Tan wroko gi oen eigi froeloesoe!
„Lobiwan, . . . tan wroko gi oen eigi froeloesoe nanga frede èn nanga beifi.” — FILIPISMA 2:12.
1, 2. Sortoe pôpi denki ben meki foeroe sma firi taki den no man basi a libi foe den?
„NA SO joe ben gebore?” No so langa pasa, na aksi dati ben skrifi na tapoe a kafti foe wan pôpi tijdschrift. Na ondro den edewortoe joe ben kan si den wortoe: „A fasi fa joe de, den maniri foe joe, srefi den sani di joe e froekisi na ini a libi. Ondrosoekoe foe no so langa pasa e sori taki ala den sani disi de kaba te joe gebore.” Den sortoe sani disi di sma e taki, e meki taki wan toe sma e firi taki den no man doe noti foe basi a libi foe den.
2 Trawan frede taki tra fasi no de leki foe no abi wan kolokoe libi, foe di a leri di den papa nanga den mama noso den leriman foe den ben gi, no ben de so boen. Den kan firi taki awansi fa a no fa, den sa meki den srefi fowtoe baka di den papa nanga mama ben meki, foe doe san den moro ogri firi foe den e poesoe den foe doe, foe no de getrow na Jehovah — foe taki en sjatoe, foe teki ogri bosroiti. Na dati na san bijbel e leri? A troe taki wan toe relisi sma de di e bribi tranga taki bijbel e leri so wan sani: a leri taki a libi bepaal kaba na fesi. Soleki fa a leri disi e taki, dan langa ten pasa, Gado ben seti ibri sani kaba di ben o pasa na ini joe libi.
3. Sortoe boskopoe di e gi deki-ati, bijbel abi ini a tori foe a man di wi man sorgoe gi wi eigi tamara?
3 Ala den difrenti idea disi abi wán sani di de a srefi na ini ala foe den: Joe no abi tra fasi foe doe, joe no man basi a fasi fa joe libi sa waka. Dati na wan boskopoe di e meki joe lasi-ati, a no so, èn efoe joe lasi-ati, dan dati e meki a problema kon moro bigi. Odo 24:10 e taki: „Joe sori taki joe lasi-ati na tapoe a dei foe banawtoe? A krakti foe joe sa de pikinso.” Ma wi e kisi deki-ati foe sabi taki wi kan ’wroko gi wi eigi froeloesoe’, soleki fa bijbel e taki (Filipisma 2:12). Fa wi kan tranga a froetrow foe wi na ini a boen bijbel leri disi?
A „bow”-wroko di wi e doe na ini wisrefi
4. Ala di 1 Korentesma 3:10-15 e taki foe bow nanga materiaal di faja no man bron, tokoe san disi no e sori?
4 Poti prakseri na tapoe na eksempre foe na apostel Paulus na ini 1 Korentesma 3:10-15. Drape, Paulus e taki foe wan kresten bow-wroko, èn a gronprakseri foe na eksempre foe en, wi kan gebroiki gi a diniwroko ini a gemeente èn dorosei foe a gemeente. Paulus e sori taki efoe wan disipel te foe kaba e froekisi foe dini Jehovah èn foe tan getrow, dan dati na soso a frantiwortoe foe den sma di ben gi en leri? Nôno. Paulus ben sori taki a de prenspari taki a leriman moesoe doe a bow-wroko na a moro boen fasi di a man. Ma soleki fa wi ben leri na ini na artikel na fesi, dan Paulus no ben e taki dati a studenti noso disipel no ben man teki en eigi bosroiti na ini na afersi. A troe, na eksempre foe Paulus e sori na tapoe a wroko di wi e doe na ini trawan, no na tapoe a bow di wi e bow wisrefi. Disi wi kan si krinkrin, bika Paulus e taki foe bow-wroko di no bow boen èn di e kisi pori ala di a sma srefi di e bow e kisi froeloesoe. Ma tokoe bijbel e gebroiki a srefi fasi dati foe taki, gi wroko di wi e doe na ini wisrefi.
