Ten nanga pisi ten ini Jehovah anoe
„A no de wan sani foe oenoe foe kon sabi den ten noso pisi ten di a Tata poti na ondro en eigi makti.” — TORI FOE DEN APOSTEL 1:7.
1. San Jesus ben piki na tapoe aksi foe den disipel foe en, di ben sori taki den ben abi belangstelling gi a ten?
SAN ben kan de moro reidelek gi den wan di „e soktoe èn e geme foe ala den tegoe sani di e pasa” na ini krestenhèit èn na heri grontapoe, dan foe aksi densrefi o ten na ogri seti foe sani disi sa kaba èn o ten Gado regtfardiki njoen grontapoe sa kon na ini en presi? (Esekièl 9:4; 2 Petrus 3:13) Sjatoe bifo a dede foe Jesus èn sjatoe baka di a opo baka, den apostel foe Jesus ben aksi en sani di ben sori taki den ben abi belangstelling gi a ten (Mateus 24:3; Tori foe den Apostel 1:6). Ma Jesus no ben piki den na wan fasi taki den ben kan go teri dei. Na ini wán kefal a ben gi den wan marki di abi difrenti pisi, èn na ini a tra kefal a ben taigi den taki ’a no de wan sani foe den foe kon sabi den ten noso pisi ten di a Tata poti na ondro en eigi makti’. — Tori foe den Apostel 1:7.
2. Foe san ede wi kan taki dati a no ala ten Jesus ben sabi a ten di en Tata poti foe sani feni presi na ini a ten foe a kaba?
2 Ala di Jesus na a wan-enkri gebore Manpikin foe Jehovah, tokoe a no ala ten a ben sabi den ten di en Tata poti foe doe sani. Na ini en profeititori foe den lasti dei, Jesus ben erken nanga sakafasi: „A dei nanga a joeroe dati no wan sma no sabi, no den engel foe hemel, no a Manpikin, ma soso a Tata” (Mateus 24:36). Jesus ben wani wakti nanga pasensi tapoe en Tata foe tjari kon na krin gi en san na a joisti ten foe tjari pori kon tapoe na ogri seti foe sani disi.a
3. San wi kan leri foe den sani di Jesus ben piki na tapoe aksi di abi foe doe nanga a prakseri di Gado abi?
3 Wi kan si toe sani ini a fasi fa Jesus ben piki den aksi di abi foe doe nanga a ten pe sani ben o pasa leki wan kontroe foe san Gado abi na prakseri. Na a fosi presi, Jehovah abi wan ten foe doe sani; èn na a di foe toe presi, En wawan e seti a ten dati, èn den foetoeboi foe en no kan froewakti taki den moesoe kisi finifini bodoi na fesi foe den ten nanga pisi ten foe Jehovah.
Ten nanga pisi ten foe Jehovah
4. San den Griki wortoe di vertaal nanga „ten” nanga „pisi ten” na Tori foe den Apostel 1:7 wani taki?
4 San „ten” nanga „pisi ten” wani taki? A sani di Jesus ben taki na ini Tori foe den Apostel 1:7 e taki foe toe sortoe sani foe a ten. A Griki wortoe di vertaal nanga „ten” wani taki „o langa a ten de”, wan pisi foe ten (langa noso sjatoe). „Pisi ten” vertaal foe wan wortoe di e sori go na wan fasti ten, wan spesroetoe ten, noso wan pisi ten di abi spesroetoe sani di e pasa na ini a ten dati. Foe den toe fosi wortoe disi, W. E. Vine e taki: „Na ini Tori foe den Apostel 1:7, ’a Tata poti nanga En eigi makti’ ala toe sani, den ten (chronos), a langa di wan ten langa, nanga den pisi ten (kairos), wan ten te spesroetoe sani e bigin pasa.”
5. O ten Jehovah ben taigi Noa taki A ben abi na prakseri foe pori a kroektoe grontapoe, èn san na den toe wroko di Noa ben doe?
