Joe de na ai gi den situwâsi di wi e miti now?
FOE de na ai gi kefar kan meki taki wan sma tan na libi noso kan meki taki a dede. Disi wi kan agersi nanga sani di ben pasa na tapoe toe èilanti pe vulkaan de.
Mount Pelée, a moro ogri vulkaan foe a di foe 20 jarihondro, ben soetoe faja kon na doro tapoe 8 mei 1902 na tapoe a Karibis èilanti Martinik. Dati ben meki pikinmoro ala sma, so wan 30.000 sma di ben libi na Saint Pierre, wan foto na a foetoe foe a vulkaan, lasi den libi.
Na ini juni 1991, Mount Pinatubo ben soetoe a moro bigi soetoe di faja soetoe komoto foe wan vulkaan kande na ini a jarihondro disi. A sani disi ben feni presi na wan presi na den Filippijnen pe foeroe sma e tan, èn a sani disi ben meki so wan 900 sma lasi den libi. Ma disi leisi, toe sani ben jepi doesoendoesoen sma foe tan na libi: (1) a de di den ben de na ai gi a kefar èn (2) a wani di den sma ben wani doe sani akroederi den warskow.
Wroko di ben fiti, ben kibri a libi foe sma
Mount Pinatubo ben sribi hondrohondro jari kaba te leki na ini april 1991 a ben bigin sori taki a ben o soetoe faja kon na doro. Faja dampoe nanga swarfoedioxide ben bigin boro komoto foe a tapoesei pisi foe a bergi di e soetoe faja kon na doro. Den sma di ben tan na ini a birti foe a vulkaan ben firi fa a gron ben seki wan lo leisi baka makandra, èn wan ogri sortoe tranga lava ben bigin komoto kon foe a bergi. Sabidensiman foe a Filippijnen Instituut foe Vulkanologie nanga Seismologie ben tan na ai srefisrefi; baka wan pisi ten den ben overtoigi lantiman taki a ben sa de wan koni sani foe den poeroe den 35.000 sma di ben tan na ini den foto nanga dorpoe krosibei drape, èn tjari den go na wan tra presi.
Wi kan froestan taki sma no ben wani lowe gowe foe den oso sondro reide, ma di den ben kisi wan video foe si di ben sori den na wan libilibi fasi san na a kefar te wan vulkaan e soetoe faja kon na doro, dan na aksi di den ben aksi densrefi efoe den ben moesoe lowe gowe, no ben de moro. Den ipi-ipi sma di ben gowe, ben gowe biten. Toe dei na baka, a vulkaan soetoe kefalek èn ben trowe aiti kubieke kilometer foe asisi go na loktoe. Baka ten hondrohondro sma ben dede foe sani di ben lon leki watra moksi nanga tokotoko komoto foe a vulkaan. Ma kande doesoendoesoen sma no ben lasi den libi foe di a pipel ben de na ai gi a kefar èn ben doe wan sani akroederi den warskow.
Lowe komoto foe wan rampoe foe libisma
Na ini a fosi jarihondro foe wi Gewoon Teri, krestensma di ben libi na Jerusalem ben moesoe teki a bosroiti toe efoe den ben moesoe gowe libi den oso. A lowe di den ben lowe komoto foe a foto dati na ini 66 G.T. ben kibri den foe a pori di ben kon na tra sma tapoe di ben tan drape nanga doesoendoesoen djoe di ben kon na Jerusalem gi a Paska foe 70 G.T. Moro leki wán miljoen sma ben de na inisei foe a foto dati di ben abi wan skotoe foe hori a Paska, di den legre foe Rome ben tapoe iniwan okasi foe lowe komoto foe a foto. Angriten, a feti di den ben feti foe kisi makti, èn na ogri fasi fa den Romesma ben feti, ben abi leki bakapisi taki moro leki wán miljoen sma lasi den libi.
A rampoe dati di ben tjari wan kaba kon na a djoe oproeroe teige Rome, no ben kon sondro foe wan sma ben taki kaba dati na fesi. Someni tenti jari na fesi, Jesus Krestes ben taki dati sma ben sa lontoe Jerusalem nanga legre. A ben taki: „Te oenoe e si taki legre kampoe lontoe Jerusalem, sabi dan taki a pori foe en kon krosibei. Dan meki den wan di de na Judea, bigin lon gowe na den bergi, èn meki den wan di de na en mindri, hari gowe foe drape, èn meki den wan di de na den boiti presi, no go na en ini” (Lukas 21:20, 21). Den bodoi dati ben de krin, èn den bakaman foe Jesus no ben meki spotoe nanga den bodoi dati.
A fosi jarihondro historiaman Eusebius foe Caesarea ben skrifi taki den kresten foe Judea ben doe wan sani na tapoe a warskow foe Jesus. Di den Romesma ben hari den legre poeroe lontoe Jerusalem na ini 66 G.T., foeroe foe den djoe kresten ben gowe foe go libi na ini a heiden foto Pella, na Perea, wan distrikt foe Rome. Foe di den ben de na ai gi a situwâsi pe den ben libi na ini èn foe di den ben doe wan sani na tapoe a warskow foe Jesus, dati meki den ben kan lowe gowe gi a sani di sma kari „wan foe den moro ogri feti na ini a heri historia”.
Na ini a ten disi, na a srefi fasi a de fanowdoe foe de na ai. Na so spesroetoe sani moesoe doe toe. Na artikel di e kon now sa tjari kon na krin foe san ede dati de so.
[Prenki na tapoe bladzijde 3]
Godo-Foto, West Stock