekoe a warskow di na apostel Petrus ben gi na ini a fosi jarihondro.

Denki krin

A di foe toe brifi di Petrus ben skrifi nanga Gado en santa jeje ben de wan froemane gi den fosi kresten, èn a skrifi gi wi toe. „Lobiwan”, a e skrifi, „disi na a di foe toe brifi now di mi e skrifi gi oenoe, pe mi, neleki na ini a fosiwan foe mi, e wiki a koni di oenoe abi foe man denki krin, foe di mi e tjari sani kon na ini oen prakseri” (2 Petrus 3:1). Foe san ede Petrus e broko en ede nanga a sani disi? Petrus e poti krakti na tapoe a de di spotoeman ben sa de, èn taki a spotoe foe den ben sa swaki a fanowdoe di ben de foe si taki a ten pe den foetoeboi foe Gado e libi de serjoesoe. Now na a ten foe loekoe boen taki spotoeman no e kori wi. Foe dati ede Petrus e gi den leisiman foe en a tranga foe „memre den sani di den santa profeiti ben taki fositen” (2 Petrus 3:2; Tori foe den Apostel 3:22, 23). San den profeiti ben taki?

Na foeroe okasi den getrow foetoeboi foe Gado ben poti prakseri na tapoe a fasi fa a kroetoe foe Gado ben tjari wan kaba kon na godelowsoefasi. Petrus e memre den leisiman foe en na a Froedoe foe den dei foe Noa, di Gado ben gebroiki leki wan fasi foe kon ini a tori di grontapoe ben foeroe nanga ogridoe. A hebi Froedoe dati ben tjari wan kaba kon na wan joisti fasi na a grontapoe foe a ten dati. Ma Gado ben hori Noa nanga en osofamiri na libi na ini wan ark, makandra nanga difrenti sortoe libi kriatoeroe „foe ibri sortoe meti”. Fositen tori na heri grontapoe e gi boeweisi taki a bijbel tori de troe.a — Genesis 6:19; 2 Petrus 3:5, 6.

Petrus e kari a kon di Gado ben kon ini a tori, ’wan tori di wan toe sma no e teki notisi foe en’. Èn den spotoeman foe a ten dati ben boboi tra sma foe de tevrede nanga densrefi. Ma noiti wi moesoe frigiti san Jehovah doe kaba. Petrus e taigi wi: „Nanga a srefi wortoe, hemel nanga grontapoe di de now, hori kibri gi a faja èn den e poti den na wan sei gi a dei foe kroetoe èn gi a pori di godelowsoe sma sa kisi” (2 Petrus 3:7). Ija, Gado sa kon ini a tori baka.

Gado no slow

Foeroe doesoenjari pasa kaba. Foe san ede Gado wakti so langa bifo a e loesoe den problema foe libisma? Ete wan tron Petrus e poti prakseri na tapoe wan tra troetori. A e taki: „Meki oenoe teki notisi foe a tori disi, lobiwan, taki gi Jehovah, wán dei de leki doesoen jari èn doesoen jari leki wán dei” (2 Petrus 3:8). A fasi fa Jehovah e prakseri foe ten, e difrenti nanga di foe wi. Gi a têgo Gado, a pisi ten di Adam ben kria te go miti now no doro wán wiki ete. Ma awansi fa wi e prakseri foe ten, ibri doesoenjari èn ibri dei di e pasa e tjari wi kon moro krosibei foe a doe di Jehovah sa doe den prakseri foe en.

„Te wi e loekoe wan patoe, dan noiti a sa bori”, dati na wan odo di wani taki dati te wi e wakti nomo tapoe wan sani di moesoe feni presi, dan a gersi taki dati e meki a tan moro langa. Ma Petrus e rikomanderi taki wi moesoe „e froewakti èn e hori a denoja foe a dei foe Jehovah boen na prakseri” (2 Petrus 3:12). Fa wi kan kisi wan denki di e meki wi de na ai gi a krosibeifasi foe a kon di Gado o kon ini a tori?

Taki na noti, ma doe na basi

Petrus e poti prakseri na tapoe sani di sma e doe èn na tapoe a fasi fa den e handri. A e taki foe ’a tjari di sma e tjari densrefi na wan santa fasi’ èn so srefi ’a doe di sma e doe sani di e sori taki den gi densrefi na ini a dini foe Gado’ (2 Petrus 3:11). San na den sani disi?

A troetroe foetoeboi foe Gado e handri na wan fasi di e plisi En. A bribi foe so wan troe anbegiman de foe si na a fasi fa a e tjari ensrefi. Disi e meki a e difrenti foe den sma di e taki wawan taki den e bribi na ini Gado nanga den pramisi foe en. Kande joe si taki a poebliki diniwroko foe Jehovah Kotoigi e poti den aparti leki sma di difrenti. Den e kon na joe oso foe poti prakseri na tapoe den pramisi foe Gado di skrifi na ini bijbel. Ma den e kotoigi toe foe a howpoe foe den èn den bribi foe den awansi pe den e miti sma.

A Kotoigi di e doe foeroe foe meki en bribi bekènti na tra sma, e gi den bribi foe en moro krakti èn moro tranga. Wortoe e tranga a krakti di a abi na en tapoe èn na a srefi ten a e tjari prisiri nanga tevredefasi kon na ini en. Te wi e meki a boen njoensoe foe Gado Kownoekondre bekènti, dan wi e plisi Jehovah toe. Wi sabi taki a ’no de onregtfardiki, so taki a sa frigiti a wroko foe wi èn a lobi di wi sori gi a nen foe en’, soleki fa a kompe apostel foe Petrus, Paulus, e froeklari. — Hebrewsma 6:10; Romesma 10:9, 10.