5. Sortoe bijbeltekst e sori taki kresten moesoe doe wan „bow”-wroko na ini densrefi?
5 Foe eksempre, poti prakseri na tapoe Judas 20, 21: „Oenoe, lobiwan, foe di oenoe bow oensrefi na tapoe a moro santa bribi foe oenoe, èn e begi nanga santa jeje, èn sorgoe na so wan fasi taki oenoe e tan na ini a lobi foe Gado.” Djaso Judas e gebroiki a srefi Griki wortoe gi „bow” di Paulus ben gebroiki na ini 1 Korentesma kapitel 3, ma a sani di Judas ben wani sori na taki wi moesoe bow wisrefi tapoe a fondamenti foe a bribi foe wi. Di Lukas ben skrifi na eksempre foe Jesus foe a man di ben bow en oso na tapoe boen tranga gron, dan Lukas ben gebroiki a srefi Griki wortoe gi „fondamenti” di Paulus ben gebroiki na ini na eksempre foe en foe a kresten bow-wroko (Lukas 6:48, 49). Moro fara, Paulus e gebroiki na idea foe wan „fondamenti” te a e froemane den kompe kresten foe en foe den go na fesi na jejefasi. Ija, Gado Wortoe e leri taki wi moesoe doe „bow”-wroko na ini wisrefi. — Efeisesma 3:15-19; Kolosesma 1:23; 2:7.
6. (a) Sori fa ibri kresten disipel na wan bow-wroko pe foeroe sma e span anoe makandra. (b) Sortoe frantiwortoe ibri disipel abi?
6 Foe bow wan kresten, na wan wroko foe wán man nomo? We, prakseri taki joe e teki a bosroiti foe bow wan oso. Joe e go na wan architect foe poti a fasi fa joe wani bow na tapoe papira. Ala di joesrefi wani doe foeroe foe a wroko, tokoe joe e joeroe wan aannemer foe wroko nanga joe èn foe sori joe fa na a moro boen fasi foe doe a wroko. Efoe na aannemer e poti wan steifi fondamenti, e jepi joe froestan fa a wroko o doe, e sori joe san na den moro boen materiaal di joe kan bai, èn e leri joe srefi foeroe foe bow-wroko, dan soleki fa a sori joe sa agri taki na aannemer doe wan boen wroko. Ma san ben o pasa efoe joe no ben o arki a rai foe en, taki joe ben o bai boenkopoe materiaal noso materiaal di no de so boen, èn srefi doe heri tra sani leki san na architect ben poti na tapoe papira? Seiker joe no ben sa sori finga na tapoe na aannemer noso tapoe na architect efoe na oso ben o saka go na gron! Na a srefi fasi ibri kresten disipel, na wan bow-wroko pe foeroe sma span anoe makandra. Jehovah na a kefalek boen architect. A e horibaka gi den getrow kresten di, leki wán foe den „kompe wrokoman foe Gado”, e leri wan studenti èn e bow en (1 Korentesma 3:9). Tokoe a studenti de na ini a tori toe. Te foe kaba, a studenti de frantiwortoe gi en eigi libi (Romesma 14:12). Efoe a wani abi moi kresten eigifasi, dan a moesoe wroko tranga foe kisi den, foe bow den na ini ensrefi. — 2 Petrus 1:5-8.
7. Sortoe tjalensi wan toe kresten e miti, èn san kan trowstoe den?
7 Disi wani taki dan, taki a fasi fa wi ben de di wi gebore, a presi pe wi e libi, èn a fasi fa den leriman foe wi e gi leri, no wani taki notinoti? Kwetikweti. Gado Wortoe e erken taki ibriwan foe den sani disi de prenspari sani di abi krakti. Foeroe sondoe firi nanga takroe firi na sani di wi gebore nanga dati èn a kan tranga foe feti den (Psalm 51:5; Romesma 5:12; 7:21-23). A leri foe papa nanga mama èn a fasi fa sani de na oso, kan abi wan kefalek krakti tapoe a jongoewan — foe doe boen noso foe doe ogri (Odo 22:6; Kolosesma 3:21). Jesus ben kroetoe den djoe relisi fesiman foe a takroe bakapisi di a leri foe den ben abi gi tra sma (Mateus 23:13, 15). Nojaso, den sortoe sani disi abi krakti tapoe wi alamala. Foe eksempre, son wan foe a pipel foe Gado e kisi foe doe nanga tjalensi leki wan bakapisi foe a moeilek pikin-nengre ten foe den. Den sortoe sma disi abi a switifasi foe wi fanowdoe èn so srefi den abi en fanowdoe taki wi e firi nanga den. Èn den kan feni trowstoe foe a bijbel boskopoe di e sori taki a no de so taki tra fasi no de leki foe kisi kroetoe na fesi kaba foe meki den srefi fowtoe di a papa nanga mama foe den ben meki noso taki den no sa de getrow. Loekoe fa wan toe kownoe foe Juda foe owroeten ben sori disi.