5 Bifo a Froedoe, Gado ben seti wan libiten foe 120 jari nomo gi a kroeka grontapoe di libisma nanga den oproeroe engel di ben teki libisma skin, ben meki doe kon (Genesis 6:1-3). Noa, di ben dini Gado, ben abi 480 jari na a momenti dati (Genesis 7:6). Noa no ben abi pikin èn a ben tan sondro pikin so wan 20 jari ete (Genesis 5:32). Langa ten baka dati, soso di den manpikin foe Noa ben kon bigi kaba èn ben trow kaba, Gado ben taigi Noa taki A ben abi na prakseri foe poeroe godelowsoefasi na grontapoe (Genesis 6:9-13, 18). Srefi na a ten dati, di Noa ben kisi toe komando foe bow wan ark èn foe preiki gi den sma di ben libi na a ten foe en, dan Jehovah no ben taigi Noa a ten di A ben abi na prakseri. — Genesis 6:14; 2 Petrus 2:5.
6. (a) Fa Noa ben sori taki a ben libi sani di ben abi foe doe nanga a ten ini Jehovah anoe? (b) Fa wi kan waka na baka na eksempre foe Noa?
6 Foeroe tenti jari langa — kande so wan 50 jari langa — „Noa ben doe ala san Gado ben komanderi en”. Noa ben doe dati „nanga bribi”, sondro foe sabi a soifri dei (Genesis 6:22; Hebrewsma 11:7). Jehovah no ben taigi en noti foe a joisti ten di sani ben o pasa, te leki wán wiki bifo a Froedoe ben o bigin (Genesis 7:1-5). A froetrow di Noa ben froetrow Jehovah èn a bribi di a ben abi na ini En, ben meki taki Noa ben man libi a ten ini Jehovah anoe. Èn troetroe Noa ben moesoe de nanga foeroe tangi di a ben si fa Jehovah ben kibri en na ini a pisi ten foe a Froedoe èn baka ten di a ben komoto na a ark go na tapoe wan krin grontapoe! Nanga wan srefi sortoe howpoe foe kisi froeloesoe, a no de so taki wi moesoe abi wan srefi sortoe bribi toe na ini Gado?
7, 8. (a) Fa nâsi nanga grontapoe tirimakti ben doe kon? (b) Na sortoe fasi Jehovah ben ’poti den fasti ten nanga den fasti skotoe foe a libipresi foe libisma’?
7 Baka a Froedoe, foeroe foe den bakapikin foe Noa ben gowe libi a troe anbegi foe Jehovah. Foe di den ben wani tan na wán presi, meki den ben bigin foe bow wan foto nanga wan toren gi falsi anbegi. Jehovah ben teki a bosroiti taki a ten ben doro foe kon ini a tori. A ben broeja a tongo di den ben taki èn „ben panja den [foe Babel] go na ala sei foe grontapoe” (Genesis 11:4, 8, 9). Baka ten, den groepoe sma di ben taki wán tongo ben kon tron nâsi, son wan foe den ben teki tra nâsi abra èn ben tron bigi makti na ini a kontren pe den ben de, èn den ben tron grontapoemakti srefi. — Genesis 10:32.
8 Akroederi den sani di Gado ben abi na prakseri, wanwan leisi A ben taki pe den skotoe foe wan kondre ben o de èn o ten wan spesroetoe nâsi ben sa abi makti na ini a kontren pe den ben de noso ben o de wan grontapoemakti (Genesis 15:13, 14, 18-21; Exodus 23:31; Deuteronomium 2:17-22; Danièl 8:5-7, 20, 21). Na apostel Paulus ben taki foe ten nanga pisi ten foe Jehovah, di a ben taigi wan toe tja-ede Grikisma na Athene: „A Gado di meki grontapoe nanga ala sani na ini . . . meki ibri nâsi foe libisma foe libi na tapoe a heri grontapoe, èn a ben poti den fasti ten nanga den fasti skotoe foe a libipresi foe libisma.” — Tori foe den Apostel 17:24, 26.
