Waktitoren LIBRARY TAPU INTERNET
Waktitoren
LIBRARY TAPU INTERNET
Sranantongo
  • BIJBEL
  • BUKU
  • KONMAKANDRA
  • w98 15/12 blz. 21-25
  • Te foefoeroeman di e tjari gon e kon foefoeroe nanga tranga

Felem no de na a pisi disi.

Sorry, wan sani no go bun di wi pruberi fu drai a felem.

  • Te foefoeroeman di e tjari gon e kon foefoeroe nanga tranga
  • A Waktitoren—A e taki fu Yehovah Kownukondre 1998
  • Edeprakseri
  • A srefi sortu tori
  • Kibri, èn a Wortoe foe Gado
  • Meki a tjans gi foefoeroeman di e foefoeroe nanga tranga kon moro mendri
  • Te foefoeroeman di e tjari gon e kon foefoeroe nanga tranga
  • Tan hori joesrefi
  • Wan foefoeroe di ben doe nanga tranga no go doro na ini West-Afrika
    A Waktitoren—A e taki fu Yehovah Kownukondre 1998
  • Wan grontapoe sondro foefoeroeman
    A Waktitoren—A e taki fu Yehovah Kownukondre 1993
  • Yesus e krin a tempel baka
    Yesus—En na a pasi, en na san tru, en na a libi
  • Aksi fu leisiman
    A Waktitoren—A e taki fu Yehovah Kownukondre (Studie-Waktitoren) 2017
Moro sani
A Waktitoren—A e taki fu Yehovah Kownukondre 1998
w98 15/12 blz. 21-25

Te foefoeroeman di e tjari gon e kon foefoeroe nanga tranga

NA INI Ikoyi, wan birti na ini West-Afrika pe heihei sma e libi dorosei a foto, den oso kon tron fortresi. Foeroe oso abi skotoe di hei 3 meter, nanga srapoe pisi isri na tapoe, noso broko batra, noso makamaka-draad. Waktiman de na tranga portoe di fasi nanga bowtoe, oedoe barki, keti, nanga isri sroto. Den fensre abi greni. Isri portoe de na mindri den sribikamra nanga a tra pisi foe na oso. Te neti, den sma e loesoe bigi dagoe — Doisri herderdagoe nanga Rottweilers. Bigi faja e poeroe doengroe èn computer waktisistema e froiti safri te ala sani boen.

No wan sma no e tweifri taki a de fanowdoe foe kibri den oso. Ede njoensoe foe koranti e kragi: „Foefoeroeman di e tjari gon èn di e foefoeroe nanga tranga e leigi a libimakandra”; „Sma no man tapoe a foefoeroe di pikin-nengre e foefoeroe nanga tranga”; èn „Broeja de, te stratigroepoe e teki [wan heri kontren] abra.” Disi na a situwâsi na ini foeroe kondre. Soleki fa bijbel ben taki na fesi, wi e libi troetroe na ini toemoesi moeilek ten. — 2 Timoteus 3:1.

Ogridoe, èn so srefi a foefoeroe di sma e foefoeroe nanga gon èn nanga tranga, e kon moro foeroe esi-esi na heri grontapoe. Moro nanga moro den tirimakti no man noso no wani foe kibri den eigi borgoe foe den. Na ini son kondre den skowtoe no abi nofo wrokoman èn nofo fetisani, èn den no abi nofo sani foe jepi sma di soekoe jepi. Foeroe sma di e tanapoe loekoe no wani foe abi foe doe nanga a tori.

Den sma di e pina foe den ogri disi èn di no man bow na tapoe a jepi foe skowtoe noso na tapoe a jepi foe poebliki, de den wawan foe kibri densrefi. Wan kresten owroeman na ini wan pôti kondre ben taki: „Efoe joe e bari kari jepi, dan den foefoeroeman di e foefoeroe nanga tranga sa malengri joe noso kiri joe. No bow na tapoe a jepi foe dorosei. Efoe joe kisi jepi, dan a boen, ma no froewakti en noso no soekoe jepi, bika te joe e soekoe jepi dan dati kan gi joe moro problema.”

