¡Meki a Libi fu Yu Waka Bun!
„Koloku fu a sma di no waka na ini a rai fu den godelowsuwan . . . A sa waka bun nanga ala san a e du.”—PSALM 1:1, 3.
1. (a) Fa furu yonguwan na ini grontapu e si na abi fu bun bakapisi? (b) San Bijbel e taki fu wan sma di sani e waka bun nanga en?
BUN bakapisi — san den wortu dati wani taki gi yu? „A moro prenspari marki fu mi na fu meki sani waka bun na ini bisnis”, na so wan yonkuman ben taki. Wan yongu uma ben taki: „A sani di mi wani trutru na fu abi wan koloku osofamiri.” Ma wan tra yongu uma e taki: „Mi wani soso wan moi oso, wan moi oto . . . Mi wani du sani gi misrefi nomo.” A problema na taki moni, osofamiri, noso srefi wan wroko di kan meki wi kon gudu, no de sani di kan gi wi trutru bun bakapisi. Na ini Psalm 1:1-3 wi e leisi: „Koloku fu a sma di no waka na ini a rai fu den godelowsuwan . . . En prisiri de na ini a wet fu Yehovah . . . A sa waka bun nanga ala san a e du.”
2. Pe wi kan feni trutru bun bakapisi, èn san na a wan-enkri fasi fa wi kan kisi en?
2 Dyaso Bijbel e pramisi wan sani di no wan libisma kan gi — ¡trutru bun bakapisi! Ma a no e taki fu wini na moni sei. Bijbel srefi e warskow: „A lobi gi moni na wan rutu fu ala sortu takru sani” (1 Timoteus 6:10). Wi libi sa waka bun trutru te wi e plisi Gado — dati abi na ini tu fu waka na baka a wet fu Yehovah. ¡Disi wawan kan tyari trutru satisfaksi kon gi wi èn kan gi wi trutru koloku! Kande na idea fu de na ondro a wet fu Yehovah èn taki a e taigi wi san wi musu du, no e hari yu. Toku Yesus ben taki: „Koloku fu den sma di sabi den nowtu na yeye fasi” (Mateus 5:3). Awansi yu e frustan disi efu no, Gado ben kria yu nanga nowtu na yeye fasi — èn so srefi wan dipi firi fu kon sabi Gado èn fu frustan san a abi na prakseri. Fu dati ede, yu kan ondrofeni trutru koloku soso te yu e satisferi den nowtu dati èn te yu e waka na baka „a wet fu Yehovah”.
Fu San Ede Wi Abi den Wet fu Yehovah Fanowdu
3. Fu san ede wi musu breiti fu meki Yehovah ’bepaal gi wi pe fu poti wi futu na pasi’?
3 A profeiti Yeremia ben skrifi: „Mi sabi heri bun, o Yehovah, taki a no de na a sma fu grontapu fu a bepaal en pasi. A no de na wan man di e waka srefi fu bepaal pe fu poti en futu na pasi” (Yeremia 10:23). Disi de tru gi ala libisma, yonguwan nanga owruwan. No wawan wi e mankeri koni, ondrofeni, nanga sabi fu poti wi eigi futu na pasi; wi no abi a reti srefi fu du dati. Bijbel e taki na Openbaring 4:11: „Yu, Yehovah, iya wi Gado, warti fu kisi a glori nanga a grani nanga a krakti, bika yu ben kria ala sani, èn fu yu wani ede den ben de èn yu ben kria den.” Leki a Kriaman fu wi, Yehovah na „a fonten fu libi” (Psalm 36:9). Leki a fonten fu libi, a sabi moro bun leki iniwan sma, fa wi musu gebroiki a libi fu wi. Fu dati ede a ben meki wet, no fu puru a prisiri fu wi, ma fu yepi wi fu gi wisrefi wini (Yesaya 48:17). Efu yu e poti a wet fu Gado na wan sei, dan seiker a no sa go bun nanga yu.
4. Fu san ede so furu yonguwan e pori a libi fu den?
4 Fu eksempre, ¿oiti yu aksi yusrefi fu san ede someni yonguwan e pori a libi fu den te den e gebroiki drugs, e libi wan yayo libi, èn e du tra takru sani? Psalm 36:1, 2 e fruklari: „Na a sani di e taki na inisei en ati, e meki a godelowsu sma pasa a wet; no wan frede gi Gado de na fesi den ai fu en. Bika a handri tumusi grati nanga ensrefi na ini en eigi ai, fu kon sabi en fowtu, so taki a no wani si en na ai.” Fu di den no abi wan gosontu „frede gi Gado”, dan furu yonguwan e kori densrefi fu di den e denki taki a no abi no wan takru bakapisi efu den e tyari densrefi na wan fasi di ogri. Ma te fu kaba, den sa ondrofeni a gronprakseri disi di no e kenki: „San wan sma e sai, na dati a sa koti tu; bika a sma di e sai nanga en skin na prakseri, sa koti porifasi fu en skin, ma a sma di e sai nanga a yeye na prakseri, sa koti têgo libi fu a yeye.”—Galasiasma 6:7, 8.