9. Fa Jehovah ’kenki ten nanga pisi ten’ foe kownoe?
9 Disi no wani taki dati Jehovah de frantiwortoe foe ala den wini na ini politiek afersi èn ala den kenki di ben feni presi na mindri den nâsi. Ma A kan kon ini a tori efoe a wani dati, so taki san A abi na prakseri kan feni presi. Dati meki a profeiti Danièl di ben si fa a Babilon Grontapoemakti ben kon na en kaba èn fa Medo-Persia ben kon na ini en presi, ben taki foe Jehovah: „A e kenki ten nanga pisi ten, a e poeroe kownoe èn e poti kownoe, a e gi koni na den koniwan èn sabi na den wan di abi a koni foe man si sani krin.” — Danièl 2:21; Jesaja 44:24–45:7.
„A ten ben e doro”
10, 11. (a) O langa na fesi Jehovah ben poti kaba o ten a ben sa froeloesoe den bakapikin foe Abraham foe katibo? (b) San e sori taki den Israèlsma no ben sabi soifri o ten den ben o kisi froeloesoe?
10 Moro leki fo hondro jari na fesi, Jehovah ben poti a soifri jari te a ben sa lagi a kownoe foe na Egipti Grontapoemakti èn ben sa fri den bakapikin foe Abraham komoto na katibo. Di Gado ben tjari kon na krin gi Abraham san A ben abi na prakseri, A ben pramisi: „Joe kan sabi seiker taki joe siri sa tron wan doroseisma na ini wan kondre di no de foe den, èn den sa moesoe dini den, èn den disi sa kwinsi den seiker, fo hondro jari langa. Ma a nâsi di den sa dini, mi e kroetoe, èn baka dati den sa gowe nanga foeroe goedoe” (Genesis 15:13, 14). Di Stefanus ben taki sjatoe foe a historia foe Israèl di a ben tanapoe na fesi a Sanhedrin, a ben taki foe a pisi ten disi foe 400 jari èn a ben taki: „Di a ten ben e doro foe a kontroe foe a pramisi di Gado ben meki bekènti na Abraham na poebliki, dan a pipel ben gro èn ben kon moro foeroe na Egipti, te leki wan tra kownoe ben opo na Egipti, di no ben sabi noti foe Josef.” — Tori foe den Apostel 7:6, 17, 18.
11 A njoen farao disi ben lagi den Israèlsma kon tron srafoe. Moses no ben skrifi a boekoe Genesis ete, ma a kan taki den pramisi foe Jehovah gi Abraham, ben froeteri na tra sma nanga mofo noso nanga sani di skrifi. A gersi toe taki a bodoi di den Israèlsma ben abi no ben gi den pasi foe bereken a soifri dei foe a froeloesoe foe a kwinsi di den ben kisi. Gado ben sabi o ten a ben sa froeloesoe den, ma soleki fa a sori, den Israèlsma di ben pina no ben sabi o ten den ben o kisi froeloesoe. Wi e leisi: „Now a ben pasa na ini den foeroe dei dati, taki te foe kaba a kownoe foe Egipti kon dede, ma den manpikin foe Israèl ben tan soktoe foe a de di den ben de na ini katibo èn foe bari kragi krei, èn a bari di den ben bari krei foe kisi jepi ben tan opo go na a troe Gado foe a de di den ben de na ini katibo. Baka wan pisi ten, Gado ben jere a geme di den ben geme èn Gado ben memre a froebontoe foe en nanga Abraham, Isak nanga Jakob. Foe dati ede Gado ben loekoe den manpikin foe Israèl èn Gado ben si san ben e pasa nanga den.” — Exodus 2:23-25.
