Dwengi a Plaag fu na Abi Di Sma No Abi den Srefi Reti
Heri esi a Kriaman sa tyari a situwâsi kon pe ala sma sa abi den srefi reti. Disi na wan sani di libisma wani srefisrefi. Te leki a ten dati, wi kan du sani awinsi fa a no fa, fu dwengi a plaag fu na abi di sma no abi den srefi reti, di abi krakti tapu wi nanga wi osofamiri. Soleki fa Nelson Mandela, a fositen presidenti fu Zuid-Afrika ben taki, dan „a de san wi e du nanga den sani di wi abi, èn no san wi e du nanga den sani di sma e gi wi, di e meki wan sma difrenti fu wan trawan”.
HISTORIA e sori taki den wortu fu en tru. Furu mansma nanga umasma di kisi pikinso sani di den ben gebore, ma di, fu di den gebroiki san den ben abi, ben kisi bun bakapisi di ben poti den aparti fu den speri fu den di kande ben de moro koni. Na a tra sei, tra sma di kisi furu winimarki di den ben gebore ben frumorsu san den ben abi èn no ben man gebroiki san den ben abi dorodoro.
¡Du Ala San Yu Man Nanga San Yu Abi!
Yehovah Kotoigi de fayafaya fu yepi sma fu kisi sabi fu den sani di Gado abi na prakseri fu du, nanga yepi fu wan studie fu Bijbel. Ma den e frustan taki, efu wan sma wani kisi trutru winimarki fu den bodoi fu Bijbel, dan a sma musu man leisi. Fu dati ede meki Yehovah Kotoigi leri tin dusundusun sma fu leisi èn skrifi, so srefi 23.000 sma (na ini 1995) na ini wán kondre fu West-Afrika wawan. A San Francisco Examiner ben taki, ala di a ben sori go na a tumusi aparti sociaal yepi di Kotoigi fu Yehovah e gi: „Yu ben sa kan taki dati den na model borgu. Den e pai belasting fayafaya, e sorgu gi den sikiwan, e yepi sma fu leri leisi èn skrifi.”
Moro fara, nanga yepi fu wan les fu leri taki na publiki, Kotoigi fu Yehovah leri hondro dusundusun sma fu tron bun takiman, di man fu taki grati na publiki. Na mindri den dusundusun sma disi wan tu de di wan dei ben abi seryusu problema fu taki. Poti prakseri tapu a man fu Zuid-Afrika di e skrifi: „Mi ben gagu so ogri taki mi prakseri ben de tapu misrefi nomo, èn furutron mi ben frutrow tapu tra sma fu taki gi mi. . . . Di mi gi mi nen na a Theokrasia Diniwroko-skoro èn mi ben musu leisi na ini Bijbel gi wan pikin grupu fu arkiman . . . , mi ben gagu so ogri taki mi no ben man kaba a pisi di mi ben musu leisi na ini a ten di mi ben kisi fu dati. Baka a konmakandra, dan na wan switi fasi a [raiman] gi mi rai di mi ben kan gebroiki ini na aladei libi. A ben gi mi a rai fu leisi nanga wan tranga sten gi misrefi. Mi ben du disi, fu di mi ben leisi dei fu dei nanga wan tranga sten na ini mi Bijbel èn na ini a tijdschrift A Waktitoren.” A man disi ben go na fesi na so wan bun fasi taki now a e gi publiki taki gi moro leki hondrohondro, srefi dusundusun arkiman.
Nyan Bun fu a Handri Di Brada E Handri Makandra a Srefi
Ini a tori fu skoroleri, a sorgu gi a gosontu, èn a posisi na ekonomia sei noso sociaal sei, dan na mindri Kotoigi fu Yehovah situwâsi e difrenti srefisrefi. Den difrenti disi e sori nomo den onvolmaakti situwâsi na a grontapu pe den e libi na ini. Ma kontrari tra relisi grupu, dan pikinmoro den Kotoigi puru fu a grupu fu den, a krutu di sma e krutu makandra sondro fu sabi fa sani de tapu a kontren fu ras nanga sociaal noso politiek situwâsi.
