Waka nanga Gado — Nanga têgo ten na wi fesi
„Wi . . . sa waka na ini a nen foe Jehovah, wi Gado, te ten di no skotoe, ija foe têgo.” — MIKA 4:5.
1. Foe san ede wi kan kari Jehovah a „Kownoe foe ten di no abi kaba”?
JEHOVAH GADO no ben abi wan bigin. Dati meki a fiti taki den e kari en „a Graniwan”, foe di a de sensi ten di pasa èn di no abi kaba (Danièl 7:9, 13). Jehovah sa njan boen toe foe wan têgo tamara. En wawan na a „Kownoe foe têgo ten” (Openbaring 10:6; 15:3). Èn na ini den ai foe en, wan doesoen jari de „leki esrede te a pasa kaba, èn leki wan pisi ten foe hori wakti na neti”. — Psalm 90:4.
2. (a) San Gado abi na prakseri gi libisma di e arki en? (b) Na tapoe san wi moesoe poti wi howpoe nanga den plan di wi e meki?
2 Foe di a Giman foe libi de foe têgo, dati meki a ben kan pristeri a fosi libisma paar, Adam nanga Eva, a froewakti foe libi di no e kaba na ini Paradijs. Ma foe di Adam no ben gi jesi, dati meki a ben lasi a reti foe libi foe têgo èn a ben gi den bakapikin foe en, sondoe nanga dede (Romesma 5:12). Tokoe, na oproeroe di Adam ben meki no ben gens san Gado ben abi na prakseri biginbigin. A de a wani foe Jehovah taki libisma di e gi jesi na en e libi foe têgo, èn sondro misi a sa doe san a abi na prakseri (Jesaja 55:11). Dati meki a fiti taki wi e poti wi howpoe èn den sani di wi wani doe, foe e dini Jehovah èn nanga têgo ten na wi fesi. Ala di wi wani hori „a dei foe Jehovah” boen na prakseri, tokoe a de kefalek prenspari foe memre taki a marki foe wi na foe waka nanga Gado foe têgo. — 2 Petrus 3:12.
Jehovah e handri na a fasti ten foe en
3. Fa wi doe sabi taki Jehovah abi wan „fasti ten” foe doe san a abi na prakseri?
3 Leki sma di e waka nanga Gado, wi abi troetroe belangstelling foe e doe a wani foe en. Wi sabi taki Jehovah na a Bigiwan di sabi o ten sani moesoe pasa, èn wi abi a froetrow taki noiti a no e misi foe meki san a abi na prakseri kon troe na a fasti ten foe en. Foe eksempre, „di a ten di ben poti ben doro en marki krinkrin, dan Gado ben seni en Manpikin kon” (Galasiasma 4:4). Na apostel Johanes ben kisi foe jere taki wan „fasti ten” ben de gi a kontroe foe den profeiti sani di a ben si ini marki (Openbaring 1:1-3). Wan ten de „a fasti ten foe kroetoe den dedewan” (Openbaring 11:18). Moro leki 1900 jari pasa kaba, na apostel Paulus ben skrifi nanga jepi foe santa jeje taki Gado „poti wan dei pe a abi na prakseri foe kroetoe a grontapoe pe sma e libi na tapoe na ini regtfardikifasi”. — Tori foe den Apostel 17:31.
4. Fa wi doe sabi taki Jehovah e angri foe tjari wan kaba kon na a ogri seti foe sani disi?
4 Jehovah sa tjari wan kaba kon na a ogri seti foe sani disi, bika sma e kosi a nen foe en na grontapoe foe nojaso. Na ogriwan gi bromki (Psalm 92:7). Nanga den sani di den e taki èn e doe, den e afrontoe Gado, èn a e hati en foe si fa den e skempi nanga den foetoeboi foe en èn e froefolgoe den (Sakaria 2:8). Dati meki a no de foe froewondroe taki Jehovah teki a bosroiti foe tjari wan kaba kon heri esi na Satan en heri organisâsi! Gado seti soifri o ten disi sa pasa, èn bijbel profeititori di e kon troe e tjari kon na krin taki wi e libi now na ini „a ten foe a kaba” (Danièl 12:4). Heri esi Gado sa handri meki ala den wan di lobi en kisi blesi.