12. Fa Stefanus ben sori taki Moses ben handri bifo a ten di Jehovah poti?
12 A sabi di den no ben sabi a soifri ten foe a froeloesoe foe Israèl, wi kan si toe na den sani di Stefanus ben taki sjatoe. Stefanus ben e taki foe Moses: „Di a ten foe a di foe fotenti jari foe en ben kaba, dan a ben opo kon na ini en ati foe ondrosoekoe den brada foe en, den manpikin foe Israèl. Èn di en ai ben si wan sma di trawan no ben handri nanga reti, dan a ben feti gi en èn ben teki refensi gi a wan di den ben meshandri, di a ben naki na Egiptisma kiri. A ben prakseri taki den brada foe en ben o froestan taki nanga jepi foe en, Gado ben e gi den froeloesoe, ma den no ben froestan dati” (Tori foe den Apostel 7:23-25). Moses ben proeberi foe froeloesoe Israèl djaso 40 jari bifo a ten foe Gado. Stefanus ben sori taki Moses ben abi foe wakti ete 40 jari bifo Gado ’ben froeloesoe den Israèlsma nanga jepi foe en’. — Tori foe den Apostel 7:30-36.
13. Fa a situwâsi foe wi de a srefi leki di foe den Israèlsma bifo den ben kisi froeloesoe foe Egipti?
13 Ala di „a ten ben e doro foe a kontroe foe a pramisi” èn Gado ben seti a soifri jari kaba, tokoe Moses nanga ala den Israèlsma ben abi foe sori bribi. Den ben abi foe wakti a fasti ten foe Gado, èn soleki fa a sori, den no ben kan bereken dati na fesi. Wisrefi abi na overtoigi taki a froeloesoe foe wi foe a disiten ogri seti foe sani e doro. Wi sabi taki wi e libi na ini „den lasti dei” (2 Timoteus 3:1-5). So boen, a no moesoe de so taki wi moesoe wani sori wi bribi èn wakti a joisti ten foe Jehovah en bigi dei? (2 Petrus 3:11-13) Baka dati, neleki Moses nanga den Israèlsma, a kan heri boen, taki wi sa singi wan glori singi foe froeloesoe, foe prèise Jehovah. — Exodus 15:1-19.
’Di a ten ben doro’
14, 15. Fa wi doe sabi taki Gado ben poti wan ten gi en Manpikin foe kon na grontapoe, èn gi san den profeiti nanga so srefi engel ben tan na ai?
14 Jehovah ben poti wan fasti ten te a wan-enkri gebore Manpikin foe en ben sa kon na grontapoe leki a Mesias. Paulus ben skrifi: „Di a ten di ben poti ben doro en marki krinkrin, dan Gado ben seni en Manpikin kon, di ben komoto na ini wan oema èn di ben kon de na ondro a wet” (Galasiasma 4:4). Disi ben de a kontroe foe Gado en pramisi foe seni wan Siri — ’Silo, èn na en den sma ben sa gi jesi’. — Genesis 3:15; 49:10.
15 Den profeiti foe Gado — srefi den engel — ben tan na ai gi a „pisi ten” te a Mesias ben sa kon na grontapoe èn a sondoe libisma famiri ben sa man kisi froeloesoe. „Foe a froeloesoe disi,” Petrus ben taki, „den profeiti di ben taki profeititori foe a no-froedini boen-ati di ben de gi oenoe, ben aksi sani fajafaja èn ben ondrosoekoe sani finifini. Den ben tan ondrosoekoe na ini sortoe spesroetoe pisi ten noso na ini sortoe pisi ten a jeje di de na ini den ben taki foe Krestes, di disi ben gi kotoigi na fesi foe a pina di Krestes ben o pina èn foe den glori di ben o kon baka dati. . . . Na ini den srefi sani dati den engel e angri foe loekoe.” — 1 Petrus 1:1-5, 10-12.
16, 17. (a) Nanga jepi foe sortoe profeititori Jehovah ben jepi den fosi jarihondro djoe foe froewakti a Mesias? (b) Fa a profeititori foe Danièl ben abi foe doe nanga den sani di den djoe ben froewakti foe a Mesias?