Den kownoe foe Juda — Den ben teki den eigi bosroiti
8. Sortoe eksempre di no ben boen, Jotam ben kisi foe en papa, ma tokoe sortoe bosroiti Jotam ben teki?
8 Usia ben tron kownoe foe Juda di a ben abi 16 jari nomo èn a ben tiri 52 jari langa. Foeroe foe a ten disi, Usia „ben tan doe san reti na ini den ai foe Jehovah, akroederi ala sani di en papa Amasia ben doe” (2 Kownoe 15:3). Jehovah ben blesi en nanga wan toe bigi sroedati feti di a ben wini. Ma a de wan sari, taki a go di sani ben go boen nanga Usia, ben frei go na en ede. A ben kisi heimemre èn ben meki oproeroe teige Jehovah foe di a ben tjari switismeri ofrandi na a altari na ini a tempel, wan wroko di soso den priester ben mag doe. Usia ben kisi piri-ai, ma a ben ati bron nanga dati. Ne Gado ben lagi Usia — a ben kisi gwasi èn a ten di ben tan ete foe en libi a ben moesoe libi en wawan (2 Kroniki 26:16-23). San Jotam, a manpikin foe Usia, ben doe di a si ala den sani disi? Makriki a papa foe en ben kan abi krakti na Jotam tapoe èn Jotam ben kan hori Jehovah na ati foe di A ben strafoe en papa. A pipel ben kan abi wan ogri krakti na tapoe Jotam, foe di a pipel ben doe ogri relisi sani (2 Kownoe 15:4). Ma Jotam ben teki en eigi bosroiti. „A ben tan doe san reti na ini den ai foe Jehovah.” — 2 Kroniki 27:2.
9. San ben de wan toe sani di ben kan abi wan boen krakti na tapoe Akas, ma fa en libi ben waka?
9 Jotam ben tiri 16 jari, èn a ben tan getrow na Jehovah a heri pisi ten dati. Foe dati ede Akas, a manpikin foe Jotam, ben abi a kefalek boen eksempre foe wan getrow papa. Èn Akas ben abi tra sani toe di ben kan abi wan boen krakti na en tapoe. Akas ben abi a blesi foe de na libi di den getrow profeiti Jesaja, Hosea, nanga Mika ben taki den profeititori fajafaja na ini a kondre. Tokoe Akas ben teki wan takroe bosroiti. „A no ben doe san ben reti na ini den ai foe Jehovah soleki fa en afo David ben doe.” A ben meki popki foe Bâ-al èn a ben anbegi den, èn a ben bron srefi wan toe foe en eigi manpikin na ini den faja foe a bron-ofrandi gi den heiden gado. Ala di den moro boen sani ben de di ben kan abi wan boen krakti na Akas tapoe, tokoe a no ben boen srefisrefi leki wan kownoe èn leki wan foetoeboi foe Jehovah. — 2 Kroniki 28:1-4.
