Kowoekondre preikiman e froeteri
Gebroiki ibri okasi
SMA sabi Jehovah Kotoigi na heri grontapoe foe a bijbel leriwroko di den e doe. Ma den e hori programa toe di e tjari tra winimarki kon gi a libimakandra. Sma teki a poeblikiwroko disi nanga opo anoe, soleki fa den ondrofenitori di e kon now di komoto foe Ekwador, e sori.
◻ Den edeman foe wan bigi fabriki pe den e meki grasi ben wani orga wan lès foe den prenspari sani ini famiri afersi gi den wrokoman foe den. A personeelschef ben gi difrenti katolik priester wan kari foe den ben kan teki prati na ini disi, ma no wan foe den ben wani. Wan priester ben taigi en taki foe di wan toe priester nomo ben doro den markitiki foe taki foe na afersi dati, dan soleki fa a ben sori no wan ben sa de foe kisi foe doe en. Di wan wrokoman di de wan Kotoigi ben jere disi, a ben seti sani taki wan brada di nofotron ben e doe preikiwroko na bisnis kontren ben sa kon fisiti a fabriki.
A dei na baka kaba, a Kotoigi ben go na a personeelschef nanga wan pristeri foe wan studiecursus. Den ben meki wan lijst nanga tori di komoto foe difrenti poeblikâsi foe a Waktitoren Genootschap. A ben naki na ati foe a chef. A ben teki dri edepenti foe takimakandra — libisma demakandra, ethiek na wrokope èn ethiek na ini na osofamiri. Den ben seti sani foe poti prakseri tapoe den bodoi nanga ala wrokoman.
Den ben prati den wrokoman na ini seibi groepoe foe 30 sma, èn baka dati dri bekwaam brada ben taki foe den bodoi nanga den. San ben de den bakapisi? Wan moi nomroe wrokoman ben aksi efoe den ben kan kisi fisiti na den oso, èn 216 bijbelstudie jepisani ben prati. A ben naki na ati foe den edeman sote taki den ben aksi den Kotoigi efoe den ben kan sreka ete wan toe lezing.
◻ No so langa pasa, Ekwador ben teki wan wet di e gi pasi taki den kan leri relisi na skoro. Wan zendeling sisa ben go fisiti wan oema-edeman foe wan lagi skoro èn a ben aksi fa a njoen wet ben e wroko. Na edeman ben froeklari taki den ben proeberi foe bigin wan programa foe anbegi Maria, ma a no ben go doro. Di a sisa ben taki dati den sortoe anbegi dati ben sa kan tjari problema kon gi den pikin di no ben de katoliksma, na edeman ben agri nanga en. „Na a tra sei”, a zendeling ben taki, „wi abi wan programa foe leri gronprakseri foe boen gwenti nanga wèt foe bijbel di no e froeplekti wan sma foe teki wan spesroetoe relisi.” Na edeman ben piki: „O ten joe kan kon? Tra tamara?” Baka di a zendeling ben sori en a boekoe Naar de Grote Onderwijzer luisteren (Arki na a Bigi Leriman), den ben teki a bosroiti foe taki foe a kapitel „Gelukkig zijn de vredelievenden” (Kolokoe den wan di lobi vrede).
Di a zendeling drai go baka, a ben fisiti seibi difrenti klas dri joeroe langa ala di na edeman ben e arki toe. Baka di a ben kaba taki nanga wan di foe feifi klas, wan foe den studenti ben taki: „Jufrow, sorgoe grantangi taki joe fisiti a di foe siksi klas. Ala ten den e proeberi foe fon oenoe èn e bigin wan feti!” Wan skorojufrow ben taki: „Ogri di e doe nanga tranga na so wan prenspari tori. Wi abi moro ten fanowdoe foe taki foe na afersi disi.”
Den ben meki mofo foe go baka na a skoro foe taki foe tori leki gi jesi èn taki lei. Te so fara, den bakapisi de heri boen. Now te a zendeling sisa e waka na strati, den pikin e lon kon taki en odi èn den e poti bijbel aksi gi en. Trawan e feni en wan grani foe meki a papa nanga mama foe den kon leri sabi en. Boiti dati, a bigin wan bijbelstudie nanga toe foe den skoropikin.