5. Fa Lot nanga Habakuk ben prakseri foe den situwâsi di ben de lontoe den?
5 Den foetoeboi foe Jehovah na ini a ten di pasa ben angri srefisrefi foe si taki godelowsoefasi e kon na wan kaba. A regtfardiki Lot „ben de ini bigi banawtoe foe di den sma di ben pasa a wet, ben tjari densrefi na wan loesoe fasi” (2 Petrus 2:7). A profeiti Habakuk ben sari foe den sani di ben pasa lontoe en, dati meki a ben begi: „O langa, o Jehovah, mi moesoe bari foe kisi jepi, sondro taki joe e jere? O langa mi sa kari joe foe jepi mi nanga na ogri di e doe nanga tranga, sondro taki joe e froeloesoe? Foe san ede joe e meki mi e si san e hati sma, èn joe e tan loekoe san de trobi nomo? Èn foe san ede ogri-ati foefoeroe nanga ogri di e doe nanga tranga de na mi fesi, èn foe san ede trobi e meki, èn foe san ede strei e opo en ede kon?” — Habakuk 1:2, 3.
6. Fa Jehovah ben piki a begi foe Habakuk, èn san wi kan leri foe disi?
6 Wan pisi foe a piki di Jehovah ben gi Habakuk ben de nanga den wortoe disi: „A fisjoen de gi a fasti ten ete, èn a e tan lon go doro te na a kaba, èn a no sa froeteri wan lei. Awansi a ben sa meki oenoe wakti en srefi, tan froewakti en; bika a sa kon troe sondro foe misi. A no sa kon lati.” (Habakuk 2:3) Na so Gado ben meki sma kon sabi taki a ben sa handri na „a fasti ten”. Ala di a ben sa kan gersi taki a e meki wi wakti en, tokoe Jehovah sa meki san a abi na prakseri kon troe — sondro misi! — 2 Petrus 3:9.
Dini na wan fajafaja fasi sondro foe kon weri
7. Ala di Jesus no ben sabi soifri o ten a dei foe Jehovah ben sa kon, tokoe fa a ben doe den wroko foe en?
7 A de so, taki wi moesoe sabi soifri o ten Jehovah o doe sani fosi wi kan waka nanga Gado na wan fajafaja fasi? Nôno, dati no de so. Poti prakseri na tapoe wan toe eksempre. Jesus ben abi troetroe belangstelling gi a ten di Gado en wani ben o pasa na grontapoe neleki fa a e pasa na ini hemel. Foe troe, Krestes ben leri den bakaman foe en foe begi: „Wi Tata na hemel, meki joe nen kon santa. Meki joe kownoekondre kon. Meki joe wani pasa, soleki na hemel, so toe na grontapoe” (Mateus 6:9, 10). Ala di Jesus ben sabi taki Gado ben o jere a begi disi, tokoe Jesus no ben sabi soifri o ten den sani ben o feni presi. Na ini en bigi profeititori di abi foe doe nanga a kaba foe a seti foe sani disi, Jesus ben taki: „A dei nanga a joeroe dati no wan sma no sabi, no den engel foe hemel, no a Manpikin, ma soso a Tata” (Mateus 24:36). Foe di Jesus Krestes na a prenspari sma foe doe den sani di Gado abi na prakseri, dati meki Jesus sa abi foe doe wantewante nanga a dedestrafoe di moesoe kon tapoe den feanti foe en hemel Tata. Ma di Jesus ben de na grontapoe, dan srefi en no ben sabi o ten Gado ben sa handri. Dati ben meki taki a no ben de so faja na ini Jehovah en diniwroko? Kwetikweti! Di den ben si a fajafaja fasi fa Jesus ben krin a tempel, dan „den disipel foe en ben memre taki a skrifi na ini boekoe: ’A faja gi joe oso sa njan mi’ ” (Johanes 2:17; Psalm 69:9). Dorodoro Jesus ben tan doe a wroko di Gado ben seni en foe doe, èn a ben doe dati na wan fajafaja fasi sondro foe kon weri. A ben dini Gado toe nanga têgo ten na en fesi.