„Teri den Dei”
5, 6. (a) Fu san ede yonguwan musu „teri den dei fu den”, èn san a wani taki fu du dati? (b) San a wani taki fu ’memre wi Bigi Kriaman’?
5 Fa yu kan meki a libi fu yu waka bun èn „koti têgo libi”? Moses ben skrifi: „Den dei srefi fu den yari fu wi, na seibitenti yari; èn aititenti yari, efu a de fu spesrutu krakti ede . . . A musu pasa gowe esi, èn na so wi e frei gowe” (Psalm 90:10). Kande wanwan leisi, noso pikinmoro noiti, yu e denki fu a dede di sma e dede. Te yu e luku en bun, dan furu yonguwan e tyari densrefi na wan fasi neleki den e denki taki no wan sani kan pori den. Ma Moses e meki wi si a sari tru tori taki a libi syatu. Wi no abi a dyaranti srefi taki wi sa libi doro 70 noso 80 yari. „Ten nanga sani di e pasa èn di sma no sabi na fesi”, kan wai puru srefi den wan di yongu èn di gosontu (Preikiman 9:11). Fa yu sa gebroiki a libi dan di yu abi now èn di warti srefisrefi? Moses ben begi: „Sori wi finifini fa fu teri den dei fu wi na so wan fasi taki wi kan kisi wan ati fu koni.”—Psalm 90:12.
6 San a wani taki fu teri den dei fu yu? A no wani taki dati yu musu wani kon sabi nomonomo o langa yu ben sa kan libi. Moses ben begi Yehovah fu leri a pipel fu En fa fu gebroiki den dei di den abi ete, na wan fasi di e gi grani na Yehovah. ¿Yu e teri den dei fu yu libi — èn yu e si ibri dei leki wan warti sani di yu abi fu gebroiki en na so wan fasi taki yu e prèise Gado? Bijbel e gi yongu sma a deki-ati disi: „Puru broko-ede fu yu ati, èn hori rampu farawe fu yu skin; bika yongu yari nanga a bromki fu a libi na soso sani. Memre now yu Bigi Kriaman na ini den dei fu yu yongu yari” (Preikiman 11:10–12:1). Fu memre wi Kriaman wani taki moro leki nomo fu no frigiti taki a de. Di na ogriman ben begi Yesus: „Memre mi te yu kon na ini yu kownukondre”, dan a ben wani taki Yesus ben musu du moro leki fu memre a nen fu en nomo. ¡A ben wani Yesus fu du wan sani, fu opo en baka na dede! (Lukas 23:42; teki gersi Genesis 40:14, 23; Yob 14:13.) Na a srefi fasi, fu memre Yehovah wani taki dati wi musu du wan sani, taki wi musu du sani di e plisi en. Sma kan taki fu yu dati yu e memre Yehovah?
No Dyarusu na Tapu Ogri Sma
7. Fu san ede son yonguwan e frukisi fu frigiti a Kriaman fu den? Gi wan eksempre.
7 Furu yonguwan frukisi fu frigiti Yehovah fu di den feni taki, efu den musu de wan Kotoigi, dan den abi tumusi furu sani di den no mag du. Wan brada na ini Spanyorokondre e memre fa a ben firi leki wan tini: „Grontapu ben hari mi fu di waarheid ben sori leki a ben muilek èn strak. A ben wani taki fu sidon, fu studeri, fu go na den konmakandra, fu weri wan das, èn mi no ben lobi fu du den sani dati.” ¿Yu feni son leisi taki yu e misi wan tu sani te yu e dini Gado? Kande yu sa fruwondru fu sabi taki wan fu de skrifiman fu Bijbel ben abi den srefi sortu firi. Grantangi, opo yu Bijbel èn leisi Psalm 73.
