Lowe foe kisi kibri bifo a „bigi banawtoe”
„Te oenoe e si taki legre kampoe lontoe Jerusalem, . . . meki den wan di de na Judea, lowe go na den bergi.” — LUKAS 21:20, 21.
1. Foe san ede a de toemoesi prenspari gi den wan di de wan pisi ete foe grontapoe, foe lowe?
GI ALA sma di de wan pisi foe a grontapoe foe Satan, a de toemoesi prenspari foe lowe. Efoe den wani tan na libi te a disiten seti foe sani e poeroe foe grontapoe, dan den moesoe gi overtoigi boeweisi taki na wan krakti fasi den teki Jehovah sei èn den no de wan pisi moro foe a grontapoe di abi Satan leki tiriman. — Jakobus 4:4; 1 Johanes 2:17.
2, 3. Foe sortoe aksi di abi foe doe nanga Jesus wortoe di skrifi na ini Mateus 24:15-22, wi sa go taki?
2 Na ini en moi profeititori foe a bosroiti foe a seti foe sani, Jesus ben poti krakti na tapoe a prenspari di a lowe disi de prenspari. Nofo tron wi e taki foe san skrifi na ini Mateus 24:4-14; ma tokoe, san a e kon na baka disi, de prenspari toe. Wi e gi joe deki-ati foe opo joe bijbel now èn leisi vers 15 te nanga 22.
3 San a profeititori dati wani taki? San ben de na ini a fosi jarihondro, „a tegoe sani di e tjari pori kon”? San a ben wani taki, dati a ben de „na ini wan santa presi”? O prenspari a tori di e pasa drape, de gi wi?
„Meki a leisiman gebroiki a koni foe man si sani krin”
4. (a) San Danièl 9:27 ben taki ben o kon te den djoe ben o drai den baka gi a Mesias? (b) Foe san ede a de krin taki Jesus ben taki: „Meki a leisiman gebroiki a koni foe man si sani krin”, di a ben sori go na a tori disi?
4 Loekoe taki na ini Mateus 24:15, Jesus ben sori go na san ben skrifi na ini a boekoe Danièl. Na ini kapitel 9 foe a boekoe dati wan profeititori de di ben froeteri na fesi foe a kon foe a Mesias nanga a kroetoe di a djoe nâsi ben sa kisi foe di den ben drai den baka gi en. A lasti pisi foe vers 27 e taki: „Èn na tapoe a frei foe tegoe sani a sma sa kon di e tjari pori kon.” Fositen djoe gwenti ben gebroiki a pisi dati foe Danièl en profeititori foe taki dati Antiòkus IV ben pori a santafasi foe a tempel foe Jehovah na Jerusalem na ini a di foe toe jarihondro b.G.T. Ma Jesus ben warskow: „Meki a leisiman gebroiki a koni foe man si sani krin.” Ma ala di a ben de troetroe wan tegoe sani taki Antiòkus IV ben meki a tempel lasi en santafasi, tokoe disi no ben abi pori leki bakapisi — no foe Jerusalem, no foe a tempel, noso foe a djoe nâsi. So boen, a ben de krin taki Jesus ben e warskow den arkiman foe en taki a kontroe foe disi no ben de na ini a ten di ben pasa, ma a ben de na ini a ten di ben moesoe kon ete.
5. (a) Fa a e jepi wi foe kon sabi soema na a fosi jarihondro „tegoe sani”, te wi e teki den Evangelie tori gersi makandra? (b) Foe san ede Cestius Gallus ben meki legre foe Rome hari go foe Siria na Jerusalem na ini 66 G.T.?
