Jesus — A Tiriman „di a bigin foe en de foe sensi owroeten”

JOE ati e naki moro tranga te joe e wakti a kon di wan famiriman e kon di langa ten joe no ben si. Te foe kaba, joe e miti en èn e taigi en odi na wan waran fasi. Joe e arki nanga joe heri ati te a e froeteri joe foe san ede en papa ben seni en kon fisiti joe. Ne a ten e kon gawgaw foe a gowe baka na oso. Na wan sari fasi, joe e taigi en adjosi. A sari di joe e firi te a gowe, e kon moro mendri te joe e jere njoensoe taki a doro boen na oso.

Baka ten, te joe e soekoe na mindri wan toe owroe brifi di ben skrifi, joe e kon si brifi di e taki sjatoe foe den sani di a famiriman foe joe doe langa bifo a ben bigin nanga a rèis foe kon miti joe. Den sani di den brifi dati e taigi joe e gi joe moi inzicht ini a background foe en èn a e meki a warderi di joe abi gi a fisiti foe en èn a wroko di a e doe now, kon moro bigi.

„Foe sensi owroeten”

Na mindri den fositen dokumenti di den fosi jarihondro djoe ben abi, ben de den sani di Gado profeiti Mika ben skrifi, èn di ben skrifi so wan seibi hondro jari na fesi. Den disi e sori soifri a presi pe a Mesias ben o gebore. „Èn joe, o Betlehem Efrata, joe di de toemoesi pikin foe de na mindri den doesoendoesoen foe Juda, foe joe a sma di o tron tiriman na Israèl sa komoto èn kon na mi, a sma di a bigin foe en de foe sensi owroeten, foe den dei foe ten di no skotoe” (Mika 5:2). Leki wan kon troe foe den wortoe disi, Jesus ben gebore na ini a Judea dorpoe foe Betlehem na ini a jari di den e kari now 2 b.G.T. Ma fa a bigin foe en ben kan de „foe sensi owroeten”?

Jesus ben libi bifo a ben kon tron wan libisma. Na ini en brifi gi den kresten na Kolose, na apostel Paulus ben taki foe Jesus leki „a prenki foe a Gado di wi no kan si, a fosi geborewan foe ala den sani di Gado kria”. — Kolosesma 1:15.

Jehovah, a Fonten foe koni, ben kria en fosi Manpikin leki a „moro froekoe sani foe en wroko”, te wi e gebroiki den wortoe di skrifi nanga jepi foe Gado en santa jeje, di Kownoe Salomo ben skrifi na ini a boekoe foe Odo. Baka a tan di Jesus tan wan pisi ten na grontapoe èn a drai di a drai go baka na hemel, a ben froeklari taki foe troe a ben de „a bigin foe den sani di Gado kria”. Leki koni di den prenki leki wan sma, Jesus di ben libi bifo a ben tron libisma e taki: „Di [Jehovah] ben sreka den hemel, mi ben de drape”. — Odo 8:22, 23, 27; Openbaring 3:14.

Sensi a bigin, Gado Manpikin ben kisi wan aparti wroko, di foe de wan „basi wrokoman” sei na sei nanga en Tata. A sani disi ben prisiri Jehovah srefisrefi! „Mi ben tron a sma di spesroetoe a ben abi waran firi gi dei na dei”, na so Odo 8:30 e taki èn a taki moro fara: „Mi ben breiti na en fesi ala ten.”

Baka ten Jehovah ben gi en fosi gebore Manpikin a kari foe teki prati na ini a kria foe libisma. „Meki wi meki libisma na a prenki foe wi”, a ben froeklari „soleki fa wi de” (Genesis 1:26) Leki bakapisi foe dati, dan wan tra waran firi ben gro. „Den sani di mi ben abi waran firi gi den troetroe”, Jesus di ben libi bifo a ben tron libisma ben tjari kon na krin, „ben de den manpikin foe libisma” (Odo 8:31). Na a bigin foe en Evangelie, na apostel Johanes ben erken a ròl foe Jesus di ben libi bifo a ben tron libisma ini a kria di a ben kria: „Ala sani ben kon de nanga jepi foe en, èn sondro en no wan sani srefi ben kon de.” — Johanes 1:3.

A Takiman foe Jehovah

Den wortoe foe Johanes e hari a prakseri go na wan tra grani di a Manpikin foe Gado ben abi, dati wani taki, foe de wan takiman. Foe sensi a bigin a ben wroko leki a Wortoe. So boen, di Jehovah ben taki nanga Adam, èn baka ten di a ben taki nanga Adam makandra nanga Eva, dan a sori leki a ben doe dati nanga jepi foe a Wortoe. Èn soema de moro bekwaam foe tjari den rai foe Gado gi a tanboen foe a libisma famiri leki a sma di ben abi waran firi gi den troetroe? — Johanes 1:1, 2.