San na a bakapisi te foeroe belangstelling de foe prati a boen njoensoe foe a Kownoekondre na ini den lasti dei foe a disiten ogri seti foe sani? Foeroe hondrodoesoen reti-atisma e leri fa foe kon na ini wan krosibei matifasi nanga Jehovah, foe kisi wini foe en no-froedini boen-atifasi èn foe feni troetroe kolokoe foe a froewakti di den abi foe kisi têgo libi na wan paradijs grontapoe.

Sabi na fesi

Ala di wi sabi foe bijbel taki Jehovah Gado sa kon ini a tori na tapoe en reti ten, tokoe wi moesoe gi jesi na a tra warskow di Petrus e gi. „Foe dati ede, lobiwan, now di oenoe sabi disi na fesi kaba, loekoe boen taki den no e tjari oenoe go nanga den na ini a sondoe foe den sma di e kakafoetoe gi a wet èn oenoe no e tanapoe kánkan moro.” — 2 Petrus 3:17.

Jehovah sabi seiker na fesi kaba taki son sma di no abi nofo tranga bribi, ben sa kan lasi-ati foe di a gersi taki a kon di Gado o kon na ini a tori e tan moro langa. A ben sabi toe taki a krakti foe den godelowsoe sma ben sa kan pori den troe foetoeboi foe en, noso taki awinsi fa no fa, a ben sa kan swaki a bribi foe den taki a dei de krosibei taki Gado o santa en nen. A ben sa de wan troetroe sari te wan sma no ben sa tanapoe kánkan moro na ini den lasti dei disi!

Now a no a ten foe abi tweifri noso foe no de seiker san Jehovah sa doe (Hebrewsma 12:1). Na presi foe dati, now na a ten foe gro na ini warderi gi a sani di a pasensi foe Jehovah tjari kon — a froewakti foe froeloesoe miljoenmiljoen sma di tron wan pisi foe na internationaal bigi ipi, èn den e froewakti foe pasa a bigi banawtoe libilibi (Openbaring 7:9, 14). Petrus e froemane: „Tan gro na ini a no-froedini boen-atifasi nanga sabi foe wi Masra èn Froeloesoeman Jesus Krestes. Gi en a glori de now èn te na ini a têgo ten.” — 2 Petrus 3:18.

„Tan na ini a lobi foe Gado”

A de wan kibri gi wi te wi abi foeroe foe doe na ini Kownoekondre preikiwroko èn e fisiti den kresten konmakandra doronomo gi anbegi èn e studeri Gado Wortoe. Na a fasi disi, wi no sa abi ten foe broko wi ede toemoesi nanga den situwâsi foe a disiten ogri sistema di e go moro nanga moro na baka. Frede nanga sorgoe no moesoe basi a libi foe den troe kresten (1 Korentesma 15:58). O moro foeroe wi abi foe doe na ini a dini foe Jehovah, o moro esi a ten e pasa.

Judas di ben libi na ini a ten foe Petrus èn di ben de na afoe brada foe Jesus, e froemane wi: „Oenoe, lobiwan, foe di oenoe bow oensrefi na tapoe a moro santa bribi foe oenoe, èn e begi nanga santa jeje, èn sorgoe na so wan fasi taki oenoe e tan na ini a lobi foe Gado, ala di oenoe e wakti a sari-ati foe wi Masra Jesus Krestes, nanga têgo libi na prakseri” (Judas 20, 21). Loekoe o prenspari a de foe abi wan positief denki di wi e tan abi te wi e horidoro na ini begi (1 Tesalonikasma 5:17). Dan Judas e taki moro fara: „Go doro foe sori sari-ati na son wan di e tweifri; froeloesoe den foe di joe e hari den poeroe na faja. Ma tan sori sari-ati na trawan, nanga di oenoe e doe dati nanga frede, di na a srefi ten oenoe no wani si na ondrokrosi di na skinfasi ben flaka na ai” (Judas 22, 23). O prenspari a de foe tranga makandra na ini den moeilek ten disi! Èn o prenspari a de foe no fadon gi tesi, te wi e gebroiki a bigi „dei [disi] foe froeloesoe” leki wan reide foe „libi na wan loesoe fasi”, di de so foeroe now na ini a disiten grontapoe di pori na moreel sei. — Judas 4; 2 Korentesma 6:1, 2.

Te joe e gi jesi na a lobi-ati rai foe Petrus, Paulus, nanga Judas èn te joe abi foeroe foe doe èn de fajafaja na ini a diniwroko foe Gado, dan joe kan wakti nanga pasensi na tapoe a ten te Jehovah o kon ini a tori. Ma joe sa doe dati?

No draidrai foe meki kontakti nanga den Kotoigi na ini joe kontren so taki joe kan kisi jepi foe tranga joe bribi na ini a pramisi foe têgo libi foe a Kriaman. Leri san de fanowdoe so taki joe kan doro den markitiki foe abi wan prati na ini a kotoigiwroko disi na heri grontapoe di noiti moro sa doe baka, di sa kon na wan kaba na a bigi banawtoe di e kon krosibei (Markus 13:10). Dan joe sa abi a froewakti foe libi na ini a njoen grontapoe foe regtfardikifasi di Jehovah e pramisi (2 Petrus 3:13). Gi jesi na den froemane foe en! Wakti nanga pasensi! Abi foeroe foe doe!

[Foetoewortoe]

[Prenki na tapoe bladzijde 7]

Leri now foe a pramisi foe Gado gi wan paradijs

[Sma di abi a reti foe den prenki na tapoe bladzijde 5]

Wolfoe: Meti/Jim Harter/Dover Publications, Inc.; jongoe skapoeman: Pikin-nengre: A Pictorial Archive from Nineteenth-Century Sources/Grafton/Dover Publications, Inc.