Poti prakseri doronomo na tapoe den sani di joe e leri sma
„Poti prakseri doronomo na tapoe joesrefi èn na tapoe den sani di joe e leri sma. Hori den sani disi, bika efoe joe e doe disi, dan joe sa froeloesoe joesrefi èn den wan di e arki joe.” — 1 TIMOTEUS 4:16.
1, 2. Foe san ede fajafaja leriman de tranga fanowdoe na ini a ten disi?
„GO . . . èn meki disipel foe sma foe ala nâsi, . . . leri den foe doe ala den sani di mi komanderi oenoe” (Mateus 28:19, 20). Bika foe a komando disi di Jesus Krestes gi, meki ala kresten moesoe doe moeiti foe tron leriman. Fajafaja leriman de fanowdoe foe jepi reti-atisma foe kisi a sabi foe Gado bifo a lati toemoesi (Romesma 13:11). Na apostel Paulus ben gi a deki-ati: „Preiki a wortoe, doe en leki wan sani di de toemoesi prenspari na ini boen ten, na ini moeilek ten” (2 Timoteus 4:2). Foe doe disi, a de fanowdoe foe gi leri na ini a gemeente èn na dorosei a gemeente. Ija, a preikiwroko wani taki moro leki nomo foe meki a boskopoe foe Gado bekènti. Wi moesoe gi leri na wan boen fasi efoe wi wani taki den sma di abi belangstelling moesoe tron disipel.
2 Wi e libi na ini ’moeilek ten di tranga foe pasa’ (2 Timoteus 3:1). Grontapoe filosofia nanga falsi leri broeja a froestan foe sma. Foeroe sma de „na doengroe na froestan sei” èn den „lasi ala sjen firi” (Efeisesma 4:18, 19). Son sma abi pen na emotioneel sei. Ija, sma e „kisi kwinsi èn den panja leki skapoe sondro skapoeman” troetroe (Mateus 9:36). Ma tokoe, te wi e gebroiki a koni foe gi sma leri, wi kan jepi den reti-atisma foe tjari den kenki kon di de fanowdoe.
Leriman na ini a gemeente
3. (a) San a komando di Jesus ben gi taki wi moesoe foe leri sma, wani taki? (b) Soema abi a fosi frantiwortoe foe gi leri na ini a gemeente?
3 Nanga jepi foe na oso-bijbelstudie, miljoenmiljoen sma e kisi persoonlijk leri. Ma na baka a dopoe foe den, den njoen wan abi moro jepi fanowdoe foe tron sma di meki „roetoe èn [di] kon stanfaste na tapoe a fondamenti” (Efeisesma 3:17). Te wi e doe a komando foe Jesus di skrifi na Mateus 28:19, 20 èn wi e tjari njoen sma kon na a organisâsi foe Jehovah, dan den abi wini foe di den e kisi leri na ini a gemeente srefi. Soleki fa Efeisesma 4:11-13 e taki, Gado ben poti man foe dini „leki skapoeman nanga leriman, nanga a prakseri foe meki den santawan kon boen baka gi a diniwroko, foe bow a skin foe a Krestes”. Son tron a koni di den abi foe gi leri wani taki toe dati den moesoe „gi piri-ai, gi strafoe, froemane, nanga foeroe langa pasensi” (2 Timoteus 4:2). A wroko foe den leriman ben de so prenspari taki, di Paulus ben skrifi den Korentesma, a e kari den leriman wantewante baka di a ben kari den apostel nanga den profeiti. — 1 Korentesma 12:28.
4. Fa a man di wi man gi leri e jepi wi foe gi jesi na a froemane foe Paulus di skrifi na Hebrewsma 10:24, 25?
4 A troe, a no ala kresten e dini leki owroeman, noso opziener. Ma tokoe ala sma e kisi a deki-ati foe gi makandra deki-ati „foe sori lobi èn doe boen wroko” (Hebrewsma 10:24, 25). Foe doe dati na den konmakandra wani taki dati wi moesoe gi opregti komentaar di sreka boen èn di kan gi tra sma tranga èn deki-ati. Kownoekondre preikiman di abi ondrofeni kan ’gi deki-ati toe foe doe boen wroko’ te den e prati a sabi nanga na ondrofeni foe den nanga njoen wan te den e wroko nanga den na ini a velddienst. Den kan gi prenspari leri na den okasi disi èn na tra okasi. Foe eksempre, lepi oemasma e kisi a deki-ati foe de „sma di e leri tra sma san boen”. — Titus 2:3.
