Gado No E Draidrai Nanga a Pramisi fu En

¿„O LANGA, o Yehovah, mi musu bari fu kisi yepi, sondro taki yu e yere?” Den wortu disi na den wortu fu a Hebrew profeiti Habakuk, di ben e libi na ini a di fu seibi yarihondro b.G.T. Ma furu sma sabi den wortu disi, ¿a no so? Libisma meki so, taki wantewante noso so esi leki a kan wi wani abi den sani di wi lobi srefisrefi. Èn disi de spesrutu so na ini a yarihondro fu wi pe sma wani sani wantewante.—Habakuk 1:2.

Na ini a fosi yarihondro wan tu sma ben de di kande ben e denki taki Gado ben musu meki den pramisi fu en kon tru moro esi. Den ben kon lasi pasensi so kefalek taki den ben e si srefi leki Gado ben e draidrai noso leki taki a lati. Fu a tori disi, na apostel Petrus ben musu memre den taki a fasi fa Gado e si sani, de heri tra fasi leki a fasi fa wi e si sani. Petrus e skrifi: „Meki unu teki notisi fu a tori disi, lobiwan, taki gi Yehovah, wán dei de leki dusun yari èn dusun yari leki wán dei.”—2 Petrus 3:8.

Akruderi a fasi disi fu bereken ten, wan sma di owru 80 yari, libi soso tu yuru nomo, èn a heri historia fu a libisma famiri ben de siksi dei nomo. Te wi e luku sani na a fasi disi, dan a e kon moro makriki gi wi fu frustan a fasi fa Gado e handri nanga wi.

Ma Gado no abi wan mi-no-ke fasi ini a tori fu ten. Kontrari fu dati, a de wan Gado di sabi o prenspari ten de (Tori fu den Apostel 1:7). Fu dati ede, Petrus e go doro fu taki: „Yehovah no e draidrai nanga a pramisi fu en, soleki fa son sma e denki taki a e draidrai, ma a abi pasensi nanga unu fu di a no wani taki wan sma e kisi pori, ma a wani taki ala sma musu abi berow” (2 Petrus 3:9). Heri tra fasi leki libisma, Gado no de na ondro druk fu du sani neleki a no ben abi ten moro. Leki a „Kownu fu têgo ten”, a man si sani fu ala sei èn kan bepaal o ten na ini a ten di e gowe doronomo, den sani di a o du sa abi a moro bun bakapisi gi ala sma di de ini a tori.—1 Timoteus 1:17.

Baka di a ben fruklari fu san ede a gersi leki Gado e draidrai, Petrus e gi a warskow disi: „A dei fu Yehovah sa kon leki wan fufuruman.” Dati wani taki, a dei fu aksi frantiwortu sa kon yoisti te sma no e fruwakti dati. Baka dati, na ini den vers na baka, Petrus e taki fu den tumusi moi fruwakti gi den wan di e „tyari [densrefi] na wan santa fasi èn [e] du sani di e sori taki [den] gi [densrefi] na ini a dini fu Gado”, namku taki den kan pasa libilibi go na ini den „nyun hemel nanga wan nyun grontapu” di Gado pramisi.—2 Petrus 3:10-13.

Disi musu meki wi kon frustan moro srefi taki a krutu fu Gado no kon ete. A pasensi fu en meki taki wi kon sabi a prakseri fu en èn meki taki wi kenki wi libi fu man kisi den blesi fu en di a pramisi. ¿Wi no musu si „a pasensi fu wi Masra leki frulusu”, soleki fa Petrus e taki? (2 Petrus 3:15) Ma wan tra sani de ini a tori fu a pasensi fu Gado.