5 San ben de „a tegoe sani” di den ben moesoe froewakti? A de moi foe si, dati a tori foe Mateus e taki: „Te oenoe e si a tegoe sani di e tjari pori kon . . . e tanapoe na ini wan santa presi.” Ma ini a srefi tori na ini Lukas 21:20 wi e leisi: „Te oenoe e si taki legre kampoe lontoe Jerusalem, sabi dan taki a pori foe en kon krosibei.” Na ini 66 G.T., kresten di ben e libi na Jerusalem ben si troetroe san Jesus ben froeteri na fesi. Wan lo sani di ben pasa di ben abi foe doe nanga trobi na mindri den djoe tiriman nanga den tiriman foe Rome, ben abi leki bakapisi taki Jerusalem ben tron wan presi pe ibri tron baka sma ben meki oproeroe kontrari Rome. A bakapisi ben de, taki tranga ogridoe ben opo kon na heri Judea, Samaria, Galilea, a Dekapolis, nanga Foenisia, na noordsei foe Siria, èn na zuidsei foe Egipti. Foe meki pikinso vrede kon na ini a pisi dati foe a Grontapoemakti foe Rome, dan Cestius Gallus ben meki sroedati legre hari go foe Siria na Jerusalem, di den djoe ben kari a „santa foto” foe den. — Nehemia 11:1; Jesaja 52:1.
6. Fa a ben de troe taki wan „tegoe sani” di ben kan tjari pori kon, ben „e tanapoe na ini wan santa presi”?
6 Den legre foe Rome ben abi a gwenti foe tjari fetifraga nanga den nanga prenki na tapoe di den ben si leki santa, ma di den djoe ben si leki sani di ben abi foe doe nanga kroektoe gado. A de moi foe si, taki den e gebroiki a Hebrew wortoe, di vertaal nanga „tegoe sani” na ini a boekoe Danièl, moro foeroe gi kroektoe gado èn gi na anbegi foe kroektoe gado (Deuteronomium 29:17).a Ala di den djoe ben kakafoetoe gi den, tokoe den legre foe Rome di ben tjari den feti fraga foe den di den ben si leki wan gado, ben kon na ini Jerusalem november 66 G.T. èn baka dati den ben bigin diki olo na ondro a tempel skotoe na a noordsei. No wan tweifri no ben de — wan „tegoe sani” di ben kan pori Jerusalem krinkrin, ben „e tanapoe na ini wan santa presi”! Ma fa wan sma ben kan lowe?
A ben de toemoesi prenspari foe lowe!
7. San a legre foe Rome ben doe sondro foe sma ben froewakti disi?
7 Wantronso, èn sondro foe abi wan krin reide gi dati te joe loekoe a tori leki fa libisma e si en, di a ben gersi taki den ben kan teki Jerusalem abra makriki, a legre foe Rome ben hari ensrefi poeroe. Den djoe revoman ben hari go na den legre foe Rome baka, ma te na Antipatris nomo, so wan 50 kilometer foe Jerusalem. Baka dati den ben drai kon baka. Di den doro Jerusalem, den ben kon na makandra na ini a tempel foe loekoe na sortoe fasi den ben sa go feti moro fara. Den ben hari jongoesma kon foe tranga den fortresi foe den èn foe go ini a legre. Kresten ben o boemoei densrefi nanga den sani disi? Srefi te den ben wai pasi gi disi, den ben sa de ete ini a presi di ben de wan kefar te den legre foe Rome ben o drai kon baka?
8. Sortoe toemoesi prenspari sani kresten ben doe, foe di den ben gi jesi na den profeiti wortoe foe Jesus?
8 Kresten na Jerusalem èn na heri Judea heri esi ben doe wan sani na tapoe a profeitis warskow di Jesus Krestes gi èn den ben lowe komoto na a presi di ben de wan kefar. A ben de toemoesi prenspari foe lowe! Den ben man lowe go na den bergi kontren biten, èn kande son wan ben go libi na Pèla, ini a distrikt Perea. Den wan di ben arki a warskow foe Jesus no ben de so don foe drai go baka foe proeberi foe kibri den materia goedoe foe den. (Teki gersi Lukas 14:33.) Di den ben gowe libi Jerusalem na so wan fasi, dan a ben de seiker taki bere-oema nanga mama di ben abi pikin na bobi ete, ben feni en wan hebi sani foe teki a waka disi nanga foetoe. Den wet foe Sabadei no ben tapoe pasi foe den lowe, èn ala di winter ben de krosibei, a no ben doro ete. A no ben teki langa fosi den wan di ben arki Jesus warskow foe lowe esi-esi, ben de dorosei foe Jerusalem nanga Judea sondro foe a libi foe den ben de na ini kefar. A libi foe den ben anga foe disi. — Teki gersi Jakobus 3:17.