Overtoigi foe bribi
5, 6. (a) Fa troe krestendom e difrenti foe falsi anbegi? (b) Fa owroeman e jepi den njoen sma foe teki koni bosroiti?
5 So boen, a troe krestendom e difrenti srefisrefi foe den falsi relisi, èn foeroe foe den falsi relisi wani basi a denki foe den memre foe den. Di Jesus ben de na grontapoe, den relisi fesiman ben proeberi foe basi pikinmoro ibri pisi foe a libi foe sma, nanga jepi foe gwenti di libisma ben meki èn di e kwinsi sma (Lukas 11:46). Den kerki tiriman foe krestenhèit doe dati nofo tron toe.
6 Ma troe anbegi na „santa diniwroko” di wi e doe nanga wi ’krakti foe denki’ (Romesma 12:1). Den foetoeboi foe Jehovah e kisi „overtoigi foe bribi” (2 Timoteus 3:14). Son tron den sma di e teki fesi moesoe meki wan toe tirilin nanga wroko sistema kande foe meki sani waka boen na ini a gemeente. Ma na presi foe teki bosroiti gi kompe kresten, den owroeman e leri den „foe si san boen èn san ogri” (Hebrewsma 5:14). Na a fosi presi den owroeman e doe disi te den e gi a gemeente njanjan ’nanga den wortoe foe bribi èn nanga den moi leri’. — 1 Timoteus 4:6.
Poti prakseri na tapoe den sani di joe e leri sma
7, 8. (a) Fa sma di no abi foeroe bekwaamfasi man dini leki leriman? (b) San e sori taki ibriwan sma moesoe doe moeiti foe tron wan boen leriman?
7 Meki wi go baka na a komando di wi kisi foe leri sma. A de fanowdoe foe kisi wan spesroetoe koni, leri, noso bekwaamfasi foe doe a wroko disi? A no abi foe de so. Moro foeroe, a leriwroko disi na heri grontapoe e doe nanga jepi foe gewoon sma di no abi foeroe bekwaamfasi (1 Korentesma 1:26-29). Paulus e froeklari: „Wi abi a goedoe disi [a diniwroko] na ini tokotoko prapi [onvolmaakti skin], so taki a krakti di e pasa san de normaal, ben sa de foe Gado èn no foe wisrefi” (2 Korentesma 4:7). A kefalek boen bakapisi di a Kownoekondre preikiwroko abi na heri grontapoe, de wan boeweisi foe a krakti di a jeje foe Jehovah abi!
8 Ma tokoe anoe moesoe span makandra foe doe persoonlijk moeiti foe tron „wan wrokoman di no abi foe sjen foe noti, di e gebroiki a wortoe foe waarheid na wan reti fasi” (2 Timoteus 2:15). Paulus ben gi Timoteus a tranga: „Poti prakseri doronomo na tapoe joesrefi èn na tapoe den sani di joe e leri sma. Hori den sani disi, bika efoe joe e doe disi, dan joe sa froeloesoe joesrefi èn den wan di e arki joe” (1 Timoteus 4:16). Fa wan sma moesoe poti prakseri na tapoe a leri di a e gi sma, na inisei èn na dorosei a gemeente? A moesoe de fanowdoe foe abi boen bekwaamfasi, noso foe abi tèknik foe gi leri?
9. San de moro prenspari leki a abi di wan sma abi bekwaamfasi?
9 Jesus foe troe ben sori taki a sabi heri boen fa foe gi leri, na ini a pôpi Bergitaki foe en. Di a ben kaba taki, dan „den ipi sma ben froewondroe foe a fasi fa a e gi leri” (Mateus 7:28). A no de foe taki dati no wan foe wi kan gi leri leki fa Jesus ben gi leri. Ma wi no abi foe de kefalek boen takiman foe de boen leriman. Ija, akroederi Job 12:7, srefi „oso meti” nanga ’kriatoeroe di abi frei’ kan gi leri sondro foe taki wan sani! A sani di de spesroetoe prenspari, boiti den bekwaamfasi noso koni di wi gebore nanga den kande, na a „sortoe sma” di wi de — den sortoe eigifasi di wi abi èn den sortoe jeje gwenti di wi kweki èn di den studenti kan waka na baka. — 2 Petrus 3:11; Lukas 6:40.