Wan Fasi fu Sondu Musu Kon na wan Kaba

Te wi e ondrosoku a fasi fa Gado ben handri nanga libisma na ini a ten di pasa, dan wi e si taki furutron a no ben e krutu sma teleki ala howpu taki sani ben o kon moro bun no ben de moro. Fu eksempre, ini a tori fu a krutu fu Gado tapu den Kanansma, a ben taigi Abraham langa ten na fesi kaba fu den sondu fu den. Ma a ten taki a ben o gi krutustrafu no ben doro ete. Fu san ede? Bijbel e taki: „Bika den sondu fu den Amorietsma [Kanansma] no kon na wan kaba ete”, noso leki fa a Knox vertaling e taki en: „A godelowsufasi fu den Amorietsma no [ben] doro en marki dorodoro.”—Genesis 15:16.a

Ma so wan 400 yari na baka, a krutu fu Gado ben kon èn den bakapikin fu Abraham, den Israèlsma, ben teki a kondre abra. Wan tu Kanansma, soleki Rakab nanga den Gibeonitsma, ben tan na libi fu den fasi fa den ben de èn den sani di den ben du, ma a moro bigi pisi fu den ben doro wan tumusi ogri dotifasi, soleki sani di disiten sabidensiman fu owruten sani ben tyari kon na krin di den ben diki sani puru fu ondro doti. Den ben anbegi den syenpresi fu mansma, den ben du tempel-hurudu, èn den ben òfer pikin. Halley’s Bible Handbook e taki: „Sabidensiman fu owruten sani di ben diki den brokopresi fu den foto fu den Kanansma e fruwondru taki Gado no ben pori den moro na fesi srefi.” Te fu kaba, ’a sondu fu den Kanansma ben doro en kaba; a godelowsufasi fu den ben „doro en marki dorodoro”. No wan sma ben kan kragi Gado nanga reti, taki a ben de onregtfardiki di a ben meki den krin a kondre ala di a ben kibri den wan di ben sori wan yoisti fasi.

Wi e si wan srefi sortu sani na ini den dei fu Noa. Ala di sma bifo a frudu ben godelowsu, toku Gado ben bosroiti nanga sari-ati taki a ten fu den ben sa tan ete 120 yari. Na a pisi ten dati, Noa ben e dini leki „wan preikiman fu regtfardikifasi” (2 Petrus 2:5). Ala di ten ben e pasa, a sori leki a godelowsufasi fu den ben kon lepi. „Gado ben si grontapu èn ¡luku! a ben pori, fu di ala skin ben pori en pasi na grontapu” (Genesis 6:3, 12). A ’sondu fu den ben doro en kaba’; a pasa di ten ben pasa ben meki taki den takru firi fu den ben doro en heimarki. Di Gado ben handri, a ben handri nanga reti srefisrefi. Soso aiti sma ben de regtfardiki na ini na ai fu Gado, èn a ben kibri den.

Wi e si taki Gado ben handri na a srefi fasi nanga Israèl. Ala di den no ben de getrow èn ben pori trutru, toku gi hondrohondro yari Gado ben abi pasensi nanga den. A verslag e taki: „Yehovah . . . ibri tron baka ben tan seni . . . den boskopuman fu en, bika a ben abi sari-ati gi en pipel . . . Ma den ben tan . . . lagi den wortu fu en èn ben spotu nanga den profeiti fu en, te leki na atibron fu Yehovah ben kon na tapu a pipel fu en, te leki den no ben man kon betre moro” (2 Kroniki 36:15, 16). A pipel ben doro a marki pe sani no ben man go bun moro. Soso Yeremia nanga wan tu trawan ben kan kisi kibri. Sma no ben man taki dati Gado ben de onregtfardiki di a ben gi krutustrafu na den sma dati te fu kaba.

A Ten fu Gado fu Handri De Now

Fu den eksempre disi wi kan si taki Gado e wakti fu tyari wan krutu tapu a seti fu sani disi soso teleki a ten lepi gi dati. Disi de fu si na ini a komando di na agersi sma fu Gado di o tyari krutustrafu kon, ben kisi: „Poti yu srapu kotinefi na ini èn koti den bosu fu a droifibon fu grontapu, bika den droifi fu en kon lepi.’ Èn na engel ben trowe en koti-nefi na grontapu èn ben koti den droifi fu a droifibon fu grontapu, èn a ben trowe en na ini a bigi win-persbaki fu na atibron fu Gado.” Luku taki a godelowsufasi fu libisma ben „kon lepi”, dati wani taki, a ben doro a penti taki sani no ben kan kon bun moro. Te Gado e tyari krutustrafu kon, dan a sa de krin taki a kon di a kon na mindri, de yoisti.—Openbaring 14:18, 19.

