Tanapoe na a dromofo foe wan moro bigi wroko
„NO WAN sma ben feti foe wini makandra. Ibriwan sma ben wani, taki sani ben moesoe waka boen nanga a trawan”, na so Richard nanga Lusia e taki foe den studenti di ben de nanga den na a di foe 105 klas foe a Waktitoren Bijbelskoro Gilead. „Wi alamala e difrenti foeroe, ma gi wi, ibri studenti na wan warti sma.” Wan skoromati, Lowell ben agri, èn a ben taki moro fara: „A difrenti di wi e difrenti foe makandra, ben meki taki wi kisi wan moro tranga banti.”
A klas di ben klari a skoro 12 september 1998, troetroe ben abi difrenti sortoe sma. Wan toe foe den studenti ben pionier na presi pe Kownoekondre preikiman de foeroe fanowdoe; trawan ben dini na wan getrow fasi moro krosibei na oso. Wan toe foe den, soleki Mats nanga Rose-Marie, ben moesoe wroko foeroe joeroe èn fajafaja foe meki na Ingrisitongo foe den kon moro boen fosi den ben kon na a skoro. Foeroe foe den studenti ben prakseri sensi den ben de pikin-nengre foe tron zendeling. Wan trowpaar ben gi den nen 12 tron foe kon na a skoro; den ben breiti troetroe di den ben kisi wan kari foe kon na a di foe 105 klas!
Den 20 wiki di boen foeroe leri ben gi, ben pasa toemoesi gaw. Fosi den studenti denki, den ben gi a lasti skorowroko di den ben skrifi èn ben hori a lasti taki foe den èn a dei ben doro di den ben o sori taki den studenti ben klari a skoro nanga boen bakapisi.
A fesiman foe a programa, Albert Schroeder, wan memre foe a Tiri Skin foe Jehovah Kotoigi, ben memre a klas taki den ben ’tanapoe na a dromofo foe wan moro bigi wroko ini a tori foe bijbel leri wroko’, èn den ben kon na baka den moro leki 7000 tra zendeling di ben kon fosi den na Gilead. A ben taki dati na ini a zomer den studenti ben njan boen foe wan spesroetoe okasi foe abi demakandra nanga sma di ben de zendeling wan langa ten kaba di den ben fisiti na edekantoro gi den internationaal kongres.
Baka dati brada Schroeder ben kari Max Larson foe a Bethel Wroko Komte. A ben taki foe a thema „Leri di e tjari joe go na têgo libi”. Brada Larson ben kari Odo 1:5, pe skrifi: „Wan koni sma sa arki èn sa teki moro leri na ini en, èn wan man di e froestan sani, na a sma di e kisi koni tiri”. Bekwaamfasi de fanowdoe foe de wan boen zendeling. Man di abi bekwaamfasi, e tanapoe na fesi foe kownoe (Odo 22:29). Baka di den kisi leri feifi moen langa, den studenti ben de srekasreka foe teki presi gi den moro bigi Kownoe, Jehovah Gado nanga Krestes Jesus.
Dan David Olson foe a Dienstafdeling ben taki foe a tori „Jepi foe meki Jehovah ati prisiri”. A ben aksi: „San onvolmaakti libisma kan doe foe meki Gado ati prisiri?” A piki? Den kan dini en na wan getrow fasi, na wan loyaal fasi, èn nanga prisiri. Jehovah wani taki en pipel moesoe prisiri nanga a diniwroko di den e doe gi en. Te wi e prisiri foe doe Gado wani, dan wi e prisiri na ati foe en (Odo 27:11). Brada Olson ben leisi wan brifi foe wan zendeling trowpaar di ben klari a di foe 104 klas foe Gilead nanga boen bakapisi. Den e prisiri nanga a njoen toewijzing foe den? „Wi abi so wan 140 preikiman”, den ben skrifi foe a gemeente foe den, „nanga wan gemiddelde foe so wan 250 te leki 300 sma di e fisiti den konmakandra. Velddienst na a moro boen pisi. Ibriwan foe wi abi fo studie, èn wan toe foe den e kon na den konmakandra kaba.”
Lyman Swingle foe a Tiri Skin, ben taki foe „Wan ten foe wakti wan momenti èn loekoe omeni blesi joe kisi”. A leri na Gilead ben tjari foeroe blesi kon. A ben jepi den studenti foe kisi moro sabi, foe kisi moro warderi gi Jehovah en organisâsi, èn foe kweki prenspari eigifasi soleki sakafasi. „Wan sma moesoe abi sakafasi foe kon djaso èn foe teki en ten arki leri”, na so brada Swingle ben taki, èn a ben taki moro fara: „Joe e gowe foe djaso ala di joe de srekasreka moro boen foe gi Jehovah glori.”