10. Sortoe papa Akas ben de, ma sortoe bosroiti en manpikin Hiskia ben teki?
10 Efoe joe loekoe a tori foe a sei foe a troe anbegi, dan wan sma no kan prakseri wan moro ogri papa leki Akas. Ma tokoe Hiskia, a manpikin foe Akas, no ben kan taki soema ben o de en papa! Den jongoe manpikin di Akas ben kiri na ini ofrandi gi Bâ-al ben de Hiskia en eigi brada soleki fa a sori. A kefalek takroe situwâsi disi ben meki taki a ben kisi kroetoe foe libi wan libi pe a no ben sa kan de getrow na Jehovah? Kontrari foe dati, Hiskia ben tron wán foe den weiniki troetroe bigi kownoe foe Juda — wan getrow, koni man di foeroe sma ben lobi. „Jehovah ben sori foe de nanga en” (2 Kownoe 18:3-7). Foe taki en leti, foe wan toe sani ede, wi kan bribi taki Hiskia ben de a skrifiman foe a di foe 119 Psalm di a ben skrifi nanga jepi foe Gado en santa jeje, di Hiskia ben de wan jongoe kownoe ete. Efoe na so a de, dan a no ben sa moeilek foe froestan foe san ede a ben sa skrifi den wortoe: „Mi sili no man sribi foe sari ede” (Psalm 119:28). Ala di Hiskia ben abi problema di ben meki en sari, tokoe a ben meki Jehovah Wortoe tiri en libi. Psalm 119:105 e taki: „Joe wortoe na wan lampoe gi mi foetoe, èn wan leti na tapoe mi pasi.” Ija, Hiskia ben teki en eigi bosroiti — wan boen bosroiti.
11. (a) Ala di Manase en papa ben kan abi wan boen krakti tapoe en, o fara Manase ben go foe opo ensrefi teige Jehovah? (b) Sortoe bosroiti Manase ben teki di a libi foe en ben de foe doro en kaba, èn san wi kan leri foe disi?
11 Ma kontrari foe a sani di wi ben sa kan froewakti, a de so taki wan foe den moro boen kownoe foe Juda, ben kisi wan foe den moro ogri kownoe leki pikin. Manase, a manpikin foe Hiskia, ben gi sma deki-ati foe anbegi kroektoe gado, foe doe afkodrei, nanga foe doe boen tranga ogridoe na wan fasi di noiti ben doe ete. A tori e taki dati „Jehovah ben tan taki nanga Manase èn a pipel foe en”, nanga jepi foe den profeiti (2 Kroniki 33:10). Soleki fa djoe leri e taki, baka dati dan Manase ben koti Jesaja pisipisi nanga sâ. (Teki gersi Hebrewsma 11:37.) Efoe dati troe efoe no, Manase no ben arki no wan foe den warskow foe Gado. Foe taki en leti, a ben meki den bron wan toe foe en eigi manpikin libilibi leki ofrandi, soleki fa en granpapa Akas ben doe. Tokoe na ogri man disi, di a ben kisi hebi tesi di a ben kon owroe kaba, ben abi berow èn a ben kenki a fasi fa a ben libi (2 Kroniki 33:1-6, 11-20). Na eksempre foe Manase e leri wi taki a no abi foe de so, taki wan sma di teki boen takroe bosroiti, no kan kon boen baka. A sma dati kan kenki.
12. Sortoe bosroiti di de kontrari makandra, Amon nanga en manpikin Josia ben teki na ini a diniwroko gi Jehovah?
12 Amon, a manpikin foe Manase, ben kan leri foeroe foe a berow di en papa ben abi. Ma a ben teki takroe bosroiti. Foe taki en leti, dan Amon „ben meki fowtoe kon moro bigi” te leki den ben kiri en te foe kaba. Josia, a manpikin foe Amon, ben de heri tra fasi èn dati ben switi srefisrefi. Soleki fa a sori, dan Josia ben froekisi foe leri wan sani foe san ben pasa nanga en granpapa. A ben bigin tiri di a ben abi aiti jari nomo. Di Josia ben abi 16 jari nomo, a ben bigin soekoe Jehovah èn baka dati a ben sori taki a ben de wan getrow kownoe di ben de wan boen eksempre (2 Kroniki 33:20–34:5). A ben teki wan bosroiti — wan boen bosroiti.
13. (a) San wi e leri foe den kownoe foe Juda di wi ben ondrosoekoe? (b) O prenspari a leri de di papa nanga mama e gi den pikin?