16 Nanga jepi foe En profeiti Danièl — wan man di ben abi wan tranga bribi — Jehovah ben gi wan profeititori di e taki foe „seibitenti wiki”. A profeititori dati ben sa man jepi den fosi jarihondro djoe foe kon sabi taki a pramisi Mesias ben de foe kon. Wan pisi foe a profeitori ben taki: „Foe sensi a wortoe go na doro foe meki Jerusalem kon boen baka èn foe bow en baka toe te a Mesias a Fesiman doro, joe sa abi seibi wiki, so srefi siksitenti na toe wiki” (Danièl 9:24, 25). Djoe, Katolik, nanga Protestant sabiman e agri moro foeroe taki den „wiki” di kari djaso, wani taki jariwiki. Den 69 „wiki” (483 jari) foe Danièl 9:25 ben bigin na ini 455 b.G.T. di Kownoe Artaxerxes foe Persia ben gi Nehemia a reti „foe meki Jerusalem kon boen baka èn foe bow en baka” (Nehemia 2:1-8). Den „wiki” disi ben kon na wan kaba 483 jari baka dati — na ini 29 G.T. di Jesus ben dopoe èn ben kisi salfoe nanga santa jeje, èn na so wan fasi a ben tron a Mesias, noso Krestes. — Mateus 3:13-17.
17 Wi no sabi efoe den fosi jarihondro djoe ben sabi soifri o ten den 483 jari ben bigin. Ma di Johanes a Dopoeman ben bigin nanga en diniwroko, „a pipel ben e froewakti èn den alamala ben aksi densrefi na ini den ati ini a tori foe Johanes: ’Na en de a Krestes kande?’ ” (Lukas 3:15) Son sabiman foe bijbel e taki dati a froewakti disi abi foe doe nanga a profeititori foe Danièl. Matthew Henry ben gi komentaar tapoe a vers disi, èn a ben taki: „Djaso den e taigi wi . . . fa a diniwroko nanga a dopoe di Johanes ben dopoe sma ben meki a pipel prakseri foe a Mesias, èn foe prakseri taki a Mesias sa kon heri esi. . . . Den seibitenti wiki foe Danièl ben kon na wan kaba now.” A Fransiman Manuel Biblique foe Vigouroux, Bacuez, nanga Brassac e taki: „Sma ben sabi taki den seibitenti jariwiki di Danièl ben taki foe den, ben e doro den kaba; no wan sma ben froewondroe foe jere Johanes a Dopoeman e meki bekènti taki a kownoekondre foe Gado ben kon krosibei.” A djoe sabiman Abba Hillel Silver ben skrifi taki akroederi a „pôpi teri foe a ten” foe a ten, „sma ben e froewakti a Mesias na ini den jari 25 te go miti 50 foe a fosi jarihondro G.T”.
Sani di e pasa — No bereken a ten
18. Ala di a profeititori foe Danièl ben jepi den djoe foe kon sabi o ten den ben kan froewakti taki a Mesias ben o kon, tokoe san ben de den moro overtoigi boeweisi taki Jesus ben de a Mesias?
18 Ala di a teri foe a ten ben jepi den djoe foe abi wan idea o ten a Mesias ben sa moesoe kon, tokoe den sani di ben pasa sori taki a teri foe a ten no ben jepi foe overtoigi moro foeroe foe den taki Jesus ben de Mesias. Moro mendri leki wán jari bifo Jesus dede, a ben aksi den disipel foe en: „Soema den ipi sma e taki na mi?” Den ben piki taki: „Johanes a Dopoeman; ma trawan e taki Elia, èn trawan baka e taki, wan foe den fositen profeiti opo baka” (Lukas 9:18, 19). Wi no abi no wan tori di skrifi taki Jesus ben kari a profeititori foe den simbôlis wiki foe boeweisi taki en ben de a Mesias. Ma na wan okasi a ben taki: „A kotoigi di mi abi, bigi moro di foe Johanes, bika na joisti den wroko di mi moesoe doe soleki fa a Tata gi mi foe doe, den wroko srefi di mi e doe, e gi kotoigi foe mi taki a Tata ben seni mi” (Johanes 5:36). A no ben de no wan teri foe a ten di tjari kon na krin, ma a ben de a preiki foe Jesus, den wondroe foe en, èn den sani di ben pasa lontoe a dede foe en (a doengroe di ben kon na wan wondroe fasi, a priti di a tempel garden ben priti, nanga a gronseki) di ben boeweisi taki en ben de a Mesias di Gado ben seni kon. — Mateus 27:45, 51, 54; Johanes 7:31; Tori foe den Apostel 2:22.