Kibri, èn a Wortoe foe Gado

Ala di kresten no de wan pisi foe grontapoe, tokoe den de na ini grontapoe (Johanes 17:11, 16). So boen, leki iniwan tra sma den e sreka sani na wan reidelek fasi foe a veiligheid foe den. Tokoe, no leki foeroe sma di no e dini Jehovah, a pipel foe Gado e soekoe kibri na mindri den skotoe foe kresten gronprakseri.

Kontrari foe dati, sma na ini son Afrikan kondre e doe towfroewroko foe kibri densrefi teige a foefoeroe di sma e foefoeroe nanga tranga. Kande wan bonoeman e koti na anoe, borsoe, noso a baka opo foe wan sma di e soekoe jepi na en. Dan a e wrifi wan towfroe dresi go na ini a koti, èn a e taki wan toe mofo, èn dan a moesoe de so taki foefoeroeman di e foefoeroe nanga tranga no sa man doe a sma dati ogri. Tra sma e poti tapoe noso towfroe dresi na ini na oso foe den, èn den e bribi taki den sortoe „kibri” disi sa meki den foefoeroeman di e foefoeroe nanga tranga no doe den ogri.

Troe kresten no abi noti foe doe nanga no wan sortoe towfroewroko. Bijbel e kroetoe ala fasi foe afkodrei, èn dati boen toe, foe di den sortoe gwenti disi e meki sma kon abi kontakti nanga den ogri jeje di e horibaka gi ogridoe na grontapoe (Genesis 6:2, 4, 11). Bijbel e taki krinkrin: „Oenoe no moesoe doe towfroe.” — Lefitikus 19:26.

Son sma e soekoe veiligheid fajafaja gi densrefi foe di den e tjari gon. Ma kresten e teki den wortoe foe Jesus serjoesoe, di ben taki: „Den wan di e teki a feti-owroe, sa lasi den libi nanga a feti-owroe” (Mateus 26:52). A pipel foe Gado „naki den feti-owroe foe den kon tron proegoe” èn den no e bai gon foe kibri densrefi teige a foefoeroe di sma e foefoeroe nanga tranga noso teige feti. — Mika 4:3.

Fa a de nanga a sreka di sma e sreka sani foe abi waktiman di e tjari gon? Ala di disi na wan afersi di wan sma moesoe bosroiti gi ensrefi, tokoe prakseri taki so wan seti ben sa poti a gon na ini na anoe foe wan tra sma. San wan wrokobasi ben sa froewakti foe den waktiman te wan foefoeroeman di e foefoeroe nanga tranga ben sa kon? A ben sa froewakti taki den waktiman moesoe soetoe a foefoeroeman efoe a ben sa de fanowdoe foe kibri den sma èn den goedoe foe den sma di den waktiman ben e hori wakti gi?

A sei di kresten e teki foe no gebroiki towfroe nanga gon leki jepisani foe kisi kibri, kan gersi wan don sani na ini na ai foe den sma di no sabi Gado. Ma bijbel e gi wi a djaranti: „A sma di e froetrow tapoe Jehovah, sa kisi kibri” (Odo 29:25). Ala di Jehovah e kibri en pipel leki wan groepoe, a no e kon na ini ibri situwâsi foe kibri den foetoeboi foe en teige a foefoeroe di sma e foefoeroe nanga tranga. Job ben de getrow srefisrefi, ma tokoe Gado ben gi pasi meki groepoe foefoeroeman teki den ipi meti foe Job, ala di den foetoeboi foe en ben lasi den libi (Job 1:14, 15, 17). Gado ben gi primisi toe meki na apostel Paulus ondrofeni „kefar foe den foefoeroeman na tapoe strati” (2 Korentesma 11:26). Ma tokoe Gado e leri den foetoeboi foe en foe libi akroederi den gronprakseri di e gi moro mendri tjans taki foefoeroeman di e foefoeroe nanga tranga, sa kon. A e gi den so srefi sabi di e jepi den foe doe wan sani te sma e proeberi foe foefoeroe den nanga tranga na wan fasi di sa meki a tjans taki den kan kisi mankeri moro mendri.

Meki a tjans gi foefoeroeman di e foefoeroe nanga tranga kon moro mendri

A koniman ben taki langa ten pasa: „Den foeroe sani di a goedoewan abi, e meki taki a no e sribi” (Preikiman 5:12). Nanga tra wortoe, den sma di abi foeroe sani kan broko den ede sote nanga a lasi di den kan lasi den goedoe foe den, taki den e lasi sribi foe di den e prakseri dati.