Fa a ben moesoe gi a Wortoe bigi sari foe si fa Eva èn baka ten Adam trangajesi a Kriaman foe den! Èn fa kande a ben angri foe loesoe den problema di a trangajesi foe den ben tjari kon tapoe den bakapikin foe den! (Genesis 2:15-17; 3:6, 8; Romesma 5:12) Di Jehovah ben e taki nanga Satan, a wan di ben gi Eva deki-ati foe meki oproeroe, Jehovah ben taki: „Mi sa poti feantifasi na mindri joe nanga na oema èn na mindri joe siri nanga en siri” (Genesis 3:15). Foe di a ben de kotoigi foe a sani di pasa na ini Eden, meki a Wortoe ben froestan taki, leki a moro prenspari pisi foe a „siri” foe na oema, en ben o tron a sma di ben o ondrofeni ogri-ati bita-atifasi. A ben sabi taki Satan ben de wan kiriman. — Johanes 8:44.

Di baka ten Satan ben tjari tweifri kon na a soifri retifasi foe Job, a ben moesoe de so taki a Wortoe kisi atibron di a ben e jere den ogri-ati kragi di e pori sma nen, di ben e iti go teige en Tata (Job 1:6-10; 2:1-4). Foe troe, na ini en ròl leki gran engel, sma sabi a Wortoe leki Mikaèl, di en nen wani taki „Soema de leki Gado?” èn dati e sori fa a e feti gi Jehovah teige ala sma di abi a marki foe teki a soevereiniteit foe Gado nanga tranga. — Danièl 12:1; Openbaring 12:7-10.

Ala di a historia foe Israèl ben e meki, dan a Wortoe ben e si a proeberi di Satan ben e proeberi foe poeroe libisma foe a troe anbegi. Baka a komoto di den komoto na Egipti, Gado ben taigi Israèl nanga jepi foe Moses: „Now mi e seni wan engel go na oen fesi foe meki oenoe tan tapoe a pasi èn foe tjari oenoe go na a presi di mi sreka na fesi gi oenoe. Loekoe boen fa oenoe e handri nanga en èn arki en sten. No tjari oensrefi na wan oproeroe fasi teige en, bika a no sa gi oenoe pardon foe na fowtoe foe oenoe; bika mi nen de na ini en” (Exodus 23:20, 21). Soema ben de na engel disi? Kande a ben de Jesus, di ben libi bifo a ben tron libisma.

A saka di a saka ensrefi na wan getrow fasi

Moses dede na ini 1473 b.G.T., èn en skin ben beri „ini a lagipresi na ini a kondre Moab na abrasei foe Bet-Peor” (Deuteronomium 34:5, 6). Leki fa a sori, dan kande Satan ben wani gebroiki a dedeskin foe horibaka gi afkodrei. Mikaèl ben kakafoetoe gi a sani disi, ma a hori ensrefi na wan saka fasi na a tirimakti foe en Tata, Jehovah. ’Foe di a no ben prefoeroe foe kroetoe en nanga skempi wortoe’, Mikaèl ben warskow Satan: „Meki a de so taki Jehovah piri-ai gi joe.” — Judas 9.

Baka dati, Israèl ben bigin nanga a wini di a wini a Pramisi Kondre foe Kanan. Krosibei foe a foto Jerikow, dan Josua ben kisi wan djaranti agen taki a Wortoe ben sa tan tiri a nâsi. Drape a ben miti wan man nanga wan feti-owroe, di a ben hari na ini en anoe. Josua ben waka go miti a freimdesma èn a ben aksi: „Joe de na wi sei noso na a sei foe den feanti foe wi?” Prakseri pikinso foe a froewondroe di Josua ben froewondroe di a freimdesma ben tjari kon na krin soema na en, di a ben taki: „Nôno, ma mi — leki granman foe a legre foe Jehovah mi kon now.” Wi no abi foe froewondroe srefisrefi taki Josua ben fadon nanga en fesi na gron bifo a hei sma disi di ben teki presi gi Jehovah, èn sondro tweifri a de a Jesus disi di ben libi bifo a kon tron wan libisma di ben o tron „a Mesias a Tiriman” baka ten. — Josua 5:13-15; Danièl 9:25.