Studenti foe Gado Wortoe
10. Fa Jesus ben de wan boen eksempre leki wan studenti foe Gado Wortoe?
10 Wan sma di e leri tra sma bijbel waarheid nanga boen bakapisi, moesoe de wan studenti foe Gado Wortoe (Romesma 2:21). Jesus Krestes ben poti wan kefalek aparti eksempre ini a tori disi. Na ini en diniwroko, Jesus ben sori na tapoe noso a ben taki foe pisi foe bijbel di de a srefi na ini pikinmoro afoe foe den Hebrew Boekoe foe bijbel.a Di a ben abi 12 jari a ben de krin foe si taki a ben sabi Gado Wortoe boen, di den ben feni en „e sidon nanga den leriman èn e arki den èn e poti aksi gi den” (Lukas 2:46). Leki wan bigisma, Jesus ben abi a gwenti foe go na a snoga, pe den ben leisi Gado Wortoe. — Lukas 4:16.
11. Sortoe boen gwenti foe studeri wan leriman moesoe kweki?
11 Joe na wan fajafaja leisiman foe Gado Wortoe? Te joe e diki na ini Gado Wortoe dan, „joe sa froestan a frede foe Jehovah, èn joe sa feni a sabi foe Gado srefi” (Odo 2:4, 5). Foe dati ede, abi boen gwenti foe studeri. Proeberi foe leisi wan pisi foe Gado Wortoe ibri dei (Psalm 1:2). Meki a de wan gwenti foe leisi ibri eksemplaar foe A Waktitoren nanga Ontwaakt! wantewante te joe kisi en. Poti finifini prakseri na tapoe den gemeente konmakandra. Leri foe ondrosoekoe sani finifini. Te joe e leri „ondrosoekoe ala sani soifri”, dan joe no sa skepi èn no sa taki sani di no soifri te joe e gi leri. — Lukas 1:3.
Lobi nanga lespeki gi den sma di joe e gi leri
12. Fa Jesus ben denki foe den disipel foe en?
12 Wan tra prenspari eigifasi na a fasi fa joe e denki foe den sma di joe e gi leri. Den Fariseiman no ben abi lespeki gi den wan di ben e arki Jesus. „Na ipi disi di no sabi a Wet, na froefroektoe sma”, den ben taki (Johanes 7:49). Ma Jesus ben abi dipi lobi nanga lespeki gi den disipel foe en. A ben taki: „Mi no e kari oenoe srafoe moro, bika wan srafoe no sabi san en masra e doe. Ma mi kari oenoe mati, bika ala den sani di mi jere foe mi Tata, mi meki oenoe kon sabi dati” (Johanes 15:15). Disi ben sori fa den disipel foe Jesus moesoe doe a leriwroko foe den.
13. Fa Paulus ben denki foe den sma di a ben gi leri?
13 Foe eksempre, Paulus no ben abi wan kowroe bisnis matifasi nanga den studenti foe en. A ben taigi den Korentesma: „Awansi oenoe abi tin doesoen leriman ini Krestes, tokoe oenoe no abi foeroe papa kwetikweti; bika ini Krestes Jesus mi tron oen papa nanga jepi foe a boen njoensoe” (1 Korentesma 4:15). Son tron Paulus ben krei srefi ala di a ben e froemane den wan di a ben gi leri! (Tori foe den Apostel 20:31) A ben sori so srefi foeroe pasensi nanga boenfasi. Foe dati ede a ben kan taigi den Tesalonikasma: „Wi ben kon de nanga switifasi na oen mindri, neleki te wan mama di e gi pikin bobi e boboi den eigi pikin foe en.” — 1 Tesalonikasma 2:7.
14. Foe san ede a de so prenspari foe abi persoonlijk belangstelling gi den bijbelstudenti foe wi? Gi wan eksempre.
14 Joe e waka na baka na eksempre foe Jesus nanga Paulus? Opregti lobi gi den studenti foe wi kan tapoe den natuurlijk bekwaamfasi di wi ben sa kan mankeri. Den bijbelstudenti foe wi e firi taki wi abi opregti belangstelling gi den persoonlijk? Wi e teki ten foe kon leri sabi den? Di wan kresten oema ben abi problema foe jepi wan studenti foe go na fesi na jejefasi, dan a ben aksi en nanga switifasi: „Wan sani e trobi joe?” Na oema ben bigin poeroe en ati kon na doro, èn ben froeteri den foeroe broko-ede nanga sorgoe foe en. A lobi-ati takimakandra dati ben de a sani di ben jepi na oema foe tjari kenki kon. Na ini den sortoe kefal disi a de joisti foe kari bijbel prakseri nanga wortoe di e gi trowstoe nanga deki-ati (Romesma 15:4). Ma wi moesoe de fersektiki: Wan bijbel studenti kan gro esi-esi, ma kande a abi wan toe grontapoe fasi ete foe poeroe. So boen, a no de wan koni sani foe abi krosibei demakandra nanga a sma te a no de fanowdoe. Wi moesoe tan hori joisti kresten skotoe. — 1 Korentesma 15:33.