9. O esi den legre foe Rome ben drai kon baka, èn nanga sortoe bakapisi?
9 A jari na baka ete, na ini 67 G.T., den Romesma ben bigin feti baka nanga den djoe. Fosi, den ben teki Galilea abra. A jari na baka, den ben pori Judea. Di 70 G.T. ben doro, dan den legre foe Rome ben lontoe Jerusalem srefi (Lukas 19:43). Angriten ben kon hebi srefisrefi. Den wan di no ben man komoto na a foto, ben go feti nanga makandra. Ibri sma di ben proeberi foe lowe, den ben kiri. San den ben ondrofeni ben de, soleki fa Jesus ben taki, wan „bigi banawtoe”. — Mateus 24:21.
10. Efoe wi e leisi nanga a koni foe man si sani krin, dan san wi sa kon si?
10 Ala sani ben kon troe di Jesus ben froeteri na fesi? Nôno, moro ben moesoe kon ete. Efoe, soleki fa Jesus ben gi leki rai, wi e leisi den Boekoe foe bijbel nanga a koni foe man si sani krin, dan wi no sa misi foe si san moesoe kon ete. Wi sa denki serjoesoe toe sortoe bakapisi disi sa abi gi wi eigi libi.
A disiten „tegoe sani”
11. Na ini sortoe toe tra pisi Danièl e sori go na „a tegoe sani”, èn foe sortoe pisi ten a e taki drape?
11 Loekoe taki, boiti san wi si kaba na ini Danièl 9:27, na ini Danièl 11:31 nanga 12:11, moro sani de di e taki foe „a tegoe sani di e tjari pori kon”. Na ini no wan foe den lasti eksempre disi den e taki foe a pori foe Jerusalem. Foe taki en leti, san taki na ini Danièl 12:11 e kon soso toe vers baka di den taki foe „a ten foe a kaba” (Danièl 12:9). Wi ben e libi na ini so wan pisi ten foe sensi 1914. Dati meki wi moesoe de na ai, so taki wi kan kon sabi soema na a disiten „tegoe sani di e tjari pori kon” èn dan wi kan de seiker taki wi libi no de na ini kefar.
12, 13. Foe san ede a fiti foe taki foe a Folkoebontoe leki a disiten „tegoe sani”?
12 San na a disiten „tegoe sani” dati? Boeweisi e sori go na a Folkoebontoe, di ben bigin wroko na ini 1920, sjatoe baka di grontapoe ben kon na ini a ten foe en kaba. Ma fa dati ben kan de wan „tegoe sani di e tjari pori kon”?
13 Memre taki den e gebroiki a Hebrew wortoe gi „tegoe sani” na ini bijbel moro foeroe te den e taki foe kroektoe gado nanga sani di sma e doe foe anbegi kroektoe gado. Den ben si a Bontoe leki wan gado? Ija, seiker! Den kerki tiriman ben poti en „na ini wan santa presi”, èn den bakaman foe den ben bigin gi densrefi na en nanga dipi lobi. A Federaal Konmakandra foe Kerki foe Krestes, na Amerkankondre, ben froeklari taki a Bontoe ben sa de „a politiek organisâsi di e teki presi gi Gado Kownoekondre na grontapoe”. Na Amerkan Senaat ben kisi wan heri ipi brifi foe relisi groepoe di ben gi en tranga foe horibaka gi a Froebontoe foe a Folkoebontoe. A mama-groepoe foe Baptistsma, Congregationaalsma, nanga Presbytersma na Ingrisikondre ben kari en „a wan-enkri wrokosani di de foe tjari [vrede kon na grontapoe]”. — Loekoe Openbaring 13:14, 15.