Wan tra okasi pe a ben kisi trobi nanga Satan ben de na ini den dei foe a profeiti Danièl. Na a okasi disi Mikaèl ben horibaka gi en kompe engel di na ogri jeje granman foe Persia ’ben e kakafoetoe gi en’, dri wiki langa. Na engel ben froeklari: „Loekoe! Mikaèl, wan foe den moro prenspari granman, ben kon jepi mi; èn mi foe mi sei, ben tan drape na den kownoe foe Persia.” — Danièl 10:13, 21.

A glori di a ben abi di a ben libi bifo èn di a ben de wan libisma

Na ini 778 b.G.T., a jari di Uzia, a kownoe foe Juda, dede, dan Gado profeiti Jesaja ben si wan fisjoen foe Jehovah na tapoe en hei kownoestoeroe. „Soema mi sa seni, èn soema sa go gi wi?”, Jehovah ben aksi. Jesaja ben de klariklari foe go, ma Jehovah ben warskow en taki den kompe Israèlsma foe en no ben o arki den sani di a ben o bariwroko gi den. Na apostel Johanes ben agersi den djoe, foe a fosi jarihondro di no ben e bribi, nanga den sma na ini den dei foe Jesaja, èn a ben taki: „Jesaja ben taki den sani disi foe di a ben si a glori foe en.” A glori foe soema? Di foe Jehovah èn di foe Jesus di ben libi na en sei ini a hemel kontren bifo a ben kon tron wan libisma. — Jesaja 6:1, 8-10; Johanes 12:37-41.

Wan toe jarihondro baka dati a moro bigi wroko di Jesus oiti ben kisi foe doe ben doro. Jehovah ben poeroe a libi krakti foe en lobi Manpikin komoto na hemel go na ini a bere foe Maria. Neigi moen na baka a kisi wan beibi boi, Jesus (Lukas 2:1-7, 21). Na apostel Paulus ben taki en so: „Ma di a fasti ten di ben poti ben doro, Gado ben seni en Manpikin kon, di wan oema ben meki” (Galasiasma 4:4) Na a srefi fasi na apostel Johanes e erken: „A Wortoe now ben tron skin èn ben tan na wi mindri, èn wi ben si a glori foe en, wan glori soleki di de foe wan wan-enkri gebore manpikin foe wan papa; èn a ben foeroe nanga no-froedini boen-ati nanga waarheid”. — Johanes 1:14.

Mesias e sori ensrefi

Di a ben abi no moro leki 12 jari, a jongoe Jesus ben kon froestan taki a ben moesoe doe den afersi foe en hemel Tata (Lukas 2:48, 49). So wan 18 jari baka dati, Jesus ben kon na Johanes a Dopoeman na a Jordan liba èn a ben dopoe. Di Jesus ben e begi, hemel ben opo, èn a santa jeje ben saka kon na en tapoe. Denki pikinso foe den heri ipi sani di a ben sa memre èn di kon na ini en froestan di a ben tjari na en prakseri baka den foeroe doesoendoesoen jari di a ben wroko makandra nanga en Tata leki wan basi wrokoman, takiman, granman foe a legre foe Gado èn leki a gran engel, Mikaèl. Baka dati a kisi a firi di meki en ati djompo di a ben jere a sten foe en Tata di e taigi Johanes a Dopoeman: „Disi na mi Manpikin, a lobiwan, di mi feni boen.” — Mateus 3:16, 17; Lukas 3:21, 22.

Johanes a Dopoeman no ben tweifri kwetikweti taki Jesus ben libi bifo a ben kon tron libisma. Di Jesus ben waka kon na en, dan Johanes ben froeklari: „Loekoe, a Pikin Skapoe foe Gado di e teki a sondoe foe grontapoe tjari gowe! Èn a taki moro fara: „Disi na a sma di mi ben taigi oenoe foe en: Baka mi wan man e kon di waka na mi fesi, bika a ben de bifo mi” (Johanes 1:15, 29, 30). Na apostel Johanes so srefi ben sabi taki Jesus ben libi bifo a ben kon tron wan libisma. „En di e kon foe tapoesei de na tapoe ala trawan”, a ben skrifi, èn „En di kon foe hemel de na tapoe ala trawan. San a si èn jere, foe dati a e gi kotoigi.” — Johanes 3:31, 32.