8. Fu san ede Asaf ben „dyarusu na tapu den sma di e meki bigi”?
8 Meki wi ondrosuku wan tu sani fu a psalm disi. Vers 2 nanga 3 e taki: „Fu mi sei, pikinmoro den futu fu mi ben lasi pasi, pikinmoro den futu fu mi ben grati. Bika mi ben kon dyarusu na tapu den sma di e meki bigi, di moro nanga moro mi ben kon si a vrede fu den godelowsu sma.” Soleki fa den tapusei wortu fu a psalm disi e taki, dan Asaf ben skrifi en. A ben de wan pokuman èn wan Leifisma èn a ben libi na ini a ten fu Kownu David (1 Kroniki 25:1, 2; 2 Kroniki 29:30). Ala di a ben abi a moi grani fu dini na ini a tempel fu Gado, toku a ben „kon dyarusu” na tapu den man di ben meki bigi fu a kruktudu di den ben du. A ben gersi leki sani ben go bun nanga den; soleki fa a sori dan den ben nyan bun fu vrede nanga seikerfasi. Fu taki en leti, a gersi di a ben gersi taki den ben abi bun bakapisi ben ’pasa a prakseri fu na ati fu den’ (Vers 5, 7). Den ben sa taki „na wan bigi fasi” fu a mesbroiki di den ben mesbroiki sma, dati wani taki, den ben taki na wan heimemre fasi (Vers 8). ’Den ben sa poti a mofo fu den na ini hemel èn a tongo fu den ben sa waka lontu na grontapu’, èn den no ben sori lespeki gi no wan sma — na hemel noso na grontapu tu.—Vers 9.
9. Fa son Kresten yonguwan na ini a ten disi ben kan kisi den srefi firi leki Asaf?
9 Kande yu kan taki a srefi sani fu den speri fu yu na skoro. Kande yu e yere fa den e meki bigi sondro syen fu den ondrofeni di den abi na seks sei, fu den bradyari fesa fu den, èn fu a gi di den e gi densrefi abra na a gebroiki fu sopi nanga drugs. Te yu e poti a so-kari prisiri libi fu den kontrari a smara pasi di yu musu waka na tapu leki wan Kresten, dan yu ben sa kan kon „dyarusu na tapu den sma di e meki bigi” (Mateus 7:13, 14). Asaf srefi ben doro a momenti pe a ben bari taki: „Fu tru, a de fu soso taki mi krin mi ati èn taki mi e wasi mi anu fu di mi no abi fowtu. Èn heri dei sani ben tanteri mi” (Vers 13, 14). Iya, a ben bigin tweifri na a warti di a warti fu dini Gado èn fu libi wan opregti libi.
10, 11. (a) San ben meki taki Asaf ben kenki a fasi fa a ben denki? (b) Na sortu fasi ogri sma de „na tapu grati gron”? Gi wan eksempre.
10 Ma koloku taki Asaf no ben tan langa na ini a situwâsi disi pe a ben lasi-ati. Heri esi a ben kon frustan taki a gersi di a ben gersi taki den godelowsuwan ben abi vrede, ben de noti moro leki wan bedrigi sani — ¡a ben de vrede gi wan pisi ten nomo! A ben bari taki: „Na tapu grati gron yu poti den. Yu meki den fadon tron wan broko presi. ¡Ke, den kon tron wan sani di e meki sma skreki, na ini wan momenti! ¡Den doro a kaba fu den, nanga skreki sani di kon wantronso den kon na a kaba fu den! (Vers 18, 19) Na wan srefi fasi, furu fu den speri fu yu de „na tapu grati gron”. ¡Te fu kaba, den sa ondrofeni den bakapisi fu a godelowsu fasi fa den e tyari densrefi èn kande dati sa wani taki, dati den sa kisi bere sondro taki den wani dati, taki den sa kisi wan siki fu seks ede, èn srefi taki sma sa poti den na ini strafu-oso noso kiri den! Ma moro takru srefi, den sa pina fu di den drifi komoto na Gado.—Yakobus 4:4.
11 Wan yongu Kotoigi na Spanyorokondre ben si fu ensrefi taki disi tru. Leki wan yonguwan, a ben libi wan dobru libi, èn a ben abi tranga matifasi nanga wan grupu godelowsu yonguwan. Heri esi a ben kon lobi wan fu den — wan yonguwan di ben gebroiki drugs. Ala di ensrefi no ben gebroiki den drugs, a ben bai den gi en. „Mi ben yepi en srefi fu poti a nanai na ini en skin”, a ben erken. Koloku taki a sisa disi ben kisi yepi fu kenki en libi èn ben kon bun baka na yeye fasi. Ma a ben skreki srefisrefi di baka ten a ben yere taki a yonguwan disi di a ben hori nanga en, dede fu di a ben abi SIDA. Iya, neleki fa a psalm singiman ben taki, dan godelowsu sma de „na tapu grati pasi”. Wan tu fu den kande e dede sondro taki den ben fruwakti dati, leki wan bakapisi fu a yayo libi fu den. Èn efu den trawan no e kenki den pasi, dan heri esi den sa kisi fu du nanga ’a tyari kon na krin na hemel fu wi Masra Yesus makandra nanga den makti engel fu en na ini wan tranga faya, te a e teki refensi tapu den wan di no sabi Gado èn tapu den wan di no e gi yesi na a bun nyunsu fu wi Masra Yesus’.—2 Tesalonikasma 1:7, 8.
