’Tan waka na ini wánfasi nanga Krestes’
„Foe dati ede, foe di oenoe teki Krestes Jesus, a Masra, tan waka na ini wánfasi nanga en.” — KOLOSESMA 2:6.
1, 2. (a) Fa bijbel e taki foe a libi foe Heinok foe getrow diniwroko gi Jehovah? (b) Fa Jehovah jepi wi foe waka nanga en soleki fa Kolosesma 2:6, 7 e sori?
OENOE oiti loekoe wan pikin boi di e waka nanga en papa? Ala sani di a papa e doe a pikinman e doe toe, en fesi e sori taki a e denki foeroe foe en papa; a papa e jepi en foe a kan waka nanga en, èn en eigi fesi e brenki foe lobi èn foe a feni di a feni en boen. A fiti taki, Jehovah e teki wan srefi sortoe idea foe sori fa wan libi foe getrow diniwroko gi en moesoe de. Foe eksempre, Gado Wortoe e taki dati a getrow man Heinok „ben tan waka nanga a [troe] Gado”. — Genesis 5:24; 6:9.
2 Neleki wan papa, di e hori sma na prakseri, ben sa jepi en jongoe manpikin foe waka nanga en, na so Jehovah gi wi a moro betre jepisani di ben sa kan de. A ben seni en wan-enkri gebore Manpikin kon na grontapoe. Ala sani di Jesus Krestes ben doe en heri libi langa djaso na grontapoe, a ben prenki en hemel Tata na wan volmaakti fasi (Johanes 14:9, 10; Hebrewsma 1:3). So boen foe wi kan waka nanga Gado, wi moesoe waka nanga Jesus. Na apostel Paulus ben skrifi: „Foe dati ede, foe di oenoe teki Krestes Jesus, a Masra, tan waka na ini wánfasi nanga en, meki roetoe èn kon bow na ini en èn kon stanfaste na ini a bribi, neleki fa oenoe ben leri, abi [bribi] pasa marki, ala di oenoe e taki wortoe foe tangi.” — Kolosesma 2:6, 7.
3. Foe san ede wi kan taki, akroederi Kolosesma 2:6, 7, dati moro de na ini a waka na ini wánfasi nanga Krestes leki foe teki dopoe nomo?
3 Foe di opregti bijbelstudenti wani waka na ini wánfasi nanga Krestes, den e meki moeiti foe waka na ini en volmaakti foetoestap, èn den e teki dopoe (Lukas 3:21; Hebrewsma 10:7-9). Na heri grontapoe, na ini 1997 wawan, moro leki 375.000 ben doe a prenspari stap disi — so wan sani foe moro leki 1000 sma ibri dei. A gro disi e gi groskin! Ma den wortoe foe Paulus di skrifi na Kolosesma 2:6, 7 e sori taki moro de na a waka di wi moesoe waka na ini wánfasi nanga Krestes leki foe teki dopoe nomo. A Griki werkwortoe di den vertaal nanga „tan waka” e taki foe wan doe di moesoe go doro, doronomo. Moro fara, Paulus e taki toe dati a waka di wi moesoe waka nanga Krestes abi fo sani na ini: meki roetoe na ini Krestes, kon bow na ini en, kon stanfaste na ini a bribi, èn taki wortoe foe tangi pasa marki. Meki wi go loekoe ibriwan foe den wortoe disi èn kon froestan fa den kan jepi wi foe tan waka na ini wánfasi nanga Krestes.
Oenoe ’meki roetoe na ini Krestes’?
4. San a wani taki foe ’meki roetoe na ini Krestes’?
4 Na a fosi presi, Paulus e skrifi taki, wi moesoe ’meki roetoe na ini Krestes’. (Teki gersi Mateus 13:20, 21.) Fa wan sma kan wroko go doro a marki foe meki roetoe na ini Krestes? We, den roetoe foe wan prani kibri gi sma ai, ma den de prenspari gi a prani — den e meki a tanapoe steifi èn den e gi en njanjan. Na a srefi fasi, na eksempre èn leri foe Krestes na a fosi presi abi krakti na tapoe wi na wan fasi di wi no e si nanga ai, èn a e kon ankra na ini wi froestan èn na ini wi ati. Drape den e gi wi njanjan èn den e tranga wi. Te wi e gi den na okasi foe tiri wi denki, foe tiri den sani di wi e doe èn foe tiri den bosroiti foe wi, dan den sa meki wi gi wi libi abra na Jehovah. — 1 Petrus 2:21.