So boen, wán fasi foe meki a broko-ede kon moro mendri, ma so srefi a tjans gi foefoeroeman di e foefoeroe nanga tranga, na foe no abi wan lo diri goedoe. Na apostel ben skrifi nanga jepi foe Gado en santa jeje: „Ala sani na ini grontapoe — a lostoe foe a skin nanga a lostoe foe den ai nanga a prodo di wan sma e prodo nanga den sani di a abi foe tan na libi — no e komoto na a Tata, ma e komoto na grontapoe” (1 Johanes 2:16). Den srefi lostoe di e boeweigi sma foe bai diri sani e boeweigi tra sma foe foefoeroe. Èn a „prodo di wan sma e prodo nanga den sani di a abi foe tan na libi” kan de wan kari gi den sma di lobi foe foefoeroe.

Boiti foe no doe sani meki sma si wi, wan tra kibri teige a foefoeroe di sma e foefoeroe nanga tranga na foe sori taki joe na wan troe kresten. Efoe joe e sori lobi gi tra sma, joe de eerlijk na ini den sani di joe e doe, èn joe de fajafaja na ini a kresten diniwroko, dan joe kan kisi wan nen na ini joe libimakandra leki wan sma di boen, wan sma di e froedini lespeki (Galasiasma 5:19-23). So wan nen di wan kresten abi kan gi moro kibri leki wan fetisani.

Te foefoeroeman di e tjari gon e kon foefoeroe nanga tranga

Ma san joe moesoe doe te foefoeroeman di e foefoeroe nanga tranga kon na ini joe oso èn miti nanga joe? Prakseri taki joe libi de moro prenspari leki den goedoe foe joe. Krestes Jesus ben taki: „No feti nanga goddelowsoe sma; ma efoe wan sma e klapoe joe na joe reti seifesi, dan drai a tra sei gi en toe. Èn efoe wan sma wani . . . abi joe inisei krosi, dan meki a teki joe dorosei krosi toe.” — Mateus 5:39, 40.

Disi na koni rai. Ala di kresten no de froeplekti foe gi ogriman bodoi foe den goedoe foe den, tokoe foefoeroeman di e foefoeroe nanga tranga kan doe moro ogri te den e si taki joe e kakafoetoe, no e wani wroko makandra, noso e kori den. Foeroe foe den, foe di den „lasi ala sjen firi”, e faja esi-esi foe doe ogri èn e tjari densrefi na wan ogri-ati fasi. — Efeisesma 4:19.

Samuèl e libi na ini wan oso pe foeroe tanpresi de. Foefoeroeman di e foefoeroe nanga tranga ben tapoe a pasi foe go na a oso èn ben go foe a wan tanpresi na a trawan foe foefoeroe sani. Samuèl ben jere gon e soetoe, doro e naki, èn sma e bari, e krei, èn e kragi. Den no ben man lowe gowe na no wan presi. Samuèl ben taigi en wefi nanga den dri manpikin foe kindi na gron, opo den anoe na loktoe, tapoe den ai, èn wakti. Di den foefoeroeman di e foefoeroe nanga tranga ben broko kon na inisei, dan Samuèl ben taki nanga den, ala di a ben loekoe go na gron, foe di a ben sabi taki efoe a ben si den fesi foe den, dan den ben kan prakseri taki baka ten a ben o man taki soema den ben de. „Kon na inisei”, a ben taki. „Teki san oen wani. Joe mag teki ala sani. Wi na Jehovah Kotoigi, èn wi no sa kakafoetoe gi oenoe.” Den foefoeroeman di e foefoeroe nanga tranga ben froewondroe foe disi. Na ini wan pisi ten foe wan joeroe baka dati, ala nanga ala, 12 man di ben tjari gon ben kon na inisei na ini groepoe. Ala di den ben foefoeroe moimoi sani, moni, nanga elektris aparaat, den no ben fon na osofamiri noso no ben kapoe den nanga owroe soleki fa den ben doe nanga tra sma ini na oso. Na osofamiri foe Samuèl ben taigi Jehovah tangi taki den ben tan na libi.

