Omeni Yu Lobi Gado Wortu?
„¡O, fa mi lobi yu wet! Heri dei mi wani poti prakseri na en tapu.”—PSALM 119:97.
1. San na wan fasi fa sma di frede Gado e sori taki den lobi Gado Wortu?
HONDROHONDRO milyun man nanga uma abi wan Bijbel. Ma wan difrenti de na ini na abi di wan sma abi wan Bijbel èn a lobi di a lobi Gado Wortu. ¿Wan sma kan taki nanga reti taki a lobi Gado Wortu efu wanwan leisi nomo a e leisi en? ¡Kwetikweti! Na a tra sei, yu abi sma di fosi no ben abi furu lespeki gi Bijbel, ma now den e leisi en ibri dei. Den leri fu lobi Gado Wortu, èn neleki a psalm skrifiman, den e prakseri Gado Wortu „heri dei” now.—Psalm 119:97.
2. Fa wán Kotoigi fu Yehovah ben tan abi wan tranga bribi na ini muilek situwâsi?
2 Wan sma di ben leri fu lobi Gado Wortu na Nasho Dori. Makandra nanga tra bribiman, a ben horidoro someni tenti yari fu dini Yehovah na ini en kondre Albania. A moro bigi pisi fu a ten dati, lanti ben tapu a wroko fu Yehovah Kotoigi, èn den getrow Kresten disi no ben kisi furu Bijbel publikâsi. Ma a bribi fu brada Dori ben tan tranga. Fa so? „A marki fu mi,” na so a ben taki, „ben de fu leisi Bijbel seiker wán yuru ibri dei, wan sani di mi ben du so wan 60 yari, fosi mi no ben man si moro.” No so langa pasa ete, a heri Bijbel no ben de fu kisi na ini Albaniatongo, ma di brada Dori ben de wan pikin, dan a ben leri Grikitongo èn dati meki a ben leisi Bijbel na ini a tongo dati. Fu di brada Dori ben leisi Bijbel doronomo, meki dati ben yepi en fu frudrage furu tesi, èn a kan yepi wi tu.
„Kweki wan Angri” gi Gado Wortu
3. Sortu denki Kresten musu abi fu Gado Wortu?
3 „Leki nyunyun pikin,” na so na apostel Petrus ben skrifi, „kweki wan angri gi a soifri merki di de fu a wortu” (1 Petrus 2:2). Neleki fa wan beibi e angri fu a merki fu en mama, na so Kresten di sabi a yeye nowtu fu den e prisiri trutru fu leisi Gado Wortu. ¿Na dati na fa yu e firi? Efu dati no de so, no lasi-ati. Yu so srefi kan kweki wan angri gi Gado Wortu.
4. San wi musu du te wi wani kisi a gwenti fu leisi Bijbel ibri dei?
4 Fu kan du dati, dan dwengi yusrefi fosi fu meki a leisi di yu e leisi Bijbel de wan sani di yu gwenti du doronomo, wan sani di yu e du ibri dei efu a kan (Tori fu den Apostel 17:11). Kande yu no man gebroiki wan yuru ibri dei fu leisi Bijbel leki fa Nasho Dori ben du, ma kande yu kan poti pikinso ten na wan sei ibri dei fu prakseri Gado Wortu. Furu Kresten e opo pikinso moro fruku so taki den kan prakseri dipi fu wan pisi fu Bijbel. ¿Wan moro betre fasi de fu bigin a dei? Tra sma feni en moro bun fu kaba a dei nanga a leisi di den e leisi Bijbel leti bifo den e go sribi. Èn trawan e leisi Bijbel na wan tra ten di den e feni moro bun. A prenspari sani de taki wi musu leisi Bijbel doronomo. Teki wan tu momenti baka dati, fu prakseri dipi fu den sani di yu leisi. Kon meki wi go luku wan tu eksempre fu sma di ben kisi wini fu a leisi di den ben leisi Gado Wortu èn a prakseri di den ben prakseri dipi fu en.
Wan Psalm Skrifiman Di Ben Lobi a Wet fu Gado
5, 6. San wi kan leri fu a skrifiman fu a di fu 119 Psalm te wi leisi san a ben skrifi èn te wi e prakseri dipi fu dati, ala di wi no sabi en nen kande?