14, 15. Na sortoe fasi a Bontoe èn baka ten a Verenigde Nâsi ben kon de „na ini wan santa presi”?
14 A Mesias Kownoekondre foe Gado ben opo na hemel na ini 1914, ma den nâsi ben bigin feti gi den eigi soevereiniteit (Psalm 2:1-6). Di den ben aksi foe teki a Folkoebontoe, den nâsi di didjonsro ben kaba feti na ini a fosi grontapoe feti, so srefi den kerki tiriman di ben blesi den legre foe den, ben sori kaba taki den ben drai den baka gi a wet foe Gado. Den no ben loekoe go na Krestes leki Kownoe. So boen, den ben gi wan libisma organisâsi a ròl foe Gado Kownoekondre; den ben poti a Folkoebontoe „na ini wan santa presi”, wan presi pe a no ben moesoe de.
15 Tapoe 24 oktober 1945 den ben opo a Verenigde Nâsi, di ben kon baka a Bontoe. Baka ten, den pawsoe foe Rome ben sori nanga bigi prisiri taki den ben feni a Verenigde Nâsi boen leki „a lasti howpoe foe tjari wánfasi nanga vrede kon” èn leki „a moro hei makti di de gi vrede nanga retidoe”. Ija, a Folkoebontoe, makandra nanga a wan di ben kon na en baka, a Verenigde Nâsi, troetroe ben tron wan kroektoe gado, wan „tegoe sani” ini na ai foe Gado èn foe en pipel.
Lowe gi san?
16. Foe pe sma di lobi regtfardikifasi moesoe lowe na ini a ten disi?
16 Te sma di lobi regtfardikifasi ’e si’ disi, èn e kon sabi san na internationaal organisâsi dati de èn fa sma e si en leki wan gado, dan a de fanowdoe taki den lowe foe kisi kibri. Lon gowe libi san? Gowe libi a sani di de a disiten prenki foe Jerusalem di no ben de getrow, namkoe, krestenhèit, èn ala sani di abi foe doe nanga Babilon a Bigiwan, a grontapoe seti foe falsi relisi. — Openbaring 18:4.
17, 18. Sortoe pori a disiten „tegoe sani” sa tjari kon?
17 Memre toe, taki na ini a fosi jarihondro, di a legre foe Rome nanga den fetifraga di den ben si leki wan gado, ben kon na ini a santa foto foe den djoe, a ben de drape foe tjari pori kon na tapoe Jerusalem nanga en seti foe anbegi. Na ini wi ten, a pori no sa kon na tapoe wán foto nomo, èn no na tapoe krestenhèit nomo, ma na tapoe a heri grontapoe seti foe falsi relisi. — Openbaring 18:5-8.
18 Na ini Openbaring 17:16, dan den ben froeteri na fesi taki wan agersi redi kloroe werdri meti, di sori foe de a Verenigde Nâsi, sa drai en baka gi Babilon a Bigiwan di de leki wan hoeroe, èn a sa pori en na wan ogri fasi. A e gebroiki krin wortoe di a taki: „Den tin toetoe di joe ben si, nanga a werdri meti, den disi no sa wani si a hoeroe na ai èn den sa gi en pori èn meki a de nanga sososkin, èn den sa njan den pisi foe en skin èn sa bron en nanga faja krinkrin.” San disi sa wani taki na wan toemoesi frede sani foe prakseri. A sa abi leki bakapisi taki ala falsi relisi na ala sei foe grontapoe, sa kon na wan kaba. Disi sa sori troetroe taki a bigi banawtoe bigin.
19. Sortoe groepoe de wan pisi foe a Verenigde Nâsi sensi di a seti, èn foe san ede disi de so prenspari?
19 A de moi foe si, taki sensi a Verenigde Nâsi ben bigin wroko na ini 1945, foeroe groepoe di no e bribi ini wan gado, èn di de kontrari relisi, de prenspari memre foe en. Na difrenti ten èn na heri grontapoe, den sortoe groepoe dati di wani tjari bigi kenki kon, de den wan di skotoe a wroko foe relisi hebi noso tapoe en krinkrin. Ma na ini den wan toe jari di pasa, na foeroe presi, tiri no kwinsi relisi groepoe someni moro. Son sma kan denki taki no wan kefar no de moro gi relisi.
