Na Abi Di Sma No Abi den Srefi Reti—¿Gado Ben Abi Dati na Prakseri?

A piki na ini wán wortu na nôno. Meki wi si fu san ede.

GADO ben abi na prakseri taki ala libisma ben musu abi den srefi okasi fu nyan bun fu libi nanga koloku. Wi e leisi fu a kria di Gado ben kria libisma: „Moro fara Gado ben taki: ’Meki wi meki libisma na a prenki fu wi, soleki fa wi de, èn meki den abi den fisi fu se nanga den kriaturu fu hemel di e frei nanga den osometi nanga heri grontapu nanga ala meti di e buweigi na tapu grontapu, na den ondro.’” Di a ben kaba fu kria den sani na grontapu, dan „Gado ben si ala san a ben meki èn, ¡luku! a ben de heri bun.”—Genesis 1:26, 31.

¿Gado kan taki dati a sari situwâsi fu a ten disi pe sma no abi den srefi reti, de „heri bun”? Kwetikweti, fu di „Gado na lobi” (1 Yohanes 4:8). Sma e taki fu en dati a „no e teki partèi gi sma” èn taki den ’wroko [fu en de] volmaakti, bika ala den pasi fu en na retidu. Wan Gado fu getrowfasi, di na en no wan kruktudu de; regtfardiki èn opregti a de’. (Deuteronomium 10:17; 32:4; teki gersi Yob 34:19.) Èn na apostel Petrus ben tapu nanga den wortu: „Now mi sabi seiker taki Gado no e teki sma partèi, ma na ini ibri nâsi a sma di e frede en èn di e du san regtfardiki de bun na en.”—Tori fu den Apostel 10:34, 35.

¿Fu di Gado na wan lobi-ati Gado, di no e teki sma partèi, di de opregti, èn di de regtfardiki, dan fa a ben kan kria libisma nanga a firi fu no handri makandra a srefi ini a tori fu a reti fu den fu abi koloku? A ben sa de wan sani di de kontrari a fasi fa Gado de, efu a ben sa gi pasi meki sma desko makandra èn efu a ben sa poti den na ini wan seti pe den no abi den srefi reti. A ben abi na prakseri taki den alamala ben musu „gebore fri èn abi a srefi wartifasi nanga den srefi reti”. Ma a de krin na ini a ten disi, taki sani no de na a fasi dati. Fu san ede a no de so?

A Rutu fu na Abi Di Sma No Abi den Srefi Reti

Taki Gado ben kria libisma fu de a srefi no wani taki dati a ben wani fu den de a srefi na ala fasi. Den ben kan difrenti na ini den talenti fu den, den sani di den abi belangstelling gi, èn a fasi fa den de leki wan sma. Den kan difrenti tu na ini a posisi di den abi noso na ini omeni makti den abi. Fu eksempre, mansma nanga umasma no de a srefi na ini ala sani, ma Gado ben meki na uma „leki wan fitipisi” fu a man (Genesis 2:18). Papa nanga mama nanga den pikin e difrenti krinkrin na ini a makti di den abi. Ma ala di den difrenti disi de, toku den alamala — mansma, umasma, nanga pikin — ben kisi a reti fu Gado fu abi den srefi okasi fu nyan bun fu den moro prenspari sani di de fanowdu fu de koloku. Den alamala ben musu nyan bun fu a srefi wartifasi èn a srefi posisi na fesi Gado.

Na so a de tu nanga den yeye manpikin fu Gado, di a ben kria fosi a ben kria libisma èn A ben gi den difrenti wroko nanga frantiwortu (Genesis 3:24; 16:7-11; Yesaya 6:6; Yudas 9). Ma toku, na mindri den skotu fu san den ben kisi, den alamala ben man nyan bun fu den sani di Gado ben seti fu libi èn fu de koloku na wan srefi marki. Na so den ben sori na wan tumusi moi fasi taki Gado no e teki sma partèi.