8, 9. Di den disipel ben aksi foe a poti di a Kownoekondre ben o poti baka, san den ben kisi foe jere, èn fa den ben piki baka?
8 Na so a ben de toe nanga den disipel foe Krestes. Jesus ben kon makandra nanga den, sjatoe bifo a ben go na hemel. A tori e taki: „Now di den ben kon makandra, den ben go aksi en: ’Masra, na ini a ten disi joe e opo a kownoekondre gi Israèl baka?’ ” Neleki a Meester foe den, densrefi ben angri srefisrefi foe a Kownoekondre kon. Ma Jesus ben piki den: „A no de wan sani foe oenoe foe kon sabi den ten noso pisi ten di a Tata poti na ondro en eigi makti, ma oenoe sa kisi krakti te a santa jeje e kon na oen tapoe, èn oenoe sa de kotoigi foe mi na Jerusalem èn na heri Judea nanga Samaria èn te na a moro farawe pisi foe grontapoe.” — Tori foe den Apostel 1:6-8.
9 No wan sani e sori taki den disipel ben lasi ati di Jesus ben gi den a piki disi. Na presi foe dati, na wan fajafaja fasi den ben doe a preikiwroko. Na ini wan toe wiki, den ben foeroe Jerusalem nanga a leri foe den (Tori foe den Apostel 5:28). Èn na ini 30 jari, den ben preiki na so foeroe presi kaba taki Paulus ben kan taki dati a boen njoensoe ben preiki „na ala kriatoeroe di de na ondro hemel” (Kolosesma 1:23). Ala di a Kownoekondre no ’ben opo baka gi Israèl’ soleki fa den disipel ben froewakti na wan fowtoe fasi èn a no ben seti na ini hemel toe na ini a pisi ten di den disipel ben de na libi, tokoe den ben e tan dini Jehovah fajafaja nanga têgo ten na den fesi.
Ondrosoekoe den sani di e boeweigi wi
10. A sabi di wi no sabi o ten Gado sa pori a seti foe Satan, e gi wi na okasi foe boeweisi san?
10 Disiten foetoeboi foe Jehovah so srefi e angri foe si a kaba foe na ogri seti foe sani disi. Ma a moro prenspari sani di wi e broko wi ede nanga en, a no a froeloesoe foe wi foe kon na ini Gado en pramisi njoen grontapoe. Wi wani si taki a nen foe Jehovah kon santa èn taki a soevereiniteit foe en kon regtfardiki. Foe den sani disi ede, wi kan prisiri taki Gado no taigi wi a ’dei nanga a joeroe’ di poti foe pori Satan en seti. Na so wi e kisi na okasi foe sori taki wi abi a fasti bosroiti foe waka nanga Gado foe têgo, foe di wi lobi en èn no foe di wi abi marki di wi wani doro na ini wan sjatoe pisi ten èn pe wi e denki wisrefi nomo.
11, 12. Na sortoe fasi Satan ben tjalensi a soifri retifasi foe Job, èn fa a tjalensi dati abi foe doe nanga wi?