5. Fa wi kan „kweki wan angri” gi njanjan na jejefasi?
5 Jesus ben lobi a sabi di e komoto foe Gado. A ben agersi dati srefi nanga njanjan (Mateus 4:4). Na foe dati ede meki na ini en Bergitaki a ben sori go na 21 tekst foe aiti difrenti boekoe foe den Hebrew Boekoe foe bijbel. Foe waka na baka na eksempre foe en, dan wi moesoe doe leki fa na apostel Petrus e froemane — „kweki wan angri” gi njanjan na jejefasi „leki njoenjoen pikin” (1 Petrus 2:2). Te wan njoenjoen pikin abi angri foe kisi njanjan, a e meki a tranga firi foe en na inisei krinkrin bekènti. Efoe nownow wi no abi a firi dati gi njanjan na jejefasi, dan den wortoe foe Petrus e gi wi deki-ati foe „kweki” na angri dati. Fa? A gronprakseri di wi kan feni na Psalm 34:8 kan jepi: „Tesi èn si taki Jehovah boen.” Efoe wi e „tesi” doronomo foe Jehovah Wortoe, bijbel, kande wi e leisi wan pisi foe en ibri dei, dan wi sa si taki a e gi wi njanjan na jejefasi èn a boen. Te foe kaba, na angri foe wi gi en sa gro.
6. Foe san ede a de prenspari foe prakseri dipi foe den sani di wi e leisi?
6 Ma a de prenspari foe meki a skin foe wi teki a njanjan boen, baka te wi njan en. So boen, wi moesoe prakseri dipi foe san wi e leisi (Psalm 77:11, 12). Foe eksempre, te wi e leisi a boekoe A moro bigi man di oiti ben libi, dan wi ben sa abi moro winimarki foe ibri kapitel, efoe wi e stòp èn e aksi wisrefi: ’Sortoe eigifasi foe Krestes mi e si na ini a pisi tori disi, èn fa mi kan waka na en baka ini mi eigi libi?’ Efoe wi e prakseri dipi na a fasi disi dan dati kan jepi wi foe gebroiki san wi e leri ini wi libi. So boen, te wi moesoe teki wan bosroiti, wi kan aksi wisrefi san Jesus kande ben o doe. Efoe wi e teki wi bosroiti akroederi dati, dan wi e sori taki wi meki roetoe na ini Krestes troetroe.
7. Fa wi moesoe denki foe a teki di wi e teki tranga njanjan na jejefasi na ini wi?
7 Paulus e gi wi tranga toe foe teki na ini wi „tranga njanjan”, den moro dipi waarheid foe a Wortoe foe Gado (Hebrewsma 5:14). A leisi di wi e leisi a heri bijbel ben sa kan de a fosi marki di wi wani doro ini a tori disi. Baka dati, wi abi moro spesroetoe tori foe studeri, soleki a froeloesoe-ofrandi foe Krestes, den difrenti froebontoe di Jehovah ben meki nanga a pipel foe en, noso wan toe foe den profeiti boskopoe na ini bijbel. Boen foeroe materiaal de di kan jepi wi foe teki so wan tranga njanjan na jejefasi na ini wi èn kan meki wi froestan en. San na a marki di wi wani doro foe di wi e teki so wan sabi na ini wi? A no foe gi wi reide foe skepi, ma foe bow a lobi foe wi gi Jehovah èn foe hari wi kon moro krosibei na en (1 Korentesma 8:1; Jakobus 4:8). Efoe, wi e teki a sabi disi fajafaja na ini wi, e fiti en na ini wi libi èn e gebroiki en foe jepi trawan, dan troetroe wi sa waka na baka na eksempre foe Krestes. Disi sa jepi wi foe meki roetoe na ini en na wan heri boen fasi.
