Anbegi Gado nanga waarheid
Efoe wi wani taki Gado feni wi anbegi boen, dan a moesoe gron tapoe waarheid (Johanes 4:23). Bijbel e meki sma kon sabi den troe anbegiman leki sma foe „a gemeente foe a libi Gado, wan postoe nanga wan jepi foe waarheid” (1 Timoteus 3:15). Den wan di de a gemeente foe Gado, no e bribi wawan na ini a waarheid foe Gado Wortoe, ma den e libi toe akroederi dati èn e horibaka gi en èn e meki en bekènti na heri grontapoe. — Mateus 24:14; Romesma 10:9-15.
SMA sabi Jehovah Kotoigi heri boen foe a bijbel leri wroko di den e doe now na ini moro leki 200 kondre. Jehovah Kotoigi e studeri bijbel èn e leri trawan taki dati na waarheid, sondro foe moksi dati nanga libisma filosofia di e swaki dati. Joe sabi den bijbel leri foe den Kotoigi? Foeroe sma e draidrai foe arki Jehovah Kotoigi foe di den e kisi foe jere fowtoe sani di trawan e froeteri foe den. Ma opregti ati sma e kisi a kari foe densrefi loekoe efoe san den Kotoigi e preiki na waarheid efoe a no de waarheid. So wan prenspari bosroiti no moesoe gron tapoe sani di joe jere sma e taki. Foeroe sma di ben ondrosoekoe den leri foe den Jehovah Kotoigi densrefi, ben kisi foeroe winimarki.
Sabi foe waarheid e poeroe frede
Poti prakseri foe eksempre na tapoe a kefal foe Eugenia. Na oemasma disi ben kweki na ini wan strak Katolik osofamiri. A papa foe en ben de wan foe den sma di ben orga sani so taki a paus ben kan fisiti Meksikow na ini 1979. Di Eugenia ben fisiti den mati foe en, a kon miti nanga Jehovah Kotoigi. Nanga a jepi foe den Kotoigi, a bigin ondrosoekoe moro fini san bijbel e taki. A e memre ete: „Na ini a bigin, frede ben bigin teki mi. Mi ben feni waarheid! Ma disi ben wani taki dati foeroe foe den sani di mi ben bribi fosi, no ben boen. Den sani di mi osofamiri, mi mati, den sma di mi lobi, ben bribi — ala den sani disi no ben boen. Senwe ben naki mi. Mi ben tan aksi misrefi san mi osofamiri ben o taki foe a njoen sani di mi ben feni. Di wan pisi ten pasa èn nanga jepi foe Jehovah, mi ben bigin teki gwenti na a kefalek moi sani disi di mi ben ondrofeni. Wan dei mi ben bosroiti foe taki a froetrow tori disi nanga wan mati foe a famiri, wan profesor foe theologia. Mi ben froeteri en taki mi ben wani feni waarheid. Ne a ben taki: ’Efoe joe wani sabi waarheid, dan joe moesoe soekoe Jehovah Kotoigi.’ ”
Eugenia ben frede taki en famiri ben o poti en na doro, èn dati na san en famiri ben doe toe. Ma den Kotoigi ben go doro foe gi en jepi na jejefasi. A e gi leki komentaar: „Mi ben kisi krakti di mi ben teki a sei foe waarheid. Mi ben kon froestan taki a ben de wan sani di warti foe feti gi en. A switikon di mi ben kisi foe Jehovah Kotoigi ben de so prenspari. Mi ben firi taki den ben lobi mi na ini a kresten gemeente. Foe kon krosibei na Gado organisâsi, ben jepi mi foe wini a frede foe tanapoe mi wawan sondro a jepi foe mi famiri.”
Poti prakseri na tapoe wan tra eksempre. Sabrina ben gro kon nanga a gwenti foe abi wan osofamiri bijbel takimakandra ala ten baka. Foe taki en leti, den ben kweki wan sortoe ’famiri relisi’. Sabrina ben meki a den wan gwenti foe de makandra nanga memre foe difrenti tra relisi, foe kan sori den pe a relisi foe den abi fowtoe. Di wán foe Jehovah Kotoigi ben pristeri en wan bijbelstudie, Sabrina ben teki dati wantewante nanga a prakseri foe boeweisi den taki a bribi foe den falsi. Sabrina e memre: „Baka di mi ben studeri moro leki wan jari, mi ben kon frede foe lasi ’mi waarheid’. Mi ben feni en makriki foe tjari den bedrigifasi foe den foeroe relisi di mi ben kisi foe doe nanga den kon na krin, ma a no ben de so makriki gi mi nanga Jehovah Kotoigi.”