5 A skrifiman fu a di fu 119 Psalm ben abi furu warderi gi Gado Wortu trutru. Suma ben skrifi a psalm dati? A nen fu a skrifiman no kari na ini Bijbel. Ma den tra tekst e sori wi wan tu sani fu en, èn wi sabi taki a libi fu en no ben de sondro problema. Wan tu fu den kompe fu en di ben musu de anbegiman fu Yehovah no ben lobi den gronprakseri fu Bijbel leki fa en ben lobi den. Ma toku a psalm skrifiman no ben meki a fasi fa den ben handri, tapu en fu du san bun (Psalm 119:23). Efu yu e libi noso e wroko makandra nanga wan sma di no e lespeki den markitiki fu Bijbel, dan kande a situwâsi fu a psalm skrifiman e sori yu sani di gersi a situwâsi fu yu.
6 Ala di a psalm skrifiman ben de wan man di ben gi yesi na Gado, toku a no ben denki fu ensrefi kwetikweti taki a ben de regtfardiki. A ben erken eerlijk taki a no ben de volmaakti (Psalm 119:5, 6, 67). Ma a no ben gi pasi meki sondu basi en. „Fa wan yonkuman sa krin en pasi?”, a ben aksi. A piki fu en: „Fu di a de na ai akruderi a wortu fu yu” (Psalm 119:9). Baka dati, a psalm skrifiman di ben wani sori o tranga a krakti fu Gado Wortu de fu meki sma kon de moro betre sma, ben taki moro fara: „Leki wan gudu mi kibri a wortu fu yu na ini mi ati, so taki mi no e sondu na yu” (Psalm 119:11). ¡Wan krakti di kan yepi wi fu no sondu na Gado, tranga trutru!
7. Fu san ede yongu sma spesrutu musu hori na prakseri taki a de fanowdu fu leisi Bijbel ibri dei?
7 A bun te Kresten yonguwan e prakseri den wortu fu a psalm skrifiman. Furu sani e kon na tapu yongu Kresten na ini a ten disi. Didibri ben o lobi fu pori a yongu geslakti fu den anbegiman fu Yehovah. Satan abi na prakseri fu kori yongu Kresten, so taki den e brokokindi gi a lostu fu a skin èn taki den e pasa den wet fu Gado. Nofotron, den kino nanga den felem na telefisi e sori a prakseri fu Didibri. Den sma di e plèi na ini den felem dati e gi sma a prakseri taki den na bun sma di abi moi eigifasi; den felem e prenki a hurudu di den e du nanga makandra leki wan gewoon sani. San na a boskopu? ’A bun te sma di no trow abi seks nanga makandra so langa den lobi makandra trutru.’ Na wan sari, taki ibri yari wan lo yongu Kresten e go prakseri so tu. Sonwan fu den e lasi a bribi fu den. ¡Iya, a druk hebi! ¿Ma a druk hebi someni, taki unu yonguwan no man kakafutu gi en? ¡Kwetikweti! Yehovah gi yongu Kresten wan fasi fu no brokokindi gi takru lostu. Te den ’de na ai akruderi Gado Wortu èn den e kibri den wortu di Gado taki na ini na ati fu den’, dan den kan kakafutu gi iniwan sani di Didibri kan gebroiki. Omeni ten yu e gebroiki fu studeri nanga yusrefi doronomo èn fu prakseri dipi fu sani?
8. Fa den eksempre di skrifi na ini a paragraaf disi kan yepi yu fu kisi moro warderi gi a Wet fu Moses?
8 A skrifiman fu a di fu 119 Psalm ben bari: „¡O, fa mi lobi yu wet!” (Psalm 119:97) Fu sortu wet a ben taki? Fu den wortu di Yehovah ben tyari kon na krin, so srefi a Wet fu Moses. Te sma no e luku sani so fini, dan den ben sa kan si a wet disi leki fositen sani èn den ben sa kan aksi densrefi fa wan sma ben kan lobi den wet dati. Ma te wi e prakseri dipi fu den difrenti sani fu a Wet fu Moses, leki fa a psalm skrifiman ben du dati, dan wi kan abi warderi gi a koni di de na ini a Wet dati. Boiti den furu profeiti sani na ini a Wet, yu abi wet tu di e taki fu krin fasi èn a nyan fu gosontu nyanyan, èn dati ben meki taki sma ben libi na wan krinfasi èn ben kan abi wan bun gosontu (Lefitikus 7:23, 24, 26; 11:2-8). A Wet ben gi sma deki-ati fu de eerlijk te den ben du bisnis èn a ben frumane den Israèlsma fu abi sari-ati gi tra anbegiman di ben de na nowtu (Exodus 22:26, 27; 23:6; Lefitikus 19:35, 36; Deuteronomium 24:17-21). Krutu bosroiti ben musu teki sondro fu teki sma partij (Deuteronomium 16:19; 19:15). Di a skrifiman fu Psalm 119 ben kisi moro ondrofeni na ini a libi, dan seiker a ben si taki a ben go bun nanga den sma di ben hori densrefi na a Wet fu Gado, èn a ben kon lobi disi moro nanga moro. Na so a de tu na ini a ten disi, taki te Kresten kan hori densrefi na den gronprakseri fu Bijbel, dan a lobi èn a warderi di den abi gi Gado Wortu e gro.