„Joe abi so foeroe prisiri — So boen foe san ede joe moesoe broko joe ede?” ben de a nen foe a taki di Daniel Sydlik ben hori, di de foe a Tiri Skin toe. Te problema e opo ede kon, dan soekoe jepi foe den Boekoe foe bijbel, dati na a tranga di a ben gi. Brada Sydlik ben gebroiki wan toe spesroetoe vers foe a di foe siksi kapitel foe Mateus, foe sori fa disi kan doe. Te wi e mankeri bribi, dan dati kan meki taki wi e broko wi ede nanga sani foe grontapoe, soleki njanjan nanga krosi. Ma Jehovah sabi san wi abi fanowdoe (Mateus 6:25, 30). Foe broko wi ede, soso sa meki den problema foe ibri dei kon moro bigi (Mateus 6:34). Na a tra sei, a de fanowdoe foe sidon prakseri na fesi san joe o doe. (Teki gersi Lukas 14:28.) „Jesus no e taki dati wi no moesoe prakseri nanga koni èn na wan serjoesoe fasi foe a tamara, ma a e taki dati a de wan don sani foe broko wi ede nanga a tamara”, na so brada Sydlik ben tjari kon na krin. „Foe doe wan sani na en, na wan foe den moro boen fasi foe kakafoetoe gi broko-ede. Te wi e bigin broko wi ede nanga sani, dan a ben sa boen gi wi foe bigin taki foe a waarheid.”
Den leriman e gi wan toe lasti rai
Baka dati, dri memre foe a Gilead skoro ben hori wan lezing. Karl Adams ben taki fosi foe a tori „San joe sa pai Jehovah baka?” A lezing foe en ben abi en gron na tapoe a di foe 116 Psalm, san Jesus ben singi kande na a neti fosi a dede (Mateus 26:30, foetoewortoe). San Jesus ben prakseri di a ben singi den wortoe: „San mi sa pai Jehovah baka foe ala a boen di a ben doe gi mi”? (Psalm 116:12) Kande a ben kan abi a volmaakti skin na prakseri di Jehovah ben sreka gi en (Hebrewsma 10:5). A tra dei, Jesus ben o òfer a skin dati leki wan srakti-ofrandi, san ben o sori o dipi a lobi foe en de. Den studenti foe a di foe 105 klas ben tesi a boenfasi foe Jehovah na ini den feifi moen di pasa. Now den ben o sori a lobi di den ben abi gi Gado, foe di den sa wroko tranga na ini den toewijzing di den kisi leki zendeling.
Mark Noumair, a di foe toe leriman foe Gilead di ben hori wan lezing, ben gi den studenti a rai foe „Go doro foe doe san boen”. Baka di den ben seri Josef leki srafoe go na Egipti, dan drape den no ben handri boen nanga en èn a ben moesoe horidoro na ondro dati 13 jari langa. Den ogri di trawan ben doe nanga en, ben meki taki a ben tapoe foe dini Gado? Nôno, a ben go doro foe doe san boen. Dan, na a reti ten foe Gado, a ben froeloesoe Josef foe den tesi foe en. Wantronso, a kenki foe wan sma di ben de na ini doengroe-oso fosi, kon tron wan sma di ben libi na ini wan paleisi (Genesis, kapitel 37-50). A leriman ben aksi den studenti foe en: „Efoe sani no e waka leki fa joe ben froewakti dati na ini joe toewijzing, joe sa tapoe dan? Joe sa lasi-ati? Noso joe sa horidoro, neleki fa Josef ben doe?”
Te foe kaba, Wallace Liverance, edeman foe administrâsi na a Gileadskoro, ben hori wan toemoesi moi èn krin takimakandra nanga memre foe a klas, nanga a thema „Meki a Kownoe nanga a Kownoekondre bekènti”. Wan toe studenti ben froeteri san den ben ondrofeni di den ben preiki oso foe oso, wenkri foe wenkri, èn na strati. Tra studenti ben froeteri fa a ben go di den ben gi kotoigi na sma di ben taki wan tra tongo. Wan toe tra studenti baka ben sori fa foe preiki gi sma foe difrenti sortoe relisi. Ala den studenti di ben klari a skoro, ben de fajafaja foe abi wan prati dorodoro na a diniwroko leki zendeling.