Disi e sori taki te a abi foe doe nanga moni nanga materia sani, den sma di trawan e foefoeroe nanga tranga èn di no e kakafoetoe gi den kan meki a tjans foe kisi mankeri kon moro mendri.a

Son tron a gi di wan kresten e gi kotoigi kan de wan kibri gi en teige mankeri. Di foefoeroeman di e foefoeroe nanga tranga ben go na a oso foe Ade, dan Ade ben taigi den: „Mi sabi taki sani moeilek gi oenoe, èn na foe dati ede oenoe e doe a sortoe wroko disi. Leki Jehovah Kotoigi wi e bribi taki wan dei ala sma sa abi nofo foe njan gi ensrefi nanga en osofamiri. Ala sma sa libi na ini vrede nanga kolokoe na ondro Gado Kownoekondre.” Dati ben kowroe a faja-ati foe den foefoeroeman di e foefoeroe nanga tranga. Wán foe den ben taki: „Pardon taki wi kon na joe oso, ma joe moesoe froestan taki angri e kiri wi.” Ala di den ben foefoeroe ala den goedoe foe Ade, tokoe den no fasi en noso en osofamiri.

Tan hori joesrefi

A no makriki foe hori joesrefi na ini wan kefarlek situwâsi, spesroetoe te wan prenspari marki foe den foefoeroeman di e foefoeroe nanga tranga na foe frede den sma di den e foefoeroe foe meki den saka densrefi na den ondro. Begi sa jepi wi. Jehovah kan jere a bari di wi e bari gi jepi, ala di a safri èn sjatoe. Bijbel e gi wi a djaranti: „Den ai foe Jehovah de na tapoe den regtfardiki sma, èn den jesi foe en de na a babari foe den foe kisi jepi” (Psalm 34:15). Jehovah e jere wi èn a kan gi wi a koni foe kan hori wisrefi na ini ibri situwâsi. — Jakobus 1:5.

Boiti begi, wan tra jepi foe hori joesrefi na foe bosroiti na fesi san joe sa doe èn san joe no sa doe efoe den sa foefoeroe joe nanga tranga. A no de foe taki, dati wi no man sabi na fesi na ini sortoe situwâsi joe sa de. Tokoe a boen foe abi gronprakseri na ede, neleki fa a de wan koni sani foe hori den sani na ede di kan gi joe kibri te joe de na ini wan oso di e teki faja. Te joe e prakseri sani na fesi, dan dati e jepi joe foe hori joesrefi, foe no broeja, èn foe no kisi mankeri.

Gado taki krinkrin fa a e prakseri foe a foefoeroe di sma e foefoeroe nanga tranga: „Mi, Jehovah, lobi retidoe; mi no wani si na ai a foefoeroe di sma e foefoeroe trawan nanga tranga makandra nanga onregtfardikifasi” (Jesaja 61:8). Jehovah ben meki en profeiti Esekièl kari a foefoeroe di sma e foefoeroe nanga tranga wan serjoesoe sondoe (Esekièl 18:18). Ma a srefi bijbel boekoe e sori toe taki Gado sa gi pardon nanga sari-ati na a sma di abi berow èn di e gi den sani baka di a ben foefoeroe nanga tranga. — Esekièl 33:14-16.

Ala di kresten e libi na ini wan grontapoe di lai nanga ogridoe, tokoe den e prisiri foe a howpoe foe libi na ondro Gado Kownoekondre, te a foefoeroe di sma e foefoeroe nanga tranga no sa de moro. Bijbel e pramisi foe a ten dati: „[Gado pipel] sa sidon troetroe, ibriwan na ondro en droifibon èn na ondro en figabon, èn no wan sma sa de di e meki den beifi; bika na a mofo foe Jehovah foe den legre srefi di taki disi.” — Mika 4:4.

[Foetoewortoe]

a A no de foe taki dati skotoe de te o fara den kan wroko makandra. Den foetoeboi foe Jehovah no e wroko makandra nanga den na no wan fasi di e pasa Gado wet. Foe eksempre, wan kresten no sa wani meki trawan abi seks nanga en nanga tranga.

    Sranantongo buku (1978-2025)
    Log Out
    Log In
    • Sranantongo
    • Seni en gi wan sma
    • Settings
    • Copyright © 2025 Watch Tower Bible and Tract Society of Pennsylvania
    • Gebruiksvoorwaarden
    • Privacybeleid
    • Privacyinstellingen
    • JW.ORG
    • Log In
    Seni en gi wan sma