Oenoe ’kon bow na ini Krestes’?
8. San a wani taki foe ’kon bow na ini Krestes’?
8 Foe a tra fasi foe waka na ini wánfasi nanga Krestes, Paulus e abra go gawgaw foe a wan agersi di na ai kan si go na a trawan — foe di foe wan prani go na di foe wan oso. Te wi e prakseri foe wan oso di den e bow, dan wi no e prakseri a fondamenti nomo, ma so srefi foe a heri oso di e bow kon foe wi man si en krinkrin, nanga jepi foe foeroe tranga wroko. Na a srefi fasi, wi moesoe doe foeroe moeiti foe kweki eigifasi nanga gwenti di de leki di foe Krestes. A bigi moeiti dati no e doe sondro foe sma si en, neleki fa Paulus ben skrifi gi Timoteus: ’Meki ala sma si taki joe e go na fesi’ (1 Timoteus 4:15; Mateus 5:16). San na wan toe kresten aktiviteit di e bow sma?
9. (a) San na wan toe praktis marki di wi kan poti na wi fesi, foe man waka na baka Krestes na ini a diniwroko foe wi? (b) Fa wi doe sabi taki Jehovah wani wi njanboen foe a diniwroko foe wi?
9 Jesus ben gi wi a wroko foe preiki èn leri a boen njoensoe (Mateus 24:14; 28:19, 20). A ben gi a volmaakti eksempre, foe di a ben e preiki sondro frede èn nanga boen bakapisi. A no de foe taki dati noiti wi sa man doe en so boen leki en. Tokoe, na apostel Petrus e poti a marki disi gi wi: „Ma santa Krestes leki Masra na ini oen ati, èn de klariklari ala ten foe opo taki gi oensrefi na fesi ibriwan sma di e aksi oenoe wan reide foe a howpoe di de na ini oenoe, ma doe dati makandra nanga wan safrifasi èn nanga dipi lespeki” (1 Petrus 3:15). Efoe oenoe e firi taki oenoe no de ’ala ten klariklari foe opo taki gi oensrefi’, no lasi-ati. Poti marki di de reidelek gi oensrefi, di sa jepi oenoe foe doro a markitiki dati safrisafri. A sreka di oenoe e sreka na fesi, kan jepi oenoe foe tjari kenki kon na ini oenoe pristeri noso a kan jepi oenoe foe gebroiki wan noso toe bijbeltekst ini den pristeri foe oenoe. Oenoe ben sa kan poti leki marki foe prati moro bijbel poeblikâsi, foe tjari moro gobaka noso foe opo wan bijbelstudie. Wi no moesoe poti ala wi prakseri tapoe nomroe nomo — soleki na a nomroe foe joeroe, omeni wi prati, noso omeni bijbelstudie wi abi — ma na tapoe a kwaliteit. Te wi e poti reidelek marki èn e doe moeiti foe doro den, dan dati kan jepi wi foe abi prisiri ini a gi di wi e gi wisrefi na ini a diniwroko. Dati na san Jehovah wani — foe wi dini en „nanga prisiri”. — Psalm 100:2; teki gersi 2 Korentesma 9:7.
10. San na wan toe tra kresten aktiviteit di wi moesoe doe, èn fa den e jepi wi?
10 Wroko de toe ini a gemeente di wi moesoe doe di e bow wi na ini Krestes. A moro prenspari wan na a sori di wi moesoe sori lobi gi makandra, bika disi na a marki di e sori soema na troe kresten (Johanes 13:34, 35). Te wi e studeri ete, foeroe foe wi e kon kisi wan krosibei banti nanga a sma di e gi wi leri, wan sani di de gewoon. Ma wi ben sa kan teki a rai foe Paulus foe ’bradi wisrefi’ foe di wi e go leri sabi trawan na ini a gemeente? (2 Korentesma 6:13) Den owroeman srefi abi a lobi èn a warderi foe wi fanowdoe. Te wi e wroko makandra nanga den, e soekoe èn e teki a bijbel rai foe den, dan wi sa meki a tranga wroko foe den moro makriki (Hebrewsma 13:17). Na a srefi ten dati, disi sa jepi wi kon bow na ini Krestes.