12. Fa wan yonguwan na Yapan ben kon si a donfasi fu dyarusu na tapu ogri sma?
12 ¡A ben sa de wan don sani srefisrefi dan fu dyarusu na tapu „den wan di no sabi Gado”! Fu tru, wi musu dyarusu na tapu den wan di sabi Yehovah èn di abi a howpu fu libi fu têgo. Wan yongu brada na Yapan ben frustan dati. Leki wan yonguwan, en so srefi ben „wani moro fri”. A e taki: „Mi ben denki taki mi ben misi wan sani. Dan mi kon frustan fa mi libi ben o de sondro a waarheid. Mi ben kan si misrefi e libi 70 noso 80 yari èn dede baka dati. ¡Ma Yehovah e gi wi a howpu fu libi fu têgo! Di mi kon frustan disi, a yepi mi fu warderi san mi ben abi trutru.” Ma toku, a no makriki srefisrefi fu tan getrow te wi abi sma na wi lontu di no e waka na baka den wet fu Gado. San na wan tu sani di yu kan du fu kakafutu gi a druk dati?
¡Luku Bun Nanga Suma Yu Abi Demakandra!
13, 14. Fu san ede a de prenspari fu luku bun nanga suma wi abi demakandra?
13 Meki wi luku ete wan tron a takimakandra fu a man di sani e waka bun nanga en, èn di Psalm 1:1-3 e taki fu en: „Koloku fu a sma di no waka na ini a rai fu den godelowsuwan, èn na ini a pasi fu sondari a no tanapu, èn na ini a sturu fu den spotuman a no sidon. Ma en prisiri de na ini a wet fu Yehovah, èn na ini en wet a e leisi nanga wan safri sten dei nanga neti. Èn fu tru a sa tron leki wan bon di prani na libawatra, di e gi en eigi froktu te en ten doro èn den wiwiri fu en no e kon flaw, èn a sa waka bun nanga ala san a e du.”
14 Na a fosi presi, den sma di yu abi leki kompe, e prei wan bigi rol. Odo 13:20 e taki: „A sma di e waka nanga koni sma, sa kon koni, ma a sma di abi fu du nanga den wan sondro frustan, a no sa go bun nanga en.” Disi no wani taki dati yu no musu abi sari-ati, taki yu no musu abi switifasi, noso taki yu musu de grofu ini a fasi fa yu e handri den yonguwan di no de Kotoigi fu Yehovah. Bijbel e gi wi tranga fu lobi a sma na wi sei èn fu „abi vrede nanga ala sma” (Romesma 12:18; Mateus 22:39). Ma kande yu sa go „waka na ini a rai” fu den wan di no e waka na baka Bijbel markitiki, te yu abi tumusi krosibei demakandra nanga den yonguwan disi.
Den Winimarki fu Leisi Bijbel
15. Fa yonguwan kan kweki wan angri fu leisi Bijbel?
15 A psalm singiman ben si tu taki a man di sani e waka bun nanga en, e prisiri fu leisi a wet fu Gado „nanga wan safri sten dei nanga neti” (Psalm 1:1, 2). A tru taki Bijbel no makriki fu leisi, èn a abi ’wan tu sani na ini di muilek fu frustan’ (2 Petrus 3:16). Ma a leisi di wi e leisi Bijbel no abi fu de soi. Wi kan „kweki wan angri gi a soifri merki” fu a Wortu fu Gado (1 Petrus 2:2). Pruberi fu leisi pikinso nomo ibri dei. Efu penti de di yu no e frustan, dan go ondrosuku sani pikinso. Baka dati, go prakseri fu san yu leisi (Psalm 77:11, 12). Efu yu abi muiti fu poti yu prakseri na sani, dan pruberi fu opo yu sten fu leisi „nanga wan safri sten”. Baka wan pisi ten, yu kan de seiker taki a lobi di yu lobi fu leisi Bijbel, sa gro. Wan yongu sisa na Brasyonkondre e memre: „Ala ten a ben gersi leki Yehovah ben de farawe fu mi. Ma wan tu mun now mi meki mi persoonlijk studie nanga a leisi di mi e leisi Bijbel, kon de moro betre. Now mi feni taki mi matifasi nanga Yehovah de moro tranga. A de wan moro trutru sma gi mi.”