20. Sortoe nen den relisi foe grontapoe tjari kon na tapoe densrefi?
20 Den relisi foe Babilon a Bigiwan tan de wan makti di e tjari prati kon na grontapoe, nanga jepi foe ogri di e doe nanga tranga. Foeroe tron den edelin foe njoensoe e meki sma kon sabi soema na den feti groepoe nanga terrorist groepoe, foe di den e kari a relisi di den groepoe disi e horibaka gi. Skowtoe nanga sroedati di moesoe tapoe oproeroe, ben abi foe feti foe go na ini tempel foe tapoe a feti na mindri difrenti groepoe foe a srefi relisi. Relisi groepoe gi moni na politiek revo. Bita-atifasi na relisi sei, meki a Verenigde Nâsi no ben man sorgoe taki difrenti ras tan boen nanga makandra. Groepoe na ini a Verenigde Nâsi di wani doro a marki foe vrede nanga seikerfasi, ben sa wani taki den poeroe ibri makti di relisi abi èn di e tapoe den foe doe san den abi na prakseri.
21. (a) Soema sa bosroiti o ten Babilon a Bigiwan moesoe kisi pori? (b) San de toemoesi prenspari foe doe fosi a ten dati?
21 Wan tra prenspari sani de toe di wi moesoe hori na prakseri. Ala di den tin toetoe na ini a Verenigde Nâsi sa gebroiki foe pori Babilon a Bigiwan, tokoe a pori dati troetroe sa de wan sani di e sori a kroetoe foe Gado. A kroetoe sa kon na Gado en reti ten (Openbaring 17:17). San wi moesoe doe disiten? „Komoto na en” — komoto na Babilon a Bigiwan — na so bijbel e piki. — Openbaring 18:4.
22, 23. San a lowe disi wani taki?
22 A lowe disi di sma moesoe lowe foe kisi kibri, a no wan sani taki a moesoe go foe a wan presi na a trawan, soleki fa den djoe kresten ben doe di den ben gowe libi Jerusalem. A de wan lowe di sma e lowe komoto na den relisi foe krestenhèit, ija, foe ibri pisi foe Babilon a Bigiwan. A wani taki, dati wan sma moesoe poti ensrefi aparti dorodoro no soso foe falsi relisi organisâsi, ma so srefi foe den gwenti foe den nanga a fasi fa den e denki. A de wan lowe di sma e lowe go na a presi foe kisi kibri na ini Jehovah en theokrasia organisâsi. — Efeisesma 5:7-11.
23 San den Kotoigi ben doe, di den salfoe foetoeboi foe Jehovah fosi ben kon sabi soema na a disiten tegoe sani, a Folkoebontoe, baka a Fosi Grontapoefeti? Den ben tapoe kaba foe de memre foe den kerki foe krestenhèit. Ma safrisafri den ben kon froestan taki den ben hori densrefi ete na son wan foe den gwenti nanga doe foe krestenhèit, soleki a gebroiki di den ben gebroiki a kroisi nanga a hori foe kresneti nanga tra heiden fesa. Di den ben leri a waarheid foe den sani disi, den ben handri wantewante. Den ben poti prakseri na tapoe a rai na ini Jesaja 52:11: „Gowe foe drape, gowe foe drape, komoto drape, no fasi no wan sani di no krin; komoto na mindri foe en, oen tan krin, oenoe di e tjari den wrokosani foe Jehovah.”
24. Soema kon lowe toe, spesroetoe foe sensi 1935?
24 Spesroetoe foe sensi 1935, wan groepoe foe tra sma di e kon bigi moro nanga moro, sma di ben teki a howpoe foe libi foe têgo na ini wan paradijs na grontapoe, ben bigin doe a srefi sani toe. Den so srefi ’si a tegoe sani di e tanapoe na ini wan santa presi’, èn den e froestan san a wani taki. Baka di den teki den bosroiti foe lowe, den poeroe den nen leki memre foe organisâsi di de wan pisi foe Babilon a Bigiwan. — 2 Korentesma 6:14-17.