11. Sortoe fasi foe si sani soleki fa a de troetroe, wi moesoe teki ini a tori foe dopoe?
11 Dopoe na wan span okasi! Ma wi no moesoe froewakti taki baka dati ibri momenti foe wi libi sa abi a srefi sortoe faja dati. Wan bigi pisi foe a bow di wi e kon bow na ini Krestes na taki wi moesoe „waka na wan orde fasi na ini a srefi gwenti” disi (Filipisma 3:16). Dati no wani taki wan loboso, dededede fasi foe libi. A wani taki nomo, waka go na fesi langalanga — nanga tra wortoe, bow boen gwenti na jejefasi èn tan hori wisrefi na den ibri dei, jari go jari kon. Hori na prakseri taki, „a sma di horidoro te na a kaba, na en sa kisi froeloesoe”. — Mateus 24:13.
Oenoe „kon stanfaste na ini a bribi”?
12. San a wani taki foe „kon stanfaste na ini bribi”?
12 Na ini a di foe dri pisi foe den wortoe di e froeteri foe a waka foe wi na ini wánfasi nanga Krestes, Paulus e gi wi deki-ati foe „kon stanfaste na ini a bribi”. Wan vertaling e taki, „poti krakti na a sei foe bribi”, foe di a Griki wortoe di Paulus teki, kan wani taki „foe poti krakti, foe gi a djaranti èn foe meki de akroederi wet sondro taki dati man kenki”. Te wi e gro na ini sabi, wi e kisi moro reide foe si taki a bribi foe wi ini Jehovah Gado, abi wan steifi fondamenti èn, te joe loekoe en boen, a poti steifi leki wan wet. A bakapisi na wan gro ini a stanfastefasi foe wi. A e kon moro hebi gi a grontapoe foe Satan foe basi wi. Disi e memre wi na a froemane foe Paulus foe „go moro fara foe kon lepi” (Hebrewsma 6:1). Lepifasi èn stanfastefasi e go skinskin nanga makandra.
13, 14. (a) Na fesi sortoe sani di den fosi jarihondro kresten na Kolose ben tanapoe di ben kan de wan kefar gi a stanfastefasi foe den? (b) San ben kan gi na apostel Paulus broko-ede?
13 Den fosi jarihondro kresten na Kolose ben abi foe kakafoetoe gi sani di ben kan meki a stanfastefasi foe den kon ini kefar. Paulus ben warskow: „Loekoe boen: kande wan sma de, di sa tjari oenoe gowe leki wan sani di a kisi nanga jepi foe filosofia nanga bedrigifasi di de wan soso sani, akroederi den gwenti foe libisma, akroederi den fondamenti sani foe grontapoe èn no akroederi Krestes” (Kolosesma 2:8). Paulus no ben wani dati den Kolosesma, di ben kon tron borgoe na ini „a kownoekondre foe a Manpikin foe [Gado] en lobi”, ben moesoe lasi den libi èn foe sani poeroe den gowe foe a blesi jejefasi foe den (Kolosesma 1:13). San ben kan kori den? Paulus ben sori go na „filosofia”, a wan enkri tron di a wortoe disi de foe feni na ini bijbel. A ben e taki foe den Griki filosofiaman, soleki Plato nanga Sokrates? Ala di den wan disi ben de wan kefar gi troe kresten, na ini den dei dati, sma ben gebroiki a wortoe „filosofia” gi foeroe tra sani. Foeroetron a ben e sori go na foeroe groepoe sma èn sma di ben abi den srefi fasi foe denki noso fasi foe tjari densrefi — srefi na relisi groepoe. Foe eksempre, den sortoe fosi jarihondro djoe soleki Josephus nanga Filo ben e kari na eigi relisi foe den wan filosofia — kande foe meki a kisi moro waarde.