13 Na ondrosoekoe di wi ondrosoekoe sjatoe, seibi kownoe foe Juda e leri wi boen foeroe. Na ini son kefal, den moro ogri kownoe ben kisi den moro boen manpikin èn, na a tra sei, den moro boen kownoe ben kisi den moro ogri manpikin. (Teki gersi Preikiman 2:18-21.) A sani disi no e sori taki a leri foe papa nanga mama no de so prenspari. Seiker a de so, taki papa nanga mama di e leri den pikin foe den akroederi a pasi foe Jehovah, e gi den pikin foe den a moro boen okasi foe tron getrow foetoeboi foe Jehovah (Deuteronomium 6:6, 7). Ma ala di getrow papa nanga mama e meki ala moeiti foe jepi den pikin foe den, tokoe ete wan toe pikin e froekisi foe teki wan ogri pasi. Tra pikin, ala di a papa nanga mama foe den abi a moro takroe krakti tapoe den, tokoe den pikin disi froekisi foe lobi Jehovah èn dini En. Nanga a blesi foe Jehovah, den e meki sani waka boen na ini a libi foe den. Joe e aksi joesrefi wanwan leisi, fa a sa de nanga joe? Dan poti prakseri na tapoe wan toe djaranti di Jehovah srefi e gi taki joe kan teki wan boen bosroiti!
Jehovah abi froetrow na ini joe!
14. Fa wi doe sabi taki Jehovah e froestan taki wi no man doe ala sani?
14 Jehovah e si ala sani. Odo 15:3 e taki: „Den ai foe Jehovah de na ibri presi, ala di den e loekoe den takroewan èn den boenwan.” Kownoe David ben taki foe Jehovah: „Joe ai ben si srefi na embryo foe mi, èn ini joe boekoe ala pisi foe en ben skrifi kaba, ini a tori foe den dei di den ben meki èn no wán foe den ben de ete” (Psalm 139:16). So boen, Jehovah sabi nanga sortoe takroe firi joe e feti — awansi joe ben kisi den sensi joe gebore noso ben kisi den leki wan bakapisi foe krakti di joesrefi no man basi. A e froestan krinkrin fa den sani disi abi krakti na joe tapoe. A e froestan taki joe no man doe ala sani, a e froestan dati moro boen srefi leki joe srefi. Èn Jehovah abi sari-ati. Noiti a e aksi moro foe wi leki san wi man doe. — Psalm 103:13, 14.
15. (a) San na wan fonten foe kisi trowstoe gi den wan di trawan ben hati den foe espresi? (b) Jehovah e si wi alamala leki warti sma foe di a e gi wi sortoe frantiwortoe?
15 Na a tra sei, Jehovah no e si wi leki sma di no man doe notinoti na a situwâsi foe wi. Efoe wi ben ondrofeni takroe sani na ini a ten di pasa, dan wi kan feni trowstoe na ini a seikerfasi taki Jehovah no wani si den sortoe takroe sani disi na ai di sma e doe foe espresi (Psalm 11:5; Romesma 12:19). Ma a sa gi wi pardon dan efoe wi e drai baka èn e teki takroe bosroiti ala di wi sabi san wi e doe? Kwetikweti. A Wortoe foe en e taki: „Ibriwan sma sa tjari en eigi lai” (Galasiasma 6:5). Jehovah e si ibriwan foe den koni kriatoeroe foe en leki warti sma di a e gi a frantiwortoe foe doe san boen èn foe dini en. A de soleki fa Moses ben taigi a nâsi Israèl: „Foe troe, mi e teki hemel nanga grontapoe leki kotoigi teige oenoe tide, taki mi poti libi nanga dede na joe fesi, blesi nanga floekoe; èn joe moesoe froekisi libi so taki joe kan tan na libi, joe nanga joe bakapikin” (Deuteronomium 30:19). Jehovah abi a froetrow taki wisrefi kan teki wan boen bosroiti. Fa wi doe sabi dati?
16. Fa wi kan abi boen bakapisi te wi e ’wroko gi wi eigi froeloesoe’?
16 Loekoe san na apostel Paulus ben skrifi: „Foe dati ede, mi lobiwan, . . . tan wroko gi oen eigi froeloesoe nanga frede èn nanga beifi, bika Gado na a wan di, foe en boen prisiri ede, e wroko ini oenoe, so taki oenoe wani èn e wroko toe” (Filipisma 2:12, 13). A fosi Griki wortoe di vertaal djaso nanga ’wroko gi’, e sori tapoe a tjari di wan sma e tjari wan sani kon na wan kaba. So boen, a no de so taki tra fasi no de leki foe lasi noso foe tapoe. Jehovah Gado moesoe foe abi a froetrow taki wi kan kaba a wroko di a gi wi foe doe — a wroko di e gi wi froeloesoe — noso a no ben sa meki Paulus skrifi so wan sani nanga jepi foe santa jeje. Fa wi e kisi boen bakapisi? A no de nanga wi eigi krakti. Efoe wi ben tranga nofo na ini wisrefi èn foe wisrefi, dan a no ben sa de fanowdoe foe de nanga „frede èn nanga beifi”. Na presi foe dati, Jehovah ’e wroko ini wi’, a santa jeje foe en e wroko ini wi prakseri nanga wi ati èn e jepi wi foe „wani èn [e] wroko toe”. Nanga a lobi-ati jepi dati, wan sani de dan foe san ede wi no moesoe teki boen bosroiti ini a libi èn libi akroederi den bosroiti di wi teki? Nôno! — Lukas 11:13.