Den ben man doro a marki disi fu di den e du muiti fu du san den leri fu Bijbel. Nanga den heri ati den e teki Bijbel gronprakseri soleki: „Gado no e si sani leki a fasi fa libisma e si sani, bika libisma e si san na ai e si nomo; ma fu a sei fu Yehovah, a e si fa na ati de” (1 Samuèl 16:7). „Gado no e teki sma partèi, ma na ini ibri nâsi a sma di e frede en èn di e du san regtfardiki, de bun na en” (Tori foe den Apostel 10:34, 35). „No du no wan sma ogri di du yu ogri. Du bun sani na fesi fu ala sma. Efu a kan, so langa a e anga fu unu, abi vrede nanga ala sma.”—Romesma 12:17, 18; luku so srefi 1 Timoteus 6:17-19; Yakobus 2:5, 9.
Fu di den Kotoigi fu Yehovah e hori tranga na den Bijbel gronprakseri disi di meki wanfasi go na fesi, dan den no e frudrage no wan sma na ini a grupu fu den di no e handri trawan a srefi fu di den e luku wan sma ras, en sociaal noso ekonomia situwâsi. Fu eksempre, den sani disi no abi noti fu du nanga a bosroiti di musu teki suma sa kisi grani fu dini na ini a Kresten gemeente. Posisi fu frantiwortu, soleki a gi fu leri noso fu hori ai tapu sani, e gi soso na den wan di abi yeye eigifasi.—1 Timoteus 3:1-13; Titus 1:5-9.
¡Gi aparti sma di pina na ondro na abi di sma no abi den srefi reti na ini wan grontapu di e krutu sani sondro fu sabi fa sani de, dan a e gi kowru-ati efu trawan e handri den leki brada nanga sisa di abi a srefi posisi na fesi Gado! Martina kan taki dati disi de tru. Baka di en papa gowe libi na osofamiri, a ben kisi kweki na ini wan pôti osofamiri pe wán bigisma nomo ben de. Furutron den ben handri en neleki den no ben teki en, a no ben abi frutrow na ini ensrefi, èn a ben feni en wan muilek sani fu feni en nanga tra sma. A ben kweki wan mi-no-ke-fasi. Ma sani ben kenki, baka di a ben bigin studeri Bijbel èn ben tron wan Kotoigi fu Yehovah. A e taki: „Mi musu feti ete nanga negatief denki, ma now mi kan handri a problema moro bun. Mi e respeki misrefi moro, èn mi e taki nanga moro frutrow. A waarheid gi mi wan firi fu frantiwortu. Now mi sabi taki Yehovah lobi mi èn taki a libi warti trutru.”
Leki wan internationaal grupu fu Kresten, dan na ini 230 kondre Kotoigi fu Yehovah e nyan bun fu wan marki fu a handri di den e handri makandra a srefi, èn a sani disi de tumusi aparti na ini a disiten grontapu. ¿Iniwan tra organisâsi kan taki a srefi èn sori nanga buweisi dati den abi leti?
A no de fu taki, dati Kotoigi fu Yehovah e si sani fa den de trutru. Wantewante den e erken taki fu di den e kon fu wan situwâsi di de onvolmaakti, den no kan puru krinkrin a handri di libisma no e handri makandra a srefi, neleki iniwan tra sma di ben pruberi fu du dati na ini den yarihondro di pasa — èn den no ben man du dati. Ma toku, den e prisiri taki na ini den eigi grupu, den du furu fu dwengi a plaag disi di e tyari dede kon. Èn nanga wan tranga bribi na ini a pramisi fu Gado, den e luku go na fesi na wan grontapu fu regtfardikifasi pe na abi di sma no abi den srefi reti, fu ala ten sa de wan sani fu a ten di pasa.
Iya, heri esi ala libisma di e gi yesi sa kon de a srefi baka ini „wartifasi nanga reti” di a Mekiman fu den ben abi na prakseri gi den na ini a bigin. ¡Dati na wan moi prakseri fu tru! ¡Èn a leisi disi a sa kon tru!
[Prenki na tapu bladzijde 7]
Yehovah Kotoigi e feti nanga a man di sma no man leisi èn skrifi fu di den e yepi dusundusun sma fu leisi èn skrifi
[Prenki na tapu bladzijde 8]
Bijbel waarheid e yepi fu puru a krutu di sma e krutu trawan sondro fu sabi fa sani de fu den ras, sociaal nanga ekonomia situwâsi ede