Zendeling di de kolokoe èn di de langa ten kaba ini a wroko
Robert Wallen ben hori a tra lezing di ben abi leki nen „Den prisiri bakapisi di e kon foe a zendingwroko”, èn a ben taki nanga fo brada foe den wan di e teki fesi na a edekantoro; no so langa pasa, den fo brada dati ben abi demakandra di ben bow den nanga zendeling di abi foeroe ondrofeni ini a zendingwroko. Den zendeling dati ben de klariklari foe taki dati a no ben de makriki gi den foe leri wan tra tongo, foe fiti densrefi na wan tra koeltoeroe, noso foe teki gwenti na wan tra klimaat. Dan so srefi den ben moesoe kakafoetoe gi na angri di den ben angri foe si den sma foe den na oso. Son tron, problema nanga a gosontoe ben de. Ma ala di den sani disi ben pasa, tokoe den zendeling ben tan abi wan positief fasi foe si sani, èn den ben kisi blesi foe di den ben horidoro. Wan toe foe den zendeling ben meki foeroe sma kisi sabi foe Jehovah. Tra zendeling ben jepi na difrenti fasi foe meki a Kownoekondre-wroko gro na ini den kondre foe den.
A lasti sma di ben hori wan lezing, ben de Carey Barber, wan memre foe a Tiri Skin. A ben loekoe wan toe heimarki foe a programa foe a „Gado pasi foe libi”-distriktkongres sjatoe baka. „Sortoe krakti a kongres programa ben abi tapoe a matifasi di joe abi nanga Jehovah?” a ben aksi den arkiman. A takiman ben sori fa den blesi di sma e kisi te den e waka Gado pasi, de heri tra fasi leki a takroe kaba di sma sa kisi te den e waka a pasi foe grontapoe. A ben taki foe a sondoe di Moses ben doe na Meriba, èn a ben warskow: „Srefi te wan sma dini na wan getrow fasi foeroe jari langa, dan ete Jehovah no e teki en leki wan soso sani te srefi wan pikin ogri e doe na den boen wet foe En” (Numeri 20:2-13). Meki a de so, taki ala den foetoeboi foe Gado na ala pe hori steifi a warti grani foe a diniwroko di den abi!
A ten ben doro gi den studenti foe kisi a diploma foe den. Baka dati, wan studenti di ben teki presi gi den tra studenti ben leisi wan brifi pe den ben sori warderi gi a leri di den ben kisi. Baka a lasti singi èn wan begi di ben kon foe na ati, a programa gi den studenti di ben klari a skoro nanga boen bakapisi, ben kaba. Ma gi a di foe 105 klas, disi ben de soso a bigin, bika den njoen zendeling ben e „tanapoe na a dromofo foe wan moro bigi wroko”.
[Faki na tapoe bladzijde 23]
Statistiek foe a klas
Nomroe foe kondre di den teki presi gi: 9
Nomroe foe kondre pe den kisi toewijzing foe go: 17
Nomroe foe den studenti: 48
Nomroe foe den trowpaar: 24
Gemiddelde jari di den abi: 33
Gemiddelde jari di den de na ini waarheid: 16
Gemiddelde jari di den de na ini a foeroeten diniwroko: 12
[Faki na tapoe bladzijde 24]
Den ben bosroiti foe go doe a foeroeten diniwroko
„Di mi ben moro jongoe, dan mi no ben abi na prakseri foe go pionier”, na so Ben e taki, wan studenti di ben klari a di foe 105 klas. „Mi ben prakseri taki soso den wan nanga spesroetoe bekwaam fasi di ben de ini wan kefalek boen situwâsi ben kan go pionier”, a e taki moro fara. „Ma mi ben leri foe lobi a velddienst. Dan wán dei a kon na mi prakseri taki foe de wan pionier wani taki nomo foe abi wan moro bigi prati na a diniwroko. Na a momenti dati mi ben kon froestan taki mi ben man pionier.”
„Na wi oso, wi ben abi foeroe lespeki gi foeroeten foetoeboi ala ten”, Lusia e froeteri. A e memre o breiti a heri gemeente foe en ben de ibritron te den zendeling ben kon fisiti a gemeente. „Di mi ben gro kon bigi,” a e taki, „a ben de krin taki foeroeten diniwroko ben sa de ini mi prakseri.”
A mama foe Theodis dede di Theodis ben abi 15 jari. „Na a ten dati, troetroe a gemeente ben de wan jepi gi mi,” a e taki, „so boen mi ben aksi misrefi: ’San mi kan doe foe sori taki mi e warderi san den ben doe gi mi?’ ” Disi ben meki taki a ben bigin nanga a foeroeten diniwroko èn now a e bigin nanga zendingwroko.
[Prenki na tapoe bladzijde 25]
A di foe 105 klas di klari a Waktitoren Bijbelskoro Gilead
Na ini a lijst na ondrosei, den nomroe foe den rèi de foe fesi go na baka, èn den nen skrifi foe kroektoe-anoesei go na reti-anoesei na ini ibri rèi:
(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.