Na wan sari sani fu taki, dati wán fu den yeye kriaturu no ben de tevrede nanga a fasi fa Gado seti sani pe A sori taki A no e teki sma partèi. A ben wani moro leki san Gado ben gi en, èn a ben angri fu kisi wan moro hei posisi. Fu di a ben meki a fowtu lostu disi gro, a ben poti ensrefi fu strei nanga Yehovah, di leki a Kriaman, nanga reti de a moro hei sma. Bakaten, na opruru yeye manpikin disi fu Gado, ben kori libisma fu den aksi Gado moro leki san A ben gi den. (Genesis 3:1-6; teki gersi Yesaya 14:12-14.) So bun, a ben gersi leki a sani di Yehovah ben seti gi libisma fu den ben kan nyan bun fu libi nanga koloku, no ben de ini balansi moro. A yeye opruruman disi, di Openbaring 20:2 e taki fu en leki „Didibri nanga Satan”, ben tron na ogri sma di ben sutu faya fu na abi di libisma no abi den srefi reti.

¿A Situwâsi Sa Kenki Oiti?

¡A piki na ini wán wortu na iya!

¿Ma suma kan tyari den kenki kon di wi wani srefisrefi? Libisma fesiman ben du muiti fu du disi hondrohondro yari langa kaba, èn sondro tweifri wan tu fu den ben de opregti. Den bun bakapisi fu den de pikinso nomo, èn dati meki furu sma kon na a bosroiti taki a no de tru srefisrefi fu fruwakti taki a problema pe sma no abi den srefi reti, sa lusu oiti. Ma a fasi fa Gado e si sani, skrifi na Yesaya 55:10, 11: „Neleki fa na alen, nanga a snew, e saka kon fu hemel èn no e drai go baka na a presi dati, boiti efu trutru a e nati grontapu èn e meki a gi froktu èn e meki a sproiti, èn siri e gi trutru na a saiman èn brede na a sma di e nyan, na so mi wortu di e komoto na mi mofo, sa sori taki a de. A no sa drai kon baka na mi sondro bakapisi, ma seiker a sa du a sani dati di mi abi prisiri na ini, èn fu tru, a sa abi bun bakapisi na ini san mi ben seni en go.”

¡A e trowstu wi trutru fu sabi taki Yehovah Gado ben meki bekènti taki a sa meki a sani di a ben abi na prakseri na ini a bigin kon tru, fu gi ala sma den srefi okasi fu libi nanga koloku! Leki wan Gado fu waarheid, a fruplekti ensrefi fu meki kon tru san a pramisi. Koloku taki a abi a wani nanga a makti fu du disi. Fa a sa du a sani disi?

A piki de na ini a Kownukondre di Yesus Krestes ben leri ala den bakaman fu en fu begi fu dati: „Wi Tata na hemel, . . . Meki yu kownukondre kon. Meki yu wani pasa, soleki na hemel, so tu na grontapu” (Mateus 6:9, 10). Iya, a Kownukondre fu Gado na a sani di Yehovah sa gebroiki fu „broko ala den kownukondre disi [di de now] na pisipisi, èn tyari wan kaba kon na den, èn ensrefi sa tan te ten di no skotu”.—Danièl 2:44.

Na ondro a tiri fu a hemel Kownukondre, wan nyun libisma libimakandra sa opo kon. Na apostel Yohanes ben skrifi fu a tori disi na ini Openbaring, a lasti buku fu Bijbel: „Mi ben si wan nyun hemel èn wan nyun grontapu; bika a fosi hemel èn a fosi grontapu ben pasa gowe” (Openbaring 21:1). Na abi di sma no abi den srefi reti no sa de moro èn so srefi den takru sani di a e tyari — pina, siki, a de di sma de ini don, a desko di sma e desko makandra, èn tra sani di e meki libisma sari.a

Moro leki wan hondro yari langa, Yehovah Kotoigi ben sori sma go na a Kownukondre dati (Mateus 24:14). Nanga yepi fu buku èn fu di densrefi e gi sma yepi, den meki tranga muiti fu yepi sma kisi a sabi fu san Gado abi na prakseri, soleki fa dati skrifi na ini Bijbel. Ma a leriwroko fu den di den e du na heri grontapu, no wawan gi sma howpu fu den kan libi èn abi den srefi reti nanga koloku na ini a ten di e kon, ma a tyari winimarki now tu fu dwengi a plaag fu na abi di sma no abi den srefi reti. Meki wi si fa.

[Futuwortu]

[Prenspari pisi na tapu bladzijde 5]

Gado ben abi na prakseri taki ala libisma ben musu abi den srefi okasi fu libi nanga koloku