11 Efoe wi e hori wi soifri reti fasi na Gado, dan dati e jepi wi toe foe sori taki Didibri ben fowtoe di a ben kroetoe taki na opregti man Job — èn so boen libisma leki Job, — e dini Gado foe di den e soekoe den eigi wini nomo. Baka di Jehovah ben kari en foetoeboi Job wan man sondro fowtoe, di de opregti, di e frede Gado, dan Satan ben poti tweifri na wan ogri fasi: „Na foe soso Job frede Gado? A no joesrefi poti wan skotoe lontoe en èn lontoe en oso èn lontoe ala san a abi? Joe blesi a wroko foe en anoe, èn den meti foe en srefi kon foeroe na grontapoe. Ma foe kenki sani, grantangi, langa joe anoe, èn fasi ala san a abi èn loekoe efoe a no sa floekoe joe leti na ini joe fesi” (Job 1:8-11). Foe di Job ben hori en soifri retifasi na ondro tesi, meki a ben boeweisi taki na ogri-ati sani disi di Satan ben taki foe hati sma, ben de wan sani di no ben de troe.
12 Efoe na a srefi fasi wi e hori wisrefi na wan soifri retifasi foe waka nanga libi, dan wi kan sori Satan taki a no troe taki wi e dini Gado soso foe di wi sabi taki seiker wi sa kisi wan pai. A sabi di wi no sabi soifri o ten Gado sa poeroe en atibron tapoe den ogriwan foe gi den dedestrafoe, e gi wi na okasi foe boeweisi taki troetroe wi lobi Jehovah èn taki wi wani waka den pasi foe en foe têgo. Dati e sori taki wi de loyaal na Gado èn taki wi abi froetrow ini a fasi fa en e handri den afersi. Moro fara, a sabi di wi no sabi a dei nanga a joeroe, e jepi wi foe tan wikiwiki èn tan na ai na jejefasi, bika wi e froestan taki a kaba kan kon na iniwan ten, leki wan foefoeroeman na neti (Mateus 24:42-44). Te wi e waka nanga Jehovah ala dei, dan wi e meki en ati prisiri èn wi e gi en na okasi foe piki Didibri, a wan di e tanteri en. — Odo 27:11.
Meki plan gi a têgo ten!
13. San bijbel e sori ini a tori foe meki plan gi a ten di e kon?
13 Den wan di e waka nanga Gado, sabi taki a de wan koni sani foe meki boen plan gi a tamara. Foe di foeroe sma sabi foe den problema di e kon te den e kon owroe èn taki den no man doe foeroe moro na a ten dati, dati meki foeroe foe den e proeberi foe meki boen gebroiki foe den jari te den jongoe èn abi krakti so taki den no abi foe broko den ede nanga moni te den kon owroe. Dan san wi kan taki foe a tamara foe wi na jejefasi di de moro prenspari srefi? Odo 21:5 e taki: „Den plan foe a sma di de fajafaja seiker sa abi winimarki, ma ibri sma di e handri toemoesi esi-esi, seiker sa pina.” Meki plan na fesi, nanga têgo ten na wi fesi, troetroe e tjari winimarki kon. Foe di wi no sabi soifri o ten a kaba foe a seti foe sani disi sa kon, meki wi moesoe poti prakseri na tapoe den sani di wi sa abi fanowdoe na ini a ten di e kon. Ma meki wi abi wan balansi fasi èn meki wi poti den afersi foe Gado na a fosi presi ini wi libi. Sma di no abi nofo bribi, kan kon na a bosroiti taki te joe e seti den afersi foe joe lontoe a doe di joe e doe Gado wani, dan dati e sori taki joe no e denki moro fara. Ma na so a de?
14, 15. (a) Sortoe eksempre Jesus ben froeteri di abi foe doe nanga a meki di sma e meki plan gi a ten di e kon? (b) Foe san ede a goedoe man na ini na eksempre foe Jesus no ben denki moro fara?
