A Disiten Plaag fu na Abi Di Sma No Abi den Srefi Reti
„Wi e si den waarheid disi leki wan sani di no kan de tra fasi, taki Gado kria ala sma a srefi, èn taki den kisi spesrutu Reti fu den Kriaman di no kan teki puru fu den, èn na mindri den disi yu abi Libi, Fri èn a muiti fu kisi Koloku.”—Srefidensi Fruklari di den Verenigde Staten fu Amerkankondre teki na ini 1776.
„Ala libisma gebore fri èn abi den srefi reti.”—Fruklari fu den Reti fu Libisma èn fu den Borgu, di a Nationaal Konmakandra fu Fransikondre teki na ini 1789.
„Ala libisma gebore fri èn abi a srefi wartifasi nanga den srefi reti.”—Universeel Fruklari fu den Reti fu Libisma, di na Algemene Konmakandra fu den Verenigde Nâsi teki na ini 1948.
WI NO abi fu tweifri na disi. A winsi fu abi den srefi reti de fu si na mindri libisma na ala sei. Ma a de wan sari sani taki sma ben musu taki ibritron baka fu na idea taki libisma musu abi den srefi reti. A tru tori disi wawan e buweisi taki te leki now na abi di sma no abi den srefi reti no de na ini libi fu a libisma famiri.
¿Iniwan sma kan rideneri seryusu taki now di wi de krosibei na a kaba fu a di fu 20 yarihondro, sani kenki kon moro bun? ¿Ala den borgu fu den Verenigde Staten fu Amerkankondre nanga Fransikondre, noso den wan fu iniwan fu den 185 memre fu den Verenigde Nâsi, trutru nyan bun fu den srefi reti di den e bribi taki den gebore nanga dati?
Ala di na idea taki ala sma musu abi den srefi reti, kande de wan „sani di no kan de tra fasi”, toku a reti fu „Libi, Fri, èn a muiti fu kisi Koloku” kwetikweti no de a srefi gi ala sma. Fu eksempre, ¿wi kan taki dati sma abi den srefi reti ini a libi efu wan pikin na ini Afrika musu abi wán datra makandra nanga 2569 tra sma, ala di wan pikin na ini Europa musu abi en makandra nanga 289 sma nomo? ¿Noso wi kan taki dati sma abi den srefi reti ini a tori fu fri èn ini a muiti di den e du fu kisi koloku, te wan fu den dri manpikin nanga tu fu den dri umapikin na ini India sa gro kon bigi sondro taki den man leisi èn skrifi, ala di na ini presi soleki Yapan, Doisrikondre, nanga Ingrisikondre, pikinmoro ibri pikin abi a dyaranti taki a sa kisi skoroleri?
¿Sma na ini kondre fu Centraal Amerika, pe ibriwan sma e kisi 1380 Amerkan dala leki pai na ini wán yari, abi a srefi „wartifasi nanga reti” na ini a libi leki den sma na ini Fransikondre, pe ibriwan sma e kisi 24.990 Amerkan dala leki pai na ini wán yari? ¿Yu kan taki dati sma abi den srefi reti te yu e teki wan nyunyun umapikin na ini Afrika di a fruwakti de taki a o libi 56 yari, gersi wan nyunyun umapikin na ini Noord-Amerika, di a fruwakti de taki a o libi 79 yari?
Furu fasi de fa yu kan si taki sma no abi den srefi reti, èn no wan fu den bun. Wan tu fu den fasi disi na a kisi di sma no man kisi den srefi sani di den abi fanowdu fu tan na libi, èn te den no abi den srefi okasi fu kisi datra yepi nanga skoroleri. Son leisi a de so taki kesekese na politiek sei, na ras sei, noso na relisi sei, e prei wan bigi rol fu teki a wartifasi nanga fri puru fu sma. Ala di sma e taki so furu fu na abi di sma musu abi den srefi reti, toku wi e libi na ini wan grontapu pe sma no abi den srefi reti. Neleki wan plaag — wan sani di e tyari kwinsi kon di bigi noso di de na ala sei, soleki fa a wortu wani taki, — na so ibri pisi fu a libisma libimakandra e firi a hebi fu na abi di sma no man abi den srefi reti. A pen di a e tyari kon soleki pina, siki, a de di sma de ini don, a de di sma de sondro wroko, nanga a desko di sma e desko makandra, hebi srefisrefi.
„Gado kria ala sma a srefi.” ¡Disi na wan moi prakseri fu tru! ¡Ma a de wan sari sani taki a de heri tra fasi na ini a trutru libi!
[Sma di abi a reti fu a prenki na tapu bladzijde 3]
UN PHOTO 152113/SHELLEY ROTNER