16. Fa wi kan kisi moro leri fu den gemeente konmakandra?
16 A de prenspari tu fu fisiti gemeente konmakandra efu yu wani gro na yeye fasi. Efu yu e ’poti prakseri na a fasi fa yu e arki’, dan yu kan kisi furu deki-ati (Lukas 8:18). Yu feni sontron taki den konmakandra no e hari yu prakseri? We, aksi yusrefi: ’San mi e du so taki mi kan lobi den konmakandra moro? ¿Mi e arki bun? ¿Mi e sreka misrefi? ¿Mi e gi piki?’ Fu taki en leti, Bijbel e taigi wi fu „poti ai na makandra fu gi makandra deki-ati fu sori lobi èn du bun wroko, . . . fu gi makandra deki-ati” (Hebrewsma 10:24, 25). ¡Fu du disi yu musu abi wan prati! A no de fu taki, efu yu wani abi wan prati, dan yu musu studeri na fesi. Wan yongu sisa e erken: „A trutru de moro makriki fu abi wan prati na den konmakandra te yu e sreka yusrefi.”
Te Wi E Waka a Pasi fu Gado, dan Wi E Kisi Bun Bakapisi
17. Fa wan fayafaya leisiman fu Bijbel de „leki wan bon di prani na libawatra”?
17 A psalm singiman e go doro fu taki fu a man di sani e waka bun nanga en èn a e taki dati a de „leki wan bon di prani na libawatra”. Kande den libawatra ben sori go na gotro pe watra ben lon fu nati den bon na ini den froktu dyari (Yesaya 44:4). A leisi di wi e leisi Bijbel ibri dei de neleki wi fasi na so wan fonten di ala ten e gi wi deki-ati nanga kowru-ati (Yeremia 17:8). Ibri dei yu sa kisi a krakti di yu abi fanowdu fu man horidoro na ondro tesi nanga problema. Fu di yu leri fa Yehovah e denki, dan yu sa abi a koni di yu abi fanowdu fu teki bun bosroiti.
18. San kan meki taki sani seiker sa waka bun nanga wan yongu sma te a e dini Yehovah?
18 Son leisi a kan gersi wan muilek sani fu dini Yehovah. Ma noiti yu musu denki taki a de tumusi muilek gi yu (Deuteronomium 30:11). Bijbel e pramisi yu taki te fu kaba, ’a sa waka bun nanga ala san yu e du’, ¡so langa leki a moro prenspari marki fu yu de fu plisi Yehovah èn fu prisiri en ati! (Odo 27:11) Èn memre, taki yu no de yu wawan. Yehovah nanga Yesus Krestes e horibaka gi yu (Mateus 28:20; Hebrewsma 13:5). Den sabi sortu druk e miti yu, èn noiti den sa libi yu (Psalm 55:22). A „heri brada libimakandra” èn yu papa nanga mama, efu den de sma di abi frede gi Gado, e horibaka gi yu (1 Petrus 2:17). ¡Nanga so wan yepi makandra nanga a fasti bosroiti di yu abi èn a muiti di yu e meki, dan yu libi sa waka bun, no wawan na ini a ten disi, ma fu têgo!
Aksi fu Luku Sani Syatu Baka
◻ San na trutru bun bakapisi?
◻ Fu san ede wi abi Yehovah fanowdu fu bepaal gi wi pe fu poti wi futu na pasi?
◻ Fa yonguwan kan „teri den dei fu den”?
◻ Fu san ede a de wan don sani fu dyarusu na tapu ogri sma?
◻ Fa a leisi fu Bijbel ibri dei èn a go di den e go na den konmakandra doronomo kan yepi yonguwan fu meki a libi fu den waka bun?
[Prenki na tapu bladzijde 20]
Fu di den no abi wan gosontu „frede gi Gado”, meki furu yonguwan e tyari densrefi na wan fasi di e tyari pori kon
[Prenki na tapu bladzijde 22]
Yonguwan e frigiti furutron taki a fasi fa den e handri sa abi bun noso takru bakapisi
[Prenki na tapu bladzijde 23]
Kweki wan lobi gi a leisi fu Bijbel
[Prenki na tapu bladzijde 23]
Yu sa lobi den konmakandra moro efu yu abi wan prati na den