Den Ben Du a Wani fu Yehovah

Wan Fisiti Di Ben Gi Furu Wini

A REIS fu Skeba go na Yerusalem ben musu weri a koningin srefisrefi. A ben gwenti fu libi na ini furu gudu. Now a ben e reis tapu a tempo fu wan kameili na wan pasi di ben langa 2400 kilometer, èn a moro bigi pisi fu a pasi ben de na ini faya woestijn. ¡Soleki fa wan sma ben bereken, a waka fu en ben fu go na a presi wawan o teki so wan 75 dei, èn dati ben de soso fu doro drape!a

Fu san ede a gudu koningin disi ben gowe libi en bunbun oso na Skeba èn ben bigin so wan muilek waka?

Wan Verslag Di Ben Wiki Furu Belangstelling

A koningin fu Skeba ben kon na Yerusalem baka di a „ben yere a tori fu Salomo di abi fu du nanga a nen fu Yehovah” (1 Kownu 10:1). Bijbel no e taki soifri san a koningin ben yere. Ma wi sabi taki Yehovah ben blesi Salomo nanga kefalek aparti koni, gudu, nanga grani (2 Kroniki 1:11, 12). Fa a du kon taki a koningin ben kon sabi disi? Fu di Skeba ben de wan mama presi fu bisnis, a ben kan taki a ben yere fu a pôpi di Salomo ben pôpi fu den bisnisman di ben e fisiti a kondre fu en. Kande wan tu fu den ben go na Ofir, wan kondre nanga san Salomo ben abi bigi bisnis afersi.—1 Kownu 9:26-28.

Awansi fa a no fa, a koningin ben doro na ini Yerusalem „nanga wan kefalek bigi grupu sma na en baka, nanga kameili di ben e tyari balsem oli nanga bun furu gowtu nanga diri ston” (1 Kownu 10:2a). Son sma e taki dati a „kefalek bigi grupu sma” ben abi so srefi wan legre grupu fu gi den kibri. Wi kan frustan disi te wi e prakseri taki a koningin ben de wan makti hei tiriman èn ben e waka nanga sani di warti furu tenti milyun Amerkan dala.b

Ma luku taki a koningin ben yere fu a pôpi di Salomo ben pôpi „di abi fu du nanga a nen fu Yehovah”. So bun, disi no ben de wan bisnis reis nomo. A e sori krin taki a koningin ben kon na a fosi presi fu yere a koni fu Salomo — kande fu leri srefi wan sani fu en Gado, Yehovah. Fu di soleki fa a sori, a ben de wan bakapikin fu Sem noso Kam, di ben de anbegiman fu Yehovah, a ben kan taki a ben wani sabi moro fu a relisi fu den fositen tata fu en.

Muilek Aksi, Bun Piki

Di a ben miti Salomo, dan a koningin ben bigin tesi en nanga „muilek aksi” (1 Kownu 10:1). A Hebrew wortu di gebroiki dyaso, kan vertaal nanga „raitori”. Ma disi no wani taki dati a koningin ben meki Salomo plèi lawlaw sani. A de moi fu si taki na Psalm 49:4, a srefi Hebrew wortu gebroiki fu taki fu seryusu aksi di abi fu du nanga sondu, dede, nanga frulusu. Fu dati ede, soleki fa a sori, a koningin fu Skeba ben e taki dipi tori nanga Salomo di ben e tesi a furu koni di a ben abi. Bijbel e taki dati a koningin „ben bigin taki nanga en ala den sani di ben de na ini en ati”. Salomo fu en sei, „ben bigin fruteri en ala den afersi fu a koningin. No wan afersi no ben kibri gi a kownu di a no ben taigi en”.—1 Kownu 10:2b, 3.

A koningin fu Skeba ben fruwondru so kefalek fu a koni fu Salomo èn a gudu fu en kownukondre, taki „yeye no ben de moro na ini en” (1 Kownu 10:4, 5). Son sma e taki dati den wortu disi wani taki dati a koningin „ben fruwondru taki pikinmoro en blo ben tapu”. ¡Wan sabiman e taki srefi dati a ben fadon flaw! Ma awansi san ben pasa, a koningin ben fruwondru fu den sani di a ben si èn ben yere. A ben taki dati den futuboi fu a kownu ben koloku fu man yere a koni fu a kownu disi, èn a ben blesi Yehovah taki A ben poti Salomo tapu a kownusturu. Dan a ben gi a kownu diri presenti, èn a gowtu wawan warti ala nanga ala so wan 40.000.000 Amerkan dala na ini a ten disi. Salomo tu ben gi presenti, èn ben gi a koningin „ala sani di a koningin ben aksi”.c—1 Kownu 10:6-13.

Les gi Wi

Yesus ben gebroiki a koningin fu Skeba leki wan praktisch les gi den leriman fu wet èn den Fariseiman. „a koningin fu zuidsei sa opo baka nanga a geslakti disi na ini a krutu èn a sa krutu en”, a ben taigi den, „bika a komoto te na a kaba fu grontapu fu yere a koni fu Salomo, ma ¡luku! moro leki Salomo de dyaso” (Mateus 12:42). Iya, a koningin fu Skeba ben sori furu warderi gi a koni di Gado e gi. Efu a ben reis 2400 kilometer fu arki Salomo, dan seiker den leriman fu wet nanga den Fariseiman ben musu arki seryusu na Yesus, di ben de leti na den fesi.

Na ini a ten disi wi kan sori furu warderi gi a moro Bigi Salomo, Yesus Krestes. Fa? Wan fasi na fu du a komando fu en fu „meki disipel fu sma fu ala nâsi” (Mateus 28:19). Wan tra fasi na fu luku na eksempre fu Yesus èn a denki fu en finifini èn dan waka na baka den.—Filipisma 2:5; Hebrewsma 12:2, 3.

A tru, wi sa musu du muiti fu waka baka na eksempre fu a Moro Bigi Salomo. Ma toku wi sa kisi furu wini fu dati. Iya, Yehovah e pramisi en pipel taki efu den e sori taki den abi a yeye fu òfer densrefi, dan a sa ’opo den sroisi fu hemel gi den èn trutru kanti wan blesi kon na den tapu te leki no wan sani e mankeri moro’.—Maleaki 3:10.

[Futuwortu]