A frede di Sabrina ben frede, ben meki a tapoe nanga a bijbelstudie foe en nanga Jehovah Kotoigi. Ma baka dati a ben firi leki a no ben warti moro na jejefasi. A ben teki a bosroiti foe bigin baka nanga a studie èn te foe kaba a bigin teki a njoen waarheid di a feni. Sabrina ben go na fesi te leki a ben doro a marki pe a ben wani prati den sani di a ben leri nanga trawan. A ben aksi den Kotoigi srefi efoe a ben kan waka nanga den na ini na oso-foe-oso diniwroko foe den. Sabrina e froeklari: „Bifo den ben feni mi boen foe preiki leki Jehovah Kotoigi, den ben aksi mi: ’Joe wani de wan Jehovah Kotoigi troetroe?’ ’Nôno!’ mi ben piki. Mi ben kon frede agen.” Baka di Sabrina ben go doro foe fisiti ala den konmakandra èn ben e loekoe Gado pipel èn a fasi fa den ben e gebroiki bijbel gronprakseri, dan te foe kaba a ben kon na a bosroiti taki disi ben de waarheid troetroe. A ben teki dopoe èn now a de wan foeroeten evangelie preikiman.
Foe san ede den e difrenti so?
Wan sma kan aksi ensrefi: ’Foe san ede den leri foe Jehovah Kotoigi e difrenti so foe tra relisi?’ Efoe joe loekoe sjatoe san den Kotoigi e bribi, dan dati sa jepi joe foe froestan taki den na opregti kresten, di e studeri bijbel nanga wan boen konsensi. Wi e gi joe deki-ati foe loekoe na ini joe eigi bijbel, den tekst di kari na ini a sjatoe loekoe baka foe den fondamenti sani di den Kotoigi e bribi èn di skrifi na tapoesei.
Efoe joe e loekoe moro fini san Jehovah Kotoigi e bribi èn fa den e hori densrefi na a sani di bijbel e leri, dan joe kan kisi blesi foe a fri di waarheid e gi sma (Johanes 17:17). No wan reide no de foe frede waarheid. Memre a sani di Jesus pramisi: „Oenoe sa sabi waarheid, èn waarheid sa meki oenoe kon fri.” — Johanes 8:32.
[Faki na tapoe bladzijde 6]
WAN TOE FONDAMENTI SANI DI JEHOVAH KOTOIGI E BRIBI
◯ Jehovah na a Almakti Gado. A nen foe en e kon moro leki 7000 tron na ini den fosi dokumenti foe bijbel di skrifi nanga anoe. — Psalm 83:18.
◯ Jesus Krestes na Gado en Manpikin, di ben kon na grontapoe foe gi en libi gi a libismafamiri (Johanes 3:16, 17). Jehovah Kotoigi e waka baka den leri foe Jesus Krestes soleki fa den de foe feni na ini den Evangelie.
◯ A nen Jehovah Kotoigi e komoto foe Jesaja 43:10 di e taki: „’Oenoe na mi kotoigi,’ na so Jehovah taki.”
◯ A Kownoekondre di sma e begi foe dati na ini a „Wi Tata” begi, na wan hemel tiri di heri esi sa poeroe ala pina nanga pen na grontapoe foe meki a tron a paradijs di bijbel e pramisi. — Jesaja 9:6, 7; Danièl 2:44; Mateus 6:9, 10; Openbaring 21:3, 4.
◯ Ibriwan sma di e doe a wani foe Gado abi na okasi foe njan boen foe den Kownoekondre blesi foe têgo. — Johanes 17:3; 1 Johanes 2:17.
◯ Kresten moesoe fiti a fasi fa den e tjari densrefi soleki fa bijbel e taki. Den moesoe meki moeiti foe de eerlijk, foe libi wan krin libi na a sei foe boen gwenti nanga wet, èn den moesoe sori lobi gi den sma na den sei. — Mateus 22:39; Johanes 13:35; 1 Korentesma 6:9, 10.
[Prenki na tapoe bladzijde 5]
Jehovah Kotoigi e meki bijbel waarheid bekènti na sma na ini moro leki 200 kondre