Den spesroetoe problema foe stief-osofamiri
A KAN FOE ABI KOLOKOE STIEF-OSOFAMIRI! FA?
A stief-osofamiri tron wan normaal osofamiri na ini foeroe presi na grontapoe. Tokoe, den stief-osofamiri abi aparti problema. A moro moeilek wan na seiker foe kweki den pikin. Ma soleki fa den toe artikel di e kon sa proeberi foe sori, dan a kan foe kweki pikin na ini wan stief-osofamiri nanga boen bakapisi.
A DE WAN GWENTI TAKI SMA E TAKI TAKROE FOE STIEFPAPA NANGA STIEFMAMA. DI WI BEN DE PIKIN-nengre, dan foeroe foe wi ben jere wan toe fasi foe na anansitori foe Assepoester di ben pina foeroe na ondro en ogri-ati stiefmama. Den pikin-nengre na ini Europa e leri so srefi na anansitori foe Sneeuwwitje èn de Zeven Dwergen. A stiefmama foe Sneeuwwitje ben de wan takroe heks!
Den sortoe anansitori disi e taki soifri fa stief-osofamiri tan? A de so, taki ala stiefpapa nanga stiefmama na ogri-ati sma? Nôno. Moro foeroe foe den wani nomo taki sani waka boen nanga den pikin di den ben kisi di den ben trow. Ma den abi foe miti wan toe moeilek problema di de wan pisi foe a libi na ini wan stief-osofamiri.
Den problema foe kweki pikin
Te wan fosi trowlibi broko, dan nofo tron a de foe di den trowpatna no ben lepi. Na ini a di foe toe trow, a handri di den ben moesoe handri nanga den pikin kan poti wan hebi druk tapoe a banti na ini a trowlibi. Wan toe verslag e sori taki moro leki 4 foe den 10 osofamiri di abi wan stiefpapa noso wan stiefmama e brokotrow na ini den fosi feifi jari.
Den sma di trow no so langa ete no e froestan den broeja firi kande, den problema foe loyaalfasi, èn den djaroesoe firi nanga atibron di e wiki na ini den stiefpikin te a stiefpapa noso a stiefmama kon na ini den famiri. Kande den stiefpikin e prakseri taki a troetroe papa noso a troetroe mama foe den lobi a stiefmama noso a stiefpapa moro den. Boiti dati, wan troetroe papa noso wan troetroe mama di en trow patna gowe libi en kan feni taki a moeilek foe froestan taki den pikin e tan abi wan tranga banti nanga a fosi trow patna foe en. Wan boi ben proeberi foe froeklari a boen matifasi di a abi nanga en troetroe papa di a ben taki: „Mama, mi sabi taki Papa no ben libi boen nanga joe, ma a libi boen nanga mi!” Den sortoe wortoe disi, ala di den na eerlijk wortoe, kan meki wan mama firi bita-ati gi a papa foe a pikin.
Wan stiefpapa ben erken: „Mi no ben sreka troetroe foe handri nanga ala den problema di abi foe doe nanga a kweki di mi ben moesoe kweki den stiefpikin foe mi. Mi ben kon abi a denki taki foe di mi ben trow nanga a mama foe den, meki mi ben de den papa. Na so a ben de! Mi no ben froestan a tranga banti di den pikin ben abi nanga a troetroe papa foe den, èn mi ben meki foeroe fowtoe.”
A sani kan span spesroetoe te trangaleri moesoe gi. Pikin-nengre abi trangaleri di e gi na wan lobi fasi fanowdoe, ma nofo tron den e meki oproeroe teige trangaleri srefi te a e kon foe den troetroe papa noso mama. A moro moeilek srefi foe teki trangaleri foe wan stiefpapa noso wan stiefmama! Foeroe tron, te den e kisi so wan trangaleri, dan wan stiefpikin sa taki so wan sani leki: „Joe a no mi troetroe papa!” Den sortoe wortoe disi kan broko wan stiefpapa noso wan stiefmama di abi boen prakseri, srefisrefi!
Pikin-nengre kan kisi boen leri troetroe na ini wan osofamiri di abi wan stiefpapa noso wan stiefmama? Den stiefpapa nanga den stiefmama kan doe wan boen sani foe bow wan stief-osofamiri nanga boen bakapisi? A piki na tapoe ala den toe aksi na ija, te ala sma di de na ini na osofamiri e gebroiki den rai na ini bijbel, a Wortoe foe Gado di sma skrifi nanga jepi foe en santa jeje.
[Prenki na tapoe bladzijde 3]
„Joe a no mi troetroe papa!”