Den tan na libi fu di den ben poti prakseri na warskow
YESUS KRESTES ben warskow na fesi taki a Dyu seti fu sani nanga en tempel na ini Yerusalem ben o kon na wan kaba. A no ben taki sortu dei dati ben o pasa. Ma a ben taki fu sani di ben o pasa fosi a pori dati kon. A ben gi den disipel fu en a deki-ati fu tan na ai èn fu komoto fu a presi drape so taki den ben o tan na libi.
Yesus ben taki na fesi: „Te unu e si taki legre kampu lontu Yerusalem, dan sabi taki a pori fu en kon krosibei.” A ben taki tu: „Te unu e si taki a tegu sani di e tyari pori kon . . . e tanapu na wan santa presi, . . . dan meki den sma di de na Yudea, lowe go na den bergi.” Yesus ben taigi den disipel fu en taki den no ben musu drai go baka fu go teki den gudu fu den. Den ben musu lowe wantewante efu den ben wani tan na libi.—Lukas 21:20, 21; Mateyus 24:15, 16.
Fu di den Dyu ben e opo densrefi teige a tirimakti fu Rome langa ten kaba, meki Cestius Gallus tyari a legre fu Rome fu go feti teige Yerusalem na ini 66 G.T. Den ben go na ini a foto èn den ben lontu a tempel srefi. Bruya ben de na ini a foto. Den wan di ben tan na ai, ben kan si taki rampu ben de fu kon. Ma den ben o man lowe? Sondro taki wan sma ben fruwakti dati, Cestius Gallus drai gowe baka nanga a legre fu en. Den Dyu di ben opo densrefi teige den Romesma, ben lon na den baka fu yagi den gowe. Now ben de a ten fu lowe gowe fu Yerusalem nanga heri Yudea!
A yari baka dati, den legre fu Rome kon baka ondro a tiri fu Vespasianus nanga en manpikin Titus. Na ini a heri kondre feti ben de. Na a bigin fu a yari 70 G.T., den Romesma bow wan skotu di ben meki fu srapu postu lontu Yerusalem. Nowan sma ben man lowe moro (Lukas 19:43, 44). Difrenti grupu na ini a foto ben e kiri makandra. Den Romesma ben kiri den tra sma di ben tan abra, noso den ben tyari den gowe leki srafu na ini katibo. A foto nanga a tempel ben kisi pori krinkrin. A fosi yarihondro historia skrifiman Josephus ben skrifi taki moro leki wan milyun Dyu ben nyan pina èn dede. A tempel dati noiti no bow baka.
Efu den Kresten ben de na ini Yerusalem ete na ini 70 G.T., dan densrefi ben o dede tu, noso den ben o tron srafu neleki ala den tra sma di ben de drape. Ma owruten historia skrifiman e taki dati den Kresten ben poti prakseri na a warskow fu Gado èn den ben lowe komoto fu Yerusalem èn fu heri Yudea sosrefi, fu go tan na den bergi na a owstusei fu a Yordanliba. Sonwan fu den ben go tan na Pela, na ini a distrikt Perea. Den ben gowe libi Yudea èn den no ben drai go baka. Den ben tan na libi fu di den ben poti prakseri na a warskow fu Yesus.
Yu e poti seryusu prakseri na warskow di e kon fu sma di yu kan frutrow?
Furu sma kisi wan lo warskow fu sani di ben o pasa. Ma fu di den sani disi no pasa noiti, meki den kon kisi a gwenti fu si ala warskow leki sani di no seryusu. Ma yu kan kibri a libi fu yu te yu e poti prakseri na warskow.
Na ini 1975, sma na ini China ben kisi warskow taki wan gronseki ben o kon. Lanti bigin sreka sani. A pipel ben arki. Dusundusun sma ben tan na libi.
Na ini april 1991, sma fu den Filippijnen di ben e tan na a Pinatubobergi ben taki dati smoko nanga asisi ben e komoto fu a bergi. Sabidensiman fu a Filippijnen Instituut gi Vulkanologie nanga Seismologie, ben ondrosuku a sani disi tu mun langa. Dan den warskow sma taki rampu ben de fu kon. Wantewante dusundusun sma froisi komoto fu a birti drape. Na a fruku mamanten fu 15 yuni, wan bigi babari ben de fu yere, èn moro leki aiti fokanti kilometer asisi sutu komoto fu a bergi, dan a saka kon na tapu a heri presi lontu a bergi. Dusundusun sma tan na libi fu di den ben poti prakseri na a warskow.
Bijbel e warskow taki a disiten seti fu sani o kon na wan kaba. Nownow wi e libi na ini den lasti dei. Yu e tan na ai aladi a kaba e kon krosibei? Yu e du wan sani so taki yu kan tan na libi? Yu e teki en leki wan seryusu sani fu warskow trawan taki den musu du a srefi sani tu?
[Prenki na tapu bladzijde 20]
Di a Pinatubobergi ben spiti faya asisi, dan furu sma ben tan na libi fu di den ben poti prakseri na a warskow
[Prenki na tapu bladzijde 21]
Di Yerusalem ben kisi pori na ini 70 G.T., dan furu Kresten ben tan na libi fu di den ben poti prakseri na a warskow fu Yesus