Wan Prins Di Ben Prefuru fu De Tra Fasi
9. Sortu denki Kownu Hiskia ben kisi fu Gado Wortu?
9 Den sani di skrifi na ini a di fu 119 Psalm e kruderi bun nanga san wi sabi fu Hiskia di a ben de wan yongu prins ete. Son Bijbel sabiman e taki dati Hiskia ben de a skrifiman fu a psalm. Ala di disi no de seiker, wi sabi taki Hiskia ben abi furu lespeki gi Gado Wortu. Na a fasi fa a ben libi, a ben sori taki a ben agri krinkrin nanga den wortu na Psalm 119:97. Bijbel e taki fu Hiskia: „A ben tan krosibei na Yehovah. A no ben drai en baka gi en fu di a ben tan waka na En baka, ma a ben tan hori ensrefi na den komando fu En, di Yehovah ben komanderi Moses.”—2 Kownu 18:6.
10. Sortu deki-ati den Kresten di no kisi a kweki fu wan papa nanga mama di lobi Gado, kan kisi fu na eksempre fu Hiskia?
10 Boiti dati, Hiskia no ben gro na ini wan osofamiri di ben lobi Gado. ¡En papa Kownu Akas, di no ben de getrow èn di ben de wan anbegiman fu kruktu gado, ben meki seiker wan fu den manpikin fu en — Hiskia en eigi brada — bron libilibi leki wan ofrandi gi wan falsi gado! (2 Kownu 16:3) Ala di Hiskia ben si a takru eksempre disi, toku a ben man „krin en pasi” fu a krakti di den heiden ben abi na sma tapu, fu di a ben leri sabi Gado Wortu.—2 Kroniki 29:2.
11. Fa sani ben waka nanga Hiskia papa di no ben getrow, ala di Hiskia ben e si disi?
11 Di Hiskia ben gro kon bigi, dan a ben si nanga en eigi ai fa en papa di ben anbegi kruktu gado ben handri afersi fu a kondre. Feanti ben lontu Yuda. Yu ben abi Resin, a kownu fu Siria, di makandra nanga Kownu Peka fu Israèl ben kon feti nanga Yerusalem (2 Kownu 16:5, 6). Yu ben abi den Edomsma nanga den Filisteasma, di ben meki den pikin legre fu den broko kon na ini Yuda nanga bun bakapisi èn di ben teki wan tu foto fu Yuda abra srefi (2 Kroniki 28:16-19). Fa Akas ben handri nanga den muilek situwâsi disi? Na presi taki Akas ben go suku yepi na Yehovah fu kan feti nanga Siria, a ben go na a kownu fu Asiria fu di a ben gi en gowtu nanga solfru leki tyuku, so srefi den di fu a tempel gudu. Ma disi no ben tyari têgo vrede kon gi Yuda.—2 Kownu 16:6, 8.
12. San Hiskia ben musu du fu no meki den srefi fowtu di en papa ben meki?
12 Te fu kaba, Akas dede èn Hiskia ben tron kownu di a ben abi 25 yari (2 Kroniki 29:1). A ben yongu ete, ma dati no ben hori en fu tron wan bun kownu. Na presi taki a ben du san en papa ben du di no ben de getrow, a ben hori ensrefi na a Wet fu Yehovah. Disi ben wani taki so srefi wan spesrutu komando gi den kownu: „Te [kownu] e go sidon na tapu a kownusturu fu en kownukondre, taki a musu skrifi gi ensrefi wan eksemplaar fu a wet disi na ini wan buku, fu a wan di den priester, den Leifisma, abi na den. Èn a musu de na en doronomo, èn a musu leisi na ini en ala den dei fu en libi, so taki a kan leri fu frede Yehovah, en Gado, fu kan hori ensrefi na ala den wortu fu a wet disi” (Deuteronomium 17:18, 19). Fu di Hiskia ben leisi Gado Wortu ibri dei, meki a ben leri fu frede Yehovah èn a no ben o meki den fowtu di en papa di no ben lobi Gado, ben meki.