Na ini a jari 61 G.T., na apostel Paulus ben gi Hebrew kresten a deki-ati foe kon froestan dorodoro o prenspari a kon foe a Mesias na grontapoe èn a wroko foe en leki gran-priester ben de. Di a ben poti prakseri na tapoe a ròl foe Jesus leki Takiman, dan Paulus ben skrifi: „Gado . . . taki nanga wi na a kaba foe den dei disi nanga jepi foe wan Manpikin . . . di nanga jepi foe en, ben meki den seti foe sani.” Awinsi disi e sori go na a ròl foe Jesus leki „basi wrokoman” di ben e kria sani noso na a abi di a ben abi foe doe nanga den sani di Gado ben seti foe meki libisma kon verzoen safrisafri baka nanga en, djaso Paulus e poti en kotoigi, makandra nanga di foe trawan, foe a libi foe Jesus bifo a ben tron wan libisma. — Hebrewsma 1:1-6; 2:9.

Loyaalfasi foe sensi „owroeten”

Gi fosi jarihondro kresten na Filipi, Paulus ben gi a froemane disi: „Tan hori a fasi foe denki disi na ini oenoe, di ben de na ini Krestes Jesus toe, di, ala di a ben de na ini a skin leki di foe Gado, no ben prakseri foe teki sani abra nanga tranga, dati wani taki, a moesoe de a srefi leki Gado. Nôno, ma a ben leigi ensrefi èn ben teki a fasi foe wan srafoe èn ben kon de leki libisma. Moro leki dati, di a ben de ini a fasi foe wan libisma, a ben saka ensrefi èn ben gi jesi te na dede, ija, dede na wan pina-oedoe” (Filipisma 2:5-8). Na wan lobi-ati fasi Jehovah ben doe wan sani tapoe a loyaal fasi foe libi foe Jesus, foe di a ben gi en wan opobaka èn wan switi kon baka na oso na hemel. Fa disi na wan soifri eksempre foe soifri retifasi di Jesus libi na baka gi wi na ini ala têgo ten! — 1 Petrus 2:21.

Fa wi de nanga tangi na ati foe den pisi di bijbel e meki wi man si foe a libi foe Jesus bifo a ben kon tron wan libisma! Foe troe den e tranga a bosroiti foe wi foe waka na baka na eksempre foe en loyaal diniwroko, spesroetoe now di a e tiri leki Kownoe foe Gado en Mesian Kownoekondre. Meki wi prèise a „Granman foe vrede”, Jesus Krestes, wi Granman èn Tiriman „di a bigin foe en de foe sensi owroeten”! — Jesaja 9:6; Mika 5:2.

[Faki na tapoe bladzijde 24]

Kotoigi foe wan libi bifo a ben kon tron libisma

Jesus en eigi wortoe soleki fa den skrifi djaso na ondrosei, e kotoigi tranga foe a libi foe en bifo a ben kon tron libisma:

◻ „No wan sma opo go na hemel, boiti a sma di saka kon foe hemel, a Manpikin foe libisma.” — Johanes 3:13.

◻ „A no Moses ben gi oenoe a brede foe hemel, ma mi Tata e gi oenoe a troe brede foe hemel. Bika a brede foe Gado na a sma di e saka kon foe hemel èn e gi libi na grontapoe. . . . Mi komoto na hemel foe doe, no mi wani, ma foe doe a wani foe a sma di ben seni mi.” — Johanes 6:32, 33, 38.

◻ „Disi na a brede di e saka kon foe hemel, so taki iniwan sma kan njan foe en èn a no sa dede. Mi na a libi brede di saka kon foe hemel; efoe wan sma e njan foe a brede disi a sa libi foe têgo.” — Johanes 6:50, 51.

◻ „San, dan, efoe oenoe ben sa si a Manpikin foe libisma e opo go na pe a ben de bifo?” — Johanes 6:62.

◻ „A kotoigi di mi e gi de troe, bika mi sabi foe pe mi komoto èn pe mi e go. . . . Oenoe na foe den kontren na ondrosei; mi na foe den kontren na tapoesei. Oenoe na foe a grontapoe disi; mi a no foe a grontapoe disi.” — Johanes 8:14, 23.

◻ „Efoe Gado ben de oen Tata, dan oenoe ben o lobi mi, bika na foe Gado mi ben komoto èn mi de djaso. Èn mi no kon kwetikweti foe misrefi, ma na En ben seni mi kon.” — Johanes 8:42.

◻ „Foe troe mi e taigi oenoe, bifo Abraham ben kon na libi, mi ben de kaba.” — Johanes 8:58.

◻ „Tata, gi mi glori na joe sei nanga a glori di mi ben abi na joe sei bifo grontapoe ben de. Tata, foe a sei foe san joe gi mi, mi e winsi taki, pe mi de, den sa de toe nanga mi, so taki den kan si a glori di joe gi mi, bika joe ben lobi mi bifo joe ben seti grontapoe.” —Johanes 17:5, 24.

[Prenki na tapoe bladzijde 23]

Josua e miti a granman foe a legre foe Jehovah