14 Jesus ben gi wan eksempre di e jepi wi froestan sani moro boen na ini a tori disi. A ben taki: „A gron foe wan goedoeman ben gi foeroe njanjan. Foe dati ede a ben bigin denki na ensrefi: ’San mi sa doe, now di mi no abi no wan presi foe tjari a njanjan di mi koti kon makandra?’ Foe dati ede a ben taki: ’Disi mi sa doe: Mi sa broko den maksin foe mi èn bow moro bigi wan, èn drape mi sa poti ala mi siri-njanjan nanga ala mi boen sani na ini; èn mi sa taigi mi sili: „Sili, joe lai foeroe boen sani gi foeroe jari; no broko joe ede nanga noti, njan, dringi èn meki prisiri.” ’ Ma Gado ben taigi en: ’Joe di no e denki, a neti disi ete den e aksi joe sili foe joe. Dan soema sa kisi den sani di joe ben tjari kon na makandra?’ Na so a e go nanga wan sma di e kibri goedoe gi ensrefi, ma di no goedoe ini Gado ai.” — Lukas 12:16-21.
15 Na sori Jesus ben sori taki a goedoe man no ben moesoe wroko foe meki moeiti foe abi seikerfasi na materia sei na ini a ten di ben o kon? Nôno, bika den Boekoe foe bijbel e gi deki-ati foe wroko tranga (2 Tesalonikasma 3:10). A fowtoe di a goedoe man ben meki na taki a no ben doe san ben de fanowdoe foe „goedoe ini Gado ai”. Srefi efoe a ben sa man njan boen foe a goedoe di a ben goedoe na materia sei foeroe jari langa, tokoe te foe kaba a ben sa dede. A no ben denki moro fara, a no ben denki foe a têgo ten.
16. Foe san ede wi kan poti ala wi froetrow na tapoe Jehovah foe kisi wan seiker tamara?
16 Foe waka nanga Jehovah nanga têgo ten na wi fesi, na wan praktis sani èn e sori taki wi e denki moro fara. A de a moro boen fasi foe meki plan gi a ten di e kon. Ala di a de wan koni sani foe meki praktis plan di abi foe doe nanga skoro, wroko, nanga osofamiri frantiwortoe, tokoe ala ten wi moesoe memre taki Jehovah noiti no e gowe libi den loyaal foetoeboi foe en. Kownoe David ben singi: „Wan ten ben de taki mi ben de wan jonkoeman, mi kon owroe toe, èn tokoe mi no si no wan regtfardikisma libi en wawan krinkrin, noso den pikin foe en e soekoe brede” (Psalm 37:25). Na a srefi fasi, Jesus ben gi a djaranti taki Gado sa sorgoe ala den wan di e soekoe a Kownoekondre fosi èn e waka den regtfardiki pasi foe Jehovah. — Mateus 6:33.
17. Fa wi doe sabi taki a kaba de krosibei?
17 Ala di wi e dini Gado nanga têgo ten na wi fesi, tokoe wi e tan hori a dei foe Jehovah boen na prakseri. A kontroe foe bijbel profeititori e gi libilibi boeweisi taki a dei dati de krosibei. Den sani di wi ben si e pasa foeroe na ini a jarihondro disi, na orlokoe, pestsiki, gronseki, mankeri foe njanjan, èn so srefi a froefolgoe di trawan ben froefolgoe troe kresten èn a preiki di a boen njoensoe foe Gado Kownoekondre e preiki na heri grontapoe. Ala den sani disi na sani foe a ten foe a kaba foe na ogri seti foe sani disi (Mateus 24:7-14; Lukas 21:11). Grontapoe lai nanga sma di ’lobi densrefi nomo, di lobi moni, di asranti, di abi heimemre, di de blasfemiasma, di e trangajesi na papa nanga mama, di de sondro tangi, di no de loyaal, di no abi natuurlijk firi foe lobi, di no de klariklari foe meki kroederi, di de ogri-ati leiman, di de sondro foe man dwengi densrefi, di abi wan krasi fasi foe doe sani, di de sondro lobi gi boen sani, di de toriman, di no e ke foe noti, di abi bigimemre, di lobi prisiri moro leki den lobi Gado’ (2 Timoteus 3:1-5). Na ini den moeilek lasti dei disi, a libi tranga gi wi leki foetoeboi foe Jehovah. Fa wi e angri srefisrefi foe a dei te Jehovah Kownoekondre sa figi poeroe ala takroedoe! Na ini a ten di tan abra, meki wi abi a fasti bosroiti foe waka nanga Gado nanga têgo ten na wi fesi.