Te wi e luku san skrifi na tapusei, dan a de krin taki a krutustrafu fu Gado teige grontapu musu de krosibei, bika grontapu kisi den eigifasi di ben meki taki Gado ben abi a reti fu gi krutustrafu na ini a ten di pasa. Ala sei pe wi e luku, grontapu furu nanga ogri di du nanga tranga, neleki fa a ben de fosi a frudu na ini den dei fu Noa. Sma e kon de moro nanga moro leki san ben skrifi na ini Genesis 6:5: „Ala prakseri di ben de na ini [libisma] ati, ala ten ben de soso takru.” Srefi den bigi sondu di ben meki taki Gado gi krutustrafu na den Kanansma, de wan gewoon sani na ini a ten disi.

Spesrutu sensi a Fosi Grontapufeti, libisma ondrofeni ogri-ati kenki. Den si taki grontapu furu pasa marki nanga a brudu fu milyunmilyun sma. Orloku, a kiri di sma e kiri ipi-ipi sma, terrorisme, ogridu, nanga kruktudu broko kon na heri grontapu. Angriten, siki, nanga hurudu de wan kefar gi a grontapu fu wi. Ala den buweisi e sori taki wi e libi now na mindri a godelowsu geslakti di Yesus ben taki fu den: „A geslakti disi kwetikweti no sa pasa gowe, te leki den sani disi feni presi” (Mateus 24:34). A grontapu e furu en „sondu” nownow. „Den bosu fu a droifibon fu grontapu” e lepi fu koti.

Ten gi Yu fu Du wan Sani

Na apostel Yohanes yere taki te a ten fu krutu e kon krosibei, dan sani sa lepi na tu sortu fasi. Na a wan sei, „a sma di e du onregtfardikifasi, meki a du moro onregtfardikifasi; èn meki a wan di doti kon moro doti.” Ma na a tra sei, „meki a regtfardikiwan du moro regtfardikifasi èn meki a santawan kon moro santa” (Openbaring 22:10, 11). A sani disi di kon baka ten e pasa makandra nanga a Bijbel leriwroko di Yehovah Kotoigi e du na a heri grontapu. A marki fu a wroko dati na fu leri sma san Gado e aksi fu den so taki den kan de warti fu kisi têgo libi. A wroko disi e du now na ini 233 kondre na ini sowan 87.000 gemeente.

Gado no e draidrai. Nanga pasensi a gi ibri sma a ten di de fanowdu fu „weri a nyun fasi fa wan sma de”, fu man doro den markitiki fu kisi den pramisi fu en (Efeisesma 4:24). Na ini a ten disi, Gado e wakti ete, ala di a situwâsi na grontapu e kon takru moro nanga moro. Yehovah Kotoigi na heri grontapu e du ala san den man na wan reidelekfasi fu fruteri den birtisma fu den fu a sabi di e gi têgo libi (Yohanes 17:3, 17). A moi fu si taki ibri yari moro leki 300.000 sma e du wan sani èn e teki dopu.

Nanga têgo libi na prakseri, now na a ten, no fu wakti, ma fu du wan sani. Bika na ini wan syatu pisi ten, wi sa si a kontru fu a pramisi fu Yesus: „Ibriwan sma di e libi èn e poti bribi na mi, kwetikweti no sa dede noiti.”—Yohanes 11:26.

[Futuwortu]

[Prenki na tapu bladzijde 6]

Den ben taigi a sma fu Gado di e tyari krutustrafu, fu poti a koti-nefi te a droifibon fu grontapu ben kon lepi

[Prenki na tapu bladzijde 7]

Yehovah Kotoigi na heri grontapu e yepi sma fu doro den markitiki fu kisi den têgo blesi fu Gado