25. San moro de fanowdoe, boiti taki wan sma e broko nanga ibri banti di a ben abi nanga falsi relisi?
25 Ma foe lowe komoto na Babilon a Bigiwan, wani taki moro leki foe gowe libi falsi relisi. Moro de ete, leki foe go nomo na wan toe konmakandra na wan Kownoekondre zaal noso foe go preiki a boen njoensoe na ini velddienst wán noso toe leisi wan moen. Nanga en skin wan sma kan de dorosei foe Babilon a Bigiwan, ma a gowe libi en troetroe? A poti ensrefi aparti foe a grontapoe di Babilon a Bigiwan de wan prenspari pisi foe dati? A e hori ensrefi ete na den sani di e sori a jeje foe Babilon a Bigiwan — wan jeje di no e sori lespeki gi den regtfardiki markitiki foe Gado? A e teki boen gwenti nanga wet ini a tori foe seks èn getrowfasi na ini a trowlibi leki wan serjoesoe sani? A e poti moro krakti na tapoe en eigi afersi noso afersi na materia sei, leki na tapoe jeje afersi? A no moesoe meki ensrefi tron soleki fa a seti foe sani disi de. — Mateus 6:24; 1 Petrus 4:3, 4.
No meki no wan sani tapoe joe foe lowe!
26. San sa jepi wi foe no bigin nanga a lowe nomo, ma foe doe disi nanga boen bakapisi te na a kaba?
26 Te wi e lowe foe kisi kibri, dan a de prenspari taki wi no e angri foe den sani di wi ben gowe libi na baka (Lukas 9:62). Wi moesoe hori wi prakseri nanga ati boen na tapoe Gado Kownoekondre nanga en regtfardikifasi. Wi abi a fasti bosroiti foe sori wi bribi foe di wi e soekoe den sani disi fosi, nanga a froetrow taki Jehovah sa blesi so wan getrow waka nanga libi? (Mateus 6:31-33) Wi overtoigi, di abi en fondamenti na tapoe bijbel, moesoe poesoe wi foe doro a marki dati foe di wi e froewakti fajafaja fa a sa waka nanga den prenspari sani di moesoe pasa ete na grontapoe.
27. Foe san ede a de prenspari foe denki serjoesoe foe den aksi di poti dja?
27 A kroetoe di Gado sa tjari, sa bigin nanga a pori foe Babilon a Bigiwan. A grontapoemakti foe falsi relisi, di de leki wan hoeroe, sa figi poeroe foe têgo. A ten dati de krosibei srefisrefi! Na sortoe sei ibriwan foe wi sa de te a prenspari ten dati doro? Èn na sortoe sei wi sa de foe feni na a heimarki foe a bigi banawtoe, te a tra pisi foe Satan en godelowsoe seti foe sani e kisi pori? Efoe wi e doe now san wi moesoe doe, dan a de seiker taki wi sa kisi kibri. Jehovah e taigi wi: „Ini a tori foe a wan di e arki mi, a sa tan na ini seikerifasi” (Odo 1:33). Te wi tan dini Jehovah loyaal èn nanga prisiri na ini a kaba foe a seti disi, dan wi kan de sma di sa dini Jehovah foe têgo.
[Foetoewortoe]
a Loekoe Insight on the Scriptures, di a Watchtower Bible and Tract Society of New York, Inc., tjari kon na doro, Pisi 1, bladzijde 634-635.
Joe e memre disi ete?
◻ San na a disiten „tegoe sani”?
◻ Na sortoe fasi „a tegoe sani . . . [de] ini wan santa presi”?
◻ San a wani taki foe lowe foe man kisi kibri now?
◻ Foe san ede a de toemoesi prenspari foe doe so wan sani?
[Prenki na tapoe bladzijde 15]
Efoe den bakaman foe Jesus ben wani tan na libi, dan den ben moesoe lowe sondro foe draidrai