Dini nanga libi sondro kaba na wi fesi
18, 19. San e sori taki getrow sma foe owroeten ben dini Gado nanga a têgo ten na den fesi?
18 Te wi e waka nanga Jehovah, meki wi hori a bribi na prakseri foe Abel, Heinòk, Noa, Abraham, nanga Sara. Baka di Paulus ben kari den sma disi, a ben skrifi: „Ala den sma disi dede na ini bribi, ala di den no ben kisi a kontroe foe den pramisi, ma den ben si den foe farawe èn ben bari den wan switi kon èn den ben meki bekènti na poebliki taki den ben de freimdesma nanga sma di ben tan gi wan pisi ten nomo na ini a kondre” (Hebrewsma 11:13). Den getrow sma dati ben „e proeberi foe kisi wan moro boen presi, dati wani taki, wan di de foe hemel” (Hebrewsma 11:16). Na ini bribi, den ben loekoe go na fesi wan moro boen presi ondro a tirimakti foe Gado Mesian Kownoekondre. Wi kan de seiker taki Gado sa pai den nanga libi foe têgo na ini a moro boen presi dati — a paradijs grontapoe na ondro Kownoekondre tiri. — Hebrewsma 11:39, 40.
19 A profeiti Mika ben sori a fasti bosroiti di a pipel foe Jehovah abi foe anbegi Gado foe têgo. A ben skrifi: „Ala pipel, foe den sei, sa waka ibriwan foe den na ini a nen foe en gado; ma wi, foe wi sei, sa waka na ini a nen foe Jehovah, wi Gado, te ten di no skotoe, ija foe têgo” (Mika 4:5). Te leki a dede, Mika ben dini Jehovah na wan loyaal fasi. Te a profeiti dati sa kisi wan opobaka na ini a njoen grontapoe, dan sondro tweifri a sa go doro foe waka nanga Gado foe ala têgo ten. Fa dati na wan moi eksempre gi wi di e libi dipi na ini a ten foe a kaba!
20. San moesoe de a bosroiti di wi e teki?
20 Jehovah e warderi a lobi di wi e sori gi en nen (Hebrewsma 6:10). A sabi taki a tranga gi wi foe tan hori wi soifri retifasi na En na ini a grontapoe disi pe Didibri na basi. Ma ala di „grontapoe e pasa gowe,” tokoe „a sma di e doe a wani foe Gado, e tan foe têgo” (1 Johanes 2:17; 5:19). So boen, nanga jepi foe Jehovah, meki wi teki a bosroiti foe horidoro na ondro den tesi di wi e kisi dei foe dei. Meki a denki nanga a libi foe wi drai lontoe den kefalek moi blesi di wi lobi-ati hemel Tata pramisi wi. Den blesi disi kan de foe wi, efoe wi e tan waka nanga Gado nanga têgo ten na wi fesi. — Judas. 20, 21.
San joe ben sa piki?
◻ San Gado abi na prakseri gi libisma di e gi jesi na en?
◻ Foe san ede Jehovah no tjari wan kaba kon ete na a grontapoe di de sondro gado?
◻ Foe san ede a sabi di wi no sabi soifri o ten Gado sa handri, no moesoe kowroe a faja fasi foe wi?
◻ San na wan toe winimarki foe waka nanga Gado nanga têgo ten na wi fesi?
[Prenki na tapoe bladzijde 17]
Foe waka nanga Gado e aksi foe wi taki wi e dini en fajafaja neleki fa Krestes en fosi disipel ben doe