14 Son filosofia di Paulus kande ben broko en ede nanga den, ben de foe a sei foe relisi. Baka ten, ini a srefi kapitel foe a brifi foe en gi den Kolosesma, a ben sori go na den wan di ben gi leri foe „no meri, no tesi, no fasi”, èn na so wan fasi a ben e poti spesroetoe prakseri na tapoe a Wet foe Moses, di ben kon na wan kaba di Krestes dede (Romesma 10:4). Makandra nanga heiden filosofia, tra makti ben abi krakti tapoe den èn den ben de wan kefar gi a jejefasi foe a gemeente (Kolosesma 2:20-22). Paulus ben warskow gi filosofia di ben de wan pisi foe „den fositen sani foe grontapoe”. Den sortoe falsi rai dati ben komoto foe libisma.
15. Fa wi kan kibri wisrefi foe no meki a fasi foe denki di no e kroederi nanga bijbel èn di wi e ondrofeni foeroetron no abi krakti na wi tapoe?
15 A hori di wan sma e hori baka gi libisma prakseri èn gi denki di no gron steifi tapoe Gado Wortoe kan tron wan kefar gi a stanfastefasi foe wan kresten. Wi na ini a ten disi moesoe de na ai gi den sortoe kefar dati. Na apostel Johanes ben gi deki-ati: „Lobiwan, no bribi ibri wortoe, di sma taki kon nanga jepi foe Gado en santa jeje, ma tesi den wortoe di sma taki kon nanga jepi foe Gado en santa jeje, foe si efoe den kon foe Gado” (1 Johanes 4:1). So boen, efoe wan skoromati e proeberi foe overtoigi oenoe taki foe libi akroederi bijbel gronprakseri na fositen-tori, noso efoe wan birtisma e meki moeiti foe abi krakti na oenoe tapoe foe kweki lobi gi goedoe, noso efoe wan kompe wrokoman e dwengi oenoe na wan kibri fasi foe doti oenoe konsensi di oenoe oefen nanga jepi foe bijbel noso efoe srefi wan kompe bribiman e kroetoe-kroetoe, noso srefi e taki negatief foe san den e denki foe trawan na ini a gemeente, no teki nomo san den e taki. Poeroe na ini san no e kroederi nanga Gado Wortoe. Efoe wi e doe so, dan wi sa tan de stanfaste te wi e waka na ini wánfasi nanga Krestes.
’Abi bribi pasa marki, ala di oenoe e taki wortoe foe tangi’
16. San na a di foe fo fasi foe waka na ini wánfasi nanga Krestes, èn sortoe aksi wi ben sa kan poti gi wisrefi?
16 A di foe fo fasi foe a waka di wi moesoe waka na ini wánfasi nanga Krestes di Paulus e taki foe en na taki wi moesoe ’abi bribi pasa marki, ala di wi e taki wortoe foe tangi’ (Kolosesma 2:7). Den wortoe „abi . . . pasa marki” e memre wi na wan liba di en watra e froedoe abra en sjoro. Disi e gi wi leki kresten a rai, dati a taki di wi e taki wortoe foe tangi moesoe de wan doronomo sani noso wan sani di wi gwenti doe. Ibriwan foe wi kan aksi wisrefi seiker, ’mi de nanga tangi na ati?’
17. (a) Foe san ede wi kan taki dati wi alamala abi foeroe sani foe taki tangi gi, awansi wi abi problema? (b) San na wan toe presenti foe Jehovah di oenoe e firi spesroetoe tangi gi?