13. Fa wan Kresten kan de seiker taki na wan yeye fasi, ala sani di a e du sa waka bun?
13 No soso den kownu fu Israèl ben kisi deki-ati fu prakseri fu Gado Wortu doronomo, ma ala den Israèlsma di ben e frede Gado ben musu du dati tu. A fosi Psalm e taki dati wan sma koloku trutru te en „prisiri de na ini a wet fu Yehovah, èn na ini en wet a e leisi nanga wan safri sten dei nanga neti” (Psalm 1:1, 2). Fu so wan man, a psalm skrifiman e taki: „A sa waka bun nanga ala san a e du” (Psalm 1:3). Na a tra sei, Bijbel e taki fu a sma di no e bribi na ini Yehovah Gado: „A de wan sma di no man teki bosroiti, di no e tanapu kánkan na ini ala en pasi” (Yakobus 1:8). Wi alamala wani de koloku èn wi wani abi bun bakapisi. Te wi e leisi Bijbel doronomo èn na wan fasi pe wi kan leri furu fu en, dan dati kan meki wi de koloku.
Gado Wortu Ben Horibaka gi Yesus
14. Fa Yesus ben sori taki a ben lobi Gado Wortu?
14 Wan leisi, a papa nanga mama fu Yesus ben feni en ala di a ben e sidon na mindri den leriman na ini a tempel na Yerusalem. ¡Den sabiman disi fu Gado Wet „ben fruwondru densrefi ala ten fu a fasi fa a ben frustan sani èn fu den piki fu en”! (Lukas 2:46, 47) Dati ben de di Yesus ben abi 12 yari. Iya, srefi di a ben yongu ete, a ben de krin taki a ben lobi Gado Wortu. Na wan tra ten, Yesus ben gebroiki den Buku fu Bijbel fu piri-ai gi Didibri, fu di a ben taki: „Libisma no musu libi fu brede wawan, ma fu ibri wortu di e kon fu Yehovah en mofo” (Mateus 4:3-10). No langa baka dati, Yesus ben preiki gi den sma fu en foto Nasaret, fu di a ben gebroiki den Buku fu Bijbel.—Lukas 4:16-21.
15. Fa Yesus ben de wan eksempre di a ben preiki na tra sma?
15 Furu leisi, Yesus ben gebroiki den wortu di skrifi na ini Gado Wortu fu horibaka gi den leri fu en. Den arkiman fu en „ben fruwondru fu a fasi fa a [ben] gi leri” (Mateus 7:28). ¡Èn a no de wan wondru — den leri fu Yesus ben kon fu Yehovah Gado srefi! Yesus ben taki: „San mi e leri, a no fu mi, ma na fu en di ben seni mi kon. A sma di e taki sani di e kon fu ensrefi, e suku en eigi glori; ma a sma di e suku a glori fu a sma di seni en, a sma disi de tru èn no wan onregtfardikifasi de na ini en.”—Yohanes 7:16, 18.
16. O fara Yesus ben go fu sori taki a ben lobi Gado Wortu?
16 Tra fasi leki a skrifiman fu Psalm 119, „no wan onregtfardikifasi” ben de na ini Yesus. A ben de sondro sondu, a Manpikin fu Gado di „ben saka ensrefi èn ben gi yesi te na dede” (Filipisma 2:8; Hebrewsma 7:26). Ma ala di Yesus ben de volmaakti, toku a ben studeri èn ben gi yesi na a Wet fu Gado. Disi ben de a moro prenspari sani di ben yepi en fu hori en soifri retifasi. Di Petrus ben gebroiki a feti-owru fu di a ben pruberi fu tapu sma meki den no teki a Masra fu en go sroto, dan Yesus ben piri-ai gi na apostel èn a ben aksi: „¿Yu denki taki mi no kan aksi mi Tata fu gi mi na a momenti disi moro leki twarfu legioen engel? Efu dati ben o de so, dan fa den Buku fu Bijbel ben o kon tru, taki a musu pasa na a fasi disi?” (Mateus 26:53, 54) Iya, a kontru fu san Bijbel ben taki, wani taki moro gi Yesus leki fu wai pasi gi wan ogri-ati dede di ben o gi en syen. ¡A ben lobi Gado Wortu na wan tumusi aparti fasi!