15. Fa wi kan sori lespeki gi wi bijbelstudenti?
15 Lespeki gi wi studenti wani taki dati wi no moesoe proeberi foe basi a persoonlijk libi foe den (1 Tesalonikasma 4:11). Foe eksempre, kande wi e studeri nanga wan oema di e libi nanga wan man sondro taki den trow. Kande den abi pikin nanga makandra. Now di na oema kisi soifri sabi foe Gado, a wani foe libi akroederi den markitiki foe Jehovah (Hebrewsma 13:4). A moesoe trow nanga a man, noso prati nanga en? Kande wi abi a tranga firi taki te a e trow nanga wan man di abi pikinso noso no wan belangstelling gi jeje sani, dan dati ben kan tapoe na oema foe go na fesi na ini a ten di e kon. Na a tra sei, kande wi e frede taki sani no sa waka boen nanga den pikin foe en èn wi e prakseri taki a ben sa moro boen te a trow nanga a man. Na ini ala toe kefal, a no sa sori taki wi abi lespeki nanga lobi te wi e boemoei na ini a libi foe wan studenti èn e proeberi foe poesoe wi eigi denki na ini den sortoe afersi disi. Na tapoe foe dati, na en na a sma di moesoe libi nanga den bakapisi foe a bosroiti di a teki. Foe dati ede, a no ben sa moro boen foe leri so wan studenti foe gebroiki en eigi „koni di [a] abi foe si sani krin” èn foe bosroiti gi ensrefi san a moesoe doe? — Hebrewsma 5:14.
16. Fa owroeman kan sori lobi nanga lespeki gi na ipi foe Gado?
16 A de spesroetoe prenspari te gemeente owroeman e handri na ipi nanga lobi èn nanga lespeki. Di Paulus ben skrifi Fileimon, a ben taki: „Ala di mi kan taki ala sani fri na ini Krestes, foe komanderi joe foe doe san boen, tokoe mi e froemane joe foe lobi ede” (Fileimon 8, 9). Son tron froeferi situwâsi kan opo kon na ini a gemeente. A kan de srefi fanowdoe foe tanapoe kánkan. Paulus ben gi Titus a tranga foe „tan gi den [sma di fowtoe] piri-ai na wan streng fasi, . . . so taki den kan de gosontoe ini a bribi” (Titus 1:13). Srefi na ini den kefal dati, den opziener moesoe de fersektiki foe noiti no taki nanga a gemeente na wan fasi di no e sori switifasi. „Wan srafoe foe Masra no abi foe feti”, Paulus ben skrifi, „ma a moesoe abi switifasi gi ala sma, bekwaam foe gi leri, e hori ensrefi te ogri e miti en.” — 2 Timoteus 2:24; Psalm 141:3.
17. Sortoe mistèik Moses ben meki, èn san owroeman kan leri foe disi?
17 Den opziener moesoe tan memre densrefi taki den e handri nanga „na ipi foe Gado” (1 Petrus 5:2). Ala di Moses ben de wan man di abi sakafasi, tokoe a ben lasi a denki disi gi wan sjatoe ten. Den Israèlsma „ben meki en jeje kon atibron èn a ben bigin taki nanga en mofoboeba sondro foe denki ” (Psalm 106:33). Gado no ben lobi a fasi fa a ben handri takroe nanga En ipi srefisrefi, srefi ala di den ben abi fowtoe na ini na afersi disi (Numeri 20:2-12). Te den owroeman e miti den sortoe tjalensi disi na ini a ten disi, dan den moesoe doe moeiti foe gi leri nanga rai nanga inzicht èn nanga switifasi. Den brada foe wi e handri moro boen te wi e handri den leki sma di abi jepi fanowdoe èn te wi e hori den na prakseri, no leki sma di no man kenki moro. Den owroeman moesoe abi a srefi positief denki di Paulus ben abi di a ben taki: „Wi e froetrow na tapoe Masra ini a tori foe oenoe, taki oenoe e doe èn sa tan doe den sani di wi e komanderi.” — 2 Tesalonikasma 3:4.
Sabi san den abi fanowdoe
18, 19. (a) Fa wi moesoe handri na tapoe den sani di den bijbelstudenti abi fanowdoe èn di no abi foeroe bekwaamfasi? (b) Fa wi ben sa kan jepi den studenti di abi problema nanga spesroetoe penti?