17. Sortoe kenki wi kan tjari kon ini wisrefi, èn fa Jehovah e jepi wi foe doe dati?
17 Wi sa kisi problema di wi sa moesoe loesoe — kande wan heri libi foe takroe gwenti nanga sani ben abi takroe krakti na wi tapoe, kan broeja wi denki pikinso. Ma tokoe, nanga jepi foe Jehovah en jeje, wi kan wini den sani disi! Soleki fa Paulus ben skrifi den kresten na Korente, dan a Wortoe foe Gado abi nofo krakti foe trowe srefi den „sani di seti steifi” (2 Korentesma 10:4). Foe taki en leti, Jehovah kan jepi wi foe tjari bigi kenki kon na ini wisrefi. A Wortoe foe en e gi wi tranga foe „poeroe na owroe fasi fa wan sma de” èn foe „weri a njoen fasi fa wan sma de, di ben kria akroederi a wani foe Gado na ini troetroe regtfardikifasi nanga loyaalfasi” (Efeisesma 4:22-24). Jehovah jeje kan jepi wi troetroe foe tjari den sortoe kenki dati kon? Seiker! A jeje foe Gado e meki froktoe na ini wi — moi, diri eigifasi di wi alamala wani kweki. A fosiwan foe den disi na lobi. — Galasiasma 5:22, 23.
18. Sortoe bosroiti ibri libisma di e denki kan teki troetroe, èn sortoe fasti bosroiti wi moesoe abi foe dati ede?
18 A sani disi troe srefisrefi èn a e meki wi kon fri. Jehovah Gado abi lobi di no man kaba, èn wi meki na a prenki foe Gado (Genesis 1:26; 1 Johanes 4:8). So boen wi kan froekisi foe lobi Jehovah. Èn a lobi dati — èn no a libi di wi ben libi fosi bifo wi tron wan kresten, no den swakifasi di wi kisi, no den firi di wi gebore nanga den èn di e gi a lostoe foe doe ogri — na a sroto gi a tamara foe wi. Lobi gi Jehovah Gado, na a sani di Adam nanga Eva ben abi fanowdoe foe tan getrow na ini Eden. So wan lobi na a sani di ibriwan foe wi abi fanowdoe foe man pasa Armagedon libilibi èn foe pasa a lasti tesi na a kaba foe Krestes en Doesoen Jari Tiri (Openbaring 7:14; 20:5, 7-10). Ibriwan foe wi, awansi fa a situwâsi foe wi de, kan kweki so wan sortoe lobi (Mateus 22:37; 1 Korentesma 13:13). Meki wi abi a fasti bosroiti foe lobi Jehovah èn foe bow tapoe a lobi dati foe têgo ten.
San joe e prakseri?
◻ Sortoe pôpi denki de tra fasi leki a boen leri di bijbel e gi ini a tori foe a frantiwortoe di ibri sma abi?
◻ Sortoe bow-wroko ibri kresten moesoe doe ini ensrefi?
◻ Fa den eksempre foe den kownoe foe Juda e sori taki ibri sma e teki en eigi bosroiti?
◻ Fa Jehovah e gi wi a djaranti taki wi kan teki boen bosroiti na ini a libi, awansi sortoe takroe krakti de lontoe wi?
[Prenki na tapoe bladzijde 15]
A fasi fa joe ben de di joe ben gebore, e taki fa joe tamara sa de?
[Prenki na tapoe bladzijde 17]
Ala di kownoe Josia ben kisi wan takroe eksempre foe en papa, tokoe a ben teki a bosroiti foe dini Gado