17 Foe troe, ibri dei wi alamala abi nofo reide foe taki Jehovah tangi pasa marki. Srefi na ini den moro takroe ten, wan toe eenvoudig sani kan gi momenti foe firi froelekti. Wan mati e sori firi gi oenoe. Wan lobiwan e fasi oenoe foe gi oenoe wan korostoe firi. Wan boen neti rostoe e meki oenoe kisi oen krakti baka. Wan switi njanjan e tapoe a kiri di angri ben e kiri oenoe. A singi foe wan pikin fowroe, a lafoe foe wan pikin, wan krin blaw loktoe, wan switi winti — ala den sani disi na sani di wi kan ondrofeni na ini wan enkri dei. A kan pasa so makriki foe teki den presenti disi leki soso sani. Den alamala no warti wan mi-e-taki-joe-tangi? Den alamala e komoto foe Jehovah, a Fonten foe „ibri boen presenti nanga ibri volmaakti kado” (Jakobus 1:17). Èn a gi wi presenti di e meki den sani disi loekoe pikin na den sei — foe eksempre, a bigi presenti foe libi srefi (Psalm 36:9). Moro fara, a gi wi na okasi foe libi foe têgo. Foe kan gi wi den presenti disi, Jehovah ben meki a moro hei ofrandi foe di a òfer en wan-enkri gebore Manpikin, „a sma di spesroetoe a ben abi waran firi gi”. — Odo 8:30; Johanes 3:16.
18. Fa wi kan sori foe wi sei taki wi abi tangi gi Jehovah?
18 We, loekoe fa den wortoe foe a psalm singiman de troe srefisrefi: „A boen foe gi Jehovah tangi” (Psalm 92:1). Na a srefi fasi Paulus ben memre den kresten na Tesalonika: „Gi tangi gi ala sani” (1 Tesalonikasma 5:18; Efeisesma 5:20; Kolosesma 3:15). Iniwan foe wi ben sa kan teki a bosroiti foe de nanga moro tangi na ati. Wi no moesoe begi soso gi den sani di wi abi fanowdoe. A fiti taki wi e kari wan toe sani di wi abi fanowdoe ini wi begi. Ma prakseri pikinso taki oenoe abi wan mati di e taki nomo nanga oenoe te a abi wan sani foe oenoe fanowdoe! So boen, foe san ede wi no sa begi Jehovah soso foe taigi en tangi noso prèise en? Den sortoe begi dati moesoe plisi en srefisrefi te a e loekoe komoto foe hemel kon na a grontapoe disi di no abi tangi! Wan moro mendri prenspari winimarki na taki den sortoe begi dati kan jepi wi foe poti prakseri tapoe den positief sei foe a libi, foe di den e memre wi o blesi wi de troetroe.
19. Fa a fasi fa Paulus e taki na Kolosesma 2:6, 7 e gi wi rai taki wi alamala kan tan go na fesi foe waka nanga Krestes?
19 A no de wan troetroe aparti sani foe si omeni koni tiri kan hari poeroe na ini soso wán enkri pisi foe Gado Wortoe? A rai foe Paulus foe tan waka na ini wánfasi nanga Krestes na wan sani di ibriwan foe wi moesoe wani teki na ati. Meki wi teki a fasti bosroiti dan foe ’meki roetoe na ini Krestes’, „kon bow na ini en”, „kon stanfaste na ini bribi”, èn ’taki wortoe foe tangi pasa marki’. A sortoe rai disi de spesroetoe prenspari gi den wan di dopoe no so langa ete. Ma wi alamala kan poti en na ini wi libi. Prakseri fa wan mamaroetoe e gro go dipi moro nanga moro èn fa wan oso di den e bow, e bow go na loktoe moro nanga moro. Na so a waka di wi e waka nanga Krestes noiti e kon na wan kaba. Wi alamala moesoe gro na jejefasi na tapoe difrenti kontren foe wi libi. Jehovah sa jepi wi èn blesi wi bika a wani taki wi tan waka nanga en èn nanga en lobi Manpikin sondro foe stòp.
San joe ben sa piki?
◻ San de ini a tori foe waka na ini wánfasi nanga Krestes?
◻ San a wani taki foe ’meki roetoe na ini Krestes’?
◻ Fa wi ben sa kan „kon bow na ini Krestes”?
◻ Foe san ede a de so prenspari foe „kon stanfaste na ini a bribi”?
◻ Sortoe reide wi abi foe ’taki wortoe foe tangi pasa marki’?
[Prenki na tapoe bladzijde 10]
Den roetoe foe wan bon no abi foe de foe si, ma den e meki a bon feni njanjan èn e hori en steifi na ini a gron