Tra Sma Di Ben Waka na Baka na Eksempre fu Krestes
17. O prenspari Gado Wortu ben de gi na apostel Paulus?
17 Na apostel Paulus ben skrifi gi tra Kresten: „Tron sma di e waka na baka na eksempre fu mi, neleki fa mi e waka na baka na eksempre fu Krestes” (1 Korentesma 11:1). Neleki a Masra fu en, na so Paulus ben kon leri fu lobi Bijbel. A ben erken: „Na ini a moro dipi pisi fu mi skin srefi mi lobi a Wet fu Gado trutru” (Romesma 7:22, The Jerusalem Bible). Paulus ben gebroiki Gado Wortu furu leisi (Tori fu den Apostel 13:32-41; 17:2, 3; 28:23). Di Paulus ben leri Timoteus, wan lobi kompebedinari, wan tu lasti sani, dan a ben sori o prenspari Gado Wortu ben musu de ini na aladei libi fu ibri „sma di de fu Gado”.—2 Timoteus 3:15-17.
18. Kari wan eksempre fu wan sma na ini a ten disi di ben sori taki a ben lespeki Gado Wortu.
18 Furu getrow futuboi fu Yehovah na ini a ten disi ben lobi Gado Wortu, neleki fa Yesus ben lobi Gado Wortu. Na a bigin fu a yarihondro disi, wan yonkuman ben kisi wan Bijbel fu wan mati. A ben taki sortu krakti a moi presenti disi ben abi na en tapu: „Mi ben abi a fasti bosroiti taki mi ben musu leisi wan pisi fu Bijbel ibri dei.” A yonkuman dati ben de Frederick Franz, èn a lobi di a ben lobi Bijbel ben meki taki a ben abi wan langa libi na ini a diniwroko fu Yehovah nanga bun bakapisi. Sma e memre en nanga prisiri ete leki wan sma di ben man taki heri kapitel fu Bijbel na ede.
19. Fa son sma e poti ten na wan sei ibri wiki fu leisi Bijbel gi a Theokrasia Diniwroko-skoro?
19 Yehovah Kotoigi e si a leisi di den e leisi Bijbel doronomo leki wan tumusi prenspari sani. Ibri wiki, te den e sreka densrefi gi wan fu den Kresten konmakandra fu den, a Theokrasia Diniwroko-skoro, dan den e leisi wan tu kapitel fu Bijbel. Na a konmakandra, den e taki fu edepenti na ini Bijbel di abi fu du nanga a pisi di den ben musu leisi. Son Kotoigi lobi fu prati a pisi di den musu leisi fu Bijbel na ini seibi pisi èn den e leisi ibri pisi ibri dei. Te den e leisi, dan den e prakseri fu den tori. Te den man dan den e go ondrosuku sani moro fara nanga yepi fu publikâsi di e taki fu Bijbel tori.
20. San de fanowdu fu kan poti ten na wan sei fu leisi Bijbel doronomo?
20 Kande yu musu ’bai ten’ puru fu tra sani di yu e du, so taki yu kan leisi Bijbel ala ten (Efeisesma 5:16). Ma a wini di yu sa kisi sa moro bigi leki den sani di yu musu libi fu du disi. Te yu e kisi a gwenti fu leisi Bijbel ibri dei, dan yu sa kon lobi Gado Wortu moro. Fosi yu prakseri, yu sa kisi a firi fu taki san a psalm skrifiman ben taki: „¡O, fa mi lobi yu wet! Heri dei mi wani poti prakseri na en tapu” (Psalm 119:97). So wan fasi fu denki sa gi yu furu wini now èn na ini a tamara, soleki fa a tra artikel sa sori.
¿Yu E Memre Disi Ete?
◻ Fa a skrifiman fu Psalm 119 ben sori taki a ben lobi Gado Wortu trutru?
◻ San wi kan leri fu den eksempre fu Yesus èn fu di fu Paulus?
◻ Fa wisrefi kan kisi moro lobi gi Gado Wortu?
[Prenki na tapu bladzijde 10]
Den getrow kownu ben musu leisi Gado Wortu doronomo. ¿Yu e du dati?
[Prenki na tapu bladzijde 12]
Srefi di Yesus ben de wan boi ete, a ben lobi Gado Wortu