19. (a) Fa kresten ben sa sabi taki a pori foe Jerusalem ben de krosibei? (b) Foe san ede den fosi jarihondro kresten di ben lowe gowe foe Jerusalem ben abi foeroe bribi fanowdoe ete?
19 Na a srefi fasi baka a dede foe Jesus, den fosi jarihondro kresten no ben kisi jepi foe bereken a kon di a djoe seti foe sani ben sa kon na wan kaba. A troe taki, a profeititori foe Danièl foe den simbôlis wiki ben taki foe a pori di a seti foe sani dati ben o pori (Danièl 9:26b, 27b). Ma a sani disi ben o pasa baka den „seibitenti wiki” (455 b.G.T.-36 G.T). Nanga tra wortoe, baka di den fosi heiden ben tron bakaman foe Jesus na ini 36 G.T., dan Danièl kapitel 9 no ben gi kresten no wan spesroetoe dei baka 36 G.T. Gi den a ben de den sani di ben o pasa, èn a no ben de a teri foe a ten, di ben sa sori taki a djoe seti foe sani ben sa kaba esi-esi. Den sani dati di Jesus ben taki na fesi foe den, ben bigin doro wan heimarki na ini 66 G.T. di den legre foe Rome ben kon feti nanga Jerusalem èn di den ben drai gowe baka. A sani disi ben gi den getrow kresten di ben de na ai èn di ben libi na Jerusalem nanga Judea, na okasi foe ’lon gowe na den bergi’ (Lukas 21:20-22). Foe di den no ben abi no wan teri foe a ten foe sori den o ten sani ben o pasa, meki den fosi kresten dati no ben sabi o ten a pori foe Jerusalem ben sa kon. Den ben moesoe abi foeroe bribi foe gowe libi den oso, den pranigron, nanga den wrokopresi foe den èn foe tan wan toe jari dorosei foe Jerusalem te leki a legre foe Rome ben drai kon baka na ini 70 G.T. èn ben pori a djoe seti foe sani krinkrin! — Lukas 19:41-44.
20. (a) Sortoe wini wi kan abi foe den eksempre foe Noa, Moses, nanga den fosi jarihondro kresten na ini Judea? (b) Foe sortoe tori wi sa taki na ini na artikel di e kon?
20 Neleki Noa, Moses, nanga den fosi jarihondro kresten na Judea, wi na ini a ten disi, kan libi den ten nanga den pisi ten na ini froetrow ini Jehovah anoe. Na overtoigi di wi abi taki wi e libi na ini a ten foe a kaba èn taki a froeloesoe foe wi e kon krosibei, no e anga foe bereken ten nanga a teri foe a ten, ma a e anga foe sani di e pasa troetroe leki wan kontroe foe bijbel profeititori. Moro fara, ala di wi e libi na ini a denoja foe Krestes, tokoe wi no de fri foe a de di a de fanowdoe taki wi moesoe sori bribi èn tan na ai. Wi moesoe go doro foe libi nanga a fajafaja froewakti foe den span sani di den Boekoe foe bijbel taki na fesi taki den ben o pasa. Disi na a tori di wi sa taki foe en na ini na artikel di e kon.
[Foetoewortoe]
a Loekoe De Wachttoren foe 1 augustus 1996, bladzijde 30 nanga 31.
Foe loekoe sani sjatoe baka
◻ San Jesus ben taigi den apostel foe en ini a tori foe ten nanga pisi ten foe Jehovah?
◻ O langa na fesi Noa ben sabi o ten a Froedoe ben o bigin?
◻ San e sori taki Moses nanga den Israèlsma no ben sabi soifri o ten den ben sa kisi froeloesoe foe Egipti?
◻ Fa wi kan abi wini foe den bijbel eksempre di abi foe doe nanga ten èn nanga pisi ten?
[Prenki na tapoe bladzijde 11]
A bribi foe Noa ben meki taki a ben kan libi sani di ben abi foe doe nanga a ten ini Jehovah anoe