18 Wan boen leriman de klariklari foe fiti ensrefi na den bekwaamfasi foe en studenti èn den sani di den e mankeri. (Teki gersi Johanes 16:12.) Na ini Jesus en agersitori foe den talenti, a masra ben gi grani na „ibriwan akroederi en eigi bekwaamfasi” (Mateus 25:15). Wi kan gebroiki a srefi fasi disi te wi e hori bijbelstudie. A no de foe taki dati a ben sa moro boen foe studeri wan poeblikâsi di gron tapoe bijbel na ini wan reidelek sjatoe pisi ten. Ma wi moesoe erken taki a no ala sma man leisi boen noso man froestan njoen idea heri esi. Foe dati ede a koni foe man si sani boen de fanowdoe foe sabi o ten wi moesoe abra go na a tra penti na ini a studie te den studenti no man tan skinskin nanga wi. Moro prenspari leki nomo foe studeri a materiaal esi-esi, na a jepi di wi moesoe jepi den studenti foe froestan san den e leri. — Mateus 13:51.
19 Wi kan taki a srefi sani foe den bijbelstudenti di abi problema nanga spesroetoe penti, soleki a Dri-wánfasi noso relisi fesadei. Ala di moro foeroe a no de fanowdoe foe gebroiki tra poeblikâsi foe ondrosoekoe sani na den studie foe wi, tokoe a kan wanwan leisi foe doe dati efoe a ben o jepi foe froestan sani moro krin. Wi moesoe gebroiki koni foe si sani krin so taki wi no e meki a studenti no e go esi na fesi, sondro taki a de fanowdoe.
De fajafaja!
20. Fa Paulus ben de wan eksempre foe sori faja nanga overtoigi na ini a leri di a gi sma?
20 „De fajafaja na ini jeje”, Paulus e taki (Romesma 12:11). Ija, te wi e hori wan oso-bijbelstudie noso te wi abi wan prati na wan gemeente konmakandra, dan wi moesoe doe dati nanga faja. Paulus ben taigi den Tesalonikasma: „A boen njoensoe di wi e preiki, no ben kon na oenoe nanga wortoe wawan, ma so srefi nanga krakti èn nanga santa jeje èn tranga overtoigi” (1 Tesalonikasma 1:5). So boen, Paulus nanga den kompe foe en no ben prati ’wawan a boen njoensoe foe Gado nanga den, ma so srefi den eigi sili’. — 1 Tesalonikasma 2:8.
21. Fa wi kan tan abi faja gi den toewijzing di wi abi foe gi sma leri?
21 Troetroe faja e kon te wi abi a tranga overtoigi taki den bijbelstudenti foe wi moesoe jere den sani di wi abi foe taki. Meki noiti wi si wan toewijzing foe gi leri leki wan aladei sani. A leriman foe wet, Esra, seiker ben poti prakseri na tapoe den sani di a ben leri sma. A „ben sreka na ati foe en foe go soekoe rai na a wet foe Jehovah èn foe doe en èn foe leri sma ordroe nanga retidoe na Israèl” (Esra 7:10). Wi moesoe doe a srefi sani te wi e sreka wisrefi finifini èn te wi e prakseri o prenspari a tori de. Meki wi begi Jehovah foe foeroe wi nanga bribi èn nanga overtoigi (Lukas 17:5). A faja foe wi kan jepi den bijbelstudenti foe kweki wan troetroe lobi gi waarheid. A no de foe taki, a poti di wi e poti prakseri na tapoe a leri di wi e leri sma, wani taki kande toe taki wi moesoe gebroiki spesroetoe tèknik foe gi leri. A tra artikel foe wi sa taki foe wan toe foe den tèknik disi.
[Foetoewortoe]
a Loekoe Inzicht in de Schrift, Pisi 2, bladzijde 476, di a Watchtower Bible and Tract Society of New York, Inc., tjari kon na doro.
Joe e memre disi ete?
◻ Foe san ede bekwaam kresten leriman de fanowdoe na ini a ten disi?
◻ Sortoe boen gwenti foe studeri wi kan kweki?
◻ Foe san ede lobi nanga lespeki gi den wan di wi e gi leri de so prenspari?
◻ Fa wi kan handri na tapoe den sani di wi bijbelstudenti abi fanowdoe?
◻ Foe san ede a abi di wi abi faja nanga overtoigi de prenspari te wi e gi tra sma leri?
[Prenki na tapoe bladzijde 10]
Boen leriman de studenti densrefi foe Gado Wortoe toe
[Prenki na tapoe bladzijde 13]
Abi persoonlijk